1 Juan 5:1 - Chayahuita (Shahui)

¹ Yaꞌipi Quisocristo imarëhuasopita aꞌna huënton pochin ninëhuaꞌ. “Quisocristo Yosë huiꞌnin chachin,” tënëhuaꞌ niꞌton, huëntonënquë yaꞌconëhuaꞌ. Huiꞌninpita pochin niꞌninpoaꞌ. Niꞌcoꞌ. “Quëmapi tëhuënchachin nosorohuatëra, huiꞌninpitantaꞌ nosororëꞌ,” topi.

1 Juan 5:1 ပူးပေါင်းရင်းမြစ်များ

Mateo 16:16

Simon Pitrori itërin: —Quëmasoꞌ Cristo. Yosë huiꞌnin chachinquën. Ina nanpiton, aꞌpaimarinquën, itërin.

Juan 1:3

Naporoꞌ Yosë yonquirin yaꞌipi maꞌsha acocasoꞌ. Ina nohuanton, huiꞌnini acorin. Yaꞌipi maꞌsha ninin. Co aꞌnaya tërantaꞌ inaora yaꞌhuërinhuëꞌ. Co acorinhuëꞌ naporini, co mantaꞌ yaꞌhuëꞌitonhuëꞌ.

Juan 15:23

Insopitasoꞌ noꞌhuihuachinaco, Tata Yosëntaꞌ noꞌhuiapi.

Juan 3:3

—Noꞌtëquën iyasha shaꞌhuitaranquën. Co nasitaantahuatanhuëꞌ, co onporontaꞌ Yosë huaꞌanëntërinquë yaꞌconaranhuëꞌ, itërin Quisosori.

Juan 6:69

Nani natërainquën. Quëmasoꞌ noyasáchin ninan. Yosë aꞌpaimarinquën, tënai, itërin Simon Pitrori.

Juan 8:42

Napotohuachinara: —Yosësoꞌ tatanëmaꞌ naporini, nosoroꞌitomacohuëꞌ. Yosë quëran oꞌmarahuë. Co caora nohuanto, oꞌmarahuëꞌ. Yosë aꞌpaimarinco.

Hechos 8:36

Nani aꞌchintohuachina, ira paꞌtapona pochin iiꞌ quënanconpi. —Niꞌquëꞌ iyasha. Iiꞌ yaꞌhuërin. Cantaꞌ aporintoco, topirahuëꞌ, itërin huaꞌani. [

Hechos 8:37

—Yaꞌipi cancanën quëran huarëꞌ natëhuatan, aporintaranquën, itërin. —Quisocristosoꞌ Yosë huiꞌnin chachin, tënahuë, tënin huaꞌan.]

Santiago 1:18

Inaora nohuanton, anasitaantatonpoa pochin nasha cancan quëtërinpoaꞌ. Inasoꞌ noꞌtëquën nonin. Nanamën natëhuatëhuaꞌ, huëntonënquë ayaꞌcoaninpoaꞌ. Huiꞌninpita pochachin niꞌninpoaꞌ. Canpoaꞌton anoyacancantërinpoaꞌ. Ina quëran oshaquëran naꞌayaꞌpi anoyacancantarin.

1 Pedro 1:3

Ma noyacha Tata Yosëso paya. Quisocristo paꞌpin inasoꞌ. Naꞌcon nosoroatonpoaꞌ, nasitantarëso pochin nasha cancan quëtërinpoaꞌ ina nohuitacaso marëꞌ. Quisocristo huaꞌanëntërinpoaꞌ. “Chiminaponahuëꞌ, nanpiantarin niꞌton, canpoantaꞌ nanpiantarihuaꞌ,” taꞌtëhuaꞌ, noya ninarëhuaꞌ. Natëtomiatërëhuaꞌ.

1 Juan 2:10

Imaramasopita capini ninosorohuatamaꞌ, tahuëri pochin cancantaramaꞌ. Ina pochin nipatamaꞌ, noꞌtëquën imaramaꞌ.

1 Juan 2:29

Quisocristo noyasáchin ninin, nitotërëhuaꞌ. Napoaton Yosë huëntonënquë yaꞌconpatëhuaꞌ, noya nicarihuaꞌ. Inpitasona noya nipachinaꞌ, nani Yosëri anoyacancantërin niꞌton, huiꞌnin pochin niꞌsarin, tënëhuaꞌ.

1 Juan 3:14

Iráca canpoantaꞌ ina pochin co noyahuëꞌ cancantërëhuaꞌ. Co Yosë nohuitatëhuahuëꞌ, chimipi pochin nipirëhuahuëꞌ, Yosë anoyacancantërinpoaꞌ ina nohuitatëhuaꞌ nanpimiatacaso marëꞌ. Napoaton iporasoꞌ ninosororëhuaꞌ. Ina quëran Yosë huëntonënquë yaꞌconëhuasoꞌ nitotërëhuaꞌ. Co ninosorohuatamahuëꞌ, co Yosë anoyacancantërinquëmahuëꞌ. Chimipi pochin cancantaramaꞌ.

1 Juan 3:17

Quisocristo imarëhuasopita capini noya ninosorocasoꞌ yaꞌhuërin. Aꞌnapita maꞌsha pahuantohuachinaꞌ, catahuahuaꞌ. Capa capacaisoꞌ nipachin, capa aꞌmocaisoꞌ nipachin quëtahuaꞌ. Co inapita catahuahuatëhuahuëꞌ, co tëhuënchachin nosororëhuahuëꞌ. Co canpoa capini ninosorohuatëhuahuëꞌ, co Yosëntaꞌ nosororëhuahuëꞌ.

1 Juan 3:9

Huëntonënquë chachin Yosë ayaꞌconinpoaꞌ niꞌton, co iporasoꞌ paꞌyatarëhuahuëꞌ oshahuanacasoꞌ. Huiꞌnin pochachin cancantatonpoaꞌ, yonquinën chachin quëtërinpoaꞌ. Nasitantarëhuaso pochin ninëhuaꞌ. Napoaton co huachi nohuantarihuahuëꞌ oshahuanacasoꞌ.

1 Juan 4:2

Ispirito Santo noꞌtëquën anitotërinpoaꞌ. “Quisocristo Yosë huiꞌnin niponahuëꞌ, isoroꞌpaquë oꞌmaton, piyapi chachin nasitimarin. Nonën chachin yaꞌhuëtërin,” itërinpoaꞌ. Ina nanan aꞌchintohuachinënquëmaꞌ, noꞌtëquën aꞌchinapi. Ispirito Santori ayonquirin niꞌton, noya nonsapi.

1 Juan 4:20

Aꞌnaquënsoꞌ “Yosë nosororahuë,” taponahuëꞌ, iin noꞌhuirin. Co inasoꞌ noꞌtëquën noninhuëꞌ, nonpiánin. Piyapi quënanëhuaꞌ. Yosëso nipirinhuëꞌ co quënanëhuahuëꞌ. Piyapi quënanarihuarahuëꞌ, co nosorohuatëhuahuëꞌ, aquëtë huarëꞌ Yosësoꞌ co nanitarëhuahuëꞌ nosorocasoꞌ.

1 Juan 4:7

Yosë paꞌpi nosororinpoaꞌ. Napoaton iyaroꞌsaꞌ, canpoantaꞌ noya ninosoroaꞌahuaꞌ. Huëntonënquë ayaꞌconpachinpoaꞌ, catahuarinpoaꞌ aꞌnapita nosorocasoꞌ. Nosorohuatëhuaꞌ, Yosë nohuitarihuaꞌ. Huiꞌninpita pochin niꞌninpoaꞌ.

1 Juan 5:18

Yosëri imarinsopita huëntonënquë ayaꞌconin. Noyasáchin nicacasoꞌ yaꞌhuërin. Yosë huiꞌnini chachin aꞌpaiarin. Sopairi yanonpintopirinhuëꞌ, Quisocristori catahuarin niꞌton, co sopairi minsëarinhuëꞌ.

1 Juan 5:4

Canpoasoꞌ Yosë huiꞌninpitanpoaꞌ niꞌton, nanitaparëhuaꞌ sopai minsëcasoꞌ. “Quisocristo catahuarinpoaꞌ,” topatëhuaꞌ, co noyahuëꞌ yonquirëhuasopita naniantarihuaꞌ. Isoroꞌpaquë naꞌa maꞌsha, piyapi, inapita yaꞌhuërin anishacancantinpoaso marëꞌ. Nipirinhuëꞌ, Quisocristo yonquihuatëhuaꞌ, catahuarinpoaꞌ imamiatacasoꞌ.

1 Juan 5:5

“Quisocristo Yosë huiꞌnin chachin,” topatëhuaꞌ, achinicancaninpoaꞌ sopai minsëcaso marëꞌ. Aꞌnapitarisoꞌ co nanitopihuëꞌ sopai minsëcaisoꞌ.