1 Pedro 2:19 - Chayahuita (Shahui)

¹⁹ Topinan quëran anaꞌintohuachinquëmaꞌ, ama noꞌhuicosohuëꞌ. Yosë yonquiatomaꞌ, ahuantocoꞌ. Ina marëꞌ Yosë noya niꞌsarinquëmaꞌ.

1 Pedro 2:19 ပူးပေါင်းရင်းမြစ်များ

Salmos 69:4

Ainëhuë huaꞌhuayátërahuë nipirinhuëꞌ, ina quëran naꞌcon naꞌcon inimicotërinacosopita naꞌarin. Co manta onpotopirahuëꞌ, noꞌhuirinaco. Inimicoroꞌsa naꞌatonaꞌ, topinan quëran yatëparinaco. Co manta ihuatopirahuëꞌ, ayanaꞌhuaso camaiárinaco.

Lucas 6:32

Amiconëmapitaráchin nosorohuatamaꞌ, co noya noya nisaramahuëꞌ. Oshahuanoꞌsa tërantaꞌ inahua capini ninosoropi.

Juan 15:21

Napoaponahuëꞌ, imaramaco niꞌton, naꞌcon naꞌcon piyapiꞌsaꞌ aparisitarinënquëmaꞌ. Tata Yosë aꞌpaimarincosoꞌ co nohuitopihuëꞌ niꞌton, noꞌhuiarinënquëmaꞌ.

Hechos 11:23

Inaquë canconahuaton, “Tëhuënchachin nisha piyapiꞌsantaꞌ imasapi. Yosëri naꞌcon catahuarin,” taꞌton, noya cancantërin. Pirnapisoꞌ noya quëmapi. Yosë noya natërin. Ispirito Santori noyá yaꞌcoancantërin niꞌton, piyapiꞌsaꞌ pënënin: “Ama Sinioro aꞌpocosohuëꞌ. Yaꞌipi cancanëma quëran huarëꞌ imamiatocoꞌ,” itërin. Pënënpachina, aꞌnapitantaꞌ Quisoso imapi.

Romanos 13:5

Napoaton huaꞌanoꞌsaꞌ natëcoꞌ anaꞌintochinënquëmaꞌ. Isontaꞌ yonquicasoꞌ yaꞌhuërin: “Yosëri acorin natëcaso marëꞌ,” taꞌtomaꞌ, natëcoꞌ.

1 Corintios 15:10

Inaora nohuanton, Yosë catahuarinco. Co catahuarincohuëꞌ naporini, co mantaꞌ nanichitohuëꞌ. Catahuahuachincora, paꞌnahuë nanamën aꞌchinapo. Co topinan quëran catahuarincohuëꞌ. Casoꞌ naꞌcon naꞌcon Yosë marëꞌ sacatërahuë. Co carisoꞌ piyapiꞌsaꞌ anoyacancantërahuëꞌ. Yosë achinicancaninco aꞌchinaꞌhuaso marëꞌ. Ina catahuarinco niꞌton, aꞌchinpatëra naꞌa piyapiꞌsaꞌ imasapi.

2 Corintios 1:12

Yosë niꞌsárincoi niꞌton, noꞌtëquën shaꞌhuitarainquëmaꞌ. Co piꞌpian tërantaꞌ nonpintërainquëmahuëꞌ. Noyápiachin cancantatoi, yaꞌipi parti aꞌchinai. Co quiyaora yonquinëhuëi quëran aꞌchintërainquëmahuëꞌ. Yosë inaora nohuanton, catahuarincoi niꞌton, noya ninai. Ina marëꞌ noya cancantërai.

2 Corintios 8:1

Isontaꞌ iyaroꞌsaꞌ yashaꞌhuitëranquëmaꞌ. Masitonia parti naꞌa piyapiꞌsaꞌ Quisocristo imasapi. Nisha nisha ninanoquë niyontonatonaꞌ, Yosë chinotapi. “Yosë naꞌcon nosororinpoaꞌ,” taꞌtonaꞌ, aꞌnapita noya nosoroapi. Yosëri chachin catahuarin ina pochin cancantacaiso marëꞌ.

2 Timoteo 1:12

Ina marëꞌ aparisitopirinacohuëꞌ, co tapanato yaaꞌporahuëꞌ. Quisocristo imamiatarahuë. Ina nohuitato, inasáchin natërahuë. Yaꞌipi nanitaparin. Nani shaꞌhuitërinco nanamën aꞌchinaꞌhuasoꞌ niꞌton, noya aꞌpaiarinco. Oꞌmantaquë huarëꞌ nanamën yaꞌhuëmiatarin, tënahuë.

Hebreos 10:2

Oshanënaꞌ inquipi naporini, co nani piꞌiquë naquëranchin naquëranchin maꞌsha tëpaꞌitonahuëꞌ. Cancanënaꞌ anoyatopi naporini, noyápiachin cancanchitonahuëꞌ.

1 Pedro 2:20

Co noyahuëꞌ nipatamaꞌ, anaꞌintarinquëmaꞌ. Ahuantohuatamaꞌ, co ina marëꞌ noya niꞌninquëmahuëꞌ: “Noꞌtëquën anaꞌintohuachinquëmaꞌ, ahuantacasoꞌ yaꞌhuërin,” topi yaꞌipiya. Aꞌna tahuëriso nipirinhuëꞌ noya nipiramahuëꞌ, aparisitarinënquëmaꞌ. Co noꞌhuitatomahuëꞌ, ahuantohuatamaꞌ, Yosë noya niꞌsarinquëmaꞌ.

1 Pedro 4:15

Aꞌnaquën piyapiꞌsasoꞌ co noyahuëꞌ cancantopi. Tëpatopi, ihuatopi, nanan paꞌyatopi inapitasoꞌ anaꞌintacasoꞌ yaꞌhuërin. Ama inapita pochin yonquicosohuëꞌ. Ina marëꞌ parisitohuatëhuaꞌ, tapanacasoꞌ yaꞌhuërin.