1 Juan 4:1 - Chayahuita (Shahui)

¹ Naꞌcon iyaroꞌsaꞌ nosororanquëmaꞌ niꞌton, pënënaranquëmaꞌ. Naꞌa nonpin nanan pënëntonaꞌpiroꞌsaꞌ nonpin nanan aꞌchinapi. “Yosë nanamën aꞌchinahuë,” topirinahuëꞌ, co noꞌtëquën aꞌchinpihuëꞌ. Napoaton aꞌchintohuachinënquëmaꞌ, ama aꞌnaroáchin natëtocosohuëꞌ. “Nonpin nanan nimara,” taꞌtomaꞌ, yonquicoꞌ. Yaꞌipi Yosë quiricanën quëran aꞌchintërinpoasoꞌ yonquiatomaꞌ, tantiacoꞌ. Co ina pochin aꞌchintohuachinënquëmahuëꞌ, ama natëcosohuëꞌ.

1 Juan 4:1 ပူးပေါင်းရင်းမြစ်များ

Jeremías 14:14

Napotohuatora Sinioro taantarin: “Co cari aꞌpapirahuëꞌ, naporápi. Nonpinatona naporápi. Co piꞌpian tëranta ina pochin camairahuëꞌ. Co nonchatërarahuëꞌ. Inahuara yonquinëna quëran ina pochin shaꞌhuitárinëmaꞌ.

Jeremías 23:16

Siniorosoꞌ yaꞌipi nanitapaton israiroꞌsanpoa pënëninpoaꞌ: “Ina pënëntonaꞌpiroꞌsa maꞌsona pënënpachinquëmaꞌ, ama natëtocosohuëꞌ. Inahuara yonquinëna quëran shaꞌhuitatënëma nonpintárinëmaꞌ. Co cari anitotërahuëso shaꞌhuitërinënquëmahuëꞌ.

Marcos 13:21

Naporoꞌ tahuëriꞌsaꞌ nisha nisha shaꞌhuitarinënquëmaꞌ. ‘¡Niꞌcochi, Cristo nani huëꞌnin!’ tosapi. Aꞌnapitantaꞌ taponaꞌ: ‘¡Niꞌcochi, pasëquë yaꞌhuarin!’ tosapi. Napotohuachinënquëmaꞌ, ama natëcosohuëꞌ.

Lucas 12:57

“¿Onpoatomataꞌ canpitaora cancanëma quëran co noꞌtëquën yonquiramahuëꞌ?

Lucas 21:8

Napotohuachinara: “Niꞌcona iyaroꞌsaꞌ nonpintochinënquëmaꞌ. Aꞌnaquën huëcatonaꞌ: ‘Casoꞌ Cristoco. Yosë chachin aꞌpairinco,’ tosapi. Aꞌnapitantaꞌ nonpin nanan shaꞌhuirapi. ‘Nani tahuëri naniriarin, nitotërai,’ tosapi. Ama inapita imacosohuëꞌ.

Hechos 17:11

Inaquë yaꞌhuëpisopitaso nipirinhuëꞌ nóya yonquipi. Co Tisaronicaquë yaꞌhuëpisopita pochinhuëꞌ. Paonori aꞌchintohuachina, nóya natanpi. “Paonosoꞌ noꞌtëquën aꞌchinamara,” taꞌtonaꞌ, nani tahuëri Yosë quiricanën noyásha nontapi noꞌtëquën nitotacaiso marëꞌ.

Hechos 20:29

Nani paꞌpato, co noyahuëꞌ quëmapiꞌsaꞌ huëꞌsapi. Canoniri maꞌsha maninso pochachin yaocoiarinënquëmaꞌ. Paꞌsápatonaꞌ, anishacancantapi. Co nosoroarinënquëmahuëꞌ. Ina nani nitotërahuë.

1 Corintios 12:10

Ispirito Santo nohuanton, aꞌnaquëontaꞌ nanitërin sacai nininsoꞌ nicacasoꞌ. Aꞌnaquën Yosë yonquirinso chachin cancanën quëran anitotërin aꞌnapita shaꞌhuitacaso marëꞌ. Aꞌnaquëontaꞌ Ispirito Santo nohuanton, macarisona catahuarinsoꞌ nitoninorin. Co Ispirito Santoachin yacatahuarinpoahuëꞌ. Sopairintaꞌ piyapiꞌsaꞌ catahuarin nonpintinpoaso marëꞌ. Napoaton aꞌnapita pënënpachinpoaꞌ, ninocasoꞌ yaꞌhuërin. Nonpin nanan nipachina, shaꞌhuitërinpoaꞌ ama natëcaso marëhuëꞌ. Aꞌnaquëontaꞌ Ispirito Santo nohuanton, nisha nananquë nonpiso pochin nonpi. Aꞌnapitantaꞌ catahuarin maꞌsona nisha nananquë topisoꞌ shaꞌhuicaisoꞌ.

1 Corintios 14:29

Niyontonpatamaꞌ, catoya, caraya nimara Yosëri anitotërinsoꞌ shaꞌhuiinaꞌ. Aꞌnapitasoꞌ natainaꞌ. Noꞌtën nanan nipachin, noya natanatomaꞌ yonquicoꞌ noꞌtëquën natëcamaso marëꞌ. Yosë nanamënáchin imacasoꞌ yaꞌhuërin.

1 Tesalonicenses 5:20

“Yosë anitotërincoso shaꞌhuichinquëma,” itohuachinënquëmaꞌ, noya natancoꞌ.

1 Tesalonicenses 5:21

Napoaponahuëꞌ, niꞌcona nonpintochinënquëmaꞌ. Aꞌnaquën “Noꞌtëquën aꞌchintaranquëmaꞌ,” itohuachinënquëmaꞌ, ama aꞌnaroáchin natëtocosohuëꞌ. Yaꞌipi napopisoꞌ Yosë quiricanën quëran tantiacoꞌ. “Inaora yonquinën quëran aꞌchinamara,” taꞌtomaꞌ, tantiacoꞌ. Yosë nanamënsáchin natëcasoꞌ yaꞌhuërin.

2 Tesalonicenses 2:2

Aꞌnaquënso nipirinhuëꞌ co noꞌtëquën nitotopihuëꞌ. “Oꞌmantacasoꞌ tahuëri nani nanirin,” itohuachinquëmaꞌ, ama paꞌyancosohuëꞌ. Ama nisha nisha yonquicosohuëꞌ. Aꞌnaquën tapon: “Cari ninorahuë. Oꞌmantacasoꞌ tahuëri nani nanirin,” itohuachinquëmaꞌ, ama natëcosohuëꞌ. Aꞌnantaꞌ tapon: “Nanirin mini. Paono chachin naponinshitërincoi,” itopirinënquëmahuëꞌ, ama ina natëcosohuëꞌ.

1 Timoteo 4:1

Tëhuënchachin Ispirito Santo ninoton, aꞌninquëchin shaꞌhuitërinpoaꞌ: “Aꞌna tahuëri aꞌnaquën piyapiꞌsaꞌ Yosë nanamën aꞌporapi. Sopai natëtonaꞌ, nonpin nanan aꞌchinpachinaꞌ, imasapi. Ayaroꞌ tahuëri yaꞌcaritohuachin, naporapi,” tënin.

2 Timoteo 3:13

Co noyahuëꞌ nipisopita, nonpintëroꞌsaꞌ, inapitasoꞌ aquë aquëtëꞌ co noyahuëꞌ nisapi. Naꞌcon piyapiꞌsa nonpintopi quëran, aꞌnapitarintaꞌ nonpintapi.

2 Pedro 2:1

Iráca Yosëri acorinsopita noꞌtëquën pënëntopi. Aꞌnaquënso nipirinhuëꞌ nonpin nanan pënëntatonaꞌ, israiroꞌsaꞌ nonpintopi. Inapochachin iporantaꞌ aꞌnaquën nonpin nanan yaaꞌchintarinënquëmaꞌ. Noyasha nontapirinënquëmahuëꞌ, nonpintarinënquëmaꞌ. “Quiyantaꞌ imarai,” taponaraihuëꞌ, nonpin nanan aꞌchinapi anishacancantacaiso marëꞌ. Quisocristo nichaꞌëinpoaso marëꞌ chiminin. Inaíchin natëcaso nipirinhuëꞌ, nisha aꞌchinaꞌpiroꞌsasoꞌ co yanatëpihuëꞌ. Ina marëꞌ aꞌna tahuëri Yosëri anaꞌintarin. Aꞌnanaya anaꞌintarin.

1 Juan 2:18

Co huaꞌquiya quëranhuëꞌ, apiaꞌhuaroꞌsaꞌ, Quisocristo oꞌmantararin. “Cristo yaoꞌmahuachin, inimiconën huëꞌsarin,” itërinënpoaꞌ. Nani natantëramaꞌ canpitantaꞌ. Iporasoꞌ naꞌa piyapiꞌsari Cristo yainimicotopi. Napoaton oꞌmantacasoꞌ tahuëri naniriarin, tënëhuaꞌ.

1 Juan 2:7

Co iyaroꞌsaꞌ nasha camaitërinsoꞌ ninshitaranquëmahuëꞌ. Iráca quëran huarëꞌ Yosë nanamën natanamaꞌ. “Yaꞌipinquëmaꞌ noya ninosorocoꞌ,” itërinpoaꞌ. Inachachin iporantaꞌ pënënaranquëmaꞌ.

2 Juan 1:7

Aꞌnaquënso nipirinhuëꞌ piyapiꞌsaꞌ yanonpintatonaꞌ, nisha aꞌchinapi. Yaꞌipi parti paꞌsápi nonpin nanan shaꞌhuicaiso marëꞌ. “Quisocristosoꞌ Yosë huiꞌnin niponahuëꞌ, co piyapi chachin nininhuëꞌ. Co canpoa pochin nonën yaꞌhuëtërinhuëꞌ,” topi. Co noꞌtëquën aꞌchinpihuëꞌ. Insosona ina pochin aꞌchinpachina, nonpinarin. Inasoꞌ Quisocristo inimiconën, tënahuë.

3 Juan 1:11

Ama iya co noyahuëꞌ nipisopita nonanquësohuëꞌ. Noya nipisopita nonanquëꞌ. Noya nipatëhuaꞌ, tëhuënchachin Yosë imarihuaꞌ. Co noyahuëꞌ nipatëhuaꞌ, co Yosë nohuitarihuahuëꞌ.

Apocalipsis 2:2

Nani nohuitëranquëmaꞌ. Yaꞌipi ninamasopita nitotërahuë. Chiníquën ca marëꞌ sacatëramaꞌ. Co amiatomacohuëꞌ, noya ninamaꞌ. Aꞌnaquën co noyahuëꞌ nipachinara, co noya niꞌnamahuëꞌ. Nonpin nanan aꞌchinaꞌpiroꞌsantaꞌ co noya niꞌnamahuëꞌ. ‘Yosë aꞌparincoi, aꞌchinarai,’ itopirinënquëmahuëꞌ, nonpinapi. Inapita natanpatamaꞌ: ‘Co noꞌtëquën aꞌchinpihuëꞌ,’ taꞌtomaꞌ, co natëramahuëꞌ.