1 Juan 1:6 - Chayahuita (Shahui)

⁶ Tashi pochin cancantohuatëhuaꞌ, co Yosë nohuitarihuahuëꞌ. “Yosë nohuitërahuë,” tapomarahuëꞌ, co noyahuëꞌ cancantohuatamaꞌ, nonpinamaꞌ. Co noꞌtën nanan imaramahuëꞌ.

1 Juan 1:6 ပူးပေါင်းရင်းမြစ်များ

Mateo 7:22

Ayaroꞌ tahuëri nanihuachin, naꞌa piyapiꞌsaꞌ nontaponaco: ‘Quëma nanamën Sinioro shaꞌhuirai. Quisoso nanan quëtërincoi, taꞌtoi sopairoꞌsaꞌ aꞌparai. Quëma pochin sacaiꞌ nininsopita ninai,’ itaponaco.

Juan 11:10

Tashiso nipirinhuëꞌ iratohuatëra, iꞌparëꞌ. Capa aꞌpininsoꞌ niꞌton, iꞌparëꞌ, itërincoi.

Juan 12:35

—Iporáchin tahuëri pochin aꞌpintaranquëmaꞌ. Co huachi huaꞌquiꞌ yaꞌhuapohuëꞌ. Aꞌpininso pochin noꞌtëquën anitotëranquëmaꞌ. Anitotohuatënquëmaꞌ, noya nicoꞌ. Niꞌcona tashinan pochin cancantotamaꞌ. Tashinanquë iratohuatëra, chihuërëꞌ.

Juan 12:46

Carinquëmaꞌ aꞌpintëranquëmaꞌ. Imapatamaco, co tashinan pochin cancantaramahuëꞌ. Tahuëri pochin cancantaramaꞌ. Ina marëꞌ isoroꞌpaquë oꞌmarahuë.

Juan 8:12

Ina quëran piyapiꞌsaꞌ aꞌchintantarin. —Casoꞌ aꞌpintatë pochin nicato, yaꞌipi piyapiꞌsaꞌ noꞌtëquën anitotarahuë. Imapatamaco, co huachi tashinan pochin cancantaramahuëꞌ. Tahuëri pochin cancantaramaꞌ. Ina pochin cancantohuatamaꞌ, Yosë nohuitatomaꞌ nanpimiataramaꞌ.

Juan 8:55

Co inasoꞌ nohuitopiramahuëꞌ, casoꞌ nohuitërahuë. Yaꞌipi noninsoꞌ natërahuë. “Co nohuitërahuëꞌ,” tënahuë naporini, canpita pochachin cantaꞌ nonpiintohuëꞌ.

1 Timoteo 4:2

Naporoꞌ nonpinaꞌpiroꞌsaꞌ yaꞌhuaponaꞌ piyapiꞌsaꞌ nonpintacaiso marëꞌ. “Quiyantaꞌ Yosë imarai,” topirinahuëꞌ, co noꞌtëquën nonsapihuëꞌ. Nitotaponaraihuëꞌ, co cancanhuanhuë pochin nicatonaꞌ, co natëtochináchinhuëꞌ cancantapi. Huaꞌquiꞌ sopai natëtonaꞌ, co huachi nanitapihuëꞌ Yosë natëcaisoꞌ. Inapitasoꞌ nisha aꞌchinapi.

Santiago 2:14

“Cantaꞌ Yosë imarahuë,” tapomarahuëꞌ, co noyahuëꞌ nipatamaꞌ, topinan quëran nonsaramaꞌ. Ina pochin cancantohuatamaꞌ, co chaꞌësaramahuëꞌ.

Santiago 2:16

Co catahuarihuarahuëꞌ: “Noya yaꞌhuëquëꞌ. Ama sëhuënquësohuëꞌ. Ama tana natanquësohuëꞌ,” itapomarahuëꞌ, co aꞌmocaisoꞌ, cosharoꞌ, inapita quëtohuatëhuahuëꞌ, ¡topinan quëran napotarihuaꞌ!

Santiago 2:18

Aꞌnaquëmaꞌ tapomaꞌ nimara: “Quëmasoꞌ ‘Yosë imarahuë,’ taꞌton, chinotëran. Caso nipirinhuëꞌ noya ninahuë. Quëmasoꞌ Yosë chinotaponahuëꞌ, co noya nipatanhuëꞌ, topinan quëran nonsaran. Caso nipirinhuëꞌ, noya ninahuëso marëꞌ natërahuësoꞌ yaꞌnoarin,” tapomaꞌ.

1 Juan 1:10

“Yaꞌipinquëmaꞌ co noyahuëꞌ ninamaꞌ,” itërinpoaꞌ Yosë. Napotopirinpoahuëꞌ, “Noya ninahuë. Co casoꞌ oshahuancohuëꞌ,” topatëhuaꞌ, “Yosë nonpintërinpoaꞌ,” tënëhuaso pochin cancantërëhuaꞌ. Nanamën noꞌtëquën shaꞌhuitopirinpoahuëꞌ, co tëhuënchachin natërëhuahuëꞌ.

1 Juan 1:3

Inápaquë yaꞌhuaponahuëꞌ, oꞌmahuachina, piyapicoi niꞌnai, aꞌchininsontaꞌ natanai. Paꞌpiontaꞌ anohuitërincoi. Huiꞌnin nohuitatoi, nohuitërai. Nipayarëso pochin ninai. Napoaton ninshitaranquëmaꞌ canpitantaꞌ Quisocristo nohuitacamaso marëꞌ. Quiya pochachin Yosë nohuitocoꞌ nipayarëso pochin nicacamaso marëꞌ.

1 Juan 1:8

“Co oshahuancohuëꞌ,” topatëhuaꞌ, canpoara ninonpintërëhuaꞌ. Co noꞌtëquën yonquirëhuahuëꞌ, co tëhuënchachin imarëhuahuëꞌ.

1 Juan 2:4

Aꞌnaquënso nipirinhuëꞌ “Nani Yosë nohuitërahuë,” topirinahuëꞌ, pënëninpoasoꞌ co natëtonahuëꞌ, nonpiánpi. Co noꞌtëquën yonquipihuëꞌ.

1 Juan 4:20

Aꞌnaquënsoꞌ “Yosë nosororahuë,” taponahuëꞌ, iin noꞌhuirin. Co inasoꞌ noꞌtëquën noninhuëꞌ, nonpiánin. Piyapi quënanëhuaꞌ. Yosëso nipirinhuëꞌ co quënanëhuahuëꞌ. Piyapi quënanarihuarahuëꞌ, co nosorohuatëhuahuëꞌ, aquëtë huarëꞌ Yosësoꞌ co nanitarëhuahuëꞌ nosorocasoꞌ.