1 Juan 3:12 - Chayahuita (Shahui)

¹² Iráca Cainosoꞌ sopai natëton, iin tëparin. ¿Maꞌmarëtaꞌ tëparin? Iinsoꞌ noya ninin niꞌton, noꞌhuiton, tëparin. Ama ina pochin cancantocosohuëꞌ.

1 Juan 3:12 ပူးပေါင်းရင်းမြစ်များ

Génesis 4:25

Oshaquëran Atan saꞌin, huaꞌhuaantahuachina, Sito itërin. “Cainori tëparinso yaꞌhuërënamën Yosë quëtaantarinco,” taꞌton, ina pochin nininën acotërin.

Salmos 37:12

Inpioroꞌsasoꞌ, noya nipisopita maꞌsha yaonpotopi. Napoatona co tënorochináchinhuëꞌ niꞌpi.

Proverbios 27:4

Piyapi noꞌhuitohuachinasoꞌ, co tënorotochináchinhuëꞌ cancantërin. Paꞌpi huënocatohuachinantaꞌ, maꞌsha ataꞌhuantochináchin niconin. Noyapatatona noꞌhuitohuachinasoꞌ napoaponahuëꞌ, aquë aquëtë co ahuantacasohuëꞌ nisarin.

Mateo 13:19

Tricoraya paꞌsarayarëso pochin Yosë nanamën yaꞌipi parti aꞌchintërëꞌ. ‘Yosë yahuaꞌanëntarinquëmaꞌ,’ topachina, aꞌnaquën piyapiꞌsaꞌ ira pochin nipi. Nanamën natanpirinahuëꞌ, co yonquipihuëꞌ. Inairaroꞌsari huëcapairahuatonaꞌ, pëꞌyaquipiso pochin aꞌnaroáchin sopai huëꞌnin. Huëꞌsahuaton, Yosë nanamën natanpisoꞌ osërëtiirin. Ananiantërin huachi.

Mateo 13:38

Isoroꞌpaꞌ panca imin pochin ninin. Yosë huaꞌanëntërinquë yaꞌconpisopitasoꞌ noya yaꞌpirin pochin nipi. Sopai natëpisopitaso nipirinhuëꞌ, pacatëroꞌ pochin niconpi. Co noyahuëꞌ cancantatonaꞌ, sopai natëpi.

Mateo 23:35

Iráca quëran huarëꞌ noya quëmapiꞌsaꞌ pënëntopirinahuëꞌ, naꞌa tëpapi. Apiriꞌton noya quëmapi nipirinhuëꞌ, iini tëparin. Ina piquëran aꞌnaya aꞌnaya noya pënëntopirinahuëꞌ, tëparaꞌpiapi. Naꞌa piꞌipi napopi. Napoin quëran Sacariasë tëpapi antaꞌ. Piriquiasë huiꞌnin inasoꞌ. Yosë chinotopiso pëi iꞌiratëquë artaro yaꞌhuërinso aquëcha tëpapi. Canpitasoꞌ ina nitotapomarahuëꞌ, co natantochináchinhuëꞌ cancantëramaꞌ. Napoaton Yosë chiníquën anaꞌintarinquëmaꞌ.

Mateo 27:23

—¿Maꞌmarëtaꞌ tëpaꞌi? ¿Maꞌtaꞌ onporin? itopirinhuëꞌ, aquëtë chachin chiníquën itantapi: —¡Corosëquë patanantëquëꞌ chimiꞌin! itaantapi.

Mateo 5:37

Maꞌsona tërantaꞌ iyaroꞌsaꞌ nonpatamaꞌ, noꞌtëquënáchin noncoꞌ. ‘Paꞌsarahuë,’ topatamaꞌ, pacoꞌ. ‘Co paꞌsarahuëꞌ,’ topatamaꞌ, ama pacosohuëꞌ. Noꞌtëquënáchin nonpatamaꞌ, co Yoscoarëꞌ taꞌcasoꞌ yaꞌhuërinhuëꞌ. Piꞌpisha tërantaꞌ piyapi nonpintohuatamaꞌ, sopai nohuanton napoaramaꞌ, tënahuë,” tënin Quisoso.

Juan 10:32

Quisosori itaantarin: —Tata Yosë shaꞌhuitërinco niꞌton, naꞌa piyapiꞌsaꞌ anoyatërahuë: ¿Insota anoyatërahuëso marëꞌ naꞌpiquë yatëparamaco? itërin.

Juan 8:40

Yosë anitotërincoso chachin noꞌtëquën shaꞌhuitopiranquëmahuëꞌ, yatëparamaco. Apraansoꞌ co ina pochin yonquirinhuëꞌ. Yosë nanamën noya natërin.

Juan 8:41

Canpitaso nipirinhuëꞌ tatanëma pochin nininsoꞌ nonanamaꞌ, itërin. —Co quiyasoꞌ maꞌpapiaꞌhuaroꞌsacoihuëꞌ. Yosë chachin tatanëhuëi. Inasáchin natërai, itaantapi.

Hechos 7:52

Iráca quëran huarëꞌ naꞌa pënëntonaꞌpiroꞌsaꞌ pënëntopirinahuëꞌ, ¿insotaꞌ shimashonëmapitari noya niꞌpi? Yaꞌipiya aparisitopi. “Aꞌna tahuëri noya noya nininsoꞌ oꞌmararin,” topachinara, noꞌtëquën ninopirinahuëꞌ, tëpapi. Ina quëran Cristo chachin oꞌmahuachina, shaꞌhuirapitomaꞌ, atëpatëramaꞌ.

1 Tesalonicenses 2:14

Iráca Cotia parti naꞌa piyapiꞌsaꞌ Quisocristo imatonaꞌ, natëpi. Aꞌnapita cotioroꞌsariso nipirinhuëꞌ, noꞌhuitonaꞌ chiníquën aparisitopi. Iporasoꞌ iyaroꞌsaꞌ canpitantaꞌ parisitëramaꞌ. Yaꞌhuëhuanoꞌsaꞌ inapochachin aparisitarinënquëmaꞌ.

Hebreos 11:4

Iráca Apiri Yosë natërin. “Yosë catahuarinco,” taꞌton, maꞌsha tëparahuaton, Yosë chinotërin. Inapotohuachina, noya niꞌnin. “Noya natërinco,” tënin. Cainoso nipirinhuëꞌ co ina pochin cancantërinhuëꞌ. Napoaton Apiri nani chiminpirinhuëꞌ, ipora huantaꞌ “Ma noya Apiri natëtërin,” tënëhuaꞌ.

Hebreos 12:24

Quisocristo chachin nohuitarihuaꞌ. Inasoꞌ nasha quëran anoyatërinso shaꞌhuitërinpoaꞌ imacaso marëꞌ. Huënainën quëran anoyacancantërinpoaꞌ. Iráca Apiri huënainën paꞌnin. Iini tëpahuachina, huënainën paꞌnin niꞌton, anaꞌintacasoꞌ yaꞌhuërin. Quisocristo chimininsosoꞌ nipirinhuëꞌ, noya noya. Huënainën paꞌnin niꞌton, nanan anoyatërinpoaꞌ.

1 Pedro 4:4

Iporaso nipirinhuëꞌ imaramaꞌ. Aꞌnapita yanoꞌpihuachinara, amatopirinënquëmahuëꞌ. Co yanoꞌpihuatamarahuëꞌ, noꞌhuirinënquëmaꞌ. “¿Onpoatomataꞌ pita nipatëira, co yaniꞌnamacoihuëꞌ?” itatënënquëmaꞌ, pinorinënquëmaꞌ.

1 Juan 3:8

Nani tahuëri co noyahuëꞌ nipatamaꞌ, sopai imaramaꞌ. Iráca quëran huarëꞌ sopai co noyahuëꞌ cancantaton, oshahuanin. Inasoꞌ nonpintohuachinpoaꞌ, canpoantaꞌ oshahuanarëhuaꞌ. Napoaton Yosë huiꞌnin oꞌmarin sopai minsëaton nichaꞌëinpoaso marëꞌ. Yaꞌipi oshanënpoaꞌ inquitohuachinpoaꞌ, co huachi sopai natëcasoꞌ yaꞌhuërinhuëꞌ.

Judas 1:11

¡Maꞌhuantacha nisapi paya! Nonpinaꞌpiroꞌsasoꞌ, Caino pochin cancantatonaꞌ co Yosë natëpihuëꞌ. Paramo pochin cancantopi. Iráca Paramosoꞌ coriquiráchin cancantaton, piyapiꞌsaꞌ anishacancantërin. Corintaꞌ iráca co noyahuëꞌ ninin. Co huaꞌanoꞌsaꞌ yanatërinhuëꞌ, noꞌhuirin. Ina marëꞌ Yosë nohuanton, chiminin. Inapita pochin cancantopisopita Yosëri chiníquën anaꞌintarin.

Apocalipsis 17:6

Tëhuënchachin ina sanapi paꞌpi co noyahuëꞌ cancantërin. Quisoso imapisopita co quëꞌyarinhuëꞌ. “Quisoso imarai,” topachinara, atëpatërin. Notohuaroꞌ atëpatahuaton, noꞌpirinso pochin paꞌyatërin. Ina nicato, panca paꞌyanahuë. Ina quëran anquëni itërinco: