1 Samuel 12:22 - Chayahuita (Shahui)

²² Sinioronënpoasoꞌ Yosë chachin. Inaora nohuanton israiroꞌsanpoa huayoninpoaꞌ. Inasoꞌ, nani shaꞌhuitërinpoa aꞌpainpoasoꞌ. Co inasoꞌ aꞌpoarinpoahuëꞌ. Yaꞌipi shaꞌhuitërinpoasoꞌ acotarinpoaꞌ. Yaꞌipi isoroꞌpaquë yaꞌhuëpisopita noya nicatonaꞌ: “Ma noyacha inaso paya,” taꞌcaiso marëꞌ napotarinpoaꞌ.

1 Samuel 12:22 ပူးပေါင်းရင်းမြစ်များ

1 Reyes 6:13

Canpita yaꞌhuëramaso huáncana yaꞌhuëato, catahuaráponquëmaꞌ. Co onporonta pataranquëmahuëꞌ. Iso pëiquë nontohuatamaco, natanaranquëmaꞌ,” itërin.

1 Reyes 8:57

Sinioronënpoasoꞌ Yosë niꞌton, catahuainpoaꞌ. Shimashonënpoapita catahuarinso pochachin nichinpoaꞌ. Ama naniantatonpoarahuëꞌ, natëtochináchin cancantacaso marëꞌ catahuainpoaꞌ. Maꞌpitaso ninëhuaquë nohuantërinsoráchin nicatëhua pënëntërinsoꞌ natëahuaꞌ. Nohuantërinsopita, camaitërinsopita, inapitanta natëahuaꞌ. Yaꞌipi inapita natëcaiso marëꞌ shimashonënpoapita camairin.

Nehemías 9:17

Quëmarisoꞌ naꞌcon catahuapiranhuëꞌ, co ina yayonquipihuëꞌ. Co natëtënënhuëꞌ Iquipitoquë chachin panantacaisoꞌ yonquiantapi. Ina marëꞌ huaꞌan yonípi. Iquipitoroꞌsari camaiantacaiso marëꞌ yatahuërëantapi. Napopirinahuë tërantaꞌ, co ataꞌhuantëranhuëꞌ. Noyápiachin cancantaton, aꞌnaroáchin yanosorotëran. Co aꞌnaroáchin noꞌhuitëranhuëꞌ. Piyapinënpita nosoromiatëran niꞌton, co aꞌporanhuëꞌ.

Éxodo 32:12

Inapita ataꞌhuantohuatan, iquipitoroꞌsa pinosarinquën: “Yosëso israiroꞌsa co quëꞌyarinhuëꞌ. Napoaton motopiroꞌsa parti ataꞌhuantacaso marëꞌ, isëran ocoirin, tosapi. Ina niꞌton, ahuantëquëꞌ. Ama inapita maꞌsha onpotëquësohuëꞌ.

Isaías 41:17

Popriroꞌsaꞌ, sano piyapiroꞌsaꞌ, inapitaso iꞌsha yonípirinahuëꞌ, co quënanpihuëꞌ. Paꞌpi yamorotonaꞌ, yaniconopirapi. Napopirinahuëꞌ, ca Sinioroco niꞌto, catahuarahuë. Ca Yosënëmaco niꞌto, inapitanta co aꞌpoapohuëꞌ.

Isaías 42:16

Somarayaroꞌsanta ira co nohuitopisohuëꞌ, quëpatarahuë. Inapita marëꞌ tashinantërinsoꞌ, tahuëriya pochin atarantarahuë. Naꞌpiro iraroꞌsantaꞌ, siminto ira pochin atarantarahuë. Onpopionta inapochin acotarahuë.

Isaías 43:25

Inapopiramahuëꞌ, Yosënëmaco niꞌto, paꞌpi co noyahuëꞌ ninamasopita, inquitaranquëmaꞌ. Co yanatëtatomahuëꞌ anoꞌhuitopiramacohuëꞌ, co huachi inapita yonquiarahuëꞌ.

Isaías 43:7

Inapitasoꞌ ca pochachin ninintopi. Cari chachin inapitaso acorahuë. Catahuarahuëso nicatonaꞌ, yaꞌipiya quëran paꞌyatiinacoso marëꞌ acorahuë.

Isaías 63:8

Inapita yonquiaton Sinioro tënin: “Inapitasoꞌ piyapinëhuëpita. Co onporonta nonpintarinacohuëꞌ,” tënin. Napoaton maꞌsha onpotohuachinara, inaora chachin maꞌsha onpotapiso pochin ninatanin. Ina pochin cancantaton nichaꞌësarin. Co aꞌna aꞌpaton nichaꞌësarinhuëꞌ. Inaora chachin paꞌsahuaton nichaꞌësarin. Nosoromiataton inapotarin. Opatëahuatë iporëso pochin nitarin. Iráca quëran huarëꞌ napotërinsoꞌ, inachachin nisárin.

Jeremías 14:21

Quëmaso noyanquën. Naporanso nitotacaiso marëꞌ, ama aꞌpocoisohuëꞌ. Huaꞌanëntëranso shiranën huënaráchin huënaráchin Quirosarin ninanoquë yaꞌhuërin. Ina yonquiaton iso ninanosoꞌ nosoroquëꞌ. Iráca quiyarëꞌquën anoyatëran. Ama ina naniantaton, nonpinatë pochin niquësohuëꞌ.

Jeremías 14:7

Sinioro tëhuënchachin quiyasoꞌ oshahuancoi niꞌton, co catahuancoiso inashitëraihuëꞌ. Napopiraihuëꞌ, noyanquën ninanso nitotacaiso marëꞌ catahuacoi. Nisha nisha cancantatoi naꞌaro tëhuëtërainquën. Inapoatoi naꞌcon oshahuanai.

Jeremías 14:9

Catahuancoiso marëꞌ co manta ninanhuëꞌ niꞌton, quëmapi huaꞌyantërinso pochin yaꞌnoran. Ahuëtonaꞌpisoꞌ, noya paꞌpoyatërin. ¡Quëmaso nipirinhuëꞌ, co nanitërinsohuë pochin niconan! Quëmaso Sinioro napoaponahuëꞌ, yaꞌhuëraiso huáncana nisaran. Piyapinënpitacoi ninaisoꞌ, yaꞌipiya quëran nitotopi. Ama patocoisohuëꞌ, itërahuë.

Malaquías 1:2

Sinioro chachin naporin: “Iráca quëran huarëꞌ nosororanquëmaꞌ,” itërinquëmaꞌ. Canpitaso napoaponahuëꞌ, co yayonquiramahuëꞌ. Inapoatomaꞌ: “¿Onporahuatonta nosororincoisoꞌ?” toconamaꞌ. Napohuatamara: “Coꞌta tëhuënchachin nosoroatënquëma catahuaranquëmaꞌ. Shimashonëma Cacoposoꞌ, Isaorë ina yoꞌnanquëranchin pipipi. Shimashonëmaso napoaponahuëꞌ, huayonato naꞌcon naꞌcon nosororahuë. Napoaton canpitantaꞌ, huayonatënquëma nosororanquëmaꞌ. Isaoso nipirinhuëꞌ, co huayonatohuëꞌ, co onpopinchin nosororahuëꞌ. Napoaton shinpitanta co huayonatohuëꞌ, co onpopinchin catahuarahuëꞌ. Isao noꞌpaꞌ quëtërahuësosoꞌ, tanan motopiroꞌsa nipirinhuëꞌ, ca nohuanton tomaroꞌtë motopiroꞌsa quëparitërin. Noyaroꞌpaꞌ huaꞌanëntopirinhuëꞌ, tomaroꞌtë motopiroꞌsaquë maꞌsha yaꞌhuërinsopitaráchin yaꞌhuërin huachi.

Mateo 11:26

Quëmaora nohuanton Tata naporan,” itërin.

Juan 15:16

Co canpitaora nohuanton imaramacohuëꞌ. Ca nohuanto, imaramaco. Carinquëmaꞌ huayonanquëmaꞌ. Nani acoranquëma opa sëꞌpaquën naꞌcon nitërinso pochin nisápamaso marëꞌ. Inapohuatamaꞌ: ‘Quisoso nanan quëtërinco,’ taꞌtomaꞌ, Yosë nontocoꞌ catahuainquëmaꞌ. Ca pochin yonquiatomaꞌ, maꞌsona nipatamaꞌ, acochinquëmaꞌ.

Romanos 11:1

Napoaton natananquëmaꞌ: ¿Israiroꞌsaꞌ co natëtopiso marëhuëꞌ Yosëri aꞌpomiatërin ti? Co aꞌporinhuëꞌ. Ipora huantaꞌ piyapinënpita niꞌton, nosororin. Cantaꞌ Israiro piyapico. Tata Apraansoꞌ shimashonëhuë. Mincamin huëntonquë nasitërahuë.

Romanos 11:29

Nani Yosëri shaꞌhuitohuachin, inachachin nisarin. Co onporontaꞌ nisha nontarinhuëꞌ. Huëntonënquë ayaꞌconpachin, co onporontaꞌ naniantarinhuëꞌ.

1 Corintios 4:7

Yosë nohuanton, nisha nisha nitotërëhuaꞌ. Co canpoara nohuanton, nitotërëhuahuëꞌ. Yosëíchin catahuarinpoaꞌ noya noya nicacasoꞌ. Co catahuarinpoahuëꞌ naporini, co mantaꞌ nitochitërihuahuëꞌ. Napoaton co nocantacasoꞌ yaꞌhuërinhuëꞌ.

Efesios 1:12

Quiyaꞌton imarai. “Quisocristo nichaꞌësarinpoaꞌ,” taꞌtoi imarai. Noya imapatoi, aꞌnapitantaꞌ nicatonacoi, Yosë yonquiapi inahuantaꞌ: “Ma noyacha Tata Yosëso paya,” tosapi. Ina taꞌcaiso marëꞌ acorincoi.

Efesios 1:6

Huiꞌnin naꞌcon nosororin. Ina imapatëhuaꞌ, canpoantaꞌ naꞌcon nosoroarinpoaꞌ. Ina yonquiatëhuaꞌ, “Ma noyacha Tata Yosësoꞌ niꞌton, inaora nohuanton, nosororinpoa paya,” tosarëhuaꞌ.

Deuteronomio 31:17

Napoaponahuëꞌ, inapopiso marëꞌ carinta chiníquën noꞌhuito tananpitarahuë. Manta tëranta yaꞌhuëpachinantaꞌ, co huachi inapita yonquiarahuëꞌ. Paꞌpi parisitatona naporo huarëꞌ: ‘Tëhuënchachin Sinioro aꞌporinpoa niꞌton, poꞌsarëhuaꞌ,’ tëcaponaꞌ.

Deuteronomio 31:6

Ama tëꞌhuatoma nisha nisha cancantocosohuëꞌ. Inapitarëꞌquëma niahuëhuatamaꞌ, ama manta paꞌyancosohuëꞌ. Sinioronënpoasoꞌ Yosë niꞌton, catahuararinquëmaꞌ. Co onporonta patarinquëmahuëꞌ. Co naniantarinquëmahuëꞌ,” itërin Moisësëri.

Deuteronomio 31:8

Sinioro chachin quëchintaton noꞌtëquën quëpaarinquën. Co onporonta patarinquënhuëꞌ. Co naniantarinquënhuëꞌ. Napoaton ama manta tëꞌhuatëquësohuëꞌ,” itërin Moisësëri.

Deuteronomio 7:6

Canpitaso nipirinhuëꞌ, Sinioroíchin chinotamaso marëꞌ nani acorinquëmaꞌ. Naꞌa nacionoꞌsa isoroꞌpaquë yaꞌhuëpirinhuëꞌ, canpitasoꞌ, ina piyapinënpita nicamaso marëꞌ huayoninquëmaꞌ,” itërin Moisësëri.

Deuteronomio 9:5

Tëhuënchachin co canpita noya ninamaso marëꞌ, inapita noꞌpanëna masaramahuëꞌ. Inapita co noyahuëꞌ nipiso marëꞌ, aꞌpararin. Naporahuaton, shimashonëmapita: Apraan, Isaco, Cacopo, inapita shaꞌhuitërinsoꞌ yonquiaton inapotarin.

Filipenses 1:6

“Quisocristo imasarahuë huachi,” topatamaꞌ, naporo tahuëri chachin Yosë anoyacancantërinquëmaꞌ. Co naniantarinquëmahuëꞌ, tënahuë. Ipora huantaꞌ catahuarinquëmaꞌ noya noya nicacamaso marëꞌ. Quisocristo oꞌmantaquë huarëꞌ catahuarinquëmaꞌ. Naporoꞌ Quisocristo pochachin cancantaramaꞌ.

Hebreos 13:5

Ama coriquiráchin paꞌyatocosohuëꞌ. Co naꞌcon maꞌsha yaꞌhuëtopirinquëmahuëꞌ, sano cancantocoꞌ. Ama naꞌcon naꞌcon nohuantocosohuëꞌ. Yosë chachin nani shaꞌhuitërinpoaꞌ. “Co onporontaꞌ pataranquëmahuëꞌ. Co naniantaranquëmahuëꞌ,” itërinpoaꞌ.

1 Pedro 2:9

Imarëhuasopitaso nipirinhuëꞌ nohuantërinpoaꞌ. Huayoninpoaꞌ ina nohuitacaso marëꞌ. Inasáchin huaꞌanëntërinpoaꞌ. Nani acorinpoaꞌ corto huaꞌanoꞌsa pochin nicatëhuaꞌ, ina marëꞌ sacatacasoꞌ. Noyápiachin cancan quëtërinpoaꞌ. Yosë piyapinënpoaꞌ ninëhuaꞌ. Iráca tashi pochin cancantopirëhuahuëꞌ, Yosë nichaꞌërinpoaꞌ tahuëri pochin cancantacaso marëꞌ. Acorinpoaꞌ Yosë noya nosororinpoasoꞌ shaꞌhuicaso marëꞌ.