1 Juan 3:16 - Chayahuita (Shahui)

¹⁶ Quisocristoso nipirinhuëꞌ naꞌcon nosoroatonpoaꞌ, nichaꞌëinpoaso marëꞌ chiminin. Chiminaton, nosororinpoasoꞌ anitotërinpoaꞌ. Inapochachin iyaroꞌsaꞌ, yaꞌipi Quisocristo imapisopita nosorocasoꞌ yaꞌhuërin. Naꞌcon ninosoroaꞌahuaꞌ. Quisoso yaꞌhuërënamënpoaꞌ chimininso pochachin nosorocasoꞌ yaꞌhuërin.

1 Juan 3:16 ပူးပေါင်းရင်းမြစ်များ

Mateo 20:28

Cantaꞌ Yosë quëran quëmapico niporahuëꞌ, co aꞌnapita camaicaꞌhuaso marëꞌ oꞌmarahuëꞌ. Piyapiꞌsaꞌ catahuacaꞌhuaso marëꞌ oꞌmarahuë. Chiminarahuë naꞌa piyapiꞌsaꞌ nichaꞌëcaꞌhuaso marëꞌ, itërin Quisosori.

Juan 10:11

Casoꞌ ohuica huaꞌanën pochin ninahuë. Imarinacosopita noya aꞌpairahuë. Huaꞌanën noya nipachina, ohuicanënpita aꞌpaiton, co chiminacasoꞌ tëꞌhuatërinhuëꞌ. Inapochachin cantaꞌ imarinacosopita marëꞌ chiminarahuë.

Juan 10:15

Tatahuërëꞌco ninohuitëraiso pochin nohuitërahuë. Nosoroato, inapita marëꞌ chiminarahuë.

Juan 13:34

Iporasoꞌ nasha pochin pënënaranquëmaꞌ noya ninosorocamaso marëꞌ. Carinquëma nosororanquëmaso pochachin, imaramacosopita capinintaꞌ ninosorocoꞌ.

Juan 3:16

Yosësoꞌ yaꞌipi piyapiꞌsaꞌ paꞌpi nosoromiatërin. Napoaton aꞌnaíchin huiꞌnin nipirinhuëꞌ, isoroꞌpaquë aꞌpaimarin chiminacaso marëꞌ. Ina natëtëhuaꞌ: “Ca marëꞌ chiminin,” topatëhuaꞌ, co parisitopiquë paꞌsarëhuahuëꞌ. Yosë nohuitatëhuaꞌ, nanpimiatarëhuaꞌ.

Hechos 20:28

Canpitantaꞌ niꞌcona piꞌpian tërantaꞌ Yosë naniantotamaꞌ. Quisoso imapisopitantaꞌ noya niꞌcoꞌ. Ispirito Santo nani acorinquëmaꞌ huaꞌanën pochin nicacamaso marëꞌ. Inapitantaꞌ Yosë huëntonënquë yaꞌconpi. Quisoso chiminaton, ayaꞌconinpoaꞌ.

Romanos 16:4

Iráca aꞌnapita yatëpapirinacohuëꞌ, inapita co chimirin tëꞌhuatatonaraihuëꞌ, catahuarinaco. Ina marëꞌ piꞌpíshachin shichiminaponaraihuëꞌ, catahuarinaco niꞌton, chaꞌërahuë. Ina marëꞌ “Yosparinquën,” itërahuë. Nisha piyapiꞌsaꞌ imapisopitarintaꞌ “Yosparinquën,” itopi inahuarintaꞌ.

Romanos 5:8

Quisocristoso nipirinhuëꞌ oshahuanoꞌsa marëꞌ chiminin. Oshahuanpirëhuahuëꞌ, yaꞌhuërëtërinpoaꞌ. Yosë nohuanton, canpoa marëꞌ chiminin. Napoaton: “Ma noyacha Yosë nosororinpoa paya,” tënëhuaꞌ.

2 Corintios 4:12

Aꞌchintërainquëmaso marëꞌ aparisitatonacoi, yatëpapirinacoihuëꞌ, canpitasoꞌ imaramaꞌ. Quisocristo anoyacancantërinquëmaꞌ niꞌton, nanpimiataramaꞌ, tënahuë.

Efesios 5:2

Quisocristo nosoroatonpoaꞌ, canpoa marëꞌ chiminin. Oshanënpoa marëꞌ chiminpachina, Yosëri noya niꞌnin. Napoaton canpoantaꞌ nani tahuëriya inapochachin ninosoroaꞌahuaꞌ Yosë noya niꞌinpoaꞌ.

Efesios 5:25

Quëmapiꞌsantaꞌ saꞌinaꞌ nosoroꞌinaꞌ. Quisocristosoꞌ imarëhuasopita naꞌcon nosororinpoaꞌ. Nosoroatonpoaꞌ, yaꞌhuërënamënpoaꞌ chiminin. Ina nosororinpoaso pochachin quëmapiꞌsaꞌ saꞌinaꞌ nosoroꞌinaꞌ.

Filipenses 2:17

Iráca maꞌsha Yosë marëꞌ tëpahuachinaꞌ, huinontaꞌ opotopi. Inapochachin cantaꞌ canpita noya noya imacamaso marëꞌ tëpahuachinacontaꞌ, noya nisarin, co sëtarahuëꞌ. Aꞌchintëranquëmaꞌ niꞌton, noya imaramaꞌ. Napoaton noya cancantërahuë.

1 Tesalonicenses 2:8

Naꞌcon nosoroatëinquëmaꞌ, Yosë nanamën aꞌchintërainquëmaꞌ. Ina marëꞌ parisitopiraihuëꞌ, co ina yonquiraihuëꞌ. Yaꞌipi cancanëhuëi quëran nosororainquëmaꞌ niꞌton, naꞌcon catahuarainquëmaꞌ.

Tito 2:13

Noya cancantatëhuaꞌ, Quisocristo ninarëhuaꞌ. Aꞌna tahuëri chiníquën nanantaton, oꞌmantararin. Inasoꞌ Yosë chachin niꞌton, huënaráchin huënaráchin yaꞌnoarin. Ina quënanpatëhuaꞌ, nóya cancantarihuaꞌ. Chiníquën nanantaton, noyá nichaꞌësarinpoaꞌ.

1 Pedro 1:18

Iráca shimashonënpoapita topinan quëran yaꞌhuëpi. Moshatopirinahuëꞌ, co Yosë nohuitopihuëꞌ. Inapita nonanatomaꞌ, canpitantaꞌ topinan quëran yaꞌhuëpiramahuëꞌ, Yosë ocoirinquëmaꞌ ina nohuitacamaso marëꞌ. Ocoiinquëmaso marëꞌ co coriqui pahuërëtërinhuëꞌ. Huiꞌnin chachin aꞌpaimarin. Coriqui, oro, inapita aꞌna tahuëri taꞌhuantarin.

1 Pedro 2:24

Quisocristo isoroꞌpaquë oꞌmaton, piyapi chachin nasitimarin. Oshanënpoa marëꞌ corosëquë chiminin. Inaora yaꞌhuërëtërinpoaꞌ. Yaꞌipi co noyahuëꞌ yonquirëhuasopita naniantatëhuaꞌ noya nicacaso marëꞌ chiminin. Corosëquë parisitaton, anoyacancantërinpoaꞌ.

1 Pedro 3:18

Quisocristontaꞌ nóya niponahuëꞌ, oshahuanëhuaso marëꞌ parisitërin. Oshanënpoaꞌ inquitinpoaso marëꞌ chiminin. Aꞌnaromarëáchin chiminin. Noya niponahuëꞌ, oshahuanoꞌsa marëꞌ chiminin. Canpoantaꞌ Yosë nohuitacaso marëꞌ chiminin. Piyapi niꞌton tëhuënchachin tëpapi. Chiminaponahuëꞌ, nanpiantarin niꞌton, noya noya yaꞌhuantarin.

1 Juan 2:6

“Yosë imarahuë,” topatëhuaꞌ, Quisocristo pochachin cancantacasoꞌ yaꞌhuërin.

1 Juan 2:9

Aꞌna piyapi noꞌhuihuatamaꞌ, co Yosë imaramahuëꞌ. “Imarahuë,” tapomarahuëꞌ, co tahuëri pochin cancantëramahuëꞌ. Ipora huantaꞌ tashi pochin cancantaramaꞌ.

Apocalipsis 1:5

Quisocristontaꞌ inaora nohuanton, catahuainquëmaꞌ. Asanocancainquëmaꞌ. Iráca isoroꞌpaquë oꞌmarahuaton, noꞌtëquën aꞌchintërinpoaꞌ. Inaꞌton chiminaponahuëꞌ, nanpiantarin. Chimirin minsërahuaton, yaꞌipiya huaꞌanëntarin. Yaꞌipi huaꞌanoꞌsa quëran chini chiníquën nanantarin. Naporahuaton, naꞌcon nosororinpoaꞌ. Oshanënpoaꞌ inquitinpoaso marëꞌ huënainën aꞌparin. Chiminaton, nichaꞌërinpoa.

Apocalipsis 5:9

Chinotatonaꞌ, inahuara yonquinëna quëran nasha cantanën cantarapi. “Noya noyanquën, Sinioro, niꞌton, nanan yaꞌhuëtërinquën quirica niꞌcamasoꞌ. Toꞌni iꞌshotohuatan, nani maꞌsha anitotarancoi. Iráca tëparinënquën. Chiminaton, piyapiꞌsaꞌ sopai quëran ocoiran Yosë imacaiso marëꞌ. Napoaton quëmasáchin nanitëran yaꞌipiya huaꞌanëntacasoꞌ. Nisha nisha parti yaꞌhuëpirinahuëꞌ, imarinënquën, Sinioro. Nisha nisha nananquë nonpisopita imarinënquën. Nisha nisha copirnori huaꞌanëntërinsopita niponaraihuëꞌ, natërinënquën.