1 Juan 3:22 - Chayahuita (Shahui)

²² Yosë pënëninpoasoꞌ natëhuatëhuaꞌ, noya natanarinpoaꞌ. Ina nohuantërinsoáchin yonquihuatëhuaꞌ, catahuarinpoaꞌ. Ina pochin cancantohuatëhuaꞌ, maꞌpitaso nipatëhuaꞌ, quëtarinpoaꞌ.

1 Juan 3:22 ပူးပေါင်းရင်းမြစ်များ

Salmos 34:4

Maꞌsha onpoato Sinioro chinotërahuë. Paꞌpi paꞌyanpirahuëꞌ, ina nichaꞌërinco huachi.

Isaías 1:15

Nontamacoso marëꞌ anquihuatamara, co manta yaniꞌnanquëmahuëꞌ. Naꞌaro nontopiramacohuëꞌ, co natanaranquëmahuëꞌ. Naꞌcon tëpatërama niꞌton, huënaiꞌ imirasáchin pochin niꞌnanquëmaꞌ.

Mateo 17:5

Nonaquëyaꞌ, chitorori imotërin. Huënaráchin huënaráchin ninin. Chitoroꞌ huáncana quëran Yosëri shaꞌhuitërin: “Isosoꞌ ca huiꞌnahuë, naꞌcon nosororahuësoꞌ. Nóya niꞌnahuë. Ina noya natancoꞌ,” itërin.

Mateo 21:22

Yosë nontohuatamaꞌ, noya natëcoꞌ. “Tëhuënchachin Yosë catahuarinco,” topatamaꞌ, naꞌcon catahuarinquëmaꞌ. Maꞌsona tërantaꞌ nipatamaꞌ, acotarinquëmaꞌ, tënin.

Marcos 11:24

Napoaton Yosë nontatomaꞌ maꞌsona nipatamaꞌ, natëcoꞌ. “Tëhuënchachin Yosë catahuarinco,” topatamaꞌ, catahuaarinquëmaꞌ tënahuë.

Juan 14:13

Ca pochin yonquihuatamaꞌ, nanan quëchinquëmaꞌ Tatahuë nontacamaso marëꞌ. “Huiꞌnan chachin nanan quëtërinco,” taꞌtomaꞌ, ina nontocoꞌ. Ca pochin cancantatomaꞌ, maꞌsona nipatamaco acotaranquëmaꞌ. Aꞌnapitantaꞌ Tata Yosë noya noya nicacaiso marëꞌ inapoarahuë. Ina naꞌcon nohuantërahuë.

Juan 15:10

Tata Yosë noꞌtëquën natërahuë niꞌton, paꞌpi nosororinco. Inapochachin natëhuatamaco, carinquëmantaꞌ paꞌpi nosoroaranquëmaꞌ.

Juan 15:7

Casáchin yonquihuatamaco, naꞌcon catahuaaranquëmaꞌ. Aꞌchintëranquëmasontaꞌ ama naniantocosohuëꞌ. Ina yonquiatomaꞌ, Yosë nontocoꞌ. Tëhuënchachin imamiatohuatamaco, maꞌsona nohuantohuatamaꞌ, shaꞌhuitoco acochinquëmaꞌ.

Juan 6:29

—Tëhuënchachin Yosë yanatëhuatamaꞌ, ca imaco. Ina aꞌpaimarinco niꞌton, cancanëma quëran huarëꞌ imaco. Ina Yosë nohuantërin, itërin Quisosori.

Juan 8:29

Tatahuë aꞌpaimarinco niꞌton, caꞌtaninco. Ina nohuantërinsoráchin noꞌtëquën natërahuë niꞌton, co patarincohuëꞌ, itërin.

Juan 9:31

Oshahuanoꞌsari Yosë nontohuachina, co natanatonhuëꞌ, co catahuarinhuëꞌ. Nipirinhuëꞌ, Yosë chinotohuatëhuaꞌ, noya natëhuatëhuaꞌ, natanarinpoaꞌ. Ina nitotërëhuaꞌ.

Hechos 17:30

Iráca co Yosë nohuitopihuëꞌ niꞌton, co anaꞌintërinhuëꞌ. Iporaso nipirinhuëꞌ, yaꞌipi piyapinpoaꞌ pënëninpoaꞌ: ‘Co noyahuëꞌ yonquiramasoꞌ naniantatomaꞌ, casáchin chinotoco,’ itërinpoaꞌ Yosë.

Hechos 20:21

Co cotioroꞌsaráchin pënënahuëꞌ. Cricoroꞌsantaꞌ pënënahuë. ‘Co noyahuëꞌ yonquiramasopita naniantatomaꞌ, Yosë chachin tahuërëtantacoꞌ. Sinioro Quisoso natëco huachi. Inasáchin anoyacancantërinpoasoꞌ,’ itëranquëmaꞌ. Yaꞌipinquëmaꞌ aꞌchintëranquëmaꞌ.

Filipenses 4:18

Iporasoꞌ nóya iꞌhuërëtëramaco huachi. Napoaton noya yaꞌhuarahuë. Co mantaꞌ pahuantërincohuëꞌ. Iꞌhua Ipapërotito huëꞌpachina, coriqui aꞌpatëramaco niꞌton, maꞌsha yaꞌhuëtërinco. Ina marëꞌ “Yosparinquëmaꞌ,” itëranquëmaꞌ. Yosë nosoroatomaꞌ, aꞌpatiramaco. Yosë chinotacaiso marëꞌ pimóchin nininsoꞌ aꞌpëhuachinara, Yosëri noya niꞌnin. Inapochachin canpitantaꞌ coriqui aꞌpatëramaco niꞌton, Yosë noya niꞌninquëmaꞌ.

Colosenses 1:10

Catahuaquëꞌ Sinioro quëma nohuantëranso chachin niinaꞌ. Inapohuachinaꞌ, noya noya niꞌsaran. Catahuaquëꞌ noyasáchin niinaꞌ. Naꞌcon naꞌcon nohuichinënquën.

Hebreos 13:21

Yosë naꞌcon catahuainquëmaꞌ ina nohuantërinsoꞌ nicacamaso marëꞌ. Piꞌpian tërantaꞌ co noyahuëꞌ yonquihuatamaꞌ, anoyacancanchinquëmaꞌ. Quisocristo catahuahuachinpoaꞌ, nani tahuëri nóya nisarëhuaꞌ. Ina quëran noya niꞌsarinpoa huachi. Yaꞌipi piyapiꞌsaꞌ inasáchin chinochinaꞌ. Ama onporontaꞌ ina naniantahuasohuëꞌ. Amen.

Santiago 1:5

“¿Maꞌcha ipora niiya?” topatamaꞌ, Yosë nontocoꞌ noya anitochinquëmaꞌ. Onpopiontaꞌ Yosë nontacasoꞌ yaꞌhuërin. Co nosororinpoasoꞌ apiratërinpoahuëꞌ. Inaora nohuanton, catahuarinpoaꞌ. Nontërëhuaso marëꞌ co noꞌhuirinpoahuëꞌ. Catahuarinpoaꞌ noꞌtëquën yonquicaso marëꞌ.

Santiago 4:3

Aꞌnaquëmaꞌ Yosë nontohuatamara, maꞌsha nipiramahuëꞌ, co quëtërinquëmahuëꞌ. Canpitaora nipaꞌyatacamaso marëꞌ maꞌsha nohuantëramaꞌ niꞌton, co quëtërinquëmahuëꞌ.

Santiago 5:16

Napoaton maꞌsona tërantaꞌ co noyahuëꞌ nipatëhuaꞌ, imarëhuasopita capini nishaꞌhuitahuaꞌ. “Ina marëꞌ casoꞌ oshahuanahuë,” nitahuaꞌ. Itohuaran capini Yosë nontahuaꞌ anoyachinpoaꞌ. Yaꞌipi co noyahuëꞌ yonquirëhuasopita naniantohuatëhuaꞌ, chiníquën ina nontohuatëhuaꞌ, naꞌcon catahuarinpoaꞌ.

1 Juan 2:3

Yosë nohuitohuatëhuaꞌ, pënëninpoasoꞌ natëarëhuaꞌ. Noꞌtëquën natëcasoꞌ nohuantarihuaꞌ. Ina natëhuatëhuaꞌ, tëhuënchachin Yosë nohuitërëhuaꞌ.

1 Juan 5:14

Yosë nontohuatëhuaꞌ, natanarinpoaꞌ. Ina nohuantërinso chachin natanpatëhuaꞌ, noya nataninpoaꞌ.