1 Reyes 21:25 - Chayahuita (Shahui)

²⁵ (Co aꞌna tëranta Acapo copirno pochin yaꞌhuërinhuëꞌ. Inasoꞌ, yaꞌipiya quëran nápo naponin ninin. Saꞌini camairin niꞌton, co Sinioro nohuantërinsohuëꞌ, nisárin.

1 Reyes 21:25 ပူးပေါင်းရင်းမြစ်များ

1 Reyes 18:18

—Quëma tëhuëchinsoꞌ piyapinënpitarëꞌquën chachin Sinioro camaitërinso aꞌporan. Ina aꞌporahuatoma nisha nisha mamanshiroꞌsa Paaro nonanpisoꞌ mosharamaꞌ. Ina naꞌintërinquëma parisitaramaꞌ.

1 Reyes 19:2

Ina natanahuaton Quisapirasoꞌ, Iniasë shaꞌhuitacaso marëꞌ aꞌnara comision aꞌparin: “Naporin Quisapira: ‘Quëmasoꞌ Paaro marëꞌ pënëntonaꞌpiroꞌsa acorahuësoꞌ, atëpatëran. Napoaton carionta atëpataꞌhuanquënso yaꞌhuërin. Tashiraya ipora pochin atëpatëransopita pochin nitaranquën. Coꞌsoꞌ inapotohuatënquënhuëꞌ, mamanshiroꞌsa chiníquën anaꞌinchinaco,’ tënin,” itërin.

1 Reyes 21:20

Napotohuachina, paꞌsahuaton Siniorori napotërinsoꞌ Acapo shaꞌhuitonin. Napotohuachina Acapori itapon: —¡Quëmasoꞌ inimiconëhuënquën nipiranhuëꞌ, niquënanëchi paya! itërin. Napotohuachina Inari itapon: —Co Sinioro costarinsohuëráchin ninanso marëꞌ niquënanëꞌ.

1 Reyes 21:7

—¿Macairata huaꞌanquënsoꞌ? Ama ina marëꞌ sëtatonhuëꞌ, coshatëquëꞌ. ¡Carinquën quëtaranquën Napoto oparonën! itërin saꞌini.

2 Reyes 23:25

Cosiasëráchin ina pochin Sinioro imaton, yaꞌipi cancanën quëran, yaꞌipi huaꞌyanën quëran, yaꞌipi chinirin quëran Sinioroíchin natërin. Moisësë pënëntërinso chachin natërin. Co inso copirno tërantaꞌ, inapochin iráca quëran huarëꞌ natërinhuëꞌ. Ina piquërantaꞌ, co huachi aꞌna ina pochin yaꞌhuëantarinhuëꞌ.

Éxodo 34:16

Niꞌcona huiꞌnina canpita huiꞌnama acoantohuachinaꞌ. Inapohuachinsoꞌ, inahuaso mamanshinëna moshasoiꞌ, huiꞌnamanta moshapataponaꞌ.

Isaías 50:1

Ina quëran Sinioro napoantarin: “Israiroꞌsanquëmaꞌ. Carimaso naꞌcon yaaꞌchintatënquëma yonípiranquëmahuëꞌ, co quënananquëmahuëꞌ. Përápiranquëmahuëꞌ, co aꞌpaniramacohuëꞌ. ‘Nihuitërinsoꞌ pahuërëtacaso marëꞌ paꞌanatë pochin nitërinpoaꞌ,’ topiramahuëꞌ. Oshahuanama niꞌton, paꞌanatë pochin nitëranquëmaꞌ. Co natantochináchinhuëꞌ cancantëramaso marëꞌ aꞌpoatë pochin nitëranquëmaꞌ. ¡Natëramaco naporini, carima nichaꞌëitënquëmahuëꞌ! Marënta camaihuatora, aꞌnaroáchin yanirin. Iꞌrosanta yanitonaꞌ, inotëro taranapi. Napohuachina, samiroꞌsanta yamorori tëpapon. Inapoatona chiminpachinaꞌ, chanataponaꞌ.

Isaías 52:3

Inimiconëma quëpainëmaso marëꞌ co piꞌpian tërantaꞌ, pahuërë maꞌpatërahuëꞌ. Napoaton huaꞌanëntaantaꞌhuanquëmaso marëꞌ co piꞌpian tëranta pahuërëtaꞌhuaso yaꞌhuërinhuëꞌ,” tënin.

Hechos 14:2

Aꞌnaquën cotioroꞌsaso nipirinhuëꞌ, co yanatëpihuëꞌ. Napoaton, nisha piyapiꞌsaꞌ nontatonaꞌ, anishacancantopi. “Quisoso imapisopita co noya piyapisahuëꞌ,” itopi. Napoaton aꞌnaquën co yaimatonahuëꞌ, imapisopita noꞌhuipi.

Hechos 6:12

Ina pochin nonatonaꞌ, naꞌa piyapiꞌsaꞌ anoꞌhuitopi. Cotio ansianoꞌsaꞌ, cotio maistroꞌsaꞌ, inapitantaꞌ anoꞌhuitopi. Co huachi Istipan noya niꞌpihuëꞌ. Napoaton maconpi. Maconahuatonaꞌ, quëpapi cotio huaꞌanoꞌsari natanacaiso marëꞌ.

Romanos 6:19

Iso pochin aꞌchintaranquëmaꞌ noya noya nitotacamaso marëꞌ. Canpitaora co nitotëramahuëꞌ. Iracasoꞌ yaꞌipi nonëma quëran huarëꞌ oshahuanacasoáchin paꞌyatëramaꞌ. Inapohuatamara, paꞌpi nishinahuënꞌ cancantëramaꞌ. Iporasoꞌ noyasáchin nicoꞌ. Inapohuatamaꞌ, noyápiachin cancantaramaꞌ.

Romanos 7:14

Noya yonquicaso marëꞌ pënënpirinpoahuëꞌ. Casoꞌ co noya yonquiatohuëꞌ, oshahuanahuë. Oshahuanahuësoꞌ huaꞌanëntatë pochin nitërinco. Co nanitërahuëꞌ noya nicaꞌhuasoꞌ.

Apocalipsis 2:20

co yaꞌipi cancanëma quëran imaramacohuëꞌ. Aꞌna sanapi corto pëiquë chachin nonpin nanan aꞌchintopirinquëmahuëꞌ, co aꞌparamahuëꞌ. Iráca Quisapira paꞌpi co noyahuëꞌ sanapi niponahuëꞌ, chiníquën nanantaton, piyapinëhuëpita anishacancantërin. Inapochachin iporasoꞌ ina sanapi pënënarinquëmaꞌ co noyahuëꞌ nicacamasoꞌ. ‘Noya monshihuanacasoꞌ. Mamanshi moshacaso marëꞌ nosha acohuachina, noya capacasoꞌ. Caꞌcoꞌ,’ itohuachinquëmara, aꞌnaquëmaꞌ natëtomaꞌ, monshihuanamaꞌ. Nosha mamanshi marëꞌ acopisoꞌ caꞌnamaꞌ. Ina pochin ina sanapi nonpintërinquëmaꞌ.