1 Juan 2:13 - Chayahuita (Shahui)

¹³ Aꞌnaquëmaꞌ nani huaꞌquiꞌ imatomaꞌ aꞌnapita catahuaramaꞌ niꞌton, Quisocristo noya nohuitëramaꞌ. Inasoꞌ iráca quëran huarëꞌ yaꞌhuërin. Noya imaramaꞌ niꞌton, ninshitaranquëmaꞌ. Canpitantaꞌ huiꞌnapiꞌsanquëmaꞌ, nani sopai minsëramaꞌ. Napoaton ninshitaranquëmaꞌ.

1 Juan 2:13 ပူးပေါင်းရင်းမြစ်များ

Salmos 148:12

quëmapiꞌsaꞌ, sanapiꞌsaꞌ, huiꞌnapiꞌsaꞌ, mashoroꞌsaꞌ, huaꞌhuaroꞌsaꞌ, payaroꞌsaꞌ,

Salmos 90:2

Coꞌhuara isoroꞌpaꞌ, motopiroꞌsaꞌ, inapita yaꞌhuëyátërasohuëꞌ, quëmasoꞌ yaꞌhuëran. Iráca quëran huarëꞌ yaꞌhuëran. Tahuëri nitiquipirinhuë tërantaꞌ, quëmaso yaꞌhuëápon. Quëmasáchin Yosënquën.

Salmos 91:14

Sinioro napotërinpoaꞌ: “Nohuitatomaco nosororamaco niꞌton, inapita quëran nichaꞌësaranquëmaꞌ. Co insonta nanitapaponquëmahuëꞌ.

Joel 2:28

Naquëranchin Sinioro taantarin: “Ina tahuëriꞌsa naꞌhuërinso piquëran, ispiritonëhuë yaꞌipi piyapinëhuëpita ayaꞌcoancantarahuë. Inapotohuato, huiꞌnamapita quëmapiꞌsaꞌ, sanapiꞌsaꞌ, yonquirahuëso shaꞌhuiponaꞌ. Mashoyaroꞌsanta huaꞌnataponaꞌ. Huiꞌnapiꞌsanta huaꞌnarëso pochin aꞌnotërahuësoꞌ, niꞌsapi.

Zacarías 9:17

Naporo quëran huarëꞌ, piyapinënpita noya noya yaꞌhuëaponaꞌ. Notohuaroꞌ cosharoꞌ, huino, inapita yaꞌhuëapon. Napoatona huiꞌnapiꞌsanënpoaꞌ, nanoꞌsanënpoaꞌ, inapitantaꞌ, noya noya soꞌsoponaꞌ.

Mateo 11:27

Ina quëran piyapiꞌsaꞌ aꞌchintantarin. “Tata Yosë nohuanton, pënëntarahuë. Yaꞌipi nanamën anitotërinco piyapiꞌsaꞌ aꞌchintacaꞌhuaso marëꞌ. Huiꞌninco niꞌton, inasáchin noya nohuitërinco. Inapochachin Tata Yosë nohuitërahuë. Casáchin noya nohuitërahuë. Aꞌnaquëontaꞌ cari anohuitohuato, nohuitapi antaꞌ.

Mateo 13:19

Tricoraya paꞌsarayarëso pochin Yosë nanamën yaꞌipi parti aꞌchintërëꞌ. ‘Yosë yahuaꞌanëntarinquëmaꞌ,’ topachina, aꞌnaquën piyapiꞌsaꞌ ira pochin nipi. Nanamën natanpirinahuëꞌ, co yonquipihuëꞌ. Inairaroꞌsari huëcapairahuatonaꞌ, pëꞌyaquipiso pochin aꞌnaroáchin sopai huëꞌnin. Huëꞌsahuaton, Yosë nanamën natanpisoꞌ osërëtiirin. Ananiantërin huachi.

Mateo 13:38

Isoroꞌpaꞌ panca imin pochin ninin. Yosë huaꞌanëntërinquë yaꞌconpisopitasoꞌ noya yaꞌpirin pochin nipi. Sopai natëpisopitaso nipirinhuëꞌ, pacatëroꞌ pochin niconpi. Co noyahuëꞌ cancantatonaꞌ, sopai natëpi.

Mateo 5:37

Maꞌsona tërantaꞌ iyaroꞌsaꞌ nonpatamaꞌ, noꞌtëquënáchin noncoꞌ. ‘Paꞌsarahuë,’ topatamaꞌ, pacoꞌ. ‘Co paꞌsarahuëꞌ,’ topatamaꞌ, ama pacosohuëꞌ. Noꞌtëquënáchin nonpatamaꞌ, co Yoscoarëꞌ taꞌcasoꞌ yaꞌhuërinhuëꞌ. Piꞌpisha tërantaꞌ piyapi nonpintohuatamaꞌ, sopai nohuanton napoaramaꞌ, tënahuë,” tënin Quisoso.

Lucas 10:22

Ina quëran aꞌparinsopita itantarin. “Tata Yosë nohuanton, chiníquën nanantërahuë. Yaꞌipi nanamën anitotërinco piyapiꞌsaꞌ aꞌchintaꞌhuaso marëꞌ. Huiꞌninco niꞌto, tatahuësáchin noyá nohuitërinco. Inapochachin cantaꞌ Tata Yosë nohuitërahuë. Casáchin noyá nohuitërahuë. Aꞌnaquën piyapiꞌsantaꞌ caora nohuanto, anohuitërahuë. Inapitantaꞌ Yosë nohuitapi huachi,” itërin.

Juan 14:7

Nohuitohuatamaco, Tatahuëntaꞌ nohuitaramaꞌ. Ipora quëran huarëꞌ ina nohuitaramaꞌ. Nani niꞌnamaꞌ, itërincoi.

Juan 14:9

—Isonápoꞌ piꞌipi iyasha, canpitaroꞌco yaꞌhuëpirahuëꞌ, ¿co nohuichatërarancohuëꞌ ti? Niꞌpatamaco, tatahuëntaꞌ niꞌnamaꞌ. ¿Onpoatontaꞌ nipachin, “Tata aꞌnotocoi niꞌii,” itëranco?

Juan 16:3

Co Tata Yosë nohuitopihuëꞌ. Cantaꞌ huiꞌninco nipirahuëꞌ, co nohuitërinacohuëꞌ niꞌtonaꞌ, aparisitarinënquëmaꞌ.

Juan 16:33

Nani naꞌcon shaꞌhuitëranquëmaꞌ sano cancantacamaso marëꞌ. Casáchin yonquihuatamaco, sano cancantaramaꞌ. Co paꞌyanaramahuëꞌ. Piyapiꞌsaꞌ aparisitopirinënquëmahuëꞌ, catahuaranquëmaꞌ niꞌton, chiníquën cancantocoꞌ. Yaꞌipi isoroꞌpaquë co noyahuëꞌ nipisopita nani minsëarahuë, itërincoi Quisoso.

Juan 17:21

Inapitantaꞌ catahuaquëꞌ napopianachin yonquiꞌinaꞌ. Canpoꞌ ninosororëso pochin ninosoroꞌinaꞌ. Quëma huiꞌnanco niꞌto, yonquiranso chachin yonquirahuë. Inapitantaꞌ catahuaquëꞌ canpo pochachin yonquiꞌinaꞌ. Ina quëran aꞌnapitantaꞌ natëarinaco. ‘Yosëri chachin aꞌpaimarin,’ tosapi.

Juan 17:3

Quëmasáchin Yosënquën. Isoroꞌpaquë aꞌpaimaranco. Piyapiꞌsaꞌ nohuitahuatënënquën, cantaꞌ nohuitohuachinaco, nanpimiatapi.

Juan 8:19

—¿Insëquëtaꞌ tataparin? itopi. —Canpitasoꞌ co ina nohuitëramahuëꞌ. Cantaꞌ co tëhuënchachin nohuitëramacohuëꞌ. Nohuitëramaco naporini, tatahuëntaꞌ nohuichitomahuëꞌ, itërin.

2 Corintios 4:6

Yaꞌnan isoroꞌpaꞌ acoapon yaꞌipi parti tashipirinhuëꞌ: “Niiꞌsohuanchin huachi,” tënin Yosë. Napohuachina, tahuëri yaꞌhuërin. Inapochachin iporasoꞌ cancanënpoaquë aꞌpintërinpoaꞌ ina nohuitacaso marëꞌ. Inasoꞌ noya noya. Quisocristo yaꞌpirin quëran aꞌpintërinpoaso pochin ninin. Ina yonquihuatëhuaꞌ, Yosë chachin anohuitarinpoa huachi.

1 Timoteo 5:1

Mashoroꞌsaꞌ co noyahuëꞌ nipachinaꞌ, ama noꞌhuiquësohuëꞌ. Tata pochin nicaton, sanoanan quëran pënënquëꞌ. Napopináchin piꞌipitëramasoꞌ, iyaparin pochin niꞌquëꞌ. Inapitantaꞌ nosoroaton, sanoanan quëran pënënquëꞌ.

Tito 2:6

Huiꞌnapiꞌsantaꞌ pënënquëꞌ sano yonquiꞌinaꞌ.

1 Juan 1:1

Iso quirica aꞌpataranquëmaꞌ, niꞌcoꞌ. ¿Noyanquëmaꞌ canpitantaꞌ? Quiyantaꞌ isëquë noya yaꞌhuarai. Quisocristo noya noya nohuitacamaso marëꞌ ninshitaranquëmaꞌ. Iráca coꞌhuara isoroꞌpaꞌ yaꞌhuëyátërasohuëꞌ, inápaquë yaꞌhuërin. Ina quëran oꞌmarahuaton, aꞌchintërincoi, natanai. Quiyasoꞌ niꞌnai. Nirayarai. Nonën chachin yaꞌhuëtërin, sëꞌhuarai. Inasáchin Yosë yonquirinsoꞌ anitotërinpoaꞌ. Ina nohuitohuatëhuaꞌ, nóya nanpimiatarihuaꞌ.

1 Juan 2:1

Quisocristo imaramaꞌ niꞌton, huiꞌnahuëpita pochin niꞌnanquëmaꞌ. Ninshitaranquëmaꞌ noyasáchin nicacamaso marëꞌ. Nipirinhuëꞌ, co noyahuëꞌ nipatëhuaꞌ, Quisocristo catahuarinpoaꞌ. Oshahuanëhuaꞌ niꞌton, anaꞌintinpoasoꞌ yaꞌhuëpirinhuëꞌ. Canpoa marëꞌ Yosë nontaton, nanan anoyatarinpoaꞌ. Inasoꞌ noꞌtëquënáchin yonquirin.

1 Juan 2:12

Canpitasoꞌ imaramaꞌ niꞌton, ninshitaranquëmaꞌ. Huiꞌnahuëpita pochin nicatënquëmaꞌ, ninshitaranquëmaꞌ. Quisocristo canpoa marëꞌ chiminin. Imapatamaꞌ, oshanëmaꞌ inquitërinquëmaꞌ.

1 Juan 2:14

Yaꞌipi imaramasopita huiꞌnahuëpita pochin niꞌnanquëmaꞌ. Yosë nohuitëramaꞌ niꞌton, ninshitaranquëmaꞌ noya noya cancantacamaso marëꞌ. Quisocristo noya nohuitëramaꞌ niꞌton, iyaroꞌsaꞌ, ninshitaranquëmaꞌ. Inasoꞌ iráca quëran huarëꞌ yaꞌhuërin. Nani tahuëri, apiaꞌhuaroꞌsaꞌ, Yosë nanamën yonquiaramaꞌ. Napoaton chiníquën cancantaramaꞌ. Chiníquën cancantatomaꞌ, sopai nani minsëramaꞌ.

1 Juan 3:12

Iráca Cainosoꞌ sopai natëton, iin tëparin. ¿Maꞌmarëtaꞌ tëparin? Iinsoꞌ noya ninin niꞌton, noꞌhuiton, tëparin. Ama ina pochin cancantocosohuëꞌ.

1 Juan 4:4

Canpitasoꞌ apiaꞌhuaroꞌsaꞌ, Yosë huiꞌninpitanquëmaꞌ ninamaꞌ. Noꞌtëquën yonquiatomaꞌ, nisha aꞌchinaꞌpiroꞌsaꞌ minsëaramaꞌ. Sopai nohuanton, nonpin nananoꞌsaꞌ aꞌchintopirinënquëmahuëꞌ, Ispirito Santo nani yaꞌcoancantërinquëmaꞌ. Inasoꞌ sopai quëran chini chiníquën nanantarin niꞌton, catahuahuachinpoaꞌ, co nonpin nananoꞌsaꞌ natëtarihuahuëꞌ.

1 Juan 5:18

Yosëri imarinsopita huëntonënquë ayaꞌconin. Noyasáchin nicacasoꞌ yaꞌhuërin. Yosë huiꞌnini chachin aꞌpaiarin. Sopairi yanonpintopirinhuëꞌ, Quisocristori catahuarin niꞌton, co sopairi minsëarinhuëꞌ.

1 Juan 5:20

Yosë huiꞌnin chachin oꞌmaton, noꞌtëquën Yosë anohuitërinpoaꞌ. Inasáchin noꞌtëquën yonquirin. Yosë nohuitatëhuaꞌ, yonquirinsoráchin imasarëhuaꞌ. Quisocristo nohuitërëhuaꞌ niꞌton, catahuarinpoaꞌ noꞌtëquën yonquicaso marëꞌ. Inaíchin Yosësoꞌ niꞌton, chinotacasoꞌ yaꞌhuërin. Ina nohuitohuatëhuaꞌ, nanpimiatarihuaꞌ.

Apocalipsis 12:11

Carniroaꞌhua chiminaton, huënainën quëran anoyacancantërinpoaꞌ niꞌton, sopai minsërëhuaꞌ. Nanamën shaꞌhuitatëhuaꞌ, minsërëhuaꞌ. Yatëpapirinënpoahuëntaꞌ, co aꞌporëhuahuëꞌ, tosapi.

Apocalipsis 2:7

Imaramaco niꞌton, Ispirito Santo chachin nontarinquëmaꞌ. Huëratëhuanpatamaꞌ, noya natanatomaꞌ, yonquicoꞌ. Sopai minsëhuatamaꞌ, Yosëꞌpaꞌ yaꞌhuëmiataramaꞌ. Inatohuaꞌ nanpirin nara nitërinsoꞌ caꞌpatamaꞌ, noya noya nanpimiataramaꞌ. Nani huachi,” itëquëꞌ, ninshitohuatan, itërinco Quisoso.