1 Juan 2:7 - Chayahuita (Shahui)

⁷ Co iyaroꞌsaꞌ nasha camaitërinsoꞌ ninshitaranquëmahuëꞌ. Iráca quëran huarëꞌ Yosë nanamën natanamaꞌ. “Yaꞌipinquëmaꞌ noya ninosorocoꞌ,” itërinpoaꞌ. Inachachin iporantaꞌ pënënaranquëmaꞌ.

1 Juan 2:7 ပူးပေါင်းရင်းမြစ်များ

Levítico 19:18

Ama canpita capini ninoꞌhuitoma niiꞌhuërëtocosohuëꞌ. Canpitaora ninosororamaso pochachin aꞌnapitantaꞌ, nosorocoꞌ. Ca Sinioroco napotaranquëmaꞌ.

Mateo 5:43

Ina quëran aꞌchintaantarin: “Isontaꞌ iráca pënëntopisoꞌ. ‘Canpita capini ninosorocoꞌ. Inimiconëmapitaso nipirinhuëꞌ, co nosorocasoꞌ yaꞌhuërinhuëꞌ,’ topi.

Juan 13:34

Iporasoꞌ nasha pochin pënënaranquëmaꞌ noya ninosorocamaso marëꞌ. Carinquëma nosororanquëmaso pochachin, imaramacosopita capinintaꞌ ninosorocoꞌ.

Hechos 17:19

Aꞌnaquënso natanahuatonaꞌ, Ariopaco itopiquë quëpapi. Inasoꞌ huaꞌanoꞌsa niyontoyantopiquë. Paono inaquë quëparahuatonaꞌ, itopi: —¿Ma nisha nanan chachintaꞌ aꞌchinan? Yanitotërai quiyantaꞌ.

Hebreos 6:9

Chiníquën iyaroꞌsaꞌ pënënpiranquëmahuëꞌ, nosororanquëmaꞌ. Co Yosë aꞌpoaramahuëꞌ. Noya imatomaꞌ, chaꞌësaramaꞌ tënahuë.

1 Juan 2:24

Yaꞌnan imapomaꞌ, noꞌtëquën aꞌchintërainquëmaꞌ. Ina chachin imamiatocoꞌ. Ina imapatamaꞌ, cancanëma quëran Tata Yosë nohuitaramaꞌ. Huiꞌniontaꞌ noya nohuitarama huachi.

1 Juan 3:11

Yaꞌnan imapoma quëran huarëꞌ Yosë nanamën natanamaꞌ. “Noya ninosorocoꞌ,” itërainquëmaꞌ.

1 Juan 3:2

Naꞌcon, iyaroꞌsaꞌ, nosororanquëmaꞌ. Iporasoꞌ Yosë huiꞌninpita pochin niꞌninpoaꞌ. Aꞌna tahuëri noya noya acoarinpoaꞌ. Onpopinsona nicarihuaꞌ nimara. Co yaꞌipi nitochatërarëhuahuëꞌ. Nipirinhuëꞌ, Quisocristo oꞌmantahuachin, nirayarihuaꞌ. Ina niꞌpatëhuaꞌ, ina pochachin nicarihuaꞌ.

1 Juan 3:21

Napoaton iyaroꞌsaꞌ, cancanënpoa quëran aꞌnaya aꞌnayanpoaꞌ yonquiaꞌahuaꞌ. “Yosë noya niꞌsarinco,” topatëhuaꞌ, co Yosë tëꞌhuatarihuahuëꞌ. Co tëꞌhuatatëhuahuëꞌ, nani tahuëri ina nontarihuaꞌ.

1 Juan 3:23

Yosë nani pënëninpoaꞌ huiꞌnin imacaso marëꞌ. Naporahuaton, ninosorocasontaꞌ shaꞌhuitërinpoaꞌ. “Quisocristontaꞌ inachachin shaꞌhuitërinpoaꞌ,” taꞌtëhuaꞌ, cancanënpoa quëran natëahuaꞌ.

1 Juan 4:1

Naꞌcon iyaroꞌsaꞌ nosororanquëmaꞌ niꞌton, pënënaranquëmaꞌ. Naꞌa nonpin nanan pënëntonaꞌpiroꞌsaꞌ nonpin nanan aꞌchinapi. “Yosë nanamën aꞌchinahuë,” topirinahuëꞌ, co noꞌtëquën aꞌchinpihuëꞌ. Napoaton aꞌchintohuachinënquëmaꞌ, ama aꞌnaroáchin natëtocosohuëꞌ. “Nonpin nanan nimara,” taꞌtomaꞌ, yonquicoꞌ. Yaꞌipi Yosë quiricanën quëran aꞌchintërinpoasoꞌ yonquiatomaꞌ, tantiacoꞌ. Co ina pochin aꞌchintohuachinënquëmahuëꞌ, ama natëcosohuëꞌ.

1 Juan 4:11

Yosë naꞌcon nosororinpoaꞌ niꞌton, canpoantaꞌ, iyaroꞌsaꞌ, inapochachin ninosoroaꞌahuaꞌ. Ina pochin cancantacasoꞌ yaꞌhuërin.

1 Juan 4:21

Quisocristo pënëninpoaꞌ. “Nosorohuatamaco, piyapintaꞌ nosorocoꞌ,” itërinpoaꞌ.

1 Juan 4:7

Yosë paꞌpi nosororinpoaꞌ. Napoaton iyaroꞌsaꞌ, canpoantaꞌ noya ninosoroaꞌahuaꞌ. Huëntonënquë ayaꞌconpachinpoaꞌ, catahuarinpoaꞌ aꞌnapita nosorocasoꞌ. Nosorohuatëhuaꞌ, Yosë nohuitarihuaꞌ. Huiꞌninpita pochin niꞌninpoaꞌ.