1 Juan 2:17 - Chayahuita (Shahui)

¹⁷ Isoroꞌpaꞌ taꞌhuantarin. Yaꞌipi maꞌshantaꞌ taꞌhuantarin. Inasáchin paꞌyatohuatëhuaꞌ, topinan quëran nanpiarihuaꞌ. Nipirinhuëꞌ, Yosë noya imapatëhuaꞌ, co onporontaꞌ taꞌhuantarihuahuëꞌ. Yaꞌhuëmiatarihuaꞌ.

1 Juan 2:17 ပူးပေါင်းရင်းမြစ်များ

Salmos 90:9

Tëhuënchachin noꞌhuihuatancoira, huaꞌyanëhuëi matërancoi. Sëtërarai quëran panca nii oꞌhuahuatoira, co huaꞌquirinhuëꞌ. Inapochachin nanpiraisontaꞌ, co huaꞌquirinhuëꞌ.

Mateo 21:31

Catoꞌ huiꞌnin chachin shaꞌhuitopirinhuëꞌ, ¿insoaritaꞌ natërinsoꞌ? itërin Quisosori. —Yaꞌnan camairinsoꞌ paꞌpin natëton, sacatërin, itopi. —Noꞌtëquën naporamaꞌ. Aꞌnasoꞌ “Paꞌi nipachin,” taponahuëꞌ, co paꞌninhuëꞌ. Inapochachin copirno marëꞌ coriqui maꞌpatonaꞌpiroꞌsaꞌ, monshihuanaꞌpiroꞌsaꞌ, inapita co noyahuëꞌ yonquipirinahuëꞌ, iporasoꞌ ina naniantahuatonaꞌ, Yosë imasapi. Imatonaꞌ, tëhuënchachin huaꞌanëntërinquë yaꞌconapi. Canpitaso nipirinhuëꞌ co yayaꞌconamahuëꞌ.

Mateo 24:35

Isoroꞌpaꞌ taꞌhuantarin. Piꞌiroꞌtëntaꞌ taꞌhuantarin. Ca nanamëhuëso nipirinhuëꞌ co onporontaꞌ taꞌhuantarinhuëꞌ. Noꞌtëquën nonahuë niꞌton, yaꞌipi shaꞌhuitëranquëmaso chachin naniarin huachi.

Mateo 7:21

Ina quëran itaantarin: “Naꞌa piyapiꞌsaꞌ: ‘Sinioro, Sinioro,’ itopirinacohuëꞌ, aꞌnaquën co cancanëna quëran imarinacohuë niꞌton, co Yosë huaꞌanëntërinquë yaꞌconapihuëꞌ. Yosë natëpisopitaráchin inatohuaꞌ yaꞌhuëcontapi huachi.

Marcos 3:35

Yosë natëpisopita iyahuëpita pochin niꞌnahuë. Sanapiꞌsantaꞌ Yosë nanamën natëhuachinaꞌ, oshihuëpita pochin niꞌnahuë. Payaroꞌsantaꞌ imapachinaco, mamahuë pochin niꞌnahuë, itërin.

Juan 4:14

Nisha iꞌsha carinquën quëtaranquën. Ina yaꞌhuëtohuachinquën, co huachi yamororëso pochin cancantaranhuëꞌ. Niꞌquëꞌ. Pancaiꞌ noꞌpa quëran pipihuachina, noyápiachin pipirárin. Co onporontaꞌ yanimarinhuëꞌ. Inapochachin nanpirin iꞌsha quëtohuatënquën, cancanënquë chachin yaꞌhuëtarinquën. Inaquë yaꞌhuápon huachi. Yosë nohuitaton, nanpimiataran, itërin.

Juan 6:58

Ca cosharo pochinco. Inápa quëran oꞌmarahuë. Shimashonëmapita cosharoꞌ Yosëri aꞌpatimarinsoꞌ caꞌpirinahuëꞌ, iráca chiminpi. Nipirinhuëꞌ, imamiatohuatamaco, nanpimiataramaꞌ, itërin.

Juan 7:17

Cancanëma quëran huarëꞌ Yosë yanatëhuatamaꞌ, noꞌtëquën anitotarinquëmaꞌ: “Co inaora yonquinën quëran aꞌchininhuëꞌ. Yosë nanamën chachin aꞌchinarin,” tosaramaꞌ.

Romanos 12:2

Iporasoꞌ notohuaroꞌ piyapiꞌsaꞌ co Yosë natëpihuëꞌ. Maꞌsharáchin yonquiatonaꞌ, co Yosë yonquipihuëꞌ. Ama inapita nonancosohuëꞌ. Nani tahuëri Yosë nontocoꞌ yonquirinso chachin quëchinquëmaꞌ. Ina yonquihuatamaꞌ, nohuantërinso chachin anitotarinquëmaꞌ. Ina quëran noya noya cancantohuatamaꞌ, noya niꞌsarinquëmaꞌ.

1 Corintios 7:31

Yaꞌipi maꞌsha isoroꞌpaquë yaꞌhuërinsopita aꞌna tahuëri taꞌhuantarin. Napoaton maꞌsha yaꞌhuëtopirinquëmahuëꞌ, ama inapita naꞌcon naꞌcon yonquicosohuëꞌ.

Colosenses 1:9

Naporo quëran huarëꞌ canpita yonquiatëinquëmaꞌ, Yosë nontërai. Nani tahuëriya nontatoi, itërai: “Quëmasoꞌ Sinioro tëhuënchachin anitotërancoi noꞌtëquën natëcaꞌhuainquënso marëꞌ. Corosasëquë imarinënsopita naꞌcon catahuaquëꞌ. Yaꞌipi nohuantëransoꞌ anitotëquëꞌ. Ispirito Santori catahuain noꞌtëquën yonquiꞌinaꞌ.

Colosenses 4:12

Ipapërasëntaꞌ canpitataquë yaꞌhuërinsoꞌ saludos aꞌpatarinquëmaꞌ. Inantaꞌ Quisocristo natëton, noya nanan aꞌchinarin. Nani tahuëri canpita marëꞌ Yosë nontárin. “Catahuaquëꞌ Sinioro yaꞌipi nohuantëransoꞌ nitochinaꞌ. Noya nitotatonaꞌ imamiachinën,” itárin.

1 Tesalonicenses 4:3

Yosë nohuantërin noyasáchin nicacasoꞌ. Ama piꞌpian tërantaꞌ monshihuancosohuëꞌ.

1 Tesalonicenses 5:18

Maꞌsha onpotopirinënquëmahuëꞌ, ama sëtocosohuëꞌ. Nani tahuëri “Yosparinquën Sinioro,” itocoꞌ. Maꞌsha onpoapomarahuëntaꞌ, noya cancantocoꞌ. “Inantaꞌ Sinioro noya,” itocoꞌ. Quisocristo imarëhuaꞌ niꞌton, ina pochin cancantacasoꞌ Yosë nohuantërin.

Hebreos 10:36

Maꞌsha onpopiramahuëntaꞌ, noya ahuantocoꞌ. Noya natëhuatamaꞌ, naꞌcon catahuarinquëmaꞌ. Nani shaꞌhuitërinquëmaꞌ niꞌton, co nonpintarinquëmahuëꞌ. Noya nichaꞌësarinquëmaꞌ.

Santiago 4:14

Co tashiraya tërantaꞌ nanitaramahuëꞌ ninocamasoꞌ. Maꞌsona onpocamasoꞌ co nitotëramahuëꞌ. Co canpitaora nohuanton nanpiramahuëꞌ. Chitoroꞌ aꞌnaroáchin sacorinso pochachin aꞌnanaya aꞌnaquën chiminin.

1 Pedro 1:5

Tata Yosë yaꞌipiya nanitaparin. “Yosë co quënanpirëhuahuëꞌ, catahuarinpoaꞌ,” topatëhuaꞌ, noya aꞌpaiarinpoaꞌ. Maꞌsha onpohuatëhuaꞌ, catahuarinpoaꞌ ahuantacasoꞌ. Ayaroꞌ tahuëri nóya nichaꞌësarinpoaꞌ. Nani yonquirin oꞌmantacasoꞌ. Aꞌna tahuëri niꞌsarëhuaꞌ. Oꞌmantaquë huarëꞌ aꞌpaiarinpoaꞌ.

1 Pedro 4:2

Napoaton ama iráca naporamaso pochin yonquicosohuëꞌ. Ipora quëra huarëꞌ Yosë nohuantërinsoáchin natëcoꞌ.