1 Pedro 2:16 - Chayahuita (Shahui)

¹⁶ “Yosë nichaꞌërinpoaꞌ,” taꞌtomaꞌ, noya yonquicoꞌ. Iráca nanan co natëcasoꞌ yaꞌhuëpirinhuëꞌ, ama ina yonquiatomaꞌ tëhuëcosohuëꞌ. Yosë huaꞌanëntërinquëmaꞌ niꞌton, ina nohuantërinsoáchin natëcoꞌ.

1 Pedro 2:16 ပူးပေါင်းရင်းမြစ်များ

Mateo 23:13

Ina quëran Quisosori cotio maistroꞌsaꞌ, parisioroꞌsa inapita pënënaton itapon: “Cotio maistroꞌsanquëmaꞌ, parisioroꞌsanquëmaꞌ, canpitaso nonpintënquëma niꞌton, ¡maꞌhuantacha nisarama paya! Co noꞌtëquën aꞌchinamahuëꞌ niꞌton, Yosë iranën yaꞌcopiatë pochin nitëramaꞌ. Co noꞌtëquën Yosë imatomahuëꞌ, co canpita tërantaꞌ Yosë huaꞌanëntërinquë yaꞌconaramahuëꞌ. Aꞌnapitantaꞌ yayaꞌconpirinahuëꞌ, co catahuaramahuëꞌ yaꞌconacaisoꞌ. Canpita nonaninënquëmaꞌ niꞌton, inapitantaꞌ co yaꞌconpihuëꞌ. [

Juan 15:22

Co oꞌmato, aꞌchintërahuëꞌ naporini, co aꞌporinacoso marëꞌ oshahuaintonahuëꞌ. Nani aꞌchintopirahuëꞌ. Co natëtonacohuëꞌ, oshahuanpi niꞌton, Yosëri anaꞌintarin.

Romanos 6:18

Iporasoꞌ, co huachi oshanëma camaiarinquëmahuëꞌ. Nasha huaꞌanëmaꞌ yaꞌhuëtërinquëmaꞌ. Quisocristo natëtomaꞌ, noya nisaramaꞌ.

Romanos 6:22

Iporaso nipirinhuëꞌ co huachi oshanëma huaꞌanëntërinquëmahuëꞌ. Yosë nichaꞌërinquëmaꞌ ama huachi oshahuanacamaso marëhuëꞌ. Ina chachin huaꞌanëntërinquëmaꞌ. Napoaton noyápiachin cancantaramaꞌ. Aꞌna tahuëri Yosëꞌpaꞌ nanpimiataramaꞌ.

1 Corintios 7:22

Patron marëꞌ sacatapomarahuëꞌ, Yosë huayonpachinquëmaꞌ, oshanëmaꞌ inquitatënquëmaꞌ, nichaꞌërinquëmaꞌ. Ina yonquiatomaꞌ, co huachi sëtacasoꞌ yaꞌhuërinhuëꞌ. Inapochachin aꞌnaquëmaꞌ co patron asacatopirinquëmahuëꞌ. Yosë nichaꞌërinquëmaꞌ niꞌton, ina naꞌcon naꞌcon natëcamasoꞌ yaꞌhuërin. Yosë piyapinënpita ninamaꞌ.

Gálatas 5:1

Quisocristo nichaꞌërinpoaꞌ inasáchin yonquiatëhuaꞌ noya cancantacaso marëꞌ. Ina imapatëhuaꞌ, catahuarinpoaꞌ noya nicacasoꞌ. Napoaton ama naquëranchin iráca pënëntërinsoꞌ imahuasohuëꞌ. Quisocristoráchin yonquiaꞌahuaꞌ.

Gálatas 5:13

Ina pochin, iyaroꞌsaꞌ, nontaranquëmaꞌ. Canpitasoꞌ Quisocristo nohuantërinquëmaꞌ. Nichaꞌërinquëmaꞌ ama huachi tëꞌhuarëꞌquëmaꞌ yaꞌhuëcamaso marëhuëꞌ. Co huachi yaꞌipi iráca pënëntërinsoꞌ imacasoꞌ yaꞌhuëpirinhuëꞌ, co Yosë nohuantërinhuëꞌ oshahuanacamasoꞌ. Quisocristo imapatamaꞌ, co noyahuëꞌ yonquiramasoꞌ naniantacasoꞌ yaꞌhuërin. Ninosoroatomaꞌ, nicatahuacoꞌ noya cancantacamaso marëꞌ. Aꞌnapita naꞌcon naꞌcon yonquicoꞌ.

Efesios 6:6

Aꞌnaquënsoꞌ patroni niꞌpachinaꞌ, chiníquën sacatërin. Co niꞌpachinahuëꞌ, chiroton co sacatërinhuëꞌ. Canpitaso nipirinhuëꞌ patron co niꞌpirinquëmaontaꞌ, noya sacatocoꞌ Quisocristo noya niꞌinquëmaꞌ. Yosë natëtomaꞌ, yaꞌipi cancanëma quëran noya nicoꞌ.

Colosenses 3:24

Inasoꞌ noꞌtëquën acanaarinpoaꞌ. Inápaquë noya noya acoarinpoaꞌ. Quisocristo tëhuënchinsoꞌ huaꞌanëntërinpoaꞌ. Napoaton noya natëcoꞌ.

1 Tesalonicenses 2:5

Co noyasha nonatoi, yanonpintërainquëmahuëꞌ. Co canacaꞌhuaiso marëꞌ napotërainquëmahuëꞌ. Yosë niꞌsárincoi, noꞌtëquën nontërainquëmaꞌ.

Santiago 1:25

Nipirinhuëꞌ, natëhuatamaꞌ, noya nisaramaꞌ. Nasha nanansoꞌ nóya. Canpitaora nohuanton, ina natëhuatamaꞌ, co sopai camaiarinquëmahuëꞌ. Nani tahuëri Yosë nanamën yonquicoꞌ. Natanpatamaꞌ, ama naniantocosohuëꞌ. Noya natëhuatamaꞌ, Yosë catahuarinquëmaꞌ noya nicacamaso marëꞌ.

Santiago 2:12

Quisocristo imapatëhuaꞌ, nasha nanan shaꞌhuitërinpoaꞌ. Nichaꞌërinpoaꞌ niꞌton, nanitërëhuaꞌ nóya nicacasoꞌ. Ina nanan chachin yonquiaton, aꞌna tahuëri Yosë coisë pochin nontarinpoaꞌ. Niꞌton, piyapi nosoroatomaꞌ, noya nicoꞌ, noya nontocoꞌ.

2 Pedro 2:19

“Co insontaꞌ natëcasoꞌ yaꞌhuërinhuëꞌ. Canpitaora nohuanton yaꞌhuëcoꞌ. Maꞌsona tërantaꞌ yanipatamaꞌ, nicoꞌ. Inapohuatamaꞌ, capa cancantaramaꞌ,” itopirinënquëmahuëꞌ, co inapita tërantaꞌ inahuara nohuanton yaꞌhuëpihuëꞌ. Sopai nohuanton, noꞌpipi, monshihuanpi, co noyahuëꞌ nipi. Insosona minsëhuachinpoaꞌ, huaꞌanëntërinpoaꞌ.

Judas 1:4

Tëhuënchachin aꞌnaquënsoꞌ nonpin nanan aꞌchintarinënquëmaꞌ. Paꞌpi co noyahuëꞌ inapitasoꞌ. “Quiyantaꞌ imarai,” taponaraihuëꞌ, co noꞌtëquën aꞌchinpihuëꞌ. “Maꞌsona nohuantërëhuaso niahuaꞌ. Yosë nosororinpoaꞌ niꞌton, co anaꞌintarinpoahuëꞌ,” taꞌtonaꞌ, paꞌpi co noyahuëꞌ nipi. Noꞌpipi, monshihuanpi, aꞌnaratipita nipi. Naporahuatonaꞌ, co tëhuënchachin Quisocristo imapihuëꞌ, inasáchin natëcaso nipirinhuëꞌ. Ina marëꞌ Yosëri chiníquën anaꞌintarin. Iráca quëra huarëꞌ nani yonquirin anaꞌintacasoꞌ. Napoaton niꞌcona canpitantaꞌ nonpintochinënquëmaꞌ. Chiníquën cancantatomaꞌ, noꞌtëquën aꞌchincoꞌ.