1 Pedro 2:11 - Chayahuita (Shahui)

¹¹ Nosororanquëmaꞌ iyaroꞌsaꞌ niꞌton, pënënaranquëmaꞌ. Quisocristo imatomaꞌ, co isoroꞌpaquë yaꞌhuëmiataramahuëꞌ. Yosëꞌpaꞌ yaꞌhuëmiataramasoꞌ. Napoaton ama maꞌsha isoroꞌpaquë yaꞌhuërinsopitaráchin yonquicosohuëꞌ. Isoroꞌpaquë noꞌpiápi, monshihuanapi, taparosáchin nonatonaꞌ, capa cancantapi. Ama ina pochin cancantocosohuëꞌ. Ina pochin cancantohuatamaꞌ, sopai minsëarinquëmaꞌ, co Yosë pochin cancantaramahuëꞌ.

1 Pedro 2:11 ပူးပေါင်းရင်းမြစ်များ

Génesis 21:34

Huaꞌqui Apraan huiristinoꞌsa noꞌpanënaquë, yacapatërin.

Génesis 23:4

—Caso co yaꞌhuëhuancohuëꞌ niporahuëꞌ, yacaparanquëmaꞌ. Saꞌahuë chiminin niꞌton, chiminpatamara nipoꞌmoramasoꞌ noꞌpaꞌ paꞌantoco canta topirahuë, itërin.

Génesis 47:9

—Nani pasa cara shonca piꞌipi yaꞌhuëtërinco. Co yaꞌhuëmia yaꞌhuëatohuëꞌ, patë patë́rantarahuë. Inapoato naꞌcon parisitërahuë. Shimashonëhuëpitasoꞌ, naꞌcon naꞌcon tahuëri niꞌpi. Co caso inapita icantapohuëꞌ nimara tënahuë, itërin.

Lucas 21:34

Niꞌcona naniantotamaco. Ama pita paꞌyatacasoachin cancantocosohuëꞌ. Ama noꞌpicosohuëꞌ. Ama maꞌsharáchin yonquicosohuëꞌ. Ina pochin cancantohuatamaꞌ, co aquëtëꞌ yonquiaramacohuëꞌ. Co noya ninahuatamacohuëꞌ,

Hechos 15:20

Nipirinhuëꞌ, piꞌpian pënënacaso marëꞌ ninshitahuaꞌ. Nisha piyapiꞌsaꞌ maꞌsha tëpapi mamanshi moshacaiso marëꞌ. Ina nosha Quisoso imapisopita tananpichinaꞌ. Naporahuatonaꞌ, aꞌnaquën maconorahuatonaꞌ, maꞌsha tëpapi. Co huënainën noya inquitopihuëꞌ. Ina noshantaꞌ ama caꞌinasohuëꞌ. Naporahuatonaꞌ, ama monshihuainasohuëꞌ, Inaíchin pënëanhuanꞌ.

Hechos 15:29

Aꞌnaquën maꞌsha tëpapi mamanshi moshacaiso marëꞌ. Ina nosha tananpitocoꞌ, tënai. Naporahuaton, aꞌnaquën maconorahuatonaꞌ, maꞌsha tëpapi. Co huënainën noya inquipirinhuëꞌ, caꞌpi. Ina noshantaꞌ ama caꞌcosohuëꞌ. Naporahuaton, ama monshihuancosohuëꞌ. Moisësë naꞌcon pënëntopirinhuëꞌ, inaíchin natëcasoꞌ yaꞌhuërin, tënai. Cotasë, Sirasë, inapitantaꞌ inachachin pënënarinënquëmaꞌ. Natëhuatamaꞌ iyaroꞌsaꞌ, noya nisaramaꞌ. Nani huachi,” topi quiricatatonaꞌ.

Romanos 12:1

Yosë naꞌcon nosororinpoaꞌ niꞌton, yaꞌipi cancanëma quëran, iyaroꞌsaꞌ, ina imacoꞌ. Iráca Yosë chinotohuachinara, maꞌsha tëpapi. Canpitaso nipirinhuëꞌ Yosë marëꞌ nanpitomaꞌ, nohuantërinsoráchin nicoꞌ. Ina yonquiatomaꞌ, nani tahuëri noyasáchin nicoꞌ. Ina Yosë nohuantërin. Inapohuatamaꞌ, Yosë noya chinotaramaꞌ.

Romanos 7:23

Aꞌna cancan nohuantërin. Aꞌna cancanso nipirinhuëꞌ, co nohuantërinhuëꞌ. Co noyahuëꞌ nicacasoáchin yonquirin. Ina canarinco niꞌton, co noyahuëꞌ ninahuë.

Romanos 8:13

Co noyahuëꞌ ninëhuasopita co aꞌpoasëhuahuëꞌ, chiminpatëhuaꞌ parisitomiatacasoꞌ yaꞌhuërin. Nipirinhuëꞌ, co noyahuëꞌ ninëhuasopita tëpatë pochin nitohuatëhuaꞌ, nanpimiatarihuaꞌ. Ispirito Santo catahuarinpoaꞌ co noyahuëꞌ ninëhuasopita tëpatë pochin nitacaso marëꞌ.

2 Corintios 5:20

Quisocristo chachin acorincoi aꞌnapita anitotaꞌhuaiso marëꞌ. Ina yaꞌhuërënamën pochin shaꞌhuitarainquëmaꞌ. “Yosë nontocoꞌ nanan anoyachinquëmaꞌ,” itárainquëmaꞌ.

2 Corintios 6:1

Yosë acorincoi nanamën aꞌchinaꞌhuaiso marëꞌ. Acoatoncoi, catahuarincoi aꞌchintaꞌhuainquëmaso marëꞌ. “Yosë nosoroatonpoaꞌ, yanichaꞌërinpoaꞌ,” itërainquëmaꞌ. Ama topinan quëran natancosohuëꞌ. Imaco huachi.

2 Corintios 7:1

Iyaroꞌsa naꞌcon nosororanquëmaꞌ. Ina pochin Yosë yonquirinpoa niꞌton, yaꞌipi co noyahuëꞌ yonquirëhuasopita naniantahuaꞌ. Yaꞌipi co noyahuëꞌ ninëhuasopitantaꞌ aꞌpoaꞌahuaꞌ. Yosë tëꞌhuatatëhuaꞌ, noyasáchin niahuaꞌ.

Gálatas 5:24

Quisocristo corosëquë chiminaton, oshanënpoaꞌ inquitërinpoaꞌ. Napoaton canpoantaꞌ ina imapatëhuaꞌ, co noyahuëꞌ yonquirëhuasopita corosëquë patanantatë pochin nitatëhuaꞌ, naniantacasoꞌ yaꞌhuërin. Co huachi nohuantarihuahuëꞌ sopai pochin cancantacasoꞌ.

Efesios 2:19

Napoaton iporasoꞌ iyaroꞌsaꞌ, Yosë nohuitëramaꞌ. Co Yosëꞌpaꞌ paꞌshatërapomarahuëꞌ, nani huëntonënquë ayaꞌconinquëmaꞌ. Yaꞌhuëhuanoꞌsa pochin nisaramaꞌ. Co huachi nisharoꞌsa pochin niꞌninquëmahuëꞌ. Yaꞌipinpoaꞌ Quisocristo imarëhuasopita huiꞌninpita pochachin nóya niꞌninpoaꞌ.

Efesios 4:1

Quisocristo nanamën aꞌchinahuëso marëꞌ tashinan pëiquë poꞌmopirinacohuëꞌ, iporahuantaꞌ pënënáranquëmaꞌ. Yosë nichaꞌëtënquëmaꞌ, huëntonënquë ayaꞌconinquëmaꞌ. Napoaton noyasáchin nicoꞌ.

2 Timoteo 2:22

Aꞌnaquën huiꞌnapiꞌsasoꞌ nisha nisha yonquiatonaꞌ, paꞌsápi. Ama ina pochin yonquiquësohuëꞌ. Noyasáchin nicacasoꞌ yonquiquëꞌ. Yaꞌipi cancanën quëran Quisocristo natëquëꞌ. Yaꞌipi piyapi nosoroquëꞌ. Yaꞌipi imarëhuaso capininpoaꞌ noya niniꞌtëhuaꞌ, yaꞌhuaꞌahuaꞌ. Noyápiachin cancantatëhuaꞌ, Sinioro nontërëhuaꞌ catahuainpoaso marëꞌ.

Hebreos 11:13

Apraan, Isaco, Cacopo, inapita chiminaquë huarëꞌ Yosë natëpi. “Nani Yosë shaꞌhuitërinpoaꞌ. Co nonpintarinpoahuëꞌ. Pahuanarin nipirinhuëꞌ, aꞌna tahuëri Yosë nohuanton, yaꞌhuapon,” taꞌtonaꞌ, nóya cancantopi. “Co huaꞌqui isoroꞌpaquë yaꞌhuarihuahuëꞌ. Isëquësoꞌ topinan yacapatërëhuaso pochin ninëhuaꞌ,” topi.

Hebreos 6:9

Chiníquën iyaroꞌsaꞌ pënënpiranquëmahuëꞌ, nosororanquëmaꞌ. Co Yosë aꞌpoaramahuëꞌ. Noya imatomaꞌ, chaꞌësaramaꞌ tënahuë.

Santiago 4:1

¿Onpoatomataꞌ ninoꞌhuitomaꞌ, yaniahuëramaꞌ? tënahuë, yonquiato. Canpitaora cancanëma quëran nisha nisha maꞌsha nohuantëramaꞌ niꞌton, co noyahuëꞌ cancantëramaꞌ. Nipaꞌyatacasoáchin yonquiramaꞌ. Napoaton ninoꞌhuiramaꞌ.

1 Pedro 1:1

Ca Pitroco ninshitaranquëmaꞌ, niꞌcoꞌ. ¿Noya canpitantaꞌ yaꞌhuaramaꞌ? Noya cantaꞌ isëquë yaꞌhuarahuë. Quisocristo aꞌparinco nanamën aꞌchinaꞌhuaso marëꞌ. Canpitasoꞌ aparisitatënënquëmaꞌ, ayanquërinënquëmaꞌ niꞌton, nisha nisha parti yaꞌhuëaramaꞌ. Pontoquë, Carasiaquë, Capatosiaquë, Asiaquë, Pitiniaquë, inaquëpita yaꞌhuëramasoꞌ nanan aꞌpataranquëmaꞌ. Tëhuënchachin co isoroꞌpaquë yaꞌhuëmiatarihuahuëꞌ. Yosë nohuanton, Quisocristo imarëhuaꞌ niꞌton, Yosëꞌpaꞌ yaꞌhuëmiatarihuaꞌ. Isëquësoꞌ topinan yacapatatëhua pochin ninëhuaꞌ.

1 Pedro 1:17

Yosë nontohuatamara, “Tata,” itëramaꞌ. Aꞌna tahuëri inasoꞌ coisë pochin niꞌton, yaꞌipi piyapiꞌsaꞌ noꞌtëquën shaꞌhuitarin. Co noyahuëꞌ nipisopita noꞌtëquën anaꞌintarin. Yaꞌipi oshahuaninsopita anaꞌintarin niꞌton, tëꞌhuatacasoꞌ yaꞌhuërin. Chiminaquë huarëꞌ ina yonquiatomaꞌ, noya nicoꞌ.

1 Pedro 4:12

Naꞌcon iyaroꞌsaꞌ, imoyaroꞌsaꞌ, nosororanquëmaꞌ. Iporasoꞌ chiníquën parisitohuatamaꞌ, ama paꞌyancosohuëꞌ. Co topinan quëran maꞌsha onporamahuëꞌ. Imaramaꞌ niꞌton, ina pochin parisitacasoꞌ yaꞌhuërin. Yosë nohuanton, napoaramaꞌ noya noya imacamaso marëꞌ.

1 Pedro 4:2

Napoaton ama iráca naporamaso pochin yonquicosohuëꞌ. Ipora quëra huarëꞌ Yosë nohuantërinsoáchin natëcoꞌ.

2 Pedro 3:1

Nosororanquëmaꞌ iyaroꞌsaꞌ. Iꞌhua quirica aꞌpatëranquëmaꞌ nontacamaso marëꞌ. Iporasoꞌ naquëranchin ninshitantatënquëmaꞌ, pënëantaranquëmaꞌ noꞌtëquën yonquicamaso marëꞌ.