1 Pedro 3:18 - Chayahuita (Shahui)

¹⁸ Quisocristontaꞌ nóya niponahuëꞌ, oshahuanëhuaso marëꞌ parisitërin. Oshanënpoaꞌ inquitinpoaso marëꞌ chiminin. Aꞌnaromarëáchin chiminin. Noya niponahuëꞌ, oshahuanoꞌsa marëꞌ chiminin. Canpoantaꞌ Yosë nohuitacaso marëꞌ chiminin. Piyapi niꞌton tëhuënchachin tëpapi. Chiminaponahuëꞌ, nanpiantarin niꞌton, noya noya yaꞌhuantarin.

1 Pedro 3:18 ပူးပေါင်းရင်းမြစ်များ

Daniel 9:26

Saota shonca cato simana piquëran huaꞌan Yosëri huayoninso tëpaponaꞌ. Quirosarin ninanoꞌ, Yosë chinotacaso pëiꞌ, inapita naquëranchin ataꞌhuantaantaponaꞌ. Aꞌnara copirno piyapinënpitarë chachin huëcaton inapotapon. Panca paquiiꞌ aꞌnaroáchin mëntarinso pochin taꞌhuantacaisoꞌ canquipon. Quira nicacaisoꞌ, niataꞌhuantacaisoꞌ, inapitasoꞌ, tahuëri taꞌhuantaquë huarëꞌ imapon.

Zacarías 9:9

Sinioro chachin naporin: “Sion motopiaꞌhuaquë yaꞌhuëramasopita, capa cancantomiatocoꞌ. Quirosarinquë yaꞌhuëramasopitantaꞌ, capa cancantatoma cantacoꞌ. Niꞌcoꞌ. Copirnonëma huëꞌsarin. Inaso noyasáchin ninin. Yaꞌipi inimicoroꞌsa minsërin. Ina niponahuëꞌ, topinan piyapi pochin mora huiꞌnapishinquë yaꞌmitëahuaton, huëꞌsarin.

Mateo 27:19

Huaꞌan shiranënquë huënsëasoꞌ, saꞌinintaꞌ nanan aꞌpatiirin Quisoso ocoicaso marëꞌ. “Achin tashiꞌ aꞌninquëchin huaꞌnarahuë. Quisoso huaꞌnato, chiníquën paꞌyanahuë. Inasoꞌ noya quëmapi. Co mantaꞌ onporinhuëꞌ niꞌton, nichaꞌëquëꞌ. Co tëpacasoꞌ yaꞌhuërinhuëꞌ,” itërin saꞌini. Ina marëntaꞌ Piratori co yatëparinhuëꞌ.

Mateo 27:24

Napotohuachinara, nisha yonquirin huachi. “Piyapiꞌsaꞌ co yanatërinacohuëꞌ. Chiníquën noꞌhuitatonaꞌ, yaahuërinaco,” taꞌton, co huachi yonquirinhuëꞌ Quisoso ocoicasoꞌ. Napoaton iꞌsha masahuaton, piyapiꞌsaꞌ niꞌtërantapaquë huiꞌsërin. —Iso quëmapisoꞌ noya. Co mantaꞌ onporinhuëꞌ, tënahuë. Co ca nohuanto, tëpaapihuëꞌ. Co ina marëꞌ anaꞌintincosoꞌ yaꞌhuërinhuëꞌ. Canpita yonquiramasoꞌ, itahuaton, huiꞌsërin.

Hechos 22:14

Ina quëran itaantarinco: ‘Yosë chinotërëhuasoꞌ nani huayoninquën nohuantërinso chachin nitotamaso marëꞌ. Ina nohuanton, Quisoso yaꞌnotërinquën. Noya noya inasoꞌ. Nontërinquënsoꞌ natanan.

Hechos 3:14

Quisososoꞌ noyasáchin ninin. Co piꞌpisha tërantaꞌ oshahuanpirinhuëꞌ, co nohuantëramahuëꞌ. ‘¿Intaꞌ ocoichinquëmaꞌ?’ itohuachinquëmara, tëpatonaꞌpi huayonamaꞌ.

Romanos 1:4

Yosë pochachin niꞌton, noyasáchin ninin. Chiminpirinhuëꞌ, Yosëri ananpitaantarin. “Inasoꞌ tëhuënchachin Yosë huiꞌnin. Chini chiníquën nanantarin,” tënëhuaꞌ. Ananpitaantarin niꞌton, nitotërëhuaꞌ. Quisocristo chachin huaꞌanëntërinpoaꞌ niꞌton, “Sinioro” itërëhuaꞌ.

Romanos 4:25

Yosë nohuanton, oshanënpoa marëꞌ chiminin. Inari chachin ananpitaantarin oshanënpoaꞌ inquitatonpoaꞌ, noya nicainpoaso marëꞌ.

Romanos 5:2

Quisocristo cancanënpoa quëran natëhuatëhuaꞌ, nichaꞌësarinpoaꞌ. Nosoroatonpoaꞌ, ipora huantaꞌ catahuarinpoaꞌ noya imacaso marëꞌ. Aꞌna tahuëri Yosëꞌpaꞌ paꞌpatëhuaꞌ, Yosë pochin nisarëhuaꞌ. Ina yonquiatëhuaꞌ, nóya cancantarihuaꞌ.

Romanos 8:11

Ispirito Santo yaꞌcoancantërinpoaꞌ. Yosë huaꞌyanën chachin niꞌton, achinicancaninpoaꞌ Yosë pochin cancantacaso marëꞌ. Aꞌna tahuërintaꞌ Yosë ananpitaantarinpoaꞌ. Quisocristo ananpitaantarinsoꞌ pochachin ananpitaantarinpoaꞌ canpoantaꞌ. Nonënpoaꞌ chiminacaso yaꞌhuëpirinhuëꞌ, Ispirito Santo yaꞌcoancantërinpoaꞌ niꞌton, nanpiantarihuaꞌ.

Romanos 8:3

Iráca Yosë pënënpirinpoahuëꞌ. Co noyahuëꞌ cancantatëhuaꞌ, co nanitërëhuahuëꞌ noꞌtëquën natëcasoꞌ. Ina quëran huiꞌnin chachin isoroꞌpaquë aꞌpaimarin. Piyapi chachin nasitimarin. Co oshahuanaponahuëꞌ, oshanënpoaꞌ inquitinpoaso marëꞌ chiminin. Inapoaton, nichaꞌërinpoaꞌ ama huachi anaꞌintinpoaso marëhuëꞌ.

2 Corintios 1:24

Co quiyasoꞌ huaꞌan pochin chiníquën pënëntëraihuëꞌ. Sanoanan quëran pënënainquëmaꞌ. Yosë nanamën noya natëramaꞌ. Yacatahuarainquëmaꞌ noya cancantacamaso marëꞌ.

2 Corintios 13:4

Isoroꞌpaquë nipon, co aquëtëꞌ chinirinhuëꞌ. Corosëquë patanantopi. Chiminaponahuëꞌ, Tata Yosëri chiníquën nanantaton, ananpitaantarin. Quiyantaꞌ Quisocristo pochin cancantatoi, co quiyaora chiniraihuëꞌ. Ina acorincoi niꞌton, Yosë achinicancanincoi noꞌtëquën pënënaꞌhuainquëmaso marëꞌ.

2 Corintios 5:21

Iráca Quisocristo co mantaꞌ oshahuanaponahuëꞌ, Yosë nohuanton, yaꞌhuërëtërinpoaꞌ. Oshahuan pochin nicaton, Yosëri chiníquën anaꞌintërin. Canpoa marëꞌ chiminin niꞌton, co huachi oshahuan pochin niꞌninpoahuëꞌ. Quisocristo imapatëhuaꞌ, Yosë nóya niꞌsarinpoaꞌ.

Gálatas 1:4

Oshanënpoaꞌ inquitinpoaso marëꞌ Quisocristo chiminin. Inaora nohuanton, yaꞌhuërëtërinpoaꞌ. Notohuaroꞌ piyapiꞌsaꞌ co noyahuëꞌ yonquipi. Ama inapita pochin cancantacaso marëhuëꞌ chiminaton, anoyacancantërinpoaꞌ. Tata Yosë nohuanton, nichaꞌërinpoaꞌ.

Gálatas 3:13

Co nanitërëhuahuëꞌ noꞌtëquën natëcasoꞌ niꞌton, anaꞌintinpoasoꞌ yaꞌhuërin. Quisocristoso nipirinhuëꞌ nichaꞌërinpoaꞌ. Canpoaꞌ yaꞌhuërënamënpoaꞌ chiminin. Ina, Yosëri anaꞌintërin. Quiricanën quëran naporin: “Piyapi paꞌpi co noyahuëꞌ nipachina, naraquë achinpirahuatëꞌ, chiníquën anaꞌintërëꞌ. Nani Yosëri aꞌporin,” tënin quiricanënquë. Canpoasoꞌ anaꞌintinpoasoꞌ yaꞌhuëpirinhuëꞌ, naraquë chachin Quisocristo apatanantohuachinara, oshanënpoa marëꞌ parisitërin. Inaquë parisitaton, nichaꞌërinpoaꞌ.

Efesios 3:12

Ina imarëhua niꞌton, natëtëhuaꞌ, Yosë nontarihuaꞌ. “Anoyacancantërinpoaꞌ niꞌton, noya natanarinpoaꞌ,” taꞌtëhuaꞌ, co tëꞌhuatarihuahuëꞌ. Noya cancantatëhuaꞌ, ina nontarëhuaꞌ.

Tito 2:14

Iráca canpoa marëꞌ chiminin oshanënpoaꞌ inquitinpoaso marëꞌ. Anoyacancantërinpoaꞌ piyapinënpita nicacaso marëꞌ. Huëntonënquë chachin yaꞌconpatëhuaꞌ, noya nicacasoráchin nohuantarihuaꞌ.

Hebreos 10:10

Quisocristo piyapi chachin nasitimarahuaton, oshanënpoa marëꞌ chiminin. Yosë nohuanton, aꞌnaroíchin chiminin. Canpoantaꞌ ina imapatëhuaꞌ, oshanënpoaꞌ inquitërinpoaꞌ. Noyápiachin cancan quëtërinpoa huachi.

Hebreos 9:14

Quisocristo huënainënso nipirinhuëꞌ noya nóya. Inasoꞌ Yosë huiꞌnin niꞌton, co piꞌpisha tërantaꞌ oshahuaninhuëꞌ. Ispirito Santo yaꞌhuëmiatërinsori catahuarin niꞌton, canpoa marëꞌ chiminaton anoyacancantomiatërinpoaꞌ. Inaso huënainën aꞌparin oshanënpoaꞌ inquitinpoaso marëꞌ. Inapoaton noyápiachin cancan quëtërinpoaꞌ. Ina quëtohuachinpoaꞌ, Yosë noya chinotarihuaꞌ. Inasoꞌ nanpiarin niꞌton, canpoantaꞌ ina marëꞌ noya sacatarihuaꞌ.

Hebreos 9:26

Aꞌnaroíchin chiminaponahuëꞌ, yaꞌipi piyapinënpita marëꞌ chiminin. Co aꞌnaromarëáchin nanitërinpoahuëꞌ naporini, iráca quëran huarëꞌ naꞌaroꞌ chimiantaꞌitonhuëꞌ. Iporasoꞌ nani ayaro tahuëri yaꞌcariapirinpoahuëꞌ, aꞌnaroíchin chiminin oshanënpoaꞌ inquitinpoaso marëꞌ.

Hebreos 9:28

Quisocristontaꞌ aꞌnaroíchin chiminin oshanënpoaꞌ inquitinpoaso marëꞌ. Ina quëran inápaquë panantarin. Nani oshanënpoaꞌ inquitohuachinpoaꞌ, aꞌna tahuëri oꞌmantararin. “¡Ma noyacha Quisocristosoꞌ niꞌton, nichaꞌërinpoa paya!” taꞌtëhuaꞌ, ina ninarëhuaꞌ. Oꞌmantahuachin, imarëhuasopita maquimarinpoa huachi.

Santiago 5:6

Paꞌpi co noyahuëꞌ cancantatomaꞌ, noya piyapiꞌsaꞌ nonpinapiramaꞌ. Chiníquën aparisitopiramahuëꞌ, inapitasoꞌ co nanitopihuëꞌ iꞌhuërëtinënquëmasoꞌ. Napoaton, Yosë chiníquën anaꞌintarinquëmaꞌ.

1 Pedro 3:19

Ina pochin nanpiantaton, paꞌnin chimipiroꞌsaꞌ yaꞌhuërinquë. Inaquë tashinan pëiquë yaꞌhuapiso pochin nininsopita nanan shaꞌhuitonin.

1 Pedro 4:1

Quisocristo isoroꞌpaquë oꞌmaton, tëhuënchachin parisitërin. Napoaton canpitantaꞌ parisitohuatamaꞌ, ahuantocoꞌ. Quisocristo yonquiatëhuaꞌ, noya ahuantohuatëhuaꞌ, noya noya cancantarihuaꞌ. Co huachi oshahuanacasoꞌ paꞌyatarihuahuëꞌ.

1 Pedro 4:6

Aꞌnaquën nohuitëramasopita nani chiminpi. Piyapi niꞌton, chiminpi. Chiminaponaraihuëꞌ, coꞌhuara chimiyantërasoihuëꞌ, Quisocristo nanamën aꞌchintopi. Natëpi niꞌton, huaꞌyanëna quëran Yosë pochin nanpimiatapi.

1 Juan 1:9

Onporosona co noyahuëꞌ nipatëhuaꞌ, Yosë nontahuaꞌ. “Tëhuënchachin co noyahuëꞌ nicato, oshahuanco,” topatëhuaꞌ, Yosë oshanënpoaꞌ inquitarinpoaꞌ. Co nonpintërinpoahuëꞌ. Quisocristo chiminin niꞌton, nanitërin yaꞌipi oshanënpoaꞌ inquitinpoasoꞌ. Noyápiachin cancan quëtarinpoaꞌ.