1 Pedro 1:24 - Chayahuita (Shahui)

²⁴ “Panpatëroꞌ aꞌnaroáchin ahuirin. Inapochachin canpoantaꞌ chiminarihuaꞌ. Yancoroꞌsantaꞌ noyápiachin nipirinhuëꞌ, aꞌnaroáchin ahuihuachina, nohuatërin. Inapochachin nani maꞌsha niꞌnëhuasopita taꞌhuantarin antaꞌ.

1 Pedro 1:24 ပူးပေါင်းရင်းမြစ်များ

2 Reyes 19:26

Ina ninanoroꞌsaquë yaꞌhuëpisopitasoꞌ, panpatoro pochin niconpi. Napoatona paꞌpi tëꞌhuatërinën. Tëꞌhuatatënën paꞌpi taparo nipi. Panpatoro nasha paporinsoꞌ huaꞌtërëso pochin co manta chinipihuëꞌ. Socatë pëipitëquë, pacatoro paporinso pochin niconpi. Inanpi pacatorosoꞌ, piꞌiri co oshatarinhuëꞌ ahuitapon. Ina pochin quëmarintaꞌ, inapita minsëcasoꞌ co oshatëranhuëꞌ.

Copo naporinso' 14:2

Yanco huësohuatochina ahuiantarin. Inapochachin piyapicointaꞌ, aꞌnaroáchin capa nisarai. Huaꞌyanëhuëi piꞌiquë, aꞌnaroáchin naꞌhuërinso pochin ninai.

Salmos 103:15

Isoroꞌpaquë canpoasoꞌ panpatoro pochin niconëhuaꞌ. Yanco huësoatërinso pochin ninëhuaꞌ.

Salmos 37:2

Iporasoꞌ mini noya yaꞌhuëapi. Napopirinahuëꞌ, pasto pochin nisapi. Pasto nipotohuatëra ahuirin. Inapochachin inahuantaꞌ, aꞌnanaya taꞌhuantaponaꞌ.

Salmos 90:5

Chiniiri quëparinso pochin nitërancoi. Huaꞌnaraiso pochin co huaꞌqui nanpiraihuëꞌ.

Mateo 6:30

Pacatoro quëran huarëꞌ Yosëri yonquirin. Aꞌna tahuëríchin yaꞌhuëpirinhuëꞌ, ahuipachina, ahuiquitërë huachi. Co huaꞌquiꞌ yaꞌhuëpirinhuëꞌ, Yosëri yonquirin. Ina nohuanton, noya papotërin. Canpitasoꞌ ina quëran naꞌcon naꞌcon yonquirinquëmaꞌ. ¿Onpoatomataꞌ nipachin, co natëramahuëꞌ? ‘Yosë catahuarinco mini,’ taꞌcaso nipirinhuëꞌ.

Santiago 4:14

Co tashiraya tërantaꞌ nanitaramahuëꞌ ninocamasoꞌ. Maꞌsona onpocamasoꞌ co nitotëramahuëꞌ. Co canpitaora nohuanton nanpiramahuëꞌ. Chitoroꞌ aꞌnaroáchin sacorinso pochachin aꞌnanaya aꞌnaquën chiminin.

1 Juan 2:17

Isoroꞌpaꞌ taꞌhuantarin. Yaꞌipi maꞌshantaꞌ taꞌhuantarin. Inasáchin paꞌyatohuatëhuaꞌ, topinan quëran nanpiarihuaꞌ. Nipirinhuëꞌ, Yosë noya imapatëhuaꞌ, co onporontaꞌ taꞌhuantarihuahuëꞌ. Yaꞌhuëmiatarihuaꞌ.