1 Corintios 7:21 - Chayahuita (Shahui)

²¹ Aꞌnaquëmaꞌ patron marërachin sacatohuatamaꞌ, ama ina marëꞌ sëtocosohuëꞌ. Nipirinhuëꞌ nanitohuatamaꞌ, pipimiatatomaꞌ, canpitaora marëꞌ sacatocoꞌ.

1 Corintios 7:21 ပူးပေါင်းရင်းမြစ်များ

Lucas 12:29

Ama maꞌsha yonquiatomaꞌ, paꞌyancosohuëꞌ. ‘¿Maꞌcha caꞌnëꞌpoya? ¿Maꞌcha oꞌorëꞌpoya?’ ama tocosohuëꞌ.

Lucas 21:34

Niꞌcona naniantotamaco. Ama pita paꞌyatacasoachin cancantocosohuëꞌ. Ama noꞌpicosohuëꞌ. Ama maꞌsharáchin yonquicosohuëꞌ. Ina pochin cancantohuatamaꞌ, co aquëtëꞌ yonquiaramacohuëꞌ. Co noya ninahuatamacohuëꞌ,

1 Corintios 12:13

Ispirito Santo chachin Quisocristo huëntonënquë ayaꞌconinpoaꞌ. Cotioroꞌsahuë nipon, nisha piyapiꞌsahuë nipon, napopináchin Yosë niꞌninpoaꞌ. Aꞌnaquëmaꞌ canpitaora marëꞌ sacatëramaꞌ. Aꞌnaquëmaꞌ nani tahuëri patronëmaꞌ asacatërinënquëmaꞌ. Nisha nishanpoaꞌ nipirihuahuëꞌ, Ispirito Santo catahuarinpoaꞌ. Quisocristo imarëhuaꞌ niꞌton, huëntonënquë ayaꞌconinpoaꞌ. Aporintohuachinënpoara, aꞌna huëntoínchin ninëhuaꞌ. Yaꞌipi imarëhuasopita Ispirito Santo yaꞌcoancantërinpoaꞌ.

1 Corintios 7:20

Yaꞌnan Quisoso imapatamaꞌ, onpopinsona nicasëmaꞌ imapatamaꞌ, inachachin nisácoꞌ. Ama aꞌnaꞌ aꞌnaꞌ pochin yonquicosohuëꞌ.

1 Corintios 7:22

Patron marëꞌ sacatapomarahuëꞌ, Yosë huayonpachinquëmaꞌ, oshanëmaꞌ inquitatënquëmaꞌ, nichaꞌërinquëmaꞌ. Ina yonquiatomaꞌ, co huachi sëtacasoꞌ yaꞌhuërinhuëꞌ. Inapochachin aꞌnaquëmaꞌ co patron asacatopirinquëmahuëꞌ. Yosë nichaꞌërinquëmaꞌ niꞌton, ina naꞌcon naꞌcon natëcamasoꞌ yaꞌhuërin. Yosë piyapinënpita ninamaꞌ.

Gálatas 3:28

Yosësoꞌ co nisha nisha yonquirinpoahuëꞌ. Aꞌnaquënpoaꞌ cotio piyapinpoaꞌ, aꞌnaquëontaꞌ nisha piyapiꞌsaꞌ. Aꞌnaquëontaꞌ patronoꞌsaꞌ, aꞌnaquënsoꞌ piyapinënpita. Aꞌnaquën sanapiꞌsaꞌ, aꞌnaquënpoaꞌ quëmapinpoaꞌ nipirëhuahuëꞌ, yaꞌipinpoaꞌ Quisocristo imapatëhuaꞌ, aꞌna huëntoínchin pochin ninëhuaꞌ.

Filipenses 4:11

Co maꞌsha pahuantërincoso marëꞌ napotëranquëmahuëꞌ. Yosë nohuanton, nani nitotërahuë yaꞌipi ahuantaꞌhuasoꞌ. Maꞌsha pahuantopirincohuëntaꞌ, noya cancantërahuë.

Filipenses 4:6

Maꞌsha onpohuatamaꞌ, ama paꞌyancosohuëꞌ. Ama nisha nisha yonquicosohuëꞌ. Yosë nontocoꞌ catahuainquëmaꞌ. Maꞌsha pahuantohuachinquëmaꞌ, nitocoꞌ. “Ma noya catahuarancoi niꞌton, ‘Yosparinquën, Sinioro,’ ” itocoꞌ.

Colosenses 3:11

Quisocristo imapatëhuaꞌ, napopináchin Yosë niꞌninpoaꞌ. Aꞌnaquën cotioroꞌsaꞌ, aꞌnaquënso nipirinhuëꞌ cricoroꞌsaꞌ. Aꞌnaquën marca niacotopisoꞌ, aꞌnaquënso nipirinhuëꞌ co niacotopihuëꞌ. Aꞌnaquën nisha piyapiꞌsaꞌ, aꞌnaquëntaꞌ quëmaroꞌsaꞌ. Aꞌnaquën patron piyapinënpita, aꞌnaquënso nipirinhuëꞌ inahuara marëꞌ sacatopi. Nisha nisha nicarihuarahuëꞌ, napopináchin Yosë niꞌninpoaꞌ. Quisocristoíchin yonquicasoꞌ yaꞌhuërin. Ina imapatëhuaꞌ, yaꞌipinpoaꞌ yaꞌcoancantërinpoaꞌ. Co mantaꞌ pahuantarinpoahuëꞌ noya cancantacaso marëꞌ.

Hebreos 13:5

Ama coriquiráchin paꞌyatocosohuëꞌ. Co naꞌcon maꞌsha yaꞌhuëtopirinquëmahuëꞌ, sano cancantocoꞌ. Ama naꞌcon naꞌcon nohuantocosohuëꞌ. Yosë chachin nani shaꞌhuitërinpoaꞌ. “Co onporontaꞌ pataranquëmahuëꞌ. Co naniantaranquëmahuëꞌ,” itërinpoaꞌ.

1 Pedro 5:7

Ama maꞌsha onpochináchin yonquicosohuëꞌ. Yaꞌipiya Yosë shaꞌhuitocoꞌ catahuainquëmaꞌ. Ina quëran: “Nosoroatonpoaꞌ, co naniantarinpoahuëꞌ,” taꞌtomaꞌ sano cancantocoꞌ.