1 Reyes 22:8 - Chayahuita (Shahui)

⁸ —Yaꞌhuërin mini aꞌnara. Inasoꞌ, Imiro huiꞌnin Micaiasë itopisoꞌ. Cariso napoaporahuëꞌ, co quëꞌyarahuëꞌ. Maꞌsha onpocaꞌhuasoráchin shaꞌhuitërinco niꞌton, naporahuë, tënin Acapo. Napopirinhuëꞌ: —Ama napoquësohuëꞌ, itërin Cosahuatori.

1 Reyes 22:8 ပူးပေါင်းရင်းမြစ်များ

Génesis 37:8

Napohuachina, inapitari itapon: —Huaꞌan yaꞌconpato iyahuëpita camaiyápo ¿tocomaranquën ti? ¡Catoroꞌ quëma camaiyáponcoi! itopi. Huaꞌnarinso marëpita naꞌcon naꞌcon noꞌhuipi. Shaꞌhuihuachina, co yainhuëꞌ natanpi.

1 Reyes 19:10

“Quëmaso Sinioro Yosënquën, yaꞌipi nanitaparan. Napoaton paꞌpi aꞌpitëranquën. Israiroꞌsarëꞌquën anoyatëranso aꞌpopi. Artaronënpitantaꞌ, ohuatopi. Quëma marëꞌ pënëntopisopitantaꞌ, sahuëniquë tëpapi. Casáchin nipirinhuëꞌ, tëpainacoso marëꞌ yonisarinaco,” itërin Iniasëri.

1 Reyes 19:14

Napotohuachina: “Quëmasoꞌ Sinioro Yosënquën, yaꞌipi nanitaparan. Napoaton paꞌpi aꞌpitëranquën. Israiroꞌsarëꞌquën anoyatëranso aꞌpopi. Artaronënpitantaꞌ, ohuatopi. Quëma marëꞌ pënëntopisopitantaꞌ, sahuëniquë tëpapi. Casáchin quëparitopirahuë, tëpainacoso marëꞌ yonisarinaco,” itërin.

1 Reyes 21:20

Napotohuachina, paꞌsahuaton Siniorori napotërinsoꞌ Acapo shaꞌhuitonin. Napotohuachina Acapori itapon: —¡Quëmasoꞌ inimiconëhuënquën nipiranhuëꞌ, niquënanëchi paya! itërin. Napotohuachina Inari itapon: —Co Sinioro costarinsohuëráchin ninanso marëꞌ niquënanëꞌ.

1 Reyes 22:13

Micaiasë macapon paꞌninsoꞌ huaꞌani, quënanconahuaton itapon: “Naní quëran aꞌnapita pënëntonaꞌpiroꞌsasoꞌ, copirno nohuantërinso chachin shaꞌhuitapi. Napoaton quëmantaꞌ, inapita pochachin shaꞌhuiquë topirahuëꞌ,” itërin.

1 Reyes 22:18

Naporoꞌ Acaposoꞌ, Cosahuato itapon: —¡Niꞌnina huachi! ¡Napotëranquënso chachin maꞌsha onpocaꞌhuasoꞌ shaꞌhuitarinco! itërin.

1 Reyes 22:27

Inapitaquë quëparahuatomaꞌ, shaꞌhuitoco tashinanpëiquëchinaꞌ. Naporahuaton piꞌpian piꞌpian aꞌcainaꞌ, oꞌshichinaꞌ, napochinaꞌ. Siria sontaroꞌsa minsëato huënantaꞌhuarëꞌ, inapochinaꞌ, itërin.

1 Reyes 22:9

Naporoꞌ Acaposoꞌ, aꞌnara huaꞌan camairin: —Aꞌnaroáchin Micaiasë quëquëꞌ, itërin.

Salmos 34:21

Co noyahuëꞌ nipisopitaso nipirinhuëꞌ, co noyahuëꞌ nipisoari chachin tëpapon. Noya nipisopita co quëꞌyahuachinarahuëꞌ, anaꞌintacaso yaꞌhuërin.

Isaías 30:10

Ninotona quënanaꞌpiroꞌsa shaꞌhuitatomaꞌ: ‘Ama huaꞌnarëso pochin quënanatoma pënëncoisohuëꞌ,’ itonamaꞌ. Pënëntonaꞌpiroꞌsantaꞌ: ‘Ama Sinioro noꞌtëquën anitotërinquëmasopita, shaꞌhuitocoisohuëꞌ. Costaraisopita tëhuënchinsoꞌ, shaꞌhuitocoi. “Noya yaꞌhuëapoi,” taꞌtoi huëꞌërai pochin cancantëraisoꞌ, ama quëma huëꞌsahuaton ochinanatë pochin nitocoisohuëꞌ. Yaꞌhuincananpicoi quiyanta nohuantëraisoꞌ nisaꞌi. Sinioro natëramasoꞌ, aꞌpoco huachi. Co huachi nohuantëraihuëꞌ, Sinioro naporinso natanaꞌhuaisoꞌ. Inasoꞌ, noyasáchin ninin. Israirori chinotërin,’ toconamaꞌ. Napoaton inaso shaꞌhuitarinquëmaꞌ: ‘Canpitaso shaꞌhuitëranquëmasopita nocanatomaꞌ, ahuëtonoꞌsaꞌ, co noyahuëꞌ piyapiꞌsaꞌ, inapita catahuaimaso marëꞌ yoniramaꞌ.

Isaías 49:7

Siniorosoꞌ nichaꞌëtonaꞌpi. Siniorosoꞌ noyasáchin ninin niꞌton, Israirori chinotërin. Ina chachin piyapinën nontaton: “Quëmasoꞌ nisha piyapiꞌsa nocamiatarinquën. Nisha nisha piyapiꞌsa noꞌhuiarinquën. Noꞌhuitërayaroꞌsa huaꞌanëntatënquën asacatarinquën. Inapotopirinënquënhuëꞌ, copirnoroꞌsaꞌ, huaꞌanoꞌsa inapita niꞌsarinënquën. Noya nicatënënquën huaniponaꞌ. Huanipi quëran moshapënën. Caso Sinioroco. Noyasáchin ninahuë niꞌton, Israiro chinotërinco. Carinquën huayonanquën. Napoaton shaꞌhuitëranquënsopita ananiarahuë,” itërin.

Jeremías 18:18

Aꞌna tahuëri piyapiꞌsa chinotatonaco: “Huëco paꞌahua Irimiasë tëpacaiso marëꞌ shaꞌhuirapiaꞌhuaꞌ. Ama manta naporinso natëahuasohuëꞌ. Corto huaꞌanoꞌsa Yosë nanamën aꞌchintiinpoasoꞌ, co pahuanaponhuëꞌ. Yonquinahuanoꞌsanta pënënainpoasoꞌ, yaꞌhuëapon. Pënëntonaꞌpiroꞌsanta Yosë naporinsoꞌ anitotiinpoasoꞌ, yaꞌhuëapon,” topi.

Jeremías 20:10

Naní quëran pochin tëhuatonaco: “Yaꞌipi parti paꞌyan yaꞌhuërin” itoninaco. Naporahuaton: “Huëco paꞌahua shaꞌhuirapiahuaꞌ,” tosápi. Amiconëhuëpita quëran huarëꞌ tëhuëcaꞌhuaso ninapi. Monatonaco yacanarinaco. “Canarëhua naporini, iꞌhuërëchitërihuahuëꞌ,” topi.

Jeremías 36:23

Ioti carahuë nipon, catapini panshinhuë nipon nontohuachina, copirnori cosoroaꞌhuaquë yashararin. Inapotahuaton pënquë aꞌpërin. Inapotochináchin yaꞌipi soꞌnanpi quirica tiquiaquë huarëꞌ nitërin.

Jeremías 38:4

Inapita huaꞌanoꞌsasoꞌ, copirno nontapona paꞌpi: —Irimiasësoꞌ, yaꞌipi sontaroꞌsa iso ninanoquë yaꞌhuëpiso pënënaton aꞌpayanin. Yaꞌhuëhuanoꞌsanta inapotërin. Inaso co yacatahuarinpoahuëꞌ. Canainënpoaso nohuantaton napoarin niꞌton, chiminacaso yaꞌhuërin, itoonpi.

Amós 5:10

Aꞌnaquën coisëroꞌsa noꞌtëquën shaꞌhuipi. Canpitariso napoaponahuëꞌ, co quëꞌyaramahuëꞌ. Quënaninsoꞌ noꞌtëquën shaꞌhuinaꞌpiroꞌsantaꞌ, co quëꞌyaramahuëꞌ. Ina marëꞌ canpitasoꞌ, ¡maꞌhuantacha nisarama paya!

Miqueas 2:11

Nonpi nanan shaꞌhuitonaꞌ: ‘Naꞌcon huino yaꞌhuëapon. Nisha nisha oꞌoi yaꞌhuëhuachin, oꞌotoma noꞌpirápomaꞌ,’ topisopita tëhuënchinsoꞌ, canpitaso paꞌyatëramaꞌ,” itërin.

Miqueas 2:7

Canpoasoꞌ noya piyapinpoa ninëhuaꞌ. Co Yosë noꞌhuiarinpoahuëꞌ. Nosorinpoa niꞌton, co anaꞌintiinpoaso yaꞌhuërinhuëꞌ. Tëhuënchachin naporaiso pochin Yosëso ninin. Noꞌtëquënáchin ina imapatëhuaꞌ, shaꞌhuitërinpoasopita noya catahuarinpoaꞌ,” itërinaco.

Mateo 10:22

Imaramaco niꞌton, naꞌa piyapiꞌsaꞌ noꞌhuiarinënquëmaꞌ. Nipirinhuëꞌ, co aꞌpohuatamacohuëꞌ, nichaꞌësaranquëma huachi.

Juan 17:14

Quëma nanamën chachin nani aꞌchintërahuë. Co imarinacosopitarihuëꞌ noꞌhuipi. Co inapita pochin cancantopihuëꞌ niꞌton, noꞌhuipi. Cantaꞌ co inapita pochin cancantërahuëꞌ.

Juan 7:7

Canpitasoꞌ piyapiꞌsaꞌ co noꞌhuirinënquëmahuëꞌ. Caso nipirinhuëꞌ noꞌhuirinaco. “Co noyahuëꞌ ninamaꞌ,” itërahuëso marëꞌ noꞌhuirinaco.

Gálatas 4:16

Noꞌtëquën pënënanquëmaꞌ niꞌton, ¿noꞌhuiramaco ti?