1 Reyes 21:2 - Chayahuita (Shahui)

² Aꞌna tahuëri Acaposoꞌ, Napoto itapon: —Oparonën paꞌantoco topirahuë. Ina marëꞌ noꞌtëquën pahuërëꞌinquën. Coꞌsoꞌ paꞌantancosoꞌ nohuantohuatanhuëꞌ, carinquën nipachin aꞌna oparo noya noya nininsoꞌ quëchinquën. Pëinëhuë pirayan yaꞌhuërin niꞌton, nisha nisha cosharo shacaꞌhuaso marëꞌ nohuantërahuë, itërin.

1 Reyes 21:2 ပူးပေါင်းရင်းမြစ်များ

Génesis 16:6

Napotohuachina, Apranisoꞌ itapon: —Niꞌquëꞌ, cosonanënsoꞌ, natëinquënso yaꞌhuërin. Maꞌsona nohuantëransoꞌ nitëquëꞌ, itërin. Naporo quëran huarëꞌ Saraisoꞌ, Acara paꞌpi aparisitërin. Napoaton, inaso taꞌarin huachi.

Génesis 3:6

Ina natanaton, sanapiso nara nitërinso niꞌsárin: Noyápiachin nicaton caꞌchináchin cancantërin. “Ina caꞌpato, yaꞌipi nitotarahuë huachi,” tënin. Napoyan quëran, sëꞌpashorahuaton caꞌnin. Soꞌionta quëtohuachina, inanta caꞌnin.

1 Reyes 21:3

Napotopirinhuëꞌ, inariso itapon: —Isoso oparoꞌ, tatahuë yachiminaton, cari huaꞌanëntaꞌhuaso marëꞌ quëtërinco. Shimashonëhuëpitarinta ina chachin huaꞌanëntopi niꞌton, co quëtaꞌhuanquënsoꞌ Yosë nohuantërinhuëꞌ, itërin.

1 Reyes 21:6

—Napoto oparonën nohuantato, iso pochin nontërahuë: “Ina marë pahuërëꞌinquën. Co ina nohuantohuatanhuëꞌ, aꞌna oparo ina yaꞌhuërënamën noya noya nininso quëchinquën,” itërahuë. Napotopirahuë, co nohuantërinhuëꞌ, itërin soꞌini.

Éxodo 20:17

Ama aꞌnapita maꞌshanën noyapatocosohuëꞌ: Saꞌinaꞌ, piyapinënapita, toronënaꞌ, moranënaꞌ, inapita co noyapatamaso yaꞌhuërinhuëꞌ. Co maꞌshanëna tëranta noyapatamaso yaꞌhuërinhuëꞌ,” itërin Yosëri israiroꞌsa pënënaton.

Lucas 12:15

Napotahuaton, yaꞌipiya pënënin. —Ama iyaroꞌsaꞌ maꞌsha canacamasoáchin yonquicosohuëꞌ. Co nani maꞌsha yaꞌhuëtinquëmaꞌ huarëꞌ noya nanpiaramahuëꞌ, itërin.

1 Timoteo 6:9

Aꞌnaquënso nipirinhuëꞌ coriqui canacasoáchin yonquipi. Inasáchin cancantatonaꞌ, sopai natëpi. Nani maꞌsha nohuantatonaꞌ huënsonquë maꞌsha manëso pochin nisapi. Inasáchin yonquiatonaꞌ, aquë aquëtëꞌ nohuantaponaꞌ. Ina marëꞌ Yosëri chiníquën anaꞌintarin.

1 Samuel 8:14

Noꞌpanëma noya noya nininsopitanta matarinquëmaꞌ. Oparonëmaꞌ, oripororonëmaꞌ, inapita noya noyatërinsopita matarinquëmaꞌ. Matatënquëma catahuapisopita huaꞌanoꞌsa quëtapon.

1 Samuel 8:6

Napotohuachinara, Samoiroso co noyahuëꞌ cancantërin. Copirno nohuantopiso marëꞌ naporin. Napoaton Sinioro nontërin: “Israiroꞌsaꞌ, copirno acotaꞌhuaso nataninaco,” itërin.