1 Pedro 2:24 - Chayahuita (Shahui)

²⁴ Quisocristo isoroꞌpaquë oꞌmaton, piyapi chachin nasitimarin. Oshanënpoa marëꞌ corosëquë chiminin. Inaora yaꞌhuërëtërinpoaꞌ. Yaꞌipi co noyahuëꞌ yonquirëhuasopita naniantatëhuaꞌ noya nicacaso marëꞌ chiminin. Corosëquë parisitaton, anoyacancantërinpoaꞌ.

1 Pedro 2:24 ပူးပေါင်းရင်းမြစ်များ

Génesis 22:6

Ihuë Yosë chinotaton ahuiquitacasoꞌ, Isaco apitëntërin. Inaoranta cosoroaꞌhua, pëꞌto raꞌpi, inapita manin. Ina quëran paꞌpi huachi.

Isaías 53:11

Paꞌpi parisitërinso piquëran: “Tëhuënchachin yaꞌipi nanirahuë huachi,” tosarin. Ina nitotaton noya cancantarin. Sinioro piyapinënsoꞌ, noꞌtëquënáchin ninin. Inapoaton naꞌa piyapiꞌsa nichaꞌësarin. Co noyahuëꞌ nipiso marëꞌ parisitaton inapotarin.

Levítico 16:22

Inapotohuachin, chipo inotëro parti chihuëaton, israiroꞌsa oshanëna co piyapi yaꞌhuërinquëhuëꞌ quëpatapon.

Malaquías 4:2

Noya nicatomaco natëramacosopitaso nipirinhuëꞌ, noya coisë pochin ninahuësoꞌ, niꞌsaramaꞌ. Piꞌi aꞌpinpachina aꞌninquëchin maꞌsha quënanëso pochin niꞌsaramaꞌ. Naporoꞌ canpitaso nichaꞌësaranquëma niꞌton, capa cancantaramaꞌ. Ohuacaꞌhuaroꞌsa oncorapipi quëran iꞌsohuatohuachinara, niirëꞌnachin taꞌapiso pochin cancantaramaꞌ.

Mateo 27:26

Napohuachinara, Pirato camaitërin Parapasë ocoicaisoꞌ. Quisososo nipirinhuëꞌ chiníquën ahuihuitërin. Chiníquën huihuitonaꞌ, pëꞌsha pëꞌshatopi. Nani huihuihuachinara, shaꞌhuitërin corosëquë patanantacaiso marëꞌ.

Mateo 5:20

Cotio maistroꞌsaꞌ, parisioroꞌsaꞌ, inapita Yosë quiricanën noya nitotaponaraihuëꞌ, co cancanëna quëran imapihuëꞌ. Canpitantaꞌ co yaꞌipi cancanëma quëran huarëꞌ imapatamahuëꞌ, co onporontaꞌ Yosë huaꞌanëntërinquë yaꞌconaramahuëꞌ,” tënin.

Mateo 8:17

Iráca Isaiasë ninoton, ninshitërin. “Caniopirëhuahuëꞌ, anoyatarinpoaꞌ. Canio inquitarinpoaꞌ,” tënin. Caniaꞌpiroꞌsaꞌ anoyatohuachina, ninorinsoꞌ nanirin huachi.

Marcos 15:15

Ina natanahuaton, ama piyapiꞌsari noꞌhuicaiso marëhuëꞌ Parapasë ocoitërin. Quisososo nipirinhuëꞌ, chiníquën ahuihuitërin. Chiníquën huihuitonaꞌ, pëꞌsha pëꞌshatopi. Ina quëran shaꞌhuitërin corosëquë patanantacaiso marëꞌ.

Lucas 4:18

“Sinioro ispiritonën yaꞌcoancantërinco niꞌton, noya catahuarinco. Naꞌa piyapiꞌsaꞌ co Yosë nohuitatonahuëꞌ, nosorotopi. Napoaton Yosë acorinco noya nanan aꞌchintaꞌhuaso marëꞌ. Sopairi minsëpirinhuëꞌ, ocoiarahuë noya yonquicaiso marëꞌ. Somaraya nininsopita anoyatarahuë. Parisitapisopita nichaꞌësarahuë.

Juan 1:29

Tahuëririnquë inaquë Quisoso huëꞌsarin. Coanshari quënanahuaton, piyapiꞌsaꞌ itërin: “Pasoꞌ quëmapi niꞌcoꞌ. Yosëri aꞌpaimarinsoꞌ. Inasoꞌ carniroaꞌhua pochin nicaton, oshanënpoaꞌ inquitiinpoaso marëꞌ chiminapon.

Juan 19:1

Ina natanahuaton, sontaroꞌsaꞌ camairin Quisoso huihuicaiso marëꞌ. Napohuachina, chiníquën huihuitonaꞌ pëꞌsha pëꞌshatopi.

Hechos 10:35

Nisha piyapiꞌsanquëmaꞌ nipomarahuëꞌ, cancanëma quëran huarëꞌ ina chinotohuatamaꞌ, nohuantarinquëmaꞌ. Noya cancantohuatamaꞌ, noya niꞌsarinquëmaꞌ.

Hechos 10:39

Quirosarinquë naporin. Yaꞌipi cotioroꞌsaꞌ yaꞌhuëpiquëntaꞌ inaporin. Ina quëran corosëquë patanantahuatonaꞌ, tëpapi. Yaꞌipiya quiyari niꞌnai.

Hechos 13:29

Ina quëran yaꞌipi Yosë quiricanënquë ninorinsoꞌ nanihuachina, corosë quëran anohuararahuatonaꞌ, naꞌpi naninquë poꞌmopi.

Hechos 5:30

Tëhuënchachin corosëquë patanantatomaꞌ, Quisoso tëpapiramahuëꞌ, shimashonënpoapita chinotërinso Yosëri chachin ananpitaantarin.

Romanos 6:11

Inapochachin canpitantaꞌ ama huachi oshahuanacamasoꞌ yonquicosohuëꞌ. Quisocristo imaramaꞌ niꞌton, Yosëíchin natëcoꞌ.

Romanos 6:13

Niꞌcoꞌ. Imiramaꞌ, nantëmaꞌ, yaꞌpiramaꞌ, huëratëmaꞌ, nanamëmaꞌ, inapita yaꞌhuëtërinquëmaꞌ. Inapita quëran co noyahuë nicacaso yaꞌhuëpirinhuëꞌ. Ama nohuantocosohuëꞌ. Yosë natëcamasoáchin yonquicoꞌ. Chiminama quëran nanpiantëramaso pochin cancantatomaꞌ, yaꞌipi nonëma quëran huarëꞌ noyasáchin nicoꞌ.

Romanos 6:16

Insosona natëhuatëhuaꞌ, inasoꞌ huaꞌanëntarinpoaꞌ. ¡Nani nitotëramaꞌ ipora! Oshanënpoa natëhuatëhuaꞌ, ina huaꞌanëntarinpoaꞌ. Camaihuachinpoara, co noyahuëꞌ ninëhuaꞌ. Oshanënpoaꞌ co aꞌpoasëhuahuëꞌ chiminpatëhuaꞌ, parisitopiquë paꞌsarëhuaꞌ. Nipirinhuëꞌ, Yosë natëhuatëhuaꞌ, noya nicarihuaꞌ.

Romanos 6:2

¡Co naporinhuëꞌ! Quisocristo imapatëhuaꞌ, chiminëhuaso pochin cancantatëhuaꞌ, co huachi oshahuanacasoꞌ paꞌyatarihuahuëꞌ.

Romanos 6:22

Iporaso nipirinhuëꞌ co huachi oshanëma huaꞌanëntërinquëmahuëꞌ. Yosë nichaꞌërinquëmaꞌ ama huachi oshahuanacamaso marëhuëꞌ. Ina chachin huaꞌanëntërinquëmaꞌ. Napoaton noyápiachin cancantaramaꞌ. Aꞌna tahuëri Yosëꞌpaꞌ nanpimiataramaꞌ.

Romanos 6:7

Chimipisoꞌ co huachi yonquirinhuëꞌ oshahuanacasoꞌ. Inapochachin canpoantaꞌ Quisocristo imapatëhuaꞌ, co huachi oshanënpoa huaꞌanëntërinpoahuëꞌ.

Romanos 7:6

Iráca nisha nisha pënëntërinsoꞌ yaꞌhuërin natëcasoꞌ, Moisësëri ninshitërinsoꞌ. “Co yaꞌipiya natëhuatëhuahuëꞌ, co onporontaꞌ chaꞌësarëhuahuëꞌ,” topi. Apinaꞌpi tashinan pëiquë yaꞌhuërinso pochin nipirëhuahuëꞌ. Iporasoꞌ co huachi Moisësë pënëntërinsoꞌ yonquiarëhuahuëꞌ. Quisocristorëꞌquënpoaꞌ chiminëhuaso pochin ninëhuaꞌ niꞌton, co huachi huaꞌanëntiinpoasoꞌ yaꞌhuërinhuëꞌ. Ispirito Santo catahuarinpoaꞌ cancanënpoa quëran huarëꞌ Yosë natëcasoꞌ. Nasha cancan quëtërinpoaꞌ. Napoaton noya nisarëhuaꞌ.

1 Corintios 15:3

Yaꞌnan aꞌchintaponquëmaꞌ, Yosë anitotërincoso chachin shaꞌhuitëranquëmaꞌ: “Oshanënpoaꞌ inquitinpoaso marëꞌ Quisocristo chiminin,” itëranquëmaꞌ. Iráca Yosë quiricanën quëran ninorinso chachin chiminin.

2 Corintios 6:17

Ina quëran Siniorori itantarin: “Aꞌnaquën co noyahuëꞌ cancantohuachinaꞌ, ama inapitarëꞌquëmaꞌ nipayacosohuëꞌ. Co noyahuëꞌ yonquipisoꞌ tananpitocoꞌ. Inapotohuatamaꞌ, noya niꞌsaranquëmaꞌ.

Gálatas 3:13

Co nanitërëhuahuëꞌ noꞌtëquën natëcasoꞌ niꞌton, anaꞌintinpoasoꞌ yaꞌhuërin. Quisocristoso nipirinhuëꞌ nichaꞌërinpoaꞌ. Canpoaꞌ yaꞌhuërënamënpoaꞌ chiminin. Ina, Yosëri anaꞌintërin. Quiricanën quëran naporin: “Piyapi paꞌpi co noyahuëꞌ nipachina, naraquë achinpirahuatëꞌ, chiníquën anaꞌintërëꞌ. Nani Yosëri aꞌporin,” tënin quiricanënquë. Canpoasoꞌ anaꞌintinpoasoꞌ yaꞌhuëpirinhuëꞌ, naraquë chachin Quisocristo apatanantohuachinara, oshanënpoa marëꞌ parisitërin. Inaquë parisitaton, nichaꞌërinpoaꞌ.

Efesios 5:9

Tahuëri pochin cancantohuatamaꞌ, nóya nisaramaꞌ. Noꞌtëquënáchin yonquiatomaꞌ, noyápiachin cancantaramaꞌ.

Filipenses 1:11

Quisocristo catahuahuachinquëmaꞌ, noyasáchin nisaramaꞌ. Ina quëran aꞌnapitantaꞌ nicatënquëmaꞌ, Yosë yonquiapi. “Ma noya Yosëri catahuarin niꞌton, noya nipi. Ma noyacha Yosëso paya,” tosapi.

Colosenses 2:14

Iráca Moisësë pënëntërin nani maꞌsha natëcaso marëꞌ. Co inquënpoa tërantaꞌ nanitaparëhuahuëꞌ yaꞌipi natëcasoꞌ niꞌton, oshahuanëhuaꞌ. Ina marëꞌ anaꞌintinpoaso nipirinhuëꞌ, Quisocristo corosëquë chiminaton, nichaꞌërinpoaꞌ niꞌton, Yosë noya niꞌninpoaꞌ.

Colosenses 2:20

Iráca Quisocristo chiminin. Canpitantaꞌ ina imapatamaꞌ, inarëꞌquëmaꞌ chiminamaso pochin ninamaꞌ niꞌton, co huachi aꞌnapita pochin nisha nisha chiníquën nanantopisopita imaramahuëꞌ. Inapitasoꞌ inahuara yonquinëna quëran nisha aꞌchinpi. “Nani maꞌsha natëhuatoi, chaꞌësarai,” taꞌtonaꞌ, “Ama ina caꞌcosohuë. Ama piꞌnicosohuëꞌ. Ama sëꞌhuayátëracosohuëꞌ,” itarinënquëmaꞌ. ¿Maꞌmarëtaꞌ ipora huantaꞌ ina natëcamasoꞌ yonquiramaꞌ? tënahuë yonquiato.

Colosenses 3:3

Niꞌcoꞌ. Chimipisoꞌ co huachi isoroꞌpaꞌ yonquirinhuëꞌ. Inapochachin canpitantaꞌ Quisocristorëꞌquëmaꞌ chiminamaso pochin cancantatomaꞌ, co maꞌsharáchin yonquiaramahuëꞌ. Aꞌna tahuëri huachi Quisocristorëꞌquënpoaꞌ Yosëꞌpaꞌ noya noya yaꞌhuëcontarihuaꞌ.

Hebreos 10:10

Quisocristo piyapi chachin nasitimarahuaton, oshanënpoa marëꞌ chiminin. Yosë nohuanton, aꞌnaroíchin chiminin. Canpoantaꞌ ina imapatëhuaꞌ, oshanënpoaꞌ inquitërinpoaꞌ. Noyápiachin cancan quëtërinpoa huachi.

Hebreos 10:5

Napoaton Quisocristo isoroꞌpaquë yaoꞌmahuachina, paꞌpin itapon: “Iporaso huachi maꞌsharoꞌsaꞌ tëpacaisoꞌ, ofrenda quëcacaisoꞌ, inapita co nohuantëranhuëꞌ. Quëma nohuanton, piyapi chachin nasitomarahuë natëaꞌhuanquënso marëꞌ.

Hebreos 12:13

Yosë iranën noꞌtëquën imapatamaꞌ, co pëshonaramahuëꞌ. Yosë catahuarinquëmaꞌ noya noya yonquicamaso marëꞌ. Aꞌnapitantaꞌ nicatënquëmaꞌ, chiníquën cancantapi. Co huachi sonpacha pochin cancantapihuëꞌ.

Hebreos 7:26

Quisocristoíchin nanan anoyatërinpoaꞌ. Inasoꞌ corto huaꞌan chini chiníquën nanantërinso pochin nicaton, nóya ninin. Co piꞌpian tërantaꞌ oshahuaninhuëꞌ. Co nëꞌhuëtërinso pochin nininhuëꞌ. Co oshahuanoꞌsa pochin cancantërinhuëꞌ. Inápaquë panantahuachina, Yosëri chini chiníquën nanan quëtërin.

Hebreos 9:28

Quisocristontaꞌ aꞌnaroíchin chiminin oshanënpoaꞌ inquitinpoaso marëꞌ. Ina quëran inápaquë panantarin. Nani oshanënpoaꞌ inquitohuachinpoaꞌ, aꞌna tahuëri oꞌmantararin. “¡Ma noyacha Quisocristosoꞌ niꞌton, nichaꞌërinpoa paya!” taꞌtëhuaꞌ, ina ninarëhuaꞌ. Oꞌmantahuachin, imarëhuasopita maquimarinpoa huachi.

Santiago 5:16

Napoaton maꞌsona tërantaꞌ co noyahuëꞌ nipatëhuaꞌ, imarëhuasopita capini nishaꞌhuitahuaꞌ. “Ina marëꞌ casoꞌ oshahuanahuë,” nitahuaꞌ. Itohuaran capini Yosë nontahuaꞌ anoyachinpoaꞌ. Yaꞌipi co noyahuëꞌ yonquirëhuasopita naniantohuatëhuaꞌ, chiníquën ina nontohuatëhuaꞌ, naꞌcon catahuarinpoaꞌ.

1 Juan 2:29

Quisocristo noyasáchin ninin, nitotërëhuaꞌ. Napoaton Yosë huëntonënquë yaꞌconpatëhuaꞌ, noya nicarihuaꞌ. Inpitasona noya nipachinaꞌ, nani Yosëri anoyacancantërin niꞌton, huiꞌnin pochin niꞌsarin, tënëhuaꞌ.

1 Juan 3:7

Niꞌcona, apiaꞌhuaroꞌsaꞌ, nisha aꞌchinaꞌpiroꞌsaꞌ nonpintochinënquëmaꞌ. Noya nipatëhuaꞌ, noya cancantarëhuaꞌ. Quisocristo noya niꞌton, ina pochin cancantacasoꞌ yaꞌhuërin.

Apocalipsis 22:2

Ninano huáncana iiꞌ paꞌsarin. Cato yonsan quëran chachin nara papotërin. Nanpirin nara itopisoꞌ. Nani yoqui nitarin. Shonca catoroꞌ nitasoꞌ, piꞌipi naniarin. Monoquëontaꞌ yaꞌipi piyapiꞌsa noya yaꞌhuëcaiso marëꞌ yaꞌhuërin. Co huachi canioponahuëꞌ.