1 Corintios 8:10 - Chayahuita (Shahui)

¹⁰ “Yaꞌipi nosha noya capacasoꞌ,” taꞌtomaꞌ, noya caꞌnamaꞌ. Aꞌna tahuëriso nipirinhuëꞌ mamanshi moshapisoꞌ pëiquë paꞌpatamaꞌ, inaquë coshataramaꞌ. Inaquë coshatasëmaꞌ, tëꞌhuatonaꞌpi nicatënquëmaꞌ: “Mamanshi marëꞌ acopisoꞌ noya capacasoꞌ,” tapon nimara. Ina quëran: “Cantaꞌ nipachin caꞌi,” taꞌton, ina nosha capon. Ina caꞌpachin, “Oshahuanahuë caso huachi,” taꞌton, co noyahuëꞌ cancantarin.

1 Corintios 8:10 ပူးပေါင်းရင်းမြစ်များ

Amós 2:8

Inapitasoꞌ mamanshi marëꞌ maꞌsha tëpapisoꞌ caꞌpatopi. Aꞌnanpiso pahuërëtacaisoꞌ nitotai marëꞌ aꞌmopiso maꞌpatopi. Ina huëtohuachinara, ina aipi caꞌpatopi. Topinan quëran apahuërëtahuatonaꞌ, coriqui maꞌpatopi. Ina coriquiquë huino paꞌanatonaꞌ, mamanshinëna moshapisoꞌ pëiroꞌsaquë oꞌopi,” tënin.

Hechos 15:20

Nipirinhuëꞌ, piꞌpian pënënacaso marëꞌ ninshitahuaꞌ. Nisha piyapiꞌsaꞌ maꞌsha tëpapi mamanshi moshacaiso marëꞌ. Ina nosha Quisoso imapisopita tananpichinaꞌ. Naporahuatonaꞌ, aꞌnaquën maconorahuatonaꞌ, maꞌsha tëpapi. Co huënainën noya inquitopihuëꞌ. Ina noshantaꞌ ama caꞌinasohuëꞌ. Naporahuatonaꞌ, ama monshihuainasohuëꞌ, Inaíchin pënëanhuanꞌ.

Romanos 14:14

Yaꞌipi cosharoꞌ noya capacasoꞌ. Co mantaꞌ aꞌpocasoꞌ yaꞌhuërinhuëꞌ. Sinioro Quisoso imato, naporahuë. Napoaton nitotërahuë. Aꞌnaquënso nipirinhuëꞌ: “Co Yosë nohuantërinhuëꞌ nosha capacasoꞌ,” taponaraihuëꞌ, caꞌpachinaꞌ, tëhuënchachin oshahuanpi.

Romanos 14:23

Napoaponahuëꞌ: “Co Yosë nohuantërinhuëꞌ iso cosharo capacahuasoꞌ,” tarihuarahuëꞌ, caꞌpatëhuaꞌ, oshahuanarihuaꞌ. Ina pochin yonquiarihuarahuëꞌ maꞌsona tëranta nipatëhuaꞌ, oshahuanarihuaꞌ. Nipirinhuëꞌ, “iso cosharo noya capacasoꞌ,” tëcaton caꞌpatan, co oshahuanaranhuëꞌ.

1 Corintios 10:32

Ama insontaꞌ anishacancantocosohuëꞌ. Cotioroꞌsaꞌ, nisha piyapiꞌsaꞌ, Quisocristo imapisopita, yaꞌipiya nosorocasoꞌ yaꞌhuërin.

1 Corintios 8:4

Nosha mamanshi chinotacaiso marëꞌ acopisoꞌ aꞌchinchinquëmaꞌ nitotocoꞌ. Co mamanshi nanpirinhuëꞌ. Co ina chinotacasoꞌ yaꞌhuërinhuëꞌ. Tata Yosëíchin chinotacasoꞌ yaꞌhuërin, tënëhuaꞌ.

1 Corintios 8:7

Napoaponahuëꞌ, aꞌnaquënsoꞌ co ina nitochátërapihuëꞌ. Iráca mamanshi chinotopirinahuëꞌ, Quisocristo imapachinara, mamanshi aꞌpopi. Aꞌpopirinahuëꞌ, ipora huantaꞌ co cancanëna quëran natëyátërapihuëꞌ. “Nosha mamanshi marëꞌ tëpapisoꞌ caꞌpatëhuaꞌ, mamanshi chachin chinotarëhuaꞌ,” taponaraihuëꞌ caꞌpachinaꞌ: “Oshahuanëhuaꞌ,” taꞌtonaꞌ, co huachi noyápiachin cancantopihuëꞌ.

1 Corintios 8:9

Nipirinhuëꞌ, yaꞌipi nosha caꞌpatamaꞌ, niꞌcona aꞌnapita anishacancantotamaꞌ. Aꞌnaquën imasapirinahuëꞌ, co Quisocristoíchin natëyátërapihuëꞌ. Nisha nisha tëꞌhuatapi.