1 Juan 2:15 - Chayahuita (Shahui)

¹⁵ Naꞌa piyapiꞌsaꞌ co Yosë natëtonahuëꞌ nisha nisha yonquipi. Isoroꞌpaquë yaꞌhuërinsopitaráchin yonquipi. Ama inapita pochin cancantocosohuëꞌ. Ama nani maꞌsha nohuantapatocosohuëꞌ. Maꞌsha naꞌcon yonquihuatamaꞌ, co tëhuënchachin Tata Yosë nosororamahuëꞌ.

1 Juan 2:15 ပူးပေါင်းရင်းမြစ်များ

Mateo 4:8

Ina quëran aꞌna motopiꞌpaꞌ sopairi quëpantarin. Inatohua quëran yaꞌipi ninanoroꞌsaꞌ, maꞌshanënpita, inapita aꞌnotërin. Noyápiachin nininsopita yaꞌipiya quënanin.

Mateo 6:24

Ina quëran itaantarin: “Aꞌna piyapi catoꞌ patron yaꞌhuëtohuachina, nisha nisha camaitopi niꞌton, co nanitërinhuëꞌ cato chachin natëcasoꞌ. Aꞌnasoꞌ nohuantaton, noya natëarin. Aꞌnaso nipirinhuëꞌ co onpopinchin nohuantatonhuëꞌ, co natëarinhuëꞌ. Inapochachin canpitantaꞌ coriquiráchin cancantohuatamaꞌ, co nanitaramahuëꞌ Yosë natëcamasoꞌ,” tënin.

Lucas 16:13

Catoꞌ patron camaihuachinquëmaꞌ, co nanitëramahuëꞌ cato chachin natëcamasoꞌ. Aꞌnasoꞌ nohuantatomaꞌ, noya natëaramaꞌ. Aꞌnaso nipirinhuëꞌ co onpopinchin nohuantatomahuëꞌ co natëaramahuëꞌ. Inapochachin canacamasoáchin yonquihuatamaꞌ, co nanitaramahuëꞌ Yosë natëcamasoꞌ. Coriquiráchin cancantohuatamaꞌ, co Yosë natëaramahuëꞌ,” itërin Quisosori.

Juan 15:19

Inapita pochin cancantëramaꞌ naporini, noya niꞌitënënquëmahuëꞌ. Inahua capiniráchin nipaꞌyatopi. Nipirinhuëꞌ, nani huayonanquëmaꞌ. Ca nohuanto, co inapita pochin cancantëramahuëꞌ. Imaramaco niꞌton, noꞌhuiarinënquëmaꞌ.

Romanos 12:2

Iporasoꞌ notohuaroꞌ piyapiꞌsaꞌ co Yosë natëpihuëꞌ. Maꞌsharáchin yonquiatonaꞌ, co Yosë yonquipihuëꞌ. Ama inapita nonancosohuëꞌ. Nani tahuëri Yosë nontocoꞌ yonquirinso chachin quëchinquëmaꞌ. Ina yonquihuatamaꞌ, nohuantërinso chachin anitotarinquëmaꞌ. Ina quëran noya noya cancantohuatamaꞌ, noya niꞌsarinquëmaꞌ.

Gálatas 1:10

Co piyapiꞌsaꞌ noya nicainacoso marëꞌ aꞌchinahuëꞌ. Yosë noya nicaincoso marëꞌ aꞌchinahuë. Piyapiꞌsaꞌ paꞌyatinacoso marëꞌ naꞌcon naꞌcon yonquirahuë naporini, co Quisocristo natëitohuëꞌ.

Efesios 2:2

Coꞌhuara Quisocristo imashatërapomahuëꞌ, sopai huaꞌan natëtomaꞌ, co noyahuëꞌ ninamaꞌ. Inasoꞌ ihuan yaꞌhuërinquë yaꞌhuaton, yaꞌipi sopairoꞌsaꞌ huaꞌanëntarin. Co quënanpirëhuahuëꞌ, isoroꞌpaquë sacatárin minsëinpoaso marëꞌ. Yonquinëmaquë camairinquëmaꞌ niꞌton, co Yosë natëramahuëꞌ.

1 Timoteo 6:10

Coriquiráchin paꞌyatohuatëra, nisha nisha yonquirëꞌ. Co noyahuëꞌ ninëꞌ. Nonpinëꞌ, ihuatërëꞌ, noꞌhuitërëꞌ, ina pochin yonquirëꞌ. Aꞌnaquën coriquiráchin yonquiatonaꞌ, Yosë aꞌpopi. Ina quëran cancanëna quëran co huachi noya cancantopihuëꞌ. Sëtatonaꞌ, chiníquën parisitapi.

Santiago 1:27

Tëhuënchachin Yosë chinotohuatëhuaꞌ, piyapiꞌsaꞌ nosoroarëhuaꞌ. Saꞌahuaroꞌsaꞌ, quëyoronoꞌsaꞌ, inapita catahuarëhuaꞌ. Maꞌsha pahuantohuachinaꞌ, quëtacasoꞌ yaꞌhuërin. Aꞌnaquën piyapiꞌsaꞌ co noyahuëꞌ cancantatonaꞌ, co Yosë imapihuëꞌ. Ama inapita nonanhuansohuëꞌ. Noyápiachin cancantohuatëhuaꞌ, noya imasarëhuaꞌ. Inapohuatëhuaꞌ, Yosë noya niꞌsarinpoaꞌ.

Santiago 4:4

Canpitasoꞌ co huachi Yosëíchin yonquiramahuëꞌ. Yosë yonquipiramahuëꞌ, nani maꞌsha naꞌcon naꞌcon nohuantatomaꞌ, yamonshihuaninso pochin cancantëramaꞌ. Capa cancantacasoáchin paꞌyatëramaꞌ. Maꞌsharáchin yonquiatomaꞌ, Yosë inimiconën pochin cancantëramaꞌ.

1 Juan 3:17

Quisocristo imarëhuasopita capini noya ninosorocasoꞌ yaꞌhuërin. Aꞌnapita maꞌsha pahuantohuachinaꞌ, catahuahuaꞌ. Capa capacaisoꞌ nipachin, capa aꞌmocaisoꞌ nipachin quëtahuaꞌ. Co inapita catahuahuatëhuahuëꞌ, co tëhuënchachin nosororëhuahuëꞌ. Co canpoa capini ninosorohuatëhuahuëꞌ, co Yosëntaꞌ nosororëhuahuëꞌ.

1 Juan 4:5

Inapitaso nipirinhuëꞌ, co Yosë nohuitatonahuëꞌ, co nanamën chachin aꞌchinpihuëꞌ. Isoroꞌpaquë yaꞌhuërinsopitaráchin yonquiatonaꞌ, inahuara yonquinëna quëran aꞌchinpi. Napoaton co imapisopitasohuëꞌ nonpin nanan natëpi.

1 Juan 5:10

Yosë nani shaꞌhuitërinpoaꞌ niꞌton, imarëhuasopita nitotërëhuaꞌ. Cancanënpoa quëran anitotërinpoaꞌ. Aꞌnapitaso nipirinhuëꞌ, co Yosë natëpihuëꞌ. “Quisoso co Yosë huiꞌninhuëꞌ. Co nichaꞌësarinpoahuëꞌ,” taꞌtonaꞌ, Yosëri nonpintërinso pochin cancantopi. Noꞌtëquën shaꞌhuitopirinpoahuëꞌ, co natëpihuëꞌ.