1 Pedro 4:3 - Chayahuita (Shahui)

³ Huaꞌquiꞌ co noyahuëꞌ ninamaꞌ. Monshihuanamaꞌ, nisha nisha sanapi noyaramaꞌ, noꞌpiramaꞌ. Pita nicacasoáchin yonquiramaꞌ. Mamanshi mosharamaꞌ, co inapita moshacasohuëꞌ nipirinhuëꞌ. Iráca co Yosë imatomahuëꞌ, inaporamaꞌ. Inapoatomaꞌ, tahuëri chiniaramaꞌ.

1 Pedro 4:3 ပူးပေါင်းရင်းမြစ်များ

1 Reyes 21:26

Nisha nisha mamanshiroꞌsa mosharápaton, amororoꞌsa pochin niconin. Inapitasoꞌ Siniorori ocoirin. Israiroꞌsari yaꞌhuërëtacaiso marëꞌ napotërin.)

Isaías 28:7

Samariaroꞌsa huino oꞌotona pisan pisan toconpi. Máin paꞌyatatonaꞌ, inpan inpan toconpi. Inapita pochachin corto huaꞌanoꞌsaꞌ, pënëntonaꞌpiroꞌsaꞌ, inapitanta ina pochin oꞌotona noꞌpirápi. Huino oꞌosápatona naponin yonquipi. Inapitasoꞌ huaꞌnarëso pochin quënantacaiso nipirinhuëꞌ, maꞌsona nicacasoꞌ shaꞌhuicaiso nipirinhuëꞌ, noꞌpirahuëroꞌsa niꞌton, co Siniorori anitotërinhuëꞌ.

Isaías 65:4

Inapitasoꞌ poꞌororoꞌsaquë huënsëconpi. Co paꞌshantopiquëhuëꞌ tahuërianpitápi. Inapitasoꞌ, coshi nosha caꞌconpi. Nisha nisha maꞌsha amirotochináchin niꞌnahuësoꞌ, poꞌmotona caꞌpi.

Marcos 7:22

Nitëhuananpitëramaꞌ. Paꞌyatacasoráchin cancantëramaꞌ. Aꞌnapita maꞌshanën noyaparamaꞌ. Co noyahuëꞌ ninamaꞌ. Nonpinamaꞌ. Nisha nisha co noyahuëꞌ ninamasoꞌ co yaaꞌporamahuëꞌ. Apiraramaꞌ. Pinotëramaꞌ. “Casoꞌ co aꞌnapita pochincohuëꞌ. Noya noyaco,” toconamaꞌ. Co yonquinahuanhuëꞌ ninamaꞌ.

Hechos 17:30

Iráca co Yosë nohuitopihuëꞌ niꞌton, co anaꞌintërinhuëꞌ. Iporaso nipirinhuëꞌ, yaꞌipi piyapinpoaꞌ pënëninpoaꞌ: ‘Co noyahuëꞌ yonquiramasoꞌ naniantatomaꞌ, casáchin chinotoco,’ itërinpoaꞌ Yosë.

Romanos 13:13

Tahuëri nipachina, aꞌninquëchin niꞌton, noyasáchin ninëꞌ. Aꞌnaquënso nipirinhuëꞌ pitasachin paꞌyatopi. Naꞌa tahuëri nansarápi, oꞌosápi, coshatápi, noꞌpiápi. Ama pitasoꞌ paꞌyatocosohuëꞌ. Ama noꞌpicosohuëꞌ. Ama piꞌpisha tërantaꞌ nimonshitacamasoꞌ yonquicosohuëꞌ. Ama ninoꞌhuicosohuëꞌ. Ama aꞌna piyapi noyapatomaꞌ, noꞌhuicosohuëꞌ.

1 Corintios 12:2

Iráca co Yosë natëyatërapomahuëꞌ, nisha nisha yonquiatomaꞌ, mamanshi mosharamaꞌ. Co nanpiton natanpirinquëmahuëꞌ, sopai nohuanton, inapita chinotëramaꞌ.

1 Corintios 6:11

Iráca aꞌnaquëmaꞌ ina pochin nipiramahuëꞌ. Sinioro Quisocristo imapatamara, oshanëmaꞌ inquitërinquëmaꞌ. Nani anoyacancantërinquëmaꞌ niꞌton, Yosë noya niꞌninquëmaꞌ. Ispirito Santo chachin catahuarinquëmaꞌ noya cancantacasoꞌ.

2 Corintios 12:21

Iráca aꞌnaquëmaꞌ co noyahuëꞌ yonquiramaꞌ. Monshihuanamaꞌ, sanapirachin yonquiramaꞌ. Ipora huantaꞌ aꞌnaquëmaꞌ inapoaramaꞌ nimara. Co ina naniantohuatamahuëꞌ, canconpato, paꞌpi sëtarahuë. Carinquëmaꞌ aꞌchintëranquëmasoꞌ niꞌton, Yosë atapanarinco. Co oshanëmaꞌ aꞌpohuatamahuëꞌ, chiníquën asëtaramaco.

Gálatas 5:19

Piyapiꞌsaꞌ inahuara co nanitopihuëꞌ Yosëíchin yonquicaisoꞌ. Co noyahuëꞌ yonquipisopita nitotërëhuaꞌ. Co noyahuëꞌ yonquihuachinara, co noyahuëꞌ nipi. Yamonshihuanpi, taparoꞌ nonpi, sanapi sëꞌhuachinachin cancantopi.

Gálatas 5:21

Co noyahuëꞌ yonquihuachinara, aꞌnapita maꞌshanënpita noyapatonaꞌ, noꞌhuipi. Noꞌpipi, pitaroꞌsaquë caꞌmiatopi, oꞌomiatopi, aꞌnaratipita nipi. Iráca pënënanquëmaꞌ. Iporantaꞌ pënëantaranquëmaꞌ. Inapohuatamaꞌ, co Yosë huaꞌanëntërinquë yaꞌconaramahuëꞌ. Ina pochin nipisopita co Yosëꞌpaꞌ pantarapihuëꞌ.

Efesios 5:18

Aꞌnaquën noꞌpicasoáchin cancantopi. “Huëcoꞌ noꞌpiahuaꞌ. Capa cancantahuaꞌ,” nitopirinahuëꞌ. Ama canpitasoꞌ noꞌpicosohuëꞌ, nishacancantotamaꞌ. Yosë nontocoꞌ Ispirito Santo noyá yaꞌcoancanchinquëmaꞌ. Nani tahuëri yaꞌcoancantomiachinquëmaꞌ. Ina quëran co noꞌpipomarahuëꞌ, tëhuënchachin capa cancantomiataramaꞌ.

1 Tesalonicenses 4:5

Aꞌnaquën co Yosë nohuitatonahuëꞌ, ichihuëꞌëcaisoachin yonquiatonaꞌ, aꞌnaroáchin mapi. Ama inapita pochin cancantocosohuëꞌ. Tëhuënchachin nosoroatomaꞌ, macoꞌ.

Tito 3:3

Iráca canpoantaꞌ co noyahuëꞌ cancantërëhuaꞌ. Coꞌhuara Yosë nanamën nitochatërarihuahuëꞌ, co yonquirëhuahuëꞌ. Co yanatërëhuahuëꞌ. Sopai nonpintërinpoaꞌ niꞌton, nisha nisha nicacasoꞌ nohuantërëhuaꞌ. Maꞌpitasona paꞌyatacasoáchin yonquirëhuaꞌ. Aꞌna piyapi maꞌshanënpita noyapatërëhuaꞌ. Ninoꞌhuitëhuaꞌ, co niquëꞌyarëhuahuëꞌ. Noꞌhuípiroꞌ ninëhuaꞌ. Inapoatëhuaꞌ, topinan quëran yaꞌhuërëhuaꞌ.

1 Pedro 1:14

Huaꞌhuaroꞌsaꞌ noya nipachinara, paꞌpinaꞌ natëpi. Inapochachin canpitantaꞌ Yosëíchin natëcoꞌ. Iráca co Yosë nanamën nitotatomarahuëꞌ, co yonquiramahuëꞌ. Yanoꞌpihuatamara, noꞌpiramaꞌ. Co noyahuëꞌ yonquihuatamara, co noyahuëꞌ ninamaꞌ. Iporaso nipirinhuëꞌ ama inapocosohuëꞌ.

Judas 1:4

Tëhuënchachin aꞌnaquënsoꞌ nonpin nanan aꞌchintarinënquëmaꞌ. Paꞌpi co noyahuëꞌ inapitasoꞌ. “Quiyantaꞌ imarai,” taponaraihuëꞌ, co noꞌtëquën aꞌchinpihuëꞌ. “Maꞌsona nohuantërëhuaso niahuaꞌ. Yosë nosororinpoaꞌ niꞌton, co anaꞌintarinpoahuëꞌ,” taꞌtonaꞌ, paꞌpi co noyahuëꞌ nipi. Noꞌpipi, monshihuanpi, aꞌnaratipita nipi. Naporahuatonaꞌ, co tëhuënchachin Quisocristo imapihuëꞌ, inasáchin natëcaso nipirinhuëꞌ. Ina marëꞌ Yosëri chiníquën anaꞌintarin. Iráca quëra huarëꞌ nani yonquirin anaꞌintacasoꞌ. Napoaton niꞌcona canpitantaꞌ nonpintochinënquëmaꞌ. Chiníquën cancantatomaꞌ, noꞌtëquën aꞌchincoꞌ.