1 Corintios 6:11 - Chayahuita (Shahui)

¹¹ Iráca aꞌnaquëmaꞌ ina pochin nipiramahuëꞌ. Sinioro Quisocristo imapatamara, oshanëmaꞌ inquitërinquëmaꞌ. Nani anoyacancantërinquëmaꞌ niꞌton, Yosë noya niꞌninquëmaꞌ. Ispirito Santo chachin catahuarinquëmaꞌ noya cancantacasoꞌ.

1 Corintios 6:11 ပူးပေါင်းရင်းမြစ်များ

Salmos 51:2

Co noyahuëꞌ cancantërahuëso noyá paꞌmorëso pochin, oshanëhuë inquitatonco noyápiachin cancan quëtoco.

Salmos 51:7

Oshanëhuë inquitoco noyápiachin cancanchi. Paꞌmocancanco huiri huiríchin pochin cancanchi.

Isaías 1:16

Amarëso pochin nicatomaꞌ, ¡ama huachi oshahuancosohuëꞌ! ¡Co noyahuëꞌ ninamasopita aꞌpoco huachi!

Isaías 45:25

Israiroꞌsasoꞌ cari catahuarahuë niꞌton, noꞌtëquën yonquiaponaꞌ: ‘¡Ma noyacha Sinioro imatëhua naporëhua paya!’ tëcaponaꞌ,” tënin.

Isaías 53:11

Paꞌpi parisitërinso piquëran: “Tëhuënchachin yaꞌipi nanirahuë huachi,” tosarin. Ina nitotaton noya cancantarin. Sinioro piyapinënsoꞌ, noꞌtëquënáchin ninin. Inapoaton naꞌa piyapiꞌsa nichaꞌësarin. Co noyahuëꞌ nipiso marëꞌ parisitaton inapotarin.

Ezequiel 36:25

Canpitaso mamanshiroꞌsa moshatomaꞌ, nëꞌhuëtërinso pochin ninamaꞌ. Napoatoma co noyahuëꞌ nipiramahuëꞌ. Naporamasoꞌ, inquitaranquëmaꞌ. Nëꞌmëtë nëꞌhuëtërinsoꞌ, noyaiquë pëꞌsarëso pochin nitaranquëmaꞌ.

Mateo 20:4

‘Canpitantaꞌ iminëhuëquë sacatocoꞌ noꞌtëquën pahuërëꞌinquëmaꞌ,’ itohuachina: ‘Noyahuaꞌ. Sacachii nipachin,’ taꞌtonaꞌ, inahuantaꞌ paantapi sacataponaꞌ.

Lucas 18:14

Ina oshanën inquitaton, Yosëri noya niꞌnin. Parisioso nipirinhuëꞌ, co noyahuëꞌ niꞌnin. Aꞌnapita nocanpatamaꞌ, aꞌna tahuëri Yosë atapanarinquëmaꞌ. Nipirinhuëꞌ: ‘Caora co nanitërahuëꞌ noya nicaꞌhuasoꞌ. Catahuaco Sinioro,’ topatamaꞌ, noya acoarinquëmaꞌ,” tënin Quisoso.

Juan 13:10

—Co ina nohuantërëhuëꞌ. Nani amahuatëra, co huachi nëꞌhuëtërëhuëꞌ. Nantëichin paꞌmorëꞌ. Inapochachin nani anoyacancantëranquëmaꞌ. Ina piquëran co noyahuëꞌ nipatamaꞌ, inantaꞌ inquitaantaranquëmaꞌ. Ina quëran noya cancantaantaramaꞌ. Canpitasoꞌ noyápiachin cancantëramaꞌ. Aꞌnaichinquëmaꞌ co noyápiachin cancantërinhuëꞌ, itërin.

Juan 13:8

—Co onporontaꞌ casoꞌ paꞌmorantëarancohuëꞌ, itërin Pitrori. —Co napotohuatënquënhuëꞌ, co ca pochin cancantaton imamiatarancohuëꞌ, itërin Quisosori.

Hechos 22:16

Napoaton ama huaꞌquiquësohuëꞌ. Apiramiáchin huaniquëꞌ. “Quisoso imasarahuë huachi,” taꞌton, aporihuanquëꞌ. Ina nontohuatan, oshanën inquitarinquën,’ itërinco.

Hechos 26:18

Nisha piyapiꞌsantaꞌ aꞌchintëquëꞌ nanamëhuë nitochinaꞌ. Somaraya pochin cancantatonaꞌ, co nohuitërinacohuëꞌ. Nanamëhuë aꞌchintohuatan, nohuitarinaco. Iporasoꞌ tashi pochin cancantopi. Nohuitohuachinaco, tahuëri pochin cancantapi. Iporasoꞌ sopai huaꞌani camaihuachina, natëpi. Aꞌna tahuërisoꞌ Yosë natërapi. Natëtonaco, imapachinaco, oshanënaꞌ Yosëri inquitarin. Yaꞌipi natërinacosopita nasha cancan quëtarahuë. Yosë piyapinënpita chachin nisapi,’ itërinco.

Romanos 3:24

Nipirinhuëꞌ, inaora nohuanton, Yosë nosororinpoaꞌ. Nosoroatonpoaꞌ, Quisocristo aꞌpaimarin nichaꞌëinpoaso marëꞌ. Ina imapatëhuaꞌ, Yosë noya niꞌsarinpoaꞌ.

Romanos 4:5

Yosëso nipirinhuëꞌ, inaora nohuanton nosororinpoaꞌ. “Co caora noya nipirahuëꞌ, Yosë chachin anoyacancantarinco,” topatëhuaꞌ, oshanënpoaꞌ inquitatonpoaꞌ noya niꞌninpoaꞌ.

Romanos 5:1

“Sinioro Quisocristoíchin nichaꞌësarinpoaꞌ,” taꞌtëhuaꞌ, imarëhuaꞌ. Oshanënpoaꞌ inquitërinpoaꞌ niꞌton, Yosë noya niꞌninpoaꞌ. Co inimiconënpita pochin niꞌninpoahuëꞌ.

Romanos 5:9

“Corosëquë huënainën paꞌnin. Oshanënpoa marëꞌ chiminin,” topatëhuaꞌ, Yosë noya niꞌsarinpoaꞌ. Napoaton ayaroꞌ tahuërintaꞌ catahuarinpoaꞌ. Naporoꞌ tahuëri co noyahuëꞌ nipisopita chiníquën anaꞌintarin. Imarëhuasopitaso nipirinhuëꞌ, co anaꞌintarinpoahuëꞌ. Quisocristo chachin nichaꞌësarinpoaꞌ.

Romanos 8:30

Nohuantërinpoaꞌ niꞌton, huëntonënquë chachin ayaꞌconinpoaꞌ. Oshanënpoaꞌ inquitatonpoaꞌ, noya niꞌninpoaꞌ. Ina nohuanton, aꞌna tahuëri inápaquë noya noya acoarinpoaꞌ.

Romanos 8:33

Yosë huayoninpoaꞌ niꞌquëhuarëꞌ, co insonta nanitërinhuë shaꞌhuirapinpoasoꞌ. Yosë chachin noya niꞌninpoaꞌ.

1 Corintios 1:2

Corintoquë yaꞌhuëramasopita ninshitaranquëmaꞌ. Canpitantaꞌ Yosë huëntonënquë yaꞌconamaꞌ. Quisocristo imapatamaꞌ, anoyacancantërinquëmaꞌ niꞌton, noyápiachin cancantëramaꞌ. Yosë acorinquëmaꞌ piyapinënpita nicacamaso marëꞌ. Nisha nisha parti aꞌnapitantaꞌ Quisocristo imapi. Yaꞌipinpoaꞌ ina huaꞌanëntërinpoaꞌ. Aꞌna huënton pochin ninëhuaꞌ.

1 Corintios 1:30

Yosë nohuanton, Quisocristo imarëhuaꞌ. Imapatëhuaꞌ, yaꞌcoancantërinpoaꞌ niꞌton, yonquínahuan pochin Yosë niꞌninpoaꞌ. Naporahuaton, catahuarinpoaꞌ noꞌtëquën yonquicasoꞌ. Oshanënpoaꞌ inquitohuachinpoaꞌ, noya huachi niꞌninpoaꞌ. Nasha cancan quëtërinpoaꞌ noya nicacaso marëꞌ. Quisocristo chachin nichaꞌërinpoaꞌ.

1 Corintios 12:2

Iráca co Yosë natëyatërapomahuëꞌ, nisha nisha yonquiatomaꞌ, mamanshi mosharamaꞌ. Co nanpiton natanpirinquëmahuëꞌ, sopai nohuanton, inapita chinotëramaꞌ.

Gálatas 2:16

Napopirëhuahuëꞌ, Moisësë pënëntërinsoꞌ natëhuatëhuaꞌ, co ina marëꞌ Yosë noya niꞌsarinpoahuëꞌ. Quisocristoíchin imapatëhuaꞌ, noya niꞌsarinpoaꞌ. Napoaton canpoantaꞌ Quisocristo natërëhuaꞌ oshanënpoaꞌ inquitinpoaso marëꞌ. Co inso tërantaꞌ pënëntërinsoꞌ natërinso marëꞌ Yosëꞌpaꞌ paꞌsarinhuëꞌ. Quisocristoráchin nichaꞌërinpoaꞌ.

Gálatas 3:11

“Pënëntërinsoꞌ natëto chaꞌësarahuë,” co taꞌcasoꞌ yaꞌhuërinhuëꞌ. Ina pochin cancantohuatëhuaꞌ, co Yosë noya niꞌsarinpoahuëꞌ. Quiricanën quëran noꞌtëquën shaꞌhuitërinpoaꞌ: “Cancanënpoa quëran huarëꞌ natëtohuatëhuaꞌ, Yosë noya niꞌsarinpoa niꞌton, noya nanpimiatarihuaꞌ,” tënin quiricanënquë.

Gálatas 3:24

Niꞌcochi. Huaꞌhuaroꞌsaꞌ co yonquipihuëꞌ niꞌton, naꞌcon pënënacasoꞌ yaꞌhuërin. Inapochachin iráca Moisësë naꞌcon pënëninpoaꞌ. Maistro pochin pënëninpoaꞌ oshahuanëhuasoꞌ ayonquiinpoaso marëꞌ. Co pënëntërinsoꞌ natëcasoꞌ nanitërëhuahuëꞌ niꞌton, Quisocristo huachi yonquiarëhuaꞌ. Ina imapatëhuaꞌ, anoyacancantarinpoaꞌ.

Gálatas 3:8

Co cotioroꞌsaráchin Yosëri nohuantërinhuëꞌ. Nisha piyapiꞌsantaꞌ imapachinaꞌ, noya niꞌsarin. Noya nicaton, co oshanëna marëꞌ anaꞌintarinhuëꞌ. Iráca iso noya nanan ninoton, Apraan itapon: “Nisha nisha piyapiꞌsantaꞌ quëma pochin cancantohuachinaꞌ, naꞌcon catahuaarahuë,” itërin Yosëri. Quiricanën quëran naporin.

Efesios 5:26

Quisocristo chiminin anoyacancantinpoaso marëꞌ. Nanamën natëhuatëhuara, noyápiachin cancan quëtërinpoaꞌ. Iꞌquë amarëso pochin oshanënpoaꞌ inquitërinpoaꞌ.

Efesios 5:8

Iráca tashi pochin cancantopiramahuëꞌ, iporasoꞌ Yosë imaramaꞌ niꞌton, anoyacantërinquëmaꞌ tahuëri pochin nicacamaso marëꞌ. Napoaton tahuëri pochin nicoꞌ.

2 Tesalonicenses 2:13

Canpitaso nipirinhuëꞌ iyaroꞌsaꞌ, imaramaꞌ. Sinioro nosororinquëmaꞌ. Iráca quëran huarëꞌ Yosë huayoninquëmaꞌ huëntonënquë yaꞌconacamaso marëꞌ. Noꞌtën nanan natëhuatamaꞌ, Ispirito Santo anoyacancantërinquëmaꞌ Yosë nohuantërinso chachin nicacamaso marëꞌ. Ina yonquiatoi, Yosë nontërai: “Ma noya Sinioro inapitasoꞌ nichaꞌëran niꞌton, ‘Yosparinquën,’ ” itërai, Yosë nontatoi.

Hebreos 10:22

Napoaton Quisocristoíchin natëtëhuaꞌ, yaꞌipi cancanënpoa quëran Yosë nontahuaꞌ. Nani oshanënpoaꞌ inquitërinpoaꞌ niꞌton, noya cancantarëhuaꞌ. Quisocristo anoyacancantërinpoaꞌ niꞌton, noya iꞌquë amarëso pochin noyápiachin cancantarihuaꞌ.

Hebreos 10:29

Yosë huiꞌnin chachin aꞌpohuatamaꞌ, ¡aquë aquëtëꞌ anaꞌintinquëmasoꞌ yaꞌhuërin! Quisocristo canpoa marëꞌ chiminin. Huënainën aꞌparin anoyacancantinpoaso marëꞌ. Inapoaton, nasha quëran anoyatërinso shaꞌhuitërinpoaꞌ imacaso marëꞌ. Aꞌnaquënso nipirinhuëꞌ imapirinahuëꞌ. Ina quëran Quisocristo aꞌpopi. Huënainën quëran anoyacancantopirinhuëꞌ, nisha cancantatonaꞌ, ina huënainën chachin nocanpi. Ispirito Santori nosoropirinhuëꞌ, co piꞌpian tërantaꞌ yanatëpihuëꞌ. Inapitasoꞌ Yosëri chini chiníquën anaꞌintarin.

Hebreos 2:11

Anoyacancantohuachinpoara, huiꞌninpita pochin niꞌninpoaꞌ. Canpoarintaꞌ “Tata” itërëhuaꞌ. Napoaton Quisocristo co tapanatonhuëꞌ, iinpita pochin niꞌninpoaꞌ.

1 Pedro 1:2

Iráca quëra huarëꞌ Tata Yosë nohuitërinquëmaꞌ. Nosoroatënquëmaꞌ, huayoninquëmaꞌ huëntonënquë yaꞌconacamaso marëꞌ. Ispirito Santo anoyacancantërinquëmaꞌ natëcamaso marëꞌ. Quisocristo corosëquë chiminin oshanëmaꞌ inquitiinquëmaso marëꞌ. Yosë nontëramaꞌ niꞌton, oshanëmaꞌ inquitërinquëmaꞌ. Yosë inaora nohuanton, noya catahuainquëmaꞌ. Asanocancainquëmaꞌ.

1 Pedro 1:22

Yosë nanamënsoꞌ noꞌtën nanan. Ina natëhuatamaꞌ, yaꞌipi co noyahuëꞌ yonquiramasopita naniantaramaꞌ. Noyápiachin cancantaramaꞌ. Yosë anoyacancantërinquëmaꞌ ninosorocamaso marëꞌ. Napoaton imaramasopita capini noya ninosorocoꞌ. Tëhuënchachin cancanëma quëran huarëꞌ ninosorocoꞌ.

1 Pedro 3:21

Inapochachin iporasoꞌ Yosë nichaꞌësarinpoaꞌ. Anoyacancantohuachinpoaꞌ, aporintërinënpoaꞌ. Co nëꞌhuë inquitinënpoaso marëꞌ aporintërinënpoahuëꞌ. Aporintohuachinënpoara, Yosë nontërëhuaꞌ catahuainpoaso marëꞌ. “Yaꞌipi oshanëhuë inquitoco. Catahuaco noyasáchin nicato, noyápiachin cancanchi,” itërëhuaꞌ. Ina marëꞌ anoyacancantërinpoaꞌ. Quisocristo nanpiantarin niꞌton, nichaꞌësarinpoaꞌ.

1 Juan 2:12

Canpitasoꞌ imaramaꞌ niꞌton, ninshitaranquëmaꞌ. Huiꞌnahuëpita pochin nicatënquëmaꞌ, ninshitaranquëmaꞌ. Quisocristo canpoa marëꞌ chiminin. Imapatamaꞌ, oshanëmaꞌ inquitërinquëmaꞌ.

Apocalipsis 1:5

Quisocristontaꞌ inaora nohuanton, catahuainquëmaꞌ. Asanocancainquëmaꞌ. Iráca isoroꞌpaquë oꞌmarahuaton, noꞌtëquën aꞌchintërinpoaꞌ. Inaꞌton chiminaponahuëꞌ, nanpiantarin. Chimirin minsërahuaton, yaꞌipiya huaꞌanëntarin. Yaꞌipi huaꞌanoꞌsa quëran chini chiníquën nanantarin. Naporahuaton, naꞌcon nosororinpoaꞌ. Oshanënpoaꞌ inquitinpoaso marëꞌ huënainën aꞌparin. Chiminaton, nichaꞌërinpoa.

Apocalipsis 7:14

—Co casoꞌ nitotërahuëꞌ. Quëma nitotëransoꞌ. Shaꞌhuitoco cantaꞌ nitochi, itohuatëra, shaꞌhuitërinco: —Isopitasoꞌ chiníquën parisitaponaraihuëꞌ, co Yosë aꞌpopihuëꞌ. Carniroaꞌhuari huënainën quëran anoyacancantërin niꞌton, huiríchin aꞌmopi.