1 Pedro 2:12 - Chayahuita (Shahui)

¹² Co imapisopitahuëꞌ pinorinënquëmaꞌ. “Co noyahuëꞌ nipi,” topi. Ina nipirinhuëꞌ, noyasáchin nicoꞌ niꞌinënquëmaꞌ. Ina quëran aꞌna tahuëri Yosëri catahuarin niꞌton, noꞌtëquën yonquihuachinaꞌ, yonquiarinënquëmaꞌ. “Ma noyacha Yosëri catahuarin niꞌton, noya nipi paya,” tosapi.

1 Pedro 2:12 ပူးပေါင်းရင်းမြစ်များ

Salmos 37:14

Inpioroꞌsasoꞌ, sahuëni, pëꞌchinan, inapita quihuípi. Saꞌahuaroꞌsaꞌ, sano piyapiroꞌsaꞌ, noya piyapiroꞌsaꞌ, inapita tëpacaiso marëꞌ inapita ohuarapi.

Daniel 6:4

Huaꞌanoꞌsaꞌ, chirinchiroꞌsaꞌ, inapitariso napoaponahuëꞌ, co quëꞌyapihuëꞌ. Inapoatona shaꞌhuirapicaiso marëꞌ maquë tëranta tëhuërinsoꞌ yonípi. Naniriso noyasáchin nisahuaton, co piꞌpian tëranta ihuatërinhuëꞌ. Napoaton co nanitopihuëꞌ shaꞌhuirapicaisoꞌ.

Mateo 10:25

Napoaton noꞌhuihuachinënquëmaꞌ, co ina marëꞌ sëtacasoꞌ yaꞌhuërinhuëꞌ. Nani noꞌhuirinaco cantaꞌ. ‘Sopainquën,’ itërinaco niꞌton, canpitanta ina pochachin nontarinënquëmaꞌ,” itërin Quisosori.

Mateo 5:11

Imaramacoso marëꞌ aꞌnaquën noꞌhuiarinënquëmaꞌ, ahuëarinënquëmaꞌ, pinosarinënquëmaꞌ, nisha nisha nonpinapiarinënquëmaꞌ. Napotopirinënquëmahuëꞌ, ama sëtocosohuëꞌ. Ina marëꞌ Yosë noya niꞌsarinquëmaꞌ niꞌton, nóya cancantocoꞌ.

Mateo 5:16

Inapochachin canpitantaꞌ aꞌpininso pochin nicatomaꞌ, noyasáchin nicoꞌ. Aꞌnapita nicatënënquëmaꞌ: ‘Ma noya Tata Yosëri catahuarin niꞌton, noya nisapi,’ tosapi,” tënin.

Mateo 9:8

Piyapiꞌsaꞌ ina nicatonaꞌ, paꞌyanpi. —¡Ma noyacha Yosëri catahuarin paya! Piyapi niponahuëꞌ chiníquën nanan quëtërin paya, topi.

Lucas 1:68

“¡Ma noyacha Tata Yosësoꞌ huaꞌanëntërinpoa paya! Piyapinënpitanpoaꞌ yonquiatonpoaꞌ, nichaꞌësarinpoaꞌ.

Lucas 19:44

Yaꞌconahuatonaꞌ, pëinëmapita ohuatapi. Co aꞌna naꞌpi tërantaꞌ niyaꞌhuiritarinhuëꞌ. Yaꞌipinquëmaꞌ taꞌhuantaramaꞌ. Nichaꞌëcaꞌhuanquëmaso marëꞌ oꞌmapirahuëꞌ. Co nohuantëramacohuëꞌ niꞌton, Yosë anaꞌintarinquëma huachi,” tënin Quisoso.

Lucas 6:22

Yosë quëran quëmapico niꞌto, imaramaco. Imaramacoso marëꞌ aꞌnaquën noꞌhuiarinënquëmaꞌ. Co huachi quëꞌyarinënquëmahuëꞌ. Pinosarinënquëmaꞌ. Nonpinapiarinënquëmaꞌ. Napotopirinënquëmahuëꞌ, ama sëtocosohuëꞌ. Ina marëꞌ Yosë noya niꞌsarinquëma niꞌton, nóya cancantocoꞌ.

Juan 13:31

Cotasë nani pipihuachina, Quisoso itantarincoi: —Yosë quëran quëmapico niꞌto, apira noꞌtëquën Yosë natëarahuë. Napoaton nóya niꞌsarinco. Piyapiꞌsaꞌ niꞌpachinaco: “Ma noyacha Yosësoꞌ niꞌton, naꞌcon catahuarin paya,” tosapi.

Hechos 15:14

Iya Simon nani shaꞌhuitërinpoaꞌ. Yosë nohuanton, inaꞌton nisha piyapiꞌsaꞌ aꞌchintërin. Aꞌchintohuachina, aꞌnaquën imasapi, Yosëri huëntonënquë ayaꞌconin. Inapitantaꞌ piyapinënpita pochachin niꞌsarin.

Hechos 24:13

Topinan quëran nonpinapirinaco. Naꞌcon shaꞌhuirapipirinacohuëꞌ, niꞌnincoso chachinso co yaꞌhuërinhuëꞌ.

Hechos 25:7

Cotioroꞌsaꞌ Quirosarin quëran nani oꞌmapi niꞌton, Paono huëꞌpachina, ahuancanapirahuatonaꞌ, naꞌcon shaꞌhuirapiapi. Nisha nisha shaꞌhuirapipirinahuëꞌ, co niꞌninso chachin yaꞌhuërinhuëꞌ.

Hechos 28:22

Nipirinhuëꞌ, yanatanainquën. “Quisoso imapisopita co noyahuëꞌ,” topi natantërai. Yaꞌipi parti napopi. Napoaton shaꞌhuitocoi. ¿Maꞌtaꞌ quëma aꞌchinan?

Romanos 12:17

Aꞌna piyapi maꞌsha onpotohuachinquëmaꞌ, ama iꞌhuërëtocosohuëꞌ. Noya nicoꞌ aꞌnapitantaꞌ catahuacaso marëꞌ.

Romanos 13:13

Tahuëri nipachina, aꞌninquëchin niꞌton, noyasáchin ninëꞌ. Aꞌnaquënso nipirinhuëꞌ pitasachin paꞌyatopi. Naꞌa tahuëri nansarápi, oꞌosápi, coshatápi, noꞌpiápi. Ama pitasoꞌ paꞌyatocosohuëꞌ. Ama noꞌpicosohuëꞌ. Ama piꞌpisha tërantaꞌ nimonshitacamasoꞌ yonquicosohuëꞌ. Ama ninoꞌhuicosohuëꞌ. Ama aꞌna piyapi noyapatomaꞌ, noꞌhuicosohuëꞌ.

Romanos 14:18

Ina pochin Quisocristo imapatëhuaꞌ, Yosë noya niꞌsarinpoaꞌ. Piyapiꞌsantaꞌ noya niꞌsarinpoaꞌ.

Romanos 15:9

Nisha piyapiꞌsarintaꞌ imacaiso marëꞌ oꞌmarin. Aꞌchintohuachinara, inahuantaꞌ Yosë chinotapi. “Ma noyacha nosororinpoa paya,” tosapi. Quiricanënquë ninshitopi. “Nisha nisha piyapiꞌsaꞌ yaꞌhuërinquë, Sinioro, chinotaranquën. Yonquiatënquën, cantararahuë,” tënin.

1 Corintios 14:25

Cancanëna quëran yonquipisopita aꞌninquëchin shaꞌhuitapi niꞌton, ina yonquiatonaꞌ, oshanëna marëꞌ sëtapi. Isonahuatonaꞌ, Yosë chinotapi: “Tëhuënchachin Yosë catahuarinquëmaꞌ,” itarinënquëmaꞌ.

2 Corintios 1:12

Yosë niꞌsárincoi niꞌton, noꞌtëquën shaꞌhuitarainquëmaꞌ. Co piꞌpian tërantaꞌ nonpintërainquëmahuëꞌ. Noyápiachin cancantatoi, yaꞌipi parti aꞌchinai. Co quiyaora yonquinëhuëi quëran aꞌchintërainquëmahuëꞌ. Yosë inaora nohuanton, catahuarincoi niꞌton, noya ninai. Ina marëꞌ noya cancantërai.

2 Corintios 13:7

Canpita marëꞌ Yosë nontarai. “Catahuaquëꞌ noyasáchin niinaꞌ,” itërai. Co aꞌnapita noya nicainacoiso marë naporaihuëꞌ. Canpita noya noya imacamaso marëꞌ naporai. Aꞌnapita co noyahuëꞌ yonquiarapipirinacoihuëꞌ, co ina yonquiraihuëꞌ.

2 Corintios 8:21

Noyasáchin nisarai Yosë noya nicaincoiso marëꞌ. Piyapiꞌsantaꞌ noya nicainacoisoꞌ nohuantërai.

Efesios 2:3

Iráca yaꞌipinpoaꞌ co Yosë natërëhuahuëꞌ. Co noyahuëꞌ yonquiatëhuaꞌ, co noyahuëꞌ ninëhuaꞌ. Canpoara nohuantërëhuasoráchin ninëhuaꞌ. Yanoꞌhuitohuatëhuara, noꞌhuitërëhuaꞌ. Yanoꞌpihuatëhuara, noꞌpirëhuaꞌ. Yaahuëtohuatëhuara, ahuëtërëhuaꞌ. Ina marëꞌ yaꞌipinpoaꞌ anaꞌintinpoasoꞌ yaꞌhuërin.

Efesios 4:22

Iráca paꞌpi co noyahuëꞌ ninamaꞌ. Noꞌpiramaꞌ, monshihuanamaꞌ, nisha nisha yonquiramaꞌ. Inapohuatamara, “noya cancantarëhuaꞌ,” topiramahuëꞌ, ninonpintëramaꞌ. Co tëhuënchachin noya cancantëramahuëꞌ. Iráca naporamasoꞌ chanatërinso pochin Yosë niꞌninquëmaꞌ. Iporasoꞌ yaꞌipi co noyahuëꞌ yonquiramasopita naniantoco huachi.

Filipenses 1:27

Iporasoꞌ iyaroꞌsaꞌ nóya nicoꞌ. Quisocristo nanamën yonquiatomaꞌ, ina pochachin cancantocoꞌ. Yosë huëntonënquë yaꞌconamaꞌ niꞌton, ina pochin cancantacasoꞌ yaꞌhuërin. Nicaponquëmaꞌ paꞌsamarahuë. Co aꞌnaꞌ nanitapohuëꞌ nimara. Ina niponahuëꞌ, nani tahuëri noya nicoꞌ noya nanan natanchi. Yaꞌipinquëmaꞌ, iyaroꞌsaꞌ, imamiatocoꞌ. Ama aꞌnayanquëma tërantaꞌ nisha yonquicosohuëꞌ. Napopináchin yonquiatomaꞌ, Quisocristo nanamën aꞌchinácoꞌ. Inapohuatamaꞌ, natantohuato, nóya cancantarahuë huachi.

Filipenses 4:8

Isoíchin iyaroꞌsaꞌ pënënaranquëmaꞌ. Noꞌtën nanansáchin yonquicoꞌ. Noya imatonaꞌ, noya nipisopita yonquicoꞌ. Ama nonpin nananoꞌsaꞌ natëtocosohuëꞌ. Noyápiachin cancantocoꞌ. Aꞌnapita noyasáchin yonquirapicoꞌ. Noya nahuininsoráchin yonquicoꞌ. Aꞌnapita noya nipisoꞌ yonquiatomaꞌ: “Ma noyacha Yosëri catahuarin paya,” itocoꞌ. Ina pochin yonquihuatamaꞌ, Yosë noya niꞌsarinquëmaꞌ.

1 Tesalonicenses 4:12

Inapohuatamaꞌ, noya yaꞌhuaramaꞌ. Co imapisopitahuëntaꞌ noya niꞌsarinënquëmaꞌ. Napohuatamaꞌ, co mantaꞌ pahuantarinquëmahuëꞌ. Co topinan maꞌpatacasoꞌ yaꞌhuëaponhuëꞌ.

1 Timoteo 2:2

Copirnoroꞌsa marëꞌ Yosë nontocoꞌ noya huaꞌanëntacaiso marëꞌ. Yaꞌipi huaꞌanoꞌsa marëꞌ Yosë nontocoꞌ noya nicacaiso marëꞌ. Noya huaꞌan nipachin, co aquëtëꞌ piyapiꞌsaꞌ ninoꞌhuiapihuëꞌ. Sano yonquiatëhuaꞌ, noya yaꞌhuarihuaꞌ. Ina quëran Yosë yonquiatëhuaꞌ, noya nisarihuaꞌ.

1 Timoteo 4:12

Co mashonquënhuëꞌ niponahuëꞌ, noya pënëntëquëꞌ mashoroꞌsantaꞌ natëinënquën. Yaꞌipi piyapiꞌsaꞌ noya nontëquëꞌ. Nosoroaton, catahuaquëꞌ. Cancanën quëran huarëꞌ Yosë natëquëꞌ. Sano yonquiaton, noyápiachin cancantëquëꞌ. Noyasáchin niquëꞌ imapisopita nonainënquënso marëꞌ.

1 Timoteo 5:10

Noya nininsoráchin acoꞌinaꞌ. Iso pochin nipisopita: Huaꞌhuinpita noya asoꞌsorinsoꞌ. Niꞌtoroꞌsaꞌ huëꞌpachinara, oꞌshitërinsoꞌ. Co mantaꞌ apirarinsohuëꞌ. Piyapinën pochin cancantaton, imapisopita catahuarinsoꞌ. Parisitopisopita nosororinsoꞌ. Noyasáchin nininsoꞌ. Ina pochin nipisopita acoꞌinaꞌ.

Hebreos 13:18

Quiya marëꞌ Yosë nontocoꞌ. Noya nisarai, taꞌtoi, noyápiachin cancantërai. Yaꞌipi cancanëhuëi quëran Yosë yanatërai.

Hebreos 13:5

Ama coriquiráchin paꞌyatocosohuëꞌ. Co naꞌcon maꞌsha yaꞌhuëtopirinquëmahuëꞌ, sano cancantocoꞌ. Ama naꞌcon naꞌcon nohuantocosohuëꞌ. Yosë chachin nani shaꞌhuitërinpoaꞌ. “Co onporontaꞌ pataranquëmahuëꞌ. Co naniantaranquëmahuëꞌ,” itërinpoaꞌ.

Santiago 3:13

¡Tëhuënchachin noya yonquihuatamaꞌ, noya nisaramaꞌ! Napoaton noya nicoꞌ aꞌnapitantaꞌ noya yonquiramasoꞌ nitochinaꞌ. “Co canpoara noya nitotërëhuahuëꞌ. Yosëíchin catahuarinpoaꞌ noya yonquicasoꞌ,” taꞌtomaꞌ, noya nicoꞌ.

1 Pedro 2:15

Ina Yosë nohuantërin. Aꞌnaquën co Yosë nanamën nitotatonaraihuëꞌ, co yonquipihuëꞌ. Quisocristo imaramaꞌ niꞌton, aꞌnaroáchin yapinorinënquëmaꞌ. Noyasáchin nicoꞌ ama pinoinënquëmaso marëhuëꞌ.

1 Pedro 3:16

Ama noꞌhuitë pochin chiníquën shaꞌhuitocosohuëꞌ. Sanoanan quëran pënëncoꞌ. Yosë yonquihuatamaꞌ, noya shaꞌhuitaramaꞌ. Quisocristo imaramaꞌ niꞌton, noyasáchin nicatomaꞌ, noyápiachin cancantocoꞌ. Ina quëran pinopirinënquëmahuëꞌ, “Coꞌta noya nisapi. Quëmarisoꞌ nonpinapiran,” itarin aꞌnarintaꞌ. Itohuachina, pinotonaꞌpisoꞌ tapanarin.

1 Pedro 4:11

Aꞌnaquën Yosë nohuanton, nitotopi pënëntacaisoꞌ. Nitotohuatamaꞌ, Yosë noninso chachin pënëntocoꞌ. Aꞌnaquëontaꞌ Yosë nohuanton, caniaꞌpiroꞌsaꞌ, saꞌahuaroꞌsaꞌ, inapita catahuapi. Yosë catahuarinquëmaꞌ niꞌton, ina yonquiatomaꞌ, aꞌnapita noya catahuacoꞌ. Maꞌsona tërantaꞌ nipatamaꞌ, yaꞌipi cancanëma quëran nicoꞌ. Piyapiꞌsaꞌ nicatënënquëmaꞌ Yosë noya noya yonquicaiso marëꞌ inapocoꞌ. Yosësoꞌ noya noya ninin. Chini chiníquën nanantërin. Yaꞌipi piyapiꞌsari ina chinochinaꞌ. Quisocristo catahuarinpoaꞌ ina pochin cancantacasoꞌ. Amen.

2 Pedro 3:11

Co mantaꞌ yaꞌhuëmiatarinhuëꞌ. Yaꞌipi taꞌhuantarin niꞌton, ¡Yosë pochin cancantatëhuaꞌ, noyasáchin niahuaꞌ!

Rota naporinso' 3:14

Naporo tashi Rotasoꞌ Pooso nantën pirayan huëꞌërin. Tahuëririnquë tashi chachin capayatërin. Poosori: “Ama huëꞌnanso inso tëranta nitochinsohuëꞌ,” itërin niꞌton, naporin.