1 Reyes 17:13 - Chayahuita (Shahui)

¹³ —Ama imoya paꞌyanquësohuëꞌ. Paaton naporanso chachin anpiontaquëꞌ. Napoaponahuëꞌ, caꞌton anpitahuatonco quëshico caꞌi. Ina piquëran canpitantaꞌ, capamaso marëꞌ anpiantaquëꞌ.

1 Reyes 17:13 ပူးပေါင်းရင်းမြစ်များ

Génesis 26:24

Naporo tashi Siniorori yaꞌnotahuaton itapon: “Caso Yosëco. Tataparin Apraan chinotërinco. Ama tëꞌhuaquësohuëꞌ. Carinquën caꞌtanatënquën catahuamiataranquën. Piyapinëhuë Apraan natërinco niꞌton, ca nohuanton shiparinpita naꞌamiatapon,” itërin.

1 Reyes 17:12

Napotaantahuachina, inariso itapon: —Yoscoarëꞌ co anpipinan yaꞌhuëtërincohuëꞌ. Aꞌna sëꞌtamoíchin pochin orinanquë arina yaꞌhuëcharinco. Tomanta yonshaquë piꞌpisha yaꞌhuëtërinco. Inaíchin anpiato huaꞌhuahuë aꞌcaꞌhuaso marëꞌ ihuë masapirahuëꞌ: “Ina pëꞌyachinatoi tana tëpachinaꞌincoi,” taꞌto naporapirahuëꞌ, itërin.

1 Reyes 17:14

Sinioro israiroꞌsacoi chinotëraisoꞌ, naporin: “Ca nohuanto arina orinanquë yaꞌhuërinsoꞌ, co nitiquiaponhuëꞌ. Tomanta yonshaquë yaꞌhuërinsoꞌ, napoarin. Ca nohuanton oꞌnanpachin, cosharo yaꞌhuëaquë huarëꞌ, yaꞌhuëápon,” tënin Sinioro, itërin.

2 Reyes 6:16

Napotopirinhuëꞌ, inariso itapon: —Ama tëꞌhuatëquësohuëꞌ. Canpoa catahuarinpoasopitasoꞌ, naꞌcon naꞌcon yaꞌhuëapi, itërin.

Éxodo 14:13

Napotopirinahuëꞌ, Moisësëriso itapon: —¡Ama paꞌyancosohuëꞌ! ¡Chiníquën cancantocoꞌ! Sinioro chachin nichaꞌërinpoasoꞌ, ipora niꞌsaramaꞌ. Inari canpita yaꞌhuërënamën ahuëtaton, iquipitoroꞌsa minsëarin. Napoaton co huachi onporo tëranta inapita quënanaramahuëꞌ, itërin.

Proverbios 3:9

Maꞌsha yaꞌhuëtërinquënsopita Sinioro noya nicaton quëtëquëꞌ. Shaꞌnansopita yaꞌnan cayarinsontaꞌ, quëtëquëꞌ.

Isaías 41:10

Ama manta tëꞌhuacosohuëꞌ, caꞌtanaranquëmaꞌ. Ama paꞌyancosohuëꞌ. Caso Yosëco niꞌsáranquëmaꞌ. Carinquëma achiniatënquëma catahuaranquëmaꞌ. Chiníquën nanantato inchinanëhuë quëran sëꞌquëaranquëmaꞌ.

Isaías 41:13

Caso Sinioroco niꞌto, Yosënëmaco. Imirahuë quëran sëꞌquëatë pochin quëpáranquëmaꞌ. Napoaton: ‘Ama tëꞌhuacosohuëꞌ, catahuaranquëmaꞌ,’ itaranquëmaꞌ.

Malaquías 3:10

Nani maꞌsha yaꞌhuëtërinquëma quëran diesmo ocoirahuatomaꞌ, chinotëramacoso pëiquë quëcoꞌ. Inaquë maꞌsha tapatërinacosopita yaꞌhuërin niꞌton, quëcoꞌ. Inapohuatamaꞌ, corto huaꞌanoꞌsaꞌ, Nihuiroꞌsaꞌ, inapita cosharo yaꞌhuëtapi. Inta inapoatoma tënirico. Napohuatamaꞌ, noya noya catahuararanquëmaꞌ. Piꞌiroꞌtë huintananënpita iꞌsoatahuato, notohuaroꞌ maꞌsha noya nininsopita aꞌpatimatë pochin nitaranquëmaꞌ.

Mateo 10:37

Yaimapatamaco, ca naꞌcon naꞌcon nosoroco. Tatamaꞌ, mamamaꞌ, huiꞌnamaꞌ inapita co onpopinchin nosorocasoꞌ yaꞌhuërinhuëꞌ. Co naꞌcon naꞌcon nosorohuatamacohuëꞌ, co tëhuënchachin imaramacohuëꞌ tënahuë.

Mateo 28:5

Ina quëran sanapiꞌsantaꞌ canquihuachinara, anquëniri itërin: —Ama paꞌyancosohuëꞌ. Quisoso corosëquë patanantopisoꞌ yonisaramasoꞌ, nitotërahuë.

Mateo 6:33

Napoaton Yosë naꞌcon naꞌcon yonquicoꞌ. Aꞌnapitantaꞌ catahuacoꞌ huaꞌanëntërinquë yaꞌconacaiso marëꞌ. Yosë nontocoꞌ noyasáchin yonquicamaso marëꞌ. Ina pochin cancantohuatamaꞌ, catahuarinquëmaꞌ. Ina nohuanton, maꞌsha pahuantërinquëmasopita yaꞌhuëtarinquëmaꞌ.

Hechos 27:24

Yaꞌnotimarahuatonco, itërinco: “Ama Paono tëꞌhuaquësohuëꞌ. Co chimiitaranhuëꞌ. Yosë nohuanton, aꞌna tahuëri Noma copirno yaꞌhuërinꞌpaꞌ cansaran copirno chachin nontamaso marëꞌ. Yosë nontëran niꞌton, yaꞌipi nanchaquë nisaramasopita nanpiaramaꞌ. Co aꞌnayanquëma tërantaꞌ chiminapomahuëꞌ,” itërinco anquëni.

Hebreos 11:17

Apraan tëhuënchachin Yosë natërin. Aꞌnaíchin huiꞌnin yaꞌhuëtërin. Nasitohuachina, Isaco itërin. Naporoꞌ Yosëri shaꞌhuitërin: “Isaco mashotohuachin, huiꞌnahuanarin antaꞌ. Naporahuaton, oshaquëran notohuaroꞌ shinpita yaꞌhuëtarin,” itopirinhuëꞌ. Huiꞌnin huiꞌnapitohuachina, Yosëri itantarin: “Huiꞌnan quëparahuaton, motopiꞌpaꞌ paquëꞌ. Inaquë huiꞌnan tëpaquëꞌ chinotancoso marëꞌ,” itërin. Tënicaso marëꞌ napotërin.

1 Pedro 1:7

Maꞌsha onpohuatëhuaꞌ, Yosë catahuararinpoaꞌ yaꞌipi cancanënpoa quëran imacaso marëꞌ. Oro tapacaiso marëꞌ aꞌirotopiso pochin nitarinpoaꞌ. Oro inapotohuachinara, noyápiachin pipirin. Yaꞌipi nëꞌhuë huiquitahuaton, orosachin ninin. Inapochachin iporasoꞌ Yosë nohuanton, pënquë ahuiquitërëso pochin maꞌsha onpotërinpoaꞌ noya noya acoinpoaso marëꞌ. Oro paꞌton niponahuëꞌ, co yaꞌhuëmiatërinhuëꞌ. Canpoaso nipirinhuëꞌ, Yosë natëhuatëhuaꞌ, nanpimiatarihuaꞌ. Napoaton naꞌcon yonquiaꞌahuaꞌ cancanënpoa quëran huarëꞌ natëcasoꞌ. Ina Yosë nohuantërinsoꞌ. Natëmiatohuatëhuaꞌ, Yosë noya noya niꞌsarinpoaꞌ. Quisocristo oꞌmantahuachin, noya noya acorarinpoaꞌ. Ina pochin yaꞌnoarihuaꞌ.