1 Pedro 3:15 - Chayahuita (Shahui)

¹⁵ Yaꞌipi cancanëma quëran Quisocristo yonquicoꞌ. Inasoꞌ huaꞌanëntërinpoaꞌ niꞌton, chinotocoꞌ. Nani tahuëriya chiníquën cancantatomaꞌ, yonquicoꞌ Quisocristo nanamën shaꞌhuicamaso marëꞌ. Ina quëran “¿Onpoatomataꞌ imaramaꞌ?” itohuachinënquëmaꞌ, aꞌnaroáchin noꞌtëquën shaꞌhuitaramaꞌ.

1 Pedro 3:15 ပူးပေါင်းရင်းမြစ်များ

Isaías 1:18

Huëco paꞌahua nonatëhua anoyatahuaꞌ. Quëhuanën quëran aꞌshitërëso pochin naꞌcon oshahuanpiramahuëꞌ, inquitaranquëmaꞌ. Ina inquitatënquëmaꞌ, ocai, piꞌshiro, inapita huiritërinso pochin, anoyacancantaranquëmaꞌ.

Isaías 41:21

Israiroꞌsa copirnonënasoꞌ, Sinioro chachin. Inari mamanshiroꞌsa përaton: “Mamanshiroꞌsanquëmaꞌ, piyapinëhuëpitaroꞌco nihuëntonahuëquë, huëco canpitanta noncoꞌ. Natëaꞌhuainquëmaso marëꞌ canpitanta chiniatoma noncoꞌ.

Isaías 8:12

“Aꞌnapitasoꞌ, tëꞌhuarëꞌna yaꞌhuëpi. Aꞌna huaꞌan ahuëcaiso marëꞌ poꞌoana quëran yonquihuachinara, nanan nahuinin. Napopirinhuëꞌ, co nani napopiquë noꞌtëquën nininhuëꞌ. Napoaton aꞌnapitaso tëꞌhuatopirinahuëꞌ, co canpitaso tëꞌhuatamaso yaꞌhuërinhuëꞌ.

Números 20:12

Moisësë, Aaron, inapitaso napoaponahuëꞌ, Yosëri itapon: —Canpitaso co natëtapomarahuëꞌ naporamaꞌ. Ina niꞌton, israiroꞌsa co chinotërinacohuëꞌ. Yaꞌipi cancanëma quëran natëtoma naporama naporini, israiroꞌsa chinochitonacohuëꞌ. Chinotatonaco: “¡Ma noyacha inaso paya!” ichitonacohuëꞌ. Napoaton canpitantaꞌ, noꞌpaꞌ quëtaranquëmaquë co yaꞌconaramahuëꞌ, itërin.

Números 27:14

Sin inotëro parti niꞌsëma capa iꞌsha niꞌton, israiroꞌsa noꞌhuirinaco. Naporoꞌ catoma chachin camairanquëmaꞌ. Camaipiranquëmahuëꞌ, canpitaso noꞌhuitatoma co noyahuëꞌ ninamaꞌ. Camairanquëmaso chachin ninama naporini, israiroꞌsa noya niꞌitonacohuëꞌ. Miripa iꞌshanaquë naporamaso yonquiato napotaranquën. Inaso iꞌshaꞌ, Catisë parti yaꞌhuërin, itërin.

Hechos 21:39

—Co inacohuëꞌ. Casoꞌ cotio quëmapico. Tarsoquë nasitërahuë. Inasoꞌ panca ninanoꞌ, Sirisia parti yaꞌhuërinsoꞌ. Yaꞌipi piyapiꞌsaꞌ nohuitopi. Isopita piyapiꞌsaꞌ nonchi, topirahuëꞌ, itërin.

Hechos 24:25

Yosë shaꞌhuitërinpoaꞌ noya cancantacaso marëꞌ. Ina catahuarinpoaꞌ co noyahuëꞌ yonquirëhuasopita naniantacasoꞌ. Aꞌna tahuëri coisë pochin nicaton, yaꞌipi piyapiꞌsaꞌ natanarin. Co noyahuëꞌ nipisopita anaꞌintarin,” tënin Paono. Napotohuachina, huaꞌan paꞌpi paꞌyanin. —Nani huachi. Iporasoꞌ paquëꞌ. Aꞌna tahuëri yanontaantahuatënquën, amataantaranquën, itërin.

Colosenses 1:23

Imamiatohuatamaꞌ, Yosë noya niꞌsarinquëma huachi. Noya nanan natanamaꞌ. “Nichaꞌësarinpoaꞌ,” taꞌtomaꞌ, natërama huachi. Natëmiatocoꞌ. Ama, iyaroꞌsaꞌ, nisha nisha yonquicosohuëꞌ. Ama piꞌpian tërantaꞌ aꞌpocosohuëꞌ. Yaꞌipi parti noya nanan chachin aꞌchinapi. Inachachin cantaꞌ aꞌchinarahuë.

Colosenses 1:27

“Quisocristo chachin ayaꞌcoancantaranquëmaꞌ,” itërinpoaꞌ. Canpitantaꞌ nisha piyapinquëmaꞌ nipiramahuëꞌ, yaꞌcoancantërinquëmaꞌ. Yaꞌipinpoaꞌ yaꞌcoancantërinpoaꞌ niꞌton, aꞌna tahuëri Yosëꞌpaꞌ noya noya yaꞌhuëcontarihuaꞌ. Iráca co mantaꞌ ina nitotopirinahuëꞌ, nani anitotërinpoa huachi. Quisocristo nohuitatëhuaꞌ, ina ninarëhuaꞌ. Ma noyacha Tata Yosësoꞌ yonquirinpoa paya, tënëhuaꞌ.

Colosenses 1:5

Iráca noya nanan natanamaꞌ. “Oshanënpoaꞌ inquitatonpoaꞌ, Quisocristo anoyacancantërinpoaꞌ,” itohuachinënquëmaꞌ, noꞌtëquën aꞌchintërinënquëmaꞌ. Aꞌchintohuachinënquëmaꞌ, natëramaꞌ. “Aꞌna tahuëri Yosëꞌpaꞌ noya ananpitaantarinpoaꞌ,” taꞌtomaꞌ, Quisocristo imaramaꞌ. Ina imatomaꞌ, ina tahuëri ninaramaꞌ.

Colosenses 4:6

Noya yonquiatomaꞌ, sanoanan quëran pënëntocoꞌ noya natainënquëmaꞌ. Yashin yashin nontocoꞌ. Aꞌnaya aꞌnaya natanpachinquëmaꞌ, noyasha aꞌpanicoꞌ. Ina pochin nontacaso marëꞌ naꞌcon yonquicoꞌ.

Tito 1:2

Quisocristo imapatëhuaꞌ, aꞌna tahuëri inápaquë quëpantarinpoaꞌ. Yaꞌhuërinꞌpaꞌ yaꞌhuëmiatarihuaꞌ. “Ananpitaantarinpoaꞌ,” taꞌtëhuaꞌ, ina ninarëhuaꞌ. Yosë iráca coꞌhuara isoroꞌpaꞌ acoyátërasohuëꞌ, ninotonpoaꞌ yonquirinpoaꞌ. Inasoꞌ co onporontaꞌ nonpintërinpoahuëꞌ.

Hebreos 3:6

Quisocristoso nipirinhuëꞌ co inpriatohuëꞌ. Yosë huiꞌnin chachin niꞌton, chini chiníquën nanantërin. Paꞌpin natëton, nóya huaꞌanëntarinpoa huachi. Napoaton chiníquën cancantatëhuaꞌ, chiminaquë huarëꞌ Quisocristo natëahuaꞌ. “Co naniantarinpoahuëꞌ,” taꞌtëhuaꞌ, noya cancantahuaꞌ. Imamiatohuatëhuaꞌ, piyapinënpita chachin nisarihuaꞌ.

Hebreos 6:1

Napoaton noya soꞌsorinso pochin noya noya imahuaꞌ. Yaꞌipi Quisocristo nanamën yonquiaꞌahuaꞌ. Yaꞌnan aꞌchintohuatëinquëmara, co sacaihuëꞌ nininsopitaꞌton aꞌchintërainquëmaꞌ. “Co noyahuëꞌ nipatamaꞌ, parisitopiquë pacacasoꞌ yaꞌhuërin niꞌton, yaꞌipi co noyahuëꞌ yonquiramasopita naniantocoꞌ. Naporahuaton, Yosëíchin natëcoꞌ,” itërainquëmaꞌ.

1 Pedro 1:17

Yosë nontohuatamara, “Tata,” itëramaꞌ. Aꞌna tahuëri inasoꞌ coisë pochin niꞌton, yaꞌipi piyapiꞌsaꞌ noꞌtëquën shaꞌhuitarin. Co noyahuëꞌ nipisopita noꞌtëquën anaꞌintarin. Yaꞌipi oshahuaninsopita anaꞌintarin niꞌton, tëꞌhuatacasoꞌ yaꞌhuërin. Chiminaquë huarëꞌ ina yonquiatomaꞌ, noya nicoꞌ.

1 Pedro 3:4

Quisocristo imapatamaꞌ, ama aipi yaꞌnorinsoráchin yonquicosohuëꞌ. Noyápiachin cancantacamasoꞌ naꞌcon naꞌcon yonquicoꞌ. Yosë pochin yonquicasoꞌ yaꞌhuërin. Nitaparamasoꞌ co yaꞌhuëmiatarinhuëꞌ. Cancanënpoa quëran yonquirëhuasopitaso nipirinhuëꞌ, yaꞌhuëmiatarin. Napoaton imoyaroꞌsaꞌ sano cancantocoꞌ. Ama piꞌpian tërantaꞌ noꞌhuitocosohuëꞌ. Nóya cancantohuatamaꞌ, Yosë noya niꞌsarinquëmaꞌ.

1 Samuel 12:7

Iporasoꞌ noya natanco: Sinioronta niꞌsárinco niꞌton, noꞌtëquën ayonquiꞌinquëmaꞌ: “Ina catahuaarinpoaꞌ,” taꞌtomaꞌ, co copirno natanamaso nipirinhuëꞌ. Ina natantatomaꞌ, oshahuanamaꞌ. Paꞌa carinquëma Sinioro nosoroatonpoa catahuarinpoasoꞌ, ayonquiꞌinquëmaꞌ. Shimashonënpoapitanta catahuarinsoꞌ ayonquiꞌinquëmaꞌ.