1 Corintios 5:10 - Chayahuita (Shahui)

¹⁰ Naꞌa piyapiꞌsaꞌ co Yosë imatonahuëꞌ, monshihuanpi, apirapi, ihuatopi, mamanshi moshapi, inapopi. Huaꞌhuayatërahuëꞌ piyapi ina pochin nipi niꞌton, inapitasoꞌ nontacasoꞌ yaꞌhuërin. Co nontërëhuahuëꞌ naporini, co nanichitërihuahuëꞌ isoroꞌpaquë yaꞌhuëcasoꞌ.

1 Corintios 5:10 ပူးပေါင်းရင်းမြစ်များ

Lucas 18:11

Parisiosoꞌ huanirahuaton, sacaronquë Yosë nontërin: ‘Tata Yosë, yanontëranquën. Casoꞌ noyaco. Ina marëꞌ noya niꞌnanco niꞌton: “Yosparinquën,” itëranquën. Co aꞌnapita pochincohuëꞌ. Co ihuatërahuëꞌ. Co nonpinahuëꞌ. Co monshihuanahuëꞌ. Pasoꞌ quëmapi co noyahuëꞌ. Caso nipirinhuëꞌ co ina pochincohuëꞌ.

Juan 15:19

Inapita pochin cancantëramaꞌ naporini, noya niꞌitënënquëmahuëꞌ. Inahua capiniráchin nipaꞌyatopi. Nipirinhuëꞌ, nani huayonanquëmaꞌ. Ca nohuanto, co inapita pochin cancantëramahuëꞌ. Imaramaco niꞌton, noꞌhuiarinënquëmaꞌ.

Juan 17:6

Quëma nohuanton, aꞌnaya aꞌnaya imasarinaco. Isoroꞌpaquë yaꞌhuëpirinahuëꞌ, huayonan imainacoso marëꞌ. Napoaton, imasarinaco. Nani aꞌchintërahuë. Onpopinsona quëma cancantëransoꞌ nani anitotërahuë niꞌton, nohuitërinënquën. Inapitasoꞌ quëma piyapinënpita. Iráca quëran huarëꞌ yonquiran imainacosoꞌ. Quëma nanamën natëpi.

Juan 17:9

Imarinacosopita marëꞌ chiníquën nontaranquën. Huiꞌnanpita pochin niꞌnan. Iráca quëran huarëꞌ yonquiran imainacosoꞌ. Aꞌnapitasoꞌ co imarinacohuëꞌ. Co inapita marëꞌ nontaranquënhuëꞌ.

Juan 8:23

—Canpitasoꞌ isoroꞌpaquë yaꞌhuatomaꞌ, aꞌnapita piyapiꞌsa pochin yonquiramaꞌ. Caso nipirinhuëꞌ inápa quëran oꞌmarahuë niꞌto, Yosë pochin yonquirahuë.

1 Corintios 1:20

Aꞌnaquën inahuara yonquinëna quëran nani maꞌsha nitotopi. Aꞌnaquëntaꞌ nitoaꞌchinapi. Aꞌnaquëontaꞌ míso nonpi. Inapopirinahuëꞌ, ¿maꞌtaꞌ ina marëꞌ canapi? Co mantaꞌ canapihuëꞌ. “Co nanamëhuë imatomahuëꞌ, napoonin yonquiramaꞌ,” itërin Yosëri.

1 Corintios 10:27

Aꞌna tahuëri coshatapataramaꞌ. Co imarinsohuëꞌ amatohuachinquëmaꞌ, nohuantohuatamaꞌ pacoꞌ. Nosha acotohuachinënquëmaꞌ, “Mamanshi marëꞌ acopisoꞌ nimara,” ama tapomarahuëꞌ, caꞌcoꞌ.

1 Corintios 5:11

Aꞌnaquënso nipirinhuëꞌ. “Cantaꞌ imarahuë,” taponahuëꞌ, monshihuanárin. Aꞌnantaꞌ apirarin. Aꞌnaquëontaꞌ ipora huantaꞌ mamanshi moshararin. Aꞌnapitantaꞌ pinotapi, noꞌpirapi, ihuatapi, naporapi. Napoaponaraihuëꞌ: “Quiyantaꞌ imarai,” topi. Ama inapitarëꞌquëmaꞌ nipayacosohuëꞌ. Yosë nonpintapi niꞌton, ama inapitarëꞌquëmaꞌ coshatocosohuëꞌ.

1 Corintios 5:9

Iꞌhuantaꞌ nani ninshitëranquëmaꞌ. “Ama monshihuaninsopitarëꞌquëmaꞌ nipayacosohuëꞌ. Ama inapita noya niꞌcosohuëꞌ,” itëranquëmaꞌ.

2 Corintios 4:4

Sopai nohuanton, co nanitopihuëꞌ noꞌtëquën yonquicaisoꞌ. Maꞌsha aꞌpintërëso pochin nanamën quëran Yosë anitotërinpoaꞌ Quisocristo nohuitacaso marëꞌ. Inasoꞌ Yosë chachin ninin. Inapitaso nipirinhuëꞌ somaraya pochin cancantatonaꞌ, co nanitopihuëꞌ natëtacaisoꞌ.

Efesios 2:2

Coꞌhuara Quisocristo imashatërapomahuëꞌ, sopai huaꞌan natëtomaꞌ, co noyahuëꞌ ninamaꞌ. Inasoꞌ ihuan yaꞌhuërinquë yaꞌhuaton, yaꞌipi sopairoꞌsaꞌ huaꞌanëntarin. Co quënanpirëhuahuëꞌ, isoroꞌpaquë sacatárin minsëinpoaso marëꞌ. Yonquinëmaquë camairinquëmaꞌ niꞌton, co Yosë natëramahuëꞌ.

Filipenses 2:15

Noyasáchin nicoꞌ aꞌnapita nicatënquëmaꞌ, Yosë yonquiꞌinaꞌ. Ina huiꞌninpita pochin nicatomaꞌ, noyápiachin cancantocoꞌ. Co imapisopitasohuëꞌ nipirinhuëꞌ co Yosë nohuitatonahuëꞌ, co noyahuëꞌ cancantopi. Ninoꞌhuipi, monshihuanacaisoráchin yonquipi, nonpinápi. Co noyahuëꞌ yonquiatonaꞌ, tashi pochin cancantopi. Canpitaso nipirinhuëꞌ, tayoraroꞌsaꞌ tashiꞌ aꞌpintërinso pochin piyapiꞌsaꞌ catahuacoꞌ noꞌtëquën yonquicaiso marëꞌ.

1 Juan 4:5

Inapitaso nipirinhuëꞌ, co Yosë nohuitatonahuëꞌ, co nanamën chachin aꞌchinpihuëꞌ. Isoroꞌpaquë yaꞌhuërinsopitaráchin yonquiatonaꞌ, inahuara yonquinëna quëran aꞌchinpi. Napoaton co imapisopitasohuëꞌ nonpin nanan natëpi.

1 Juan 4:7

Yosë paꞌpi nosororinpoaꞌ. Napoaton iyaroꞌsaꞌ, canpoantaꞌ noya ninosoroaꞌahuaꞌ. Huëntonënquë ayaꞌconpachinpoaꞌ, catahuarinpoaꞌ aꞌnapita nosorocasoꞌ. Nosorohuatëhuaꞌ, Yosë nohuitarihuaꞌ. Huiꞌninpita pochin niꞌninpoaꞌ.

1 Juan 5:19

Imarëhuasopitasoꞌ Yosë huiꞌninpitanpoaꞌ ninëhuaꞌ. Aꞌnapitaso nipirinhuëꞌ co imapihuëꞌ niꞌton, sopairi huaꞌanëntërin. Camaihuachina, ina natëpi. Ina nitotërëhuaꞌ.

Apocalipsis 12:9

Inapotatonaꞌ, panca yaꞌhuan pochin nininsoꞌ inápa quëran tëꞌyatopi. Inasoꞌ sopai chachin, Satanasë itopisoꞌ. Yaꞌipi piyapiꞌsaꞌ yanonpintërin. Ina minsërahuatonaꞌ, anquëninënpitarë chachin isoroꞌpaquë tëꞌyatopi.