1 Pedro 3:17 - Chayahuita (Shahui)

¹⁷ Co noyahuëꞌ nipatëra, parisitacasoꞌ yaꞌhuërin. Aꞌna tahuëriso nipirinhuëꞌ Yosë nohuanton, imarëhuasopitantaꞌ parisitarëhuaꞌ. Noya nipirëhuahuëntaꞌ, piyapi aparisitarinënpoaꞌ. Ina pochin parisitacasoꞌ Yosë nohuantërin.

1 Pedro 3:17 ပူးပေါင်းရင်းမြစ်များ

Mateo 26:39

Amashamiachin paꞌsahuaton, isonconin. Noꞌpaquë huarëꞌ monshomarahuaton, Yosë nontërin: “Quëma nohuantohuatan Tata, nichaꞌëco ama maꞌsha onpoꞌisohuëꞌ. Main oꞌorëso pochin parisitaꞌhuasoꞌ yaꞌhuërin. Co parisitaꞌhuasoꞌ nohuantopirahuëꞌ, quëma nohuantohuatan, noya, tënahuë. Noꞌtëquën yanatëranquën,” itërin.

Mateo 26:42

Ina quëran paantarahuaton, Yosë nontaantarin. —Nohuantohuatan Tata, nichaꞌëco ama maꞌsha onpoꞌisohuëꞌ. Nipirinhuëꞌ co nohuantohuatanhuëꞌ, maꞌsona yaonpotohuatancontaꞌ noya, tënahuë. Noꞌtëquën yanatëranquën, itaantarin.

Hechos 18:21

“Aꞌna tahuëri Yosë nohuantohuachin, huëantarahuë,” tënin. Ina quëran nanchaquë yaꞌcoantarahuaton, paantarin.

Hechos 21:14

Huaꞌquiꞌ nontopiraihuëꞌ, inachachin yonquirin niꞌton: —Noyahuaꞌ. Sinioro nohuantohuachin, paquë nipachin, itërai.

1 Pedro 1:6

Ina yonquiatomaꞌ, capa cancantaramaꞌ. Aꞌna tahuëri Yosë nohuanton, piꞌpian maꞌsha onporamaꞌ. Ipora chachin maꞌsha onpotopirinënquëmahuëꞌ, co huaꞌquiꞌ parisitaramahuëꞌ. Parisitapomarahuëꞌ, oꞌmantacasoꞌ tahuëri yonquiatomaꞌ, noya cancantocoꞌ.

1 Pedro 2:15

Ina Yosë nohuantërin. Aꞌnaquën co Yosë nanamën nitotatonaraihuëꞌ, co yonquipihuëꞌ. Quisocristo imaramaꞌ niꞌton, aꞌnaroáchin yapinorinënquëmaꞌ. Noyasáchin nicoꞌ ama pinoinënquëmaso marëhuëꞌ.

1 Pedro 2:20

Co noyahuëꞌ nipatamaꞌ, anaꞌintarinquëmaꞌ. Ahuantohuatamaꞌ, co ina marëꞌ noya niꞌninquëmahuëꞌ: “Noꞌtëquën anaꞌintohuachinquëmaꞌ, ahuantacasoꞌ yaꞌhuërin,” topi yaꞌipiya. Aꞌna tahuëriso nipirinhuëꞌ noya nipiramahuëꞌ, aparisitarinënquëmaꞌ. Co noꞌhuitatomahuëꞌ, ahuantohuatamaꞌ, Yosë noya niꞌsarinquëmaꞌ.

1 Pedro 3:14

Aꞌna tahuëriso nipirinhuëꞌ imaramaso marëꞌ aparisitohuachinënquëmaꞌ, ama tëꞌhuatocosohuëꞌ. “Quisocristo marëꞌ parisitarëhuaꞌ,” taꞌtomaꞌ, noya cancantocoꞌ. Yosë noya catahuarinquëmaꞌ niꞌton, ama paꞌyancosohuëꞌ.

1 Pedro 4:15

Aꞌnaquën piyapiꞌsasoꞌ co noyahuëꞌ cancantopi. Tëpatopi, ihuatopi, nanan paꞌyatopi inapitasoꞌ anaꞌintacasoꞌ yaꞌhuërin. Ama inapita pochin yonquicosohuëꞌ. Ina marëꞌ parisitohuatëhuaꞌ, tapanacasoꞌ yaꞌhuërin.

1 Pedro 4:19

Napoaton Yosë nohuanton parisitohuatamaꞌ, noya nicoꞌ. “Catahuaco Sinioro chiníquën cancanchi,” itocoꞌ. Yosë chachin nininpoaꞌ. Inasoꞌ co onporontaꞌ naniantarinpoahuëꞌ.