1 Corintios 5:11 - Chayahuita (Shahui)

¹¹ Aꞌnaquënso nipirinhuëꞌ. “Cantaꞌ imarahuë,” taponahuëꞌ, monshihuanárin. Aꞌnantaꞌ apirarin. Aꞌnaquëontaꞌ ipora huantaꞌ mamanshi moshararin. Aꞌnapitantaꞌ pinotapi, noꞌpirapi, ihuatapi, naporapi. Napoaponaraihuëꞌ: “Quiyantaꞌ imarai,” topi. Ama inapitarëꞌquëmaꞌ nipayacosohuëꞌ. Yosë nonpintapi niꞌton, ama inapitarëꞌquëmaꞌ coshatocosohuëꞌ.

1 Corintios 5:11 ပူးပေါင်းရင်းမြစ်များ

Mateo 18:17

Co inapita tërantaꞌ yanatëantahuachinhuëꞌ, yaꞌipi imaramasopita niyontonpachinaꞌ, yaꞌipiya shaꞌhuitëquëꞌ inahuarintaꞌ nanan anoyachinaꞌ. Inapitarintaꞌ pënëantapirinahuëꞌ, co inapita tërantaꞌ yanatantahuachinhuëꞌ, ama huachi iyama pochin niꞌcosohuëꞌ. Co imarinso pochinhuë nipon, Noma copirno marëꞌ coriqui maꞌpatonaꞌpi pochin nipon niꞌco huachi.

Mateo 23:25

Canpitasoꞌ nonpintënquëma niꞌton, ¡maꞌhuantacha nisarama paya! Tëhuënchachin yanonpinamaꞌ. Niꞌcoꞌ. Aꞌnaquën minëꞌ, sënan, inapita paꞌmohuachinara, aipiáchin paꞌmopi. Acoposo nipirinhuëꞌ, nëꞌhuënantëtërin. Inapochachin canpitasoꞌ piyapiꞌsaꞌ noya nicainënquëmasoachin yonquipiramahuëꞌ, acopoꞌ cancanëma quëransoꞌ, co noya yonquiramahuëꞌ. Nonpinatomaꞌ, yaihuatëramaꞌ. Maꞌsharáchin nohuantatomaꞌ, co Yosë nohuantërinsoꞌ ninamahuëꞌ. Ina marëꞌ Yosë anaꞌintarinquëmaꞌ.

Lucas 18:11

Parisiosoꞌ huanirahuaton, sacaronquë Yosë nontërin: ‘Tata Yosë, yanontëranquën. Casoꞌ noyaco. Ina marëꞌ noya niꞌnanco niꞌton: “Yosparinquën,” itëranquën. Co aꞌnapita pochincohuëꞌ. Co ihuatërahuëꞌ. Co nonpinahuëꞌ. Co monshihuanahuëꞌ. Pasoꞌ quëmapi co noyahuëꞌ. Caso nipirinhuëꞌ co ina pochincohuëꞌ.

Lucas 21:34

Niꞌcona naniantotamaco. Ama pita paꞌyatacasoachin cancantocosohuëꞌ. Ama noꞌpicosohuëꞌ. Ama maꞌsharáchin yonquicosohuëꞌ. Ina pochin cancantohuatamaꞌ, co aquëtëꞌ yonquiaramacohuëꞌ. Co noya ninahuatamacohuëꞌ,

Hechos 1:15

Ina quëran naꞌa Quisoso imapisopita niyontonpi. Pasa cato shonca piyapiꞌsa pochin yaꞌhuëpi. Pitrori huancánachin huanirahuaton, itërin:

Hechos 9:17

Ina natanahuaton, Ananiasë paꞌnin. Cotasë pëinënquë yaꞌconconahuaton, Saono sëꞌhuaconin: —Iya Saono. Sinioro Quisoso iraquë yaꞌnotërinquënso shaꞌhuitërinco niꞌton, huëꞌnahuë. Ina nohuanton, apira noya niꞌtaantaran. Naporahuaton, Ispirito Santo noyá yaꞌcoancantarinquën, itërin.

Romanos 13:13

Tahuëri nipachina, aꞌninquëchin niꞌton, noyasáchin ninëꞌ. Aꞌnaquënso nipirinhuëꞌ pitasachin paꞌyatopi. Naꞌa tahuëri nansarápi, oꞌosápi, coshatápi, noꞌpiápi. Ama pitasoꞌ paꞌyatocosohuëꞌ. Ama noꞌpicosohuëꞌ. Ama piꞌpisha tërantaꞌ nimonshitacamasoꞌ yonquicosohuëꞌ. Ama ninoꞌhuicosohuëꞌ. Ama aꞌna piyapi noyapatomaꞌ, noꞌhuicosohuëꞌ.

Romanos 16:17

Quisocristo nanamën nóya aꞌchintërinënquëmaꞌ. Aꞌnaquënso nipirinhuëꞌ co noꞌtëquën aꞌchinpihuëꞌ. Yaanishacancantopi. Niꞌcona, iyaroꞌsaꞌ, nonpintochinënquëmaꞌ. Insëquësona aꞌchintohuachinara, nisha nisha yonquiapi. Ama inapita natancosohuëꞌ. Tananpitocoꞌ paꞌinaꞌ.

1 Corintios 10:14

Napoaton iyaroꞌsaꞌ ama piꞌpisha tërantaꞌ mamanshi moshacosohuëꞌ. Nosororanquëmaꞌ niꞌton, pënënaranquëmaꞌ.

1 Corintios 11:21

Aꞌnaquëmaꞌ co ninosoroatomahuëꞌ, niapiratëramaꞌ. Aꞌnaroáchin canpitaora cosharonëmaꞌ caꞌnamaꞌ. Co nipatomatëramahuëꞌ. Inapotohuatamara, aꞌnaquën tanapi. Aꞌnaquënso nipirinhuëꞌ naꞌcon oꞌotonaꞌ, noꞌpipi. Napoatomaꞌ, co nanitëramahuëꞌ Quisocristo chimininsoꞌ yonquiatomaꞌ coshatacamasoꞌ.

1 Corintios 6:10

Aꞌnaquëontaꞌ maꞌsha ihuatopi, apirapi, noꞌpipi, pinotopi. Aꞌnaquën aꞌnapita ahuëatonaꞌ, maꞌshanënaꞌ matopi. Yaꞌipi co noyahuëꞌ nipisopita co Yosë huaꞌanëntërinquë yaꞌcoanpihuëꞌ.

1 Corintios 6:6

Canpitaso nipirinhuëꞌ imaramaso capini nipinotomaꞌ, nishaꞌhuirapiramaꞌ. Naporahuaton, coisësoꞌ co Yosë natëpirinhuëꞌ, inaquë niquëpahuatamara, co noyahuëꞌ ninamaꞌ.

1 Corintios 6:9

Co noyahuëꞌ nipisopita co Yosë huaꞌanëntërinquë yaꞌcoanpihuëꞌ. ¡Nani ina nitotëramaꞌ ipora! Ama ninonpintocosohuëꞌ. Aꞌnaquën co Yosë natëtonahuëꞌ, monshihuanapi. Mamanshi moshapi. Saꞌinaꞌ yaꞌhuëtopirinahuëꞌ, aꞌna sanapi sëꞌhuapi. Quëmapi capini nisëꞌhuapi. Taparosachin yonquipi. Inapita pochin nipisopitasoꞌ, co Yosëꞌpaꞌ paꞌsapihuëꞌ.

1 Corintios 7:12

Isontaꞌ pënëantaranquëmaꞌ. Quisocristo isoroꞌpaquë nipon, co napopirinhuëꞌ, noya pënënaranquëmaꞌ, tënahuë. Aꞌnaquëmaꞌ coꞌhuara Quisocristo imashatërapomahuëꞌ, saꞌaramaꞌ. Iporasoꞌ imapiramahuëꞌ, saꞌamasoꞌ co yaimarinhuëꞌ. Noya yacapahuachinquëmaꞌ, ama tëꞌyatocosohuëꞌ.

1 Corintios 7:15

Nichinpitacasoꞌ noya noya nipirinhuëꞌ, quëmapihuëꞌ nipon, co imatonhuëꞌ yapaꞌpachin, noya paꞌin. Sanapintaꞌ co imatonhuëꞌ yapaꞌpachin, noya inantaꞌ paꞌin. “Noya niniꞌtomaꞌ, yaꞌhuëcoꞌ,” itërinpoaꞌ Yosë.

1 Corintios 8:11

Canpitasoꞌ nitotatomaꞌ, noya capomarahuëꞌ, tëꞌhuatonaꞌpi atapicancanaramaꞌ. Ina marëntaꞌ Quisocristo chiminin.

Gálatas 2:12

Inaquë nisha piyapiꞌsaꞌ yaꞌhuëpi. Aꞌnaquën Quisocristo imapi. Inapitasoꞌ co cotio piyapihuëꞌ niꞌton, yaꞌipi cosharoꞌ caꞌpi. Cotioroꞌsantaꞌ inaquë yaꞌhuëpisopita Quisoso imapachinara, co huachi cosharoꞌ aꞌpopihuëꞌ. Napopináchin coshatopi. Pitrontaꞌ inapitarëꞌ coshataton, co maꞌsha aꞌporinhuëꞌ. Ina quëran aꞌnapita cotioroꞌsaꞌ Quirosarin quëran canquipi. Santiaco imarinsopita inahuasoꞌ. “Quiyantaꞌ Quisocristo imarai,” taponaraihuëꞌ, iráca pënëntopisoꞌ yonquiatonaꞌ, maꞌsha aꞌpopi. Inapita huëꞌpachinara, Pitro co huachi nisha piyapiꞌsarëꞌ coshatërinhuëꞌ. Marca paꞌyatopisopita tëꞌhuataton, nisha coshatërin.

Efesios 5:18

Aꞌnaquën noꞌpicasoáchin cancantopi. “Huëcoꞌ noꞌpiahuaꞌ. Capa cancantahuaꞌ,” nitopirinahuëꞌ. Ama canpitasoꞌ noꞌpicosohuëꞌ, nishacancantotamaꞌ. Yosë nontocoꞌ Ispirito Santo noyá yaꞌcoancanchinquëmaꞌ. Nani tahuëri yaꞌcoancantomiachinquëmaꞌ. Ina quëran co noꞌpipomarahuëꞌ, tëhuënchachin capa cancantomiataramaꞌ.

Efesios 5:5

Monshihuanpatamaꞌ, co Quisocristo huëntonënquë yaꞌconamahuëꞌ. Taparoꞌ nininsoꞌ nipatamaꞌ, co imaramahuëꞌ. Maꞌsharáchin yonquihuatamaꞌ, co tëhuënchachin Yosë yonquiaramahuëꞌ. Nani maꞌsha nohuantohuatamaꞌ, mamanshi moshapiso pochin niconamaꞌ. Ina nitotatomaꞌ iyaroꞌsaꞌ yonquicoꞌ.

Colosenses 3:5

Napoaton piꞌpian tërantaꞌ co noyahuëꞌ yonquihuatamaꞌ, aꞌnaroáchin naniantocoꞌ. Ama monshihuancosohuëꞌ. Ama taparoꞌ yonquicosohuëꞌ. Ama aꞌna sanapi sëꞌhuacamasoꞌ yonquicosohuëꞌ. Ama aꞌna quëmapi saꞌin noyapacosohuëꞌ. Ama nani maꞌsha nohuantapatocosohuëꞌ. Aꞌnaquënsoꞌ maꞌsha naꞌcon nohuantatonaꞌ, mamanshi moshapiso pochin niconpi.

2 Tesalonicenses 3:14

Nani ninshitatoi, pënënainquëmaꞌ. Inso tërantaꞌ co yanatëhuachincoihuëꞌ, pënëncoꞌ. Co natëtohuachinahuëꞌ, ama inapitarëꞌquëmaꞌ nipayacosohuëꞌ oshanëna marëꞌ tapainaꞌ.

2 Tesalonicenses 3:6

Sinioro Quisocristo nanan quëtërincoi niꞌton, noꞌtëquën iyaroꞌsaꞌ pënënainquëmaꞌ. Aꞌnaquëmasoꞌ imapomarahuëꞌ, co sacatatomahuëꞌ, nisha nisha yonquiramaꞌ. Yosë nanamën noꞌtëquën aꞌchintopirainquëmahuëꞌ, co natëramacoihuëꞌ. Insosona inapohuachin, ama inapitarëꞌquëmaꞌ nipayacosohuëꞌ.

1 Timoteo 3:3

Ama noꞌpiinasohuëꞌ. Ama yaahuëchinasohuëꞌ. Sano yonquiꞌinaꞌ. Ama yanoꞌhuichinasohuëꞌ. Ama coriquiráchin cancanchinasohuëꞌ.

1 Timoteo 6:5

Nitapicancantatonaꞌ, co niquëꞌyapihuëꞌ. Iráca Yosë nanamën nitotopirinahuëꞌ, ina naniantatonaꞌ, co huachi noꞌtëquën yonquipihuëꞌ. Maꞌsha canacaiso marëꞌ Yosë yaimaconpi. Co ina marëꞌ imacasohuëꞌ nipirinhuëꞌ, napopi. Ama inapitasoꞌ natanquësohuëꞌ.

2 Juan 1:10

Aꞌna piyapi huëꞌpachin: “Carinquëmaꞌ aꞌchinchinquëmaꞌ,” itohuachinquëmaꞌ, ama aꞌnaroáchin natëcosohuëꞌ. Co Quisocristo nanamën aꞌchintohuachinquëmahuëꞌ: “Inca. Co yanatanainquënhuëꞌ,” itocoꞌ. Ama yaꞌhuëramaquë ayaꞌconcosohuëꞌ. “Yosë catahuainquën,” ama itocosohuëꞌ.

Apocalipsis 2:14

co yaꞌipinquëmaꞌ noꞌtëquën imaramacohuëꞌ. Aꞌnaquëmaꞌ Paramo pochin cancantëramaꞌ. Iráca inasoꞌ Yosë nanamën nitotopirinhuëꞌ, Yosë piyapinënpita nonpintërin. Inimiconënpita huaꞌanën shaꞌhuitërin anishacancantacaiso marëꞌ, Paraco itopisoꞌ. Inari shaꞌhuitohuachina, anishacancantopi. Nisha cancantatonaꞌ, mamanshi moshapi. Moshatonaꞌ, nosha mamanshi marëꞌ acopisontaꞌ caꞌpi. Naporahuaton, monshihuanapi.

Apocalipsis 2:20

co yaꞌipi cancanëma quëran imaramacohuëꞌ. Aꞌna sanapi corto pëiquë chachin nonpin nanan aꞌchintopirinquëmahuëꞌ, co aꞌparamahuëꞌ. Iráca Quisapira paꞌpi co noyahuëꞌ sanapi niponahuëꞌ, chiníquën nanantaton, piyapinëhuëpita anishacancantërin. Inapochachin iporasoꞌ ina sanapi pënënarinquëmaꞌ co noyahuëꞌ nicacamasoꞌ. ‘Noya monshihuanacasoꞌ. Mamanshi moshacaso marëꞌ nosha acohuachina, noya capacasoꞌ. Caꞌcoꞌ,’ itohuachinquëmara, aꞌnaquëmaꞌ natëtomaꞌ, monshihuanamaꞌ. Nosha mamanshi marëꞌ acopisoꞌ caꞌnamaꞌ. Ina pochin ina sanapi nonpintërinquëmaꞌ.

Apocalipsis 21:8

Aꞌnapitaso nipirinhuëꞌ parisitáponaꞌ. Ayaroꞌ tahuëri naꞌa piyapiꞌsaꞌ pënquë paꞌsapi. Tëꞌhuatonaꞌ aꞌpopisopita, co natëpisopitahuëꞌ, co natëtochináchinhuëꞌ cancantopisopita, tëpatonaꞌpiroꞌsaꞌ, monshihuaninsopita, pënotonoꞌsaꞌ, mamanshi chinotopisopita, nonpinaꞌpiroꞌsaꞌ, inapita panca sono shaꞌpimoꞌshirë chachin pën tënëntápaquë paꞌsapi. Inaquë parisitáponaꞌ. Huaranca huaranca piꞌipintaꞌ nipirinhuëꞌ, co onporontaꞌ pipiapihuëꞌ.

Apocalipsis 22:15

Aꞌnaquënso nipirinhuëꞌ, co onporontaꞌ Yosë yaꞌhuërinquë paꞌsapihuëꞌ. Niꞌni pochin cancantopisopita, pënotonoꞌsaꞌ, monshihuanaꞌpiroꞌsaꞌ, tëpatoroꞌsaꞌ, mamanshi chinotopisopita, inapita aipiran yaꞌhuëmiatapi. Aꞌnaquëontaꞌ nonpinápi niꞌton, co nohuantapihuëꞌ noꞌtën nanan imacaisoꞌ. Inapitantaꞌ co onporontaꞌ Yosëꞌpaꞌ paꞌsapihuëꞌ.