1 Juan 5:13 - Chayahuita (Shahui)

¹³ Canpitasoꞌ Quisocristo natëramaꞌ. “Inasoꞌ Yosë huiꞌnin niꞌton, imasarahuë,” topatamaꞌ, huëntonënquë nani ayaꞌconinquëmaꞌ. Ina nohuitatomaꞌ, nanpimiatarama. Ina nitotacamaso marëꞌ ninshitaranquëmaꞌ.

1 Juan 5:13 ပူးပေါင်းရင်းမြစ်များ

Juan 1:12

Quisocristo cancanën mapatëhuaꞌ, huiꞌnin pochin Yosë niꞌninpoaꞌ. Natërëhuasopitarachin huëntonënquë ayaꞌconinpoaꞌ.

Juan 2:23

Pascoa tahuëri inaquë yaꞌhuasocoi, Quisoso Yosë pochachin ninin. Piyapiꞌsaꞌ aꞌnaroáchin anoyatërin. “Yosëri catahuarin,” taꞌtonaꞌ, aꞌnaquën natëpi.

Juan 20:31

Iso quiricaquë ninshitërahuësopitasoꞌ, Quisoso natëcamaso marëꞌ ninshitërahuë: “Inasoꞌ tëhuënchachin Cristo, Yosë huiꞌnin. Inari aꞌpaimarinsoꞌ,” taꞌtomaꞌ, ina imaco huachi. Imapatamaꞌ, Yosë nohuitatomaꞌ nanpimiataramaꞌ.

Juan 21:24

Nani carinquëmasoꞌ shaꞌhuitëranquëmaꞌ. Noꞌtëquën ninshitëranquëmaꞌ. Yaꞌipiya nicatoi, nitotërai.

Juan 3:18

Huiꞌnin natëhuatëhuaꞌ, co Yosë anaꞌintarinpoahuëꞌ. Co natëpisopitahuëꞌ nani Yosëri yonquirin anaꞌintacasoꞌ. Inaíchin huiꞌnin nipirinhuëꞌ, co natëpihuëꞌ. Napoaton anaꞌintarin.

Juan 5:24

Noꞌtëquën itaranquëmaꞌ. Yosë chachin aꞌpaimarinco. Noya natanpatamaco, cancanëma quëran huarëꞌ ina imapatamaꞌ, nanpimiataramaꞌ. Co onporontaꞌ anaꞌintaranquëmahuëꞌ. Chiminpatamaꞌ, co parisitomiataramahuëꞌ. Nani Yosë nohuitaramaꞌ niꞌton, nanpimiataramaꞌ.

Hechos 3:16

‘Quisoso catahuarincoi,’ taꞌtoi, iso apia nohuitëramasoꞌ anoyatërai. Inantaꞌ: ‘Inasoꞌ, catahuarinco mini,’ taꞌton, noya paꞌsarin niꞌnamaꞌ canpitantaꞌ.

Hechos 4:12

Quisocristoíchin anoyacancantërinpoaꞌ. Co aꞌna nanitërinhuëꞌ nichaꞌëinpoasoꞌ. Inaíchin nanitërin nichaꞌëinpoasoꞌ, itërin Pitrori.

2 Corintios 5:1

Niꞌcoꞌ. Pëiꞌ nëꞌmëtë quëran nipachinara, co huaꞌquirinhuëꞌ. Inapochachin nonënpoantaꞌ co yaꞌhuëmiatarinhuëꞌ. Chiminpatëhuaꞌ, Yosëꞌpaꞌ paꞌpatëhuaꞌ, nasha nonënpoaꞌ Yosë quëtarinpoaꞌ. Noya noya nininsoꞌ quëtarinpoaꞌ. Inasoꞌ co onporontaꞌ chanatarinhuëꞌ.

Gálatas 4:6

Huiꞌnin pochachin nicatonpoaꞌ, Ispirito Santo ayaꞌcoancantërinpoaꞌ. Ina quëran Yosë nontohuatëhuaꞌ, Ispirito Santo nohuanton, “Tata” itërëhuaꞌ.

1 Pedro 5:12

Iya Siripano catahuarinco ninshitaꞌhuanquëmasoꞌ. Inasoꞌ noya niꞌnahuë. Noya imarin. Nani piꞌpian ninshitëranquëmaꞌ pënënaꞌhuanquëmaso marëꞌ. Yosë yonquirinpoaso chachin nani shaꞌhuitëranquëmaꞌ. Noya nosororinpoaꞌ, tënahuë. Ina yonquiatomaꞌ, ama aꞌpocosohuëꞌ.

1 Juan 1:4

Ina pochin cancantohuatamaꞌ, nóya cancantarihuaꞌ. Ina marëꞌ ninshitaranquëmaꞌ.

1 Juan 2:1

Quisocristo imaramaꞌ niꞌton, huiꞌnahuëpita pochin niꞌnanquëmaꞌ. Ninshitaranquëmaꞌ noyasáchin nicacamaso marëꞌ. Nipirinhuëꞌ, co noyahuëꞌ nipatëhuaꞌ, Quisocristo catahuarinpoaꞌ. Oshahuanëhuaꞌ niꞌton, anaꞌintinpoasoꞌ yaꞌhuëpirinhuëꞌ. Canpoa marëꞌ Yosë nontaton, nanan anoyatarinpoaꞌ. Inasoꞌ noꞌtëquënáchin yonquirin.

1 Juan 2:21

Nitotopiramahuëꞌ, naquëranchin pënëantaranquëmaꞌ yonquicamaso marëꞌ. Noꞌtën nanan imapatëhuaꞌ, co nonpin nanan natëarihuahuëꞌ.

1 Juan 2:25

Quisocristo chachin shaꞌhuitërinpoaꞌ: “Imamiatohuatamaco, Yosë nohuitatomaꞌ, nanpimiataramaꞌ,” itërinpoaꞌ.

1 Juan 2:26

Aꞌnaquën yanonpintarinënquëmaꞌ niꞌton, ninshitaranquëmaꞌ.

1 Juan 3:23

Yosë nani pënëninpoaꞌ huiꞌnin imacaso marëꞌ. Naporahuaton, ninosorocasontaꞌ shaꞌhuitërinpoaꞌ. “Quisocristontaꞌ inachachin shaꞌhuitërinpoaꞌ,” taꞌtëhuaꞌ, cancanënpoa quëran natëahuaꞌ.

1 Juan 4:9

Nosoroatonpoaꞌ, huiꞌnin chachin isoroꞌpaquë aꞌpaimarin anoyacancantinpoaso marëꞌ. Aꞌnaíchin huiꞌnin yaꞌhuëtopirinhuëꞌ, aꞌpaimarin. Quisocristo anoyacancantohuachinpoaꞌ, Yosë nohuitatëhuaꞌ, nanpimiatarihuaꞌ.

1 Juan 5:10

Yosë nani shaꞌhuitërinpoaꞌ niꞌton, imarëhuasopita nitotërëhuaꞌ. Cancanënpoa quëran anitotërinpoaꞌ. Aꞌnapitaso nipirinhuëꞌ, co Yosë natëpihuëꞌ. “Quisoso co Yosë huiꞌninhuëꞌ. Co nichaꞌësarinpoahuëꞌ,” taꞌtonaꞌ, Yosëri nonpintërinso pochin cancantopi. Noꞌtëquën shaꞌhuitopirinpoahuëꞌ, co natëpihuëꞌ.

1 Juan 5:11

Yosësoꞌ huëntonënquë ayaꞌconinpoaꞌ ina pochin nanpicaso marëꞌ. Huiꞌnin chachin anoyacancantërinpoaꞌ nanpimiatacaso marëꞌ, tënëhuaꞌ.

1 Juan 5:20

Yosë huiꞌnin chachin oꞌmaton, noꞌtëquën Yosë anohuitërinpoaꞌ. Inasáchin noꞌtëquën yonquirin. Yosë nohuitatëhuaꞌ, yonquirinsoráchin imasarëhuaꞌ. Quisocristo nohuitërëhuaꞌ niꞌton, catahuarinpoaꞌ noꞌtëquën yonquicaso marëꞌ. Inaíchin Yosësoꞌ niꞌton, chinotacasoꞌ yaꞌhuërin. Ina nohuitohuatëhuaꞌ, nanpimiatarihuaꞌ.