1 Reyes 1:25 - Chayahuita (Shahui)

²⁵ Ipora tahuëri chachin inaso pita nicaton, naꞌa ohuicaroꞌsaꞌ, tororoꞌsaꞌ, toroaꞌhuaroꞌsaꞌ, inapita atëpatërin. Inaporahuaton yaꞌipiya pochin huiꞌnanpita përarin. Sontaro capitanoꞌsanta përasahuaton, Apiataro corto huaꞌaonta përarin. Inaquë capatonaꞌ, oꞌotonaꞌ, chiníquën noncaroapi: “¡Atoniasë copirno, huaꞌqui tahuëri huaꞌanënchinpoaꞌ!” tosapi.

1 Reyes 1:25 ပူးပေါင်းရင်းမြစ်များ

2 Samuel 16:16

Yaꞌhuërëꞌ Osaisoꞌ, Apësaron nacapiapon paꞌnin. Ina paꞌyataton chiníquën nonin: —¡Ma inacha copirnoso paya! ¡Huaꞌqui tahuëri camaiinpoaꞌ! tënin.

1 Reyes 1:19

Tororoꞌsaꞌ, toroaꞌhuaroꞌsa inapita atëpatërin. Naꞌa ohuicaroꞌsanta atëpatahuaton, pita nisarin. Huiꞌnanpita yaꞌipiya pochin përarin. Apiataro, Coapo, inapitanta përarin. Saromoánchin co përarinhuëꞌ.

1 Reyes 1:24

Natani copirno itapon: —¿Quëma chachin sinioro copirno camaitëran niꞌton, Atoniasë quëma yaꞌhuërënamën huaꞌanëntarin huachi?

1 Reyes 1:34

Inaquë Satoco, Natan, inapitari tomaquë opomototahuatonaꞌ, israiroꞌsa copirnonën nicacasoꞌ marëꞌ acoꞌinaꞌ. Nani acohuachinaꞌ, naní quëran chiníquën noinaꞌ: “¡Saromon copirno huaꞌqui tahuëri nanpiton, huaꞌanënchinpoaꞌ!” chinaꞌ.

1 Reyes 1:39

Coꞌhuara inaquë paꞌshátëraponaraihuëꞌ, Satoco corto huaꞌansoꞌ, Yosë caposonën yaꞌhuërinquë paꞌnin. Ina quëran pomonquë Yosë marëꞌ toma tapapiso masahuaton paꞌnin. Canconpachina, inaquë Saromon opomototahuaton copirno nicacaso marëꞌ acorin. Ina piquëran aꞌnari carniro pomon pihuirin. Naporoꞌ yaꞌipi caꞌtanpisopitari chiníquën nonatonaꞌ: “¡Saromon copirno huaꞌqui tahuëri nanpiton, huaꞌanënchinpoaꞌ!” topi.

1 Reyes 1:9

Aꞌna tahuëri Atoniasësoꞌ, Soiriti natëtë pirayan pita ninin. (Inaso natëtëꞌ, Noquiri itopiquë huinan yaꞌhuërinso yaꞌcari yaꞌhuërin.) Ina pitaquë capacaiso marëꞌ ohuicaroꞌsaꞌ, tororoꞌsaꞌ, toroaꞌhuaroꞌsa amoshin nipisopita, inapita atëpatërin. Inapoaton yaꞌipi pochin iinpita përarin. Yaꞌipi Cota huënton sacatoroꞌsa copirno marëꞌ sacatopisontaꞌ, përarin. Coshatasoi shaꞌhuirin: “Yaꞌipi israiroꞌsa copirnonën ca yaꞌcoanahuë,” itërin.

Mateo 21:9

Aꞌnaquën quëchitërapi. Aꞌnaquëontaꞌ imasapi. Papona pochin chiníquën nonsapi: —¡Nichaꞌëcoi Tata Yosë! ¡Ma noyacha Quisososo paya! Tapico shiin inasoꞌ. ¡Quëmari chachin chiníquën nanan quëtëran! ¡Quëma nohuanton, israiroꞌsacoi huaꞌanëntarincoi! itopi.

Mateo 22:4

Copirnoso natanahuaton, aꞌnapita piyapinënpita aꞌpaantarin: ‘Shaꞌhuitoncoꞌ manóton huëꞌinaꞌ. Nani ohuacaroꞌsaꞌ amoshin nipisopita atëpatërahuë capacaso marëꞌ. Nani yaꞌipi taparahuë. Huëco huachi caꞌahuaꞌ, itoncoꞌ,’ itahuaton aꞌparin.

1 Samuel 10:24

Naporoꞌ Samoirori yaꞌipi israiroꞌsa itapon: —¡Yaꞌipima niꞌcoꞌ! ¡Iso mini Siniorori copirnonëma marëꞌ huayonin! ¡Co aꞌna Israiro quëmapi tëranta ina pochin huanirinhuëꞌ! itërin. —¡Ma inacha inaso paya! ¡Huaꞌqui tahuëri camaiinpoaꞌ! topi aꞌnapita israiroꞌsantaꞌ.