1 Juan 5:6 - Chayahuita (Shahui)

⁶ Quisocristo isoroꞌpaquë chachin oꞌmarin. Oꞌmahuachina, Yosë nohuanton, iꞌquë aporihuanin. Nani yaꞌipi shaꞌhuitërinsoꞌ tiquiaton, corosëquë chiminpachina, huënainën paꞌnin. Co topinan aporihuaninhuëꞌ. Oshanënpoaꞌ inquitinpoaso marëꞌ chiminin. Naporahuaton, Ispirito Santontaꞌ cancanënpoa quëran anitotërinpoaꞌ. Inasoꞌ noꞌtëquën shaꞌhuitërinpoaꞌ. “Quisososoꞌ Yosë huiꞌnin chachin,” itërinpoaꞌ.

1 Juan 5:6 ပူးပေါင်းရင်းမြစ်များ

Ezequiel 36:25

Canpitaso mamanshiroꞌsa moshatomaꞌ, nëꞌhuëtërinso pochin ninamaꞌ. Napoatoma co noyahuëꞌ nipiramahuëꞌ. Naporamasoꞌ, inquitaranquëmaꞌ. Nëꞌmëtë nëꞌhuëtërinsoꞌ, noyaiquë pëꞌsarëso pochin nitaranquëmaꞌ.

Zacarías 9:11

Quirosarinquë yaꞌhuëramasopita. Isontaꞌ, Sinioro shaꞌhuitarinquëmaꞌ: “Aꞌnaquën israiroꞌsa nisha nisha nacionquë ipora huanta yaꞌhuëapi. Inapitasoꞌ, poso yaninantë pochin nininquë yaꞌhuëapi niꞌton, cari nichaꞌësarahuë. Iráca shimashonëmapitaroꞌco anoyatërahuë niꞌton, napoarahuë. Inapohuatoira, maꞌsharoꞌsa tëparahuatona huënainën aꞌpatopi,” tënin.

Mateo 26:28

Ca huënainëhuë pochin isoꞌ. Huënainëhuë paꞌsarin niꞌton, nasha quëran canpitarëꞌ Yosë anoyatërinsoꞌ shaꞌhuichinquëmaꞌ imacamaso marëꞌ. Chiminarahuë naꞌa piyapiꞌsaꞌ oshanënaꞌ inquitaꞌhuaso marëꞌ.

Mateo 3:16

Ina quëran nonshiaso chachin aꞌnaroáchin inápaquë piꞌiroꞌtëꞌ niꞌsoatërin, niꞌnin. Ispirito Santo nëpë pochin nohuaraimarahuaton, Quisoso yaꞌcoancantomiatërin.

Marcos 14:24

—Ca huënainëhuë pochin isoꞌ. Huënainëhuë paꞌsarin niꞌton, nasha quëran canpitarëꞌ Yosë anoyatërinsoꞌ shaꞌhuichinquëmaꞌ imacamaso marëꞌ. Chiminarahuë naꞌa piyapiꞌsaꞌ oshanënaꞌ inquitaꞌhuaso marëꞌ.

Lucas 22:20

Nani coshatohuachinara, ninëaꞌhua maantarin. —Huënainëhuë pochin isoꞌ. Huënainëhuë paꞌsarin niꞌton, nasha quëran canpitarëꞌ Yosë anoyatërinsoꞌ shaꞌhuichinquëmaꞌ imacamaso marëꞌ. Huënainëhuë quëran nichaꞌësaranquëmaꞌ.

Juan 14:17

Ispirito Santosoꞌ noꞌtëquënáchin nonin niꞌton, Yosë nanamën noꞌtëquën anitotarinquëmaꞌ. Co imarinacosopitasohuëꞌ nipirinhuëꞌ co ina natëpihuëꞌ. Napoaton co nohuitapihuëꞌ. Canpitaso nipirinhuëꞌ nohuitaramaꞌ. Nani tahuëri catahuarinquëmaꞌ. Yaꞌcoancantarinquëmaꞌ.

Juan 14:6

—Ca ira pochinco. Yaꞌipiya noꞌtëquën aꞌchintëranquëmaꞌ. Casáchin nanpicasoꞌ quëtëranquëmaꞌ. Imaramacosopitarachin Yosëꞌpaꞌ cancontaramaꞌ.

Juan 15:26

Yosëꞌpaꞌ pantahuato, Ispirito Santo aꞌpatimaranquëmaꞌ. Inasoꞌ achinicancanarinquëmaꞌ. Noꞌtëquënáchin nonin. Yosë quëran oꞌmarahuaton, piyapiꞌsaꞌ ayonquiarin. Nonahuëso chachin noꞌtëquën ayonquiarinquëmaꞌ.

Juan 16:13

Nipirinhuëꞌ, Ispirito Santo oꞌmahuachin, yaꞌipi nanamëhuë aꞌchintarinquëmaꞌ. Noꞌtëquën anitotarinquëmaꞌ. Co inaora yonquirinsoꞌ aꞌchintarinquëmahuëꞌ. Yosë yonquirinso chachin aꞌchintarinquëmaꞌ. Aꞌna tahuëri maꞌsha onpocaisontaꞌ anitotarinquëmaꞌ.

Juan 3:5

Napotohuachina, Quisosori itaantapon: —Noꞌtëquën shaꞌhuitaranquën. Iꞌquë amarëso pochin cancanëmaꞌ anoyatacasoꞌ yaꞌhuërin. Yaꞌipi co noyahuëꞌ yonquiramasopita naniantocoꞌ. Ina naniantohuatamaꞌ, Ispirito Santo anoyacancantohuachinquëmaꞌ, nasitaantarëso pochin nisaramaꞌ. Naporo huarëꞌ Yosë huaꞌanëntërinquë yaꞌconaramaꞌ.

Juan 4:10

—Yosë yanicanapirinquënhuëꞌ, co quëmasoꞌ nitotëranhuëꞌ. “Iꞌsha mananso cantaꞌ oꞌoi,” itëranquën nipirinhuëꞌ, co nohuitërancohuëꞌ. Nohuitëranco naporini, quëma nataintoncohuëꞌ. Carinquën nanpirin iꞌsha quëchitënquënhuëꞌ, itërin Quisosori.

Juan 4:14

Nisha iꞌsha carinquën quëtaranquën. Ina yaꞌhuëtohuachinquën, co huachi yamororëso pochin cancantaranhuëꞌ. Niꞌquëꞌ. Pancaiꞌ noꞌpa quëran pipihuachina, noyápiachin pipirárin. Co onporontaꞌ yanimarinhuëꞌ. Inapochachin nanpirin iꞌsha quëtohuatënquën, cancanënquë chachin yaꞌhuëtarinquën. Inaquë yaꞌhuápon huachi. Yosë nohuitaton, nanpimiataran, itërin.

Juan 6:55

Nonëhuë cosharo pochin niꞌton, achinicancanaranquëmaꞌ. Huënainëhuë paꞌsarin niꞌton, imapatamaco, anoyacancantaranquëmaꞌ.

Hechos 8:36

Nani aꞌchintohuachina, ira paꞌtapona pochin iiꞌ quënanconpi. —Niꞌquëꞌ iyasha. Iiꞌ yaꞌhuërin. Cantaꞌ aporintoco, topirahuëꞌ, itërin huaꞌani. [

Romanos 3:25

Yosë nohuanton, Quisocristo chiminin. Oshanënpoaꞌ inquitinpoaso marëꞌ chiminin. “Ca marëꞌ chiminin,” topatëhuaꞌ, oshanënpoaꞌ inquitarinpoaꞌ. Huënainën quëran anoyacancantarinpoaꞌ. Iráca piyapiꞌsaꞌ oshahuanpirinahuëꞌ, Yosëri co aꞌnaroáchin anaꞌintërinhuëꞌ. “Aꞌna tahuëri Quisocristo chiminpachin, oshanënaꞌ inquitarahuë,” taꞌton, co anaꞌintërinhuëꞌ.

Efesios 1:7

Quisocristo corosëquë chiminaton, nichaꞌërinpoaꞌ. Huënainën paꞌnin niꞌton, oshanënpoaꞌ inquitërinpoaꞌ. Inaora nohuanton, Yosë naꞌcon nosororinpoaꞌ.

1 Timoteo 3:16

Iráca co Yosë nohuitopirëhuahuëꞌ, iporasoꞌ Quisocristo anohuitërinpoaꞌ: “Ma noyacha inaso paya,” tënëhuaꞌ. Yosë huiꞌnin isoroꞌpaquë oꞌmaton, piyapi chachin nasitimarin. Ispirito Santo chachin anitotërinpoaꞌ Yosë huiꞌnin nininsoꞌ. Nanpiantahuachina, anquëniroꞌsarintaꞌ quënanpi. Imapisopitari yaꞌipi parti paatonaꞌ, nanamën shaꞌhuiraꞌpiapi. Naꞌa piyapiꞌsaꞌ natëpi. Iporasoꞌ Yosëꞌpaꞌ noya yaꞌhuërin. Inatohuaꞌ Yosëri quëpantarin.

Tito 3:5

Co canpoara noya ninëhuaso marëꞌ nichaꞌërinpoahuëꞌ. Inaora nohuanton, Yosë nosoroatonpoaꞌ, nichaꞌërinpoaꞌ. Amatërëso pochin yaꞌipi oshanënpoaꞌ inquitërinpoaꞌ. Oshanënpoaꞌ inquitatonpoaꞌ, anasitaantarëso pochin nasha cancan quëtërinpoaꞌ. Ispirito Santo nohuanton, ina pochin cancantërëhuaꞌ.

Hebreos 10:29

Yosë huiꞌnin chachin aꞌpohuatamaꞌ, ¡aquë aquëtëꞌ anaꞌintinquëmasoꞌ yaꞌhuërin! Quisocristo canpoa marëꞌ chiminin. Huënainën aꞌparin anoyacancantinpoaso marëꞌ. Inapoaton, nasha quëran anoyatërinso shaꞌhuitërinpoaꞌ imacaso marëꞌ. Aꞌnaquënso nipirinhuëꞌ imapirinahuëꞌ. Ina quëran Quisocristo aꞌpopi. Huënainën quëran anoyacancantopirinhuëꞌ, nisha cancantatonaꞌ, ina huënainën chachin nocanpi. Ispirito Santori nosoropirinhuëꞌ, co piꞌpian tërantaꞌ yanatëpihuëꞌ. Inapitasoꞌ Yosëri chini chiníquën anaꞌintarin.

Hebreos 12:24

Quisocristo chachin nohuitarihuaꞌ. Inasoꞌ nasha quëran anoyatërinso shaꞌhuitërinpoaꞌ imacaso marëꞌ. Huënainën quëran anoyacancantërinpoaꞌ. Iráca Apiri huënainën paꞌnin. Iini tëpahuachina, huënainën paꞌnin niꞌton, anaꞌintacasoꞌ yaꞌhuërin. Quisocristo chimininsosoꞌ nipirinhuëꞌ, noya noya. Huënainën paꞌnin niꞌton, nanan anoyatërinpoaꞌ.

Hebreos 13:20

Yosë catahuainquëmaꞌ noya ninicatomaꞌ yaꞌhuëcamasoꞌ. Inasáchin asanocancaninpoaꞌ. Inari chachin iráca Quisocristo ananpitaantarin. Iporasoꞌ ohuicanënpita pochin nicatonpoaꞌ, Sinioro Quisoso aꞌpairinpoaꞌ. Huënainën paꞌnin niꞌton, nasha quëran anoyatërinso shaꞌhuitërinpoaꞌ imacaso marëꞌ. Ina anoyatërinsosoꞌ yaꞌhuëmiatarin. Co onporontaꞌ nishataponhuëꞌ.

Hebreos 9:14

Quisocristo huënainënso nipirinhuëꞌ noya nóya. Inasoꞌ Yosë huiꞌnin niꞌton, co piꞌpisha tërantaꞌ oshahuaninhuëꞌ. Ispirito Santo yaꞌhuëmiatërinsori catahuarin niꞌton, canpoa marëꞌ chiminaton anoyacancantomiatërinpoaꞌ. Inaso huënainën aꞌparin oshanënpoaꞌ inquitinpoaso marëꞌ. Inapoaton noyápiachin cancan quëtërinpoaꞌ. Ina quëtohuachinpoaꞌ, Yosë noya chinotarihuaꞌ. Inasoꞌ nanpiarin niꞌton, canpoantaꞌ ina marëꞌ noya sacatarihuaꞌ.

Hebreos 9:7

Noya noya patoanaquëso nipirinhuëꞌ, co yaꞌipi yaꞌconpihuëꞌ. Aꞌnaíchin chini chiníquën nanantërinsoáchin yaꞌconin. Co ina tërantaꞌ nani tahuëri yaꞌconinhuëꞌ. Nani piꞌipiquë aꞌna tahuëriáchin yaꞌconahuaton, maꞌsha huënainën quëparin. Inaora oshanën marëꞌ quëparin. Naporahuaton, piyapiꞌsaꞌ co yonquiatonahuë oshahuanpiso marëntaꞌ quëparin.

1 Pedro 1:2

Iráca quëra huarëꞌ Tata Yosë nohuitërinquëmaꞌ. Nosoroatënquëmaꞌ, huayoninquëmaꞌ huëntonënquë yaꞌconacamaso marëꞌ. Ispirito Santo anoyacancantërinquëmaꞌ natëcamaso marëꞌ. Quisocristo corosëquë chiminin oshanëmaꞌ inquitiinquëmaso marëꞌ. Yosë nontëramaꞌ niꞌton, oshanëmaꞌ inquitërinquëmaꞌ. Yosë inaora nohuanton, noya catahuainquëmaꞌ. Asanocancainquëmaꞌ.

1 Pedro 3:21

Inapochachin iporasoꞌ Yosë nichaꞌësarinpoaꞌ. Anoyacancantohuachinpoaꞌ, aporintërinënpoaꞌ. Co nëꞌhuë inquitinënpoaso marëꞌ aporintërinënpoahuëꞌ. Aporintohuachinënpoara, Yosë nontërëhuaꞌ catahuainpoaso marëꞌ. “Yaꞌipi oshanëhuë inquitoco. Catahuaco noyasáchin nicato, noyápiachin cancanchi,” itërëhuaꞌ. Ina marëꞌ anoyacancantërinpoaꞌ. Quisocristo nanpiantarin niꞌton, nichaꞌësarinpoaꞌ.

1 Juan 1:7

Yosësoꞌ noyasáchin ninin. Tahuëri pochin cancantërin. Canpoantaꞌ tahuëri pochin yonquihuatëhuaꞌ, Yosë nohuitarihuaꞌ. Naporahuaton, noya niniꞌtëhuaꞌ yaꞌhuarihuaꞌ. Huiꞌnin chachin chiminin niꞌton, yaꞌipi oshanënpoaꞌ inquitarinpoaꞌ. Huënainën quëran anoyacancantarinpoaꞌ.

1 Juan 4:10

Co canpoarisoꞌ nosoropirëhuahuëꞌ, Yosësoꞌ naꞌcon nosororinpoaꞌ. Ina nohuanton, huiꞌnin chachin oꞌmarahuaton, chiminin. Yaꞌhuërënamënpoaꞌ chiminin niꞌton, oshanënpoaꞌ inquitatonpoaꞌ, nanan anoyatërinpoaꞌ.

Apocalipsis 1:5

Quisocristontaꞌ inaora nohuanton, catahuainquëmaꞌ. Asanocancainquëmaꞌ. Iráca isoroꞌpaquë oꞌmarahuaton, noꞌtëquën aꞌchintërinpoaꞌ. Inaꞌton chiminaponahuëꞌ, nanpiantarin. Chimirin minsërahuaton, yaꞌipiya huaꞌanëntarin. Yaꞌipi huaꞌanoꞌsa quëran chini chiníquën nanantarin. Naporahuaton, naꞌcon nosororinpoaꞌ. Oshanënpoaꞌ inquitinpoaso marëꞌ huënainën aꞌparin. Chiminaton, nichaꞌërinpoa.

Apocalipsis 5:9

Chinotatonaꞌ, inahuara yonquinëna quëran nasha cantanën cantarapi. “Noya noyanquën, Sinioro, niꞌton, nanan yaꞌhuëtërinquën quirica niꞌcamasoꞌ. Toꞌni iꞌshotohuatan, nani maꞌsha anitotarancoi. Iráca tëparinënquën. Chiminaton, piyapiꞌsaꞌ sopai quëran ocoiran Yosë imacaiso marëꞌ. Napoaton quëmasáchin nanitëran yaꞌipiya huaꞌanëntacasoꞌ. Nisha nisha parti yaꞌhuëpirinahuëꞌ, imarinënquën, Sinioro. Nisha nisha nananquë nonpisopita imarinënquën. Nisha nisha copirnori huaꞌanëntërinsopita niponaraihuëꞌ, natërinënquën.

Apocalipsis 7:14

—Co casoꞌ nitotërahuëꞌ. Quëma nitotëransoꞌ. Shaꞌhuitoco cantaꞌ nitochi, itohuatëra, shaꞌhuitërinco: —Isopitasoꞌ chiníquën parisitaponaraihuëꞌ, co Yosë aꞌpopihuëꞌ. Carniroaꞌhuari huënainën quëran anoyacancantërin niꞌton, huiríchin aꞌmopi.