1 Pedro 5:9 - Chayahuita (Shahui)

⁹ Ama piꞌpian tërantaꞌ ina tahuërëtocosohuëꞌ. Chiníquën cancantatomaꞌ, shaꞌhuitocoꞌ paꞌin. Yosëíchin natëcoꞌ. Co canpitaíchin parisitaramahuëꞌ. Yaꞌipi parti Yosë imarëhuasopita parisitarëhuaꞌ. Ina yonquiatomaꞌ, chiníquën cancantocoꞌ.

1 Pedro 5:9 ပူးပေါင်းရင်းမြစ်များ

Lucas 22:32

Caso nipirinhuëꞌ iyasha, nani Yosë nontërahuë ama aꞌpoancoso marëhuëꞌ. Napoaton co naniantomiatarancohuëꞌ. Noya imaantahuatanco, iyanpita achinicancanquëꞌ, itërin.

Juan 16:33

Nani naꞌcon shaꞌhuitëranquëmaꞌ sano cancantacamaso marëꞌ. Casáchin yonquihuatamaco, sano cancantaramaꞌ. Co paꞌyanaramahuëꞌ. Piyapiꞌsaꞌ aparisitopirinënquëmahuëꞌ, catahuaranquëmaꞌ niꞌton, chiníquën cancantocoꞌ. Yaꞌipi isoroꞌpaquë co noyahuëꞌ nipisopita nani minsëarahuë, itërincoi Quisoso.

Hechos 14:22

Cara ninanoquë chachin Quisoso imapisopita pënënaꞌpiapi. “Ama iyaroꞌsaꞌ Quisoso aꞌpocosohuëꞌ. Imamiatocoꞌ. Aꞌnapita aparisitarinënpoaꞌ. Parisitacasoꞌ yaꞌhuërin. Parisitatëhuaꞌ, Yosë huaꞌanëntërinquë yaꞌconarëhuaꞌ. Napoaton noya ahuantocoꞌ,” itopi. Pënënpachinara, achinicancanpi.

1 Corintios 10:13

Sopai yaꞌipi piyapinpoaꞌ shaꞌhuitërinpoaꞌ co noyahuëꞌ nicacaso marëꞌ. Yosëso nipirinhuëꞌ catahuarinpoaꞌ. Aꞌnaya aꞌnayanpoaꞌ co nanitërëhuasohuëꞌ nitotaton, niꞌsarinpoaꞌ. “Tananpitëquëꞌ,” itohuachina, co sopai nanitërinhuëꞌ aquëtëꞌ tëniinpoasoꞌ. Cancanënpoa quëran huarëꞌ Yosë natëhuatëhuaꞌ, co sopai minsëarinpoahuëꞌ. Maꞌsha onpopirëhuahuëntaꞌ, Yosë ananitarinpoaꞌ ahuantacasoꞌ. Yosë chachin catahuarinpoaꞌ sopai minsëcaso marëꞌ.

Efesios 4:27

Huaꞌquiꞌ noꞌhuihuatamaꞌ, aꞌnaroáchin sopai minsëarinquëmaꞌ.

Efesios 6:16

Sontaroꞌsaꞌ iscoto quëpapi nipaꞌshintacaiso marëꞌ. Inimicoroꞌsaꞌ panca shinërë masahuatonaꞌ, yaquiꞌ noya orotërinsoꞌ nininquë pashitahuatonaꞌ, iꞌchinpitopi. Iꞌchinpitahuatonaꞌ, pëꞌchinanquë aquë tëꞌyatopi. Napoaton sontaroꞌsaꞌ iscoto quëpapi nipaꞌshintacaiso marëꞌ. Ina quëran inimicori tëꞌyanantohuachina, shinërë inaquë tacopiquirin. Panca shinërë orotërarinso pochachin sopai apira apira yanonpintërinpoaꞌ Yosë naniantacaso marëꞌ. Napoaton naꞌcon Yosë yonquicoꞌ. “Yosë niꞌsárinco. Co onporontaꞌ naniantarincohuëꞌ,” topatamaꞌ, achinicancanarinquëmaꞌ. Co piꞌpian tërantaꞌ sopai natëaramahuëꞌ. Iscoto quëpapiso pochin Yosësoꞌ noya yaꞌcopiarinpoaꞌ.

Colosenses 2:5

Co canpitataquë yaꞌhuaporahuëꞌ, nosoroatënquëmaꞌ, nani tahuëri yonquiranquëmaꞌ. Noya niniꞌtomaꞌ, yaꞌhuaramaꞌ. Co nisha nisha yonquiramahuëꞌ. Yaꞌipi cancanëma quëran Quisocristo natëramaꞌ. Ina marëꞌ nóya cancantërahuë.

1 Tesalonicenses 3:3

Canpitantaꞌ parisitapiramahuëꞌ, co nohuantëraihuëꞌ nisha nisha yonquicamasoꞌ. Co ina marëꞌ aꞌpocasoꞌ yaꞌhuërinhuëꞌ. Quisocristo imapatëhuara, aparisitërinënpoaꞌ. Yosë nohuanton, ina marëꞌ parisitarëhuaꞌ, nani nitotëramaꞌ.

1 Timoteo 6:12

Iráca imapisopita niyontonpachinara, chiníquën cancantaton, “Casoꞌ Quisocristo imarahuë,” itëran. Napoaton “Yosë catahuarinco,” taꞌton, sopai minsëquëꞌ. Yosë nani huëntonënquë ayaꞌconinquën niꞌton, imamiatëquëꞌ. Ina quëran aꞌna tahuëri inápaquë nanpimiataran.

2 Timoteo 3:12

Yaꞌipi cancanënpoa quëran Quisocristo imapatëhuaꞌ, aparisitarinënpoaꞌ.

2 Timoteo 4:7

Iráca Yosë shaꞌhuitërinco aꞌnapita aꞌchintaꞌhuasoꞌ. Nani tiquirahuë. Chiníquën sacatërahuë pochin Quisocristo nóya natërahuë. Co piꞌpian tërantaꞌ aꞌporahuëꞌ.

Hebreos 11:33

Aꞌnaquën Yosë natëtonaꞌ, nisha nisha piyapiroꞌsaꞌ minsëpi. Aꞌnaquëontaꞌ huaꞌan yaꞌconatonaꞌ, noꞌtëquën huaꞌanëntopi. “Yosë shaꞌhuitërinpoaꞌ niꞌton, catahuarinpoaꞌ,” taꞌtonaꞌ, aꞌnaquën natëpi. Napoaton Yosëri catahuarin. Aꞌnaquënsoꞌ Yosë natëtonaꞌ, paꞌpiniꞌ quëran chaꞌëpi.

Hebreos 12:8

Co Yosë pënëninpoahuëꞌ naporini, co tëhuënchachin huiꞌninpita pochin niꞌitonpoahuëꞌ. Yaꞌipi huiꞌninpita yonquirin noya noya cancantacaiso marëꞌ. Co piꞌpian tërantaꞌ anaꞌintohuachinquëmahuëꞌ, co Yosë huiꞌninpitanquëmahuëꞌ.

Santiago 4:7

Napoaton Yosëíchin natëcoꞌ. Ama piꞌpian tërantaꞌ sopai nohuantocosohuëꞌ. Chiníquën cancantocoꞌ. Yosë nontatomaꞌ, sopai aꞌpacoꞌ paꞌin. Co ina natëhuatamahuëꞌ, patarinquëmaꞌ.

1 Pedro 1:6

Ina yonquiatomaꞌ, capa cancantaramaꞌ. Aꞌna tahuëri Yosë nohuanton, piꞌpian maꞌsha onporamaꞌ. Ipora chachin maꞌsha onpotopirinënquëmahuëꞌ, co huaꞌquiꞌ parisitaramahuëꞌ. Parisitapomarahuëꞌ, oꞌmantacasoꞌ tahuëri yonquiatomaꞌ, noya cancantocoꞌ.

1 Pedro 2:21

Ina pochin ahuantacasoꞌ Yosë nohuantërin. Quisocristo canpoa marëꞌ parisitërin. Parisitaton, aꞌchintërinpoaꞌ canpoantaꞌ ina pochin ahuantacasoꞌ. Ina iyaroꞌsaꞌ nonancoꞌ.

1 Pedro 3:14

Aꞌna tahuëriso nipirinhuëꞌ imaramaso marëꞌ aparisitohuachinënquëmaꞌ, ama tëꞌhuatocosohuëꞌ. “Quisocristo marëꞌ parisitarëhuaꞌ,” taꞌtomaꞌ, noya cancantocoꞌ. Yosë noya catahuarinquëmaꞌ niꞌton, ama paꞌyancosohuëꞌ.

1 Pedro 4:13

Quisocristo parisitërinso pochin parisitohuatamaꞌ, noya cancantocoꞌ. Ina quëran chiníquën nanantaton oꞌmantahuachin, noya noya cancantaramaꞌ.

Apocalipsis 1:9

Ca Coanshaco ninshitaranquëmaꞌ. Canpitaroꞌco chachin imarahuë. Ina marëꞌ parisitopirëhuahuëꞌ, huaꞌanëntërinquë ayaꞌconinpoaꞌ. Quisocristo chachin catahuahuachinpoaꞌ, noya ahuantarëhuaꞌ. Yosë nanamën aꞌchinahuëso marëꞌ aparisitërinaco. Quisocristo imarahuë niꞌton, aꞌna soꞌtonꞌpaꞌ aꞌparinaco, Patomosë itopiquë.

Apocalipsis 6:11

Napotohuachinara, Yosëri itërin: —Ninatacoꞌ. Oshaquëran anaꞌintarahuë. Co tahuëri naniyatërarinhuëꞌ. Aꞌnapita imarinacosopita ipora huantaꞌ pënëntapi. Aꞌnaquën tëpaantahuachinaꞌ, isëquë chachin huëantapi antaꞌ. Naporo huarëꞌ tëparinënquëmasopita noꞌtëquën anaꞌintarahuë, itërin. Itahuaton, huiríchin aꞌmocaisoꞌ quëtërin. Noyápiachin cancantopi niꞌton, huiríchin aꞌmotërin.

Apocalipsis 7:14

—Co casoꞌ nitotërahuëꞌ. Quëma nitotëransoꞌ. Shaꞌhuitoco cantaꞌ nitochi, itohuatëra, shaꞌhuitërinco: —Isopitasoꞌ chiníquën parisitaponaraihuëꞌ, co Yosë aꞌpopihuëꞌ. Carniroaꞌhuari huënainën quëran anoyacancantërin niꞌton, huiríchin aꞌmopi.