1 Corintios 4:6 - Chayahuita (Shahui)

⁶ Aꞌchintohuatëinquëmara iyaroꞌsaꞌ, Yosëíchin yonquirai. Aporosërëꞌcoi aꞌchintërainquëmasoꞌ ninshitëranquëmaꞌ canpitantaꞌ quiya pochin yonquicamaso marëꞌ. Yosë quiricanënáchin natëcasoꞌ yaꞌhuërin. Aꞌna quëmapi noya noya aꞌchintohuachinquëmaꞌ, ama inasáchin paꞌyatocosohuëꞌ.

1 Corintios 4:6 ပူးပေါင်းရင်းမြစ်များ

Salmos 8:4

Inapita acoaponahuëꞌ, ¿piyapicointa yonquirancoi ti? ¡Co quiyasoꞌ máquëncoihuëꞌ! ¡Co yonquiatoncoi catahuancoiso inashitëraihuëꞌ!

Hechos 18:24

Naporoꞌ tahuëriꞌsaꞌ aꞌna cotio quëmapi Ipisoquë paꞌnin, Aporosë itopisoꞌ. Aricantriaquë nasitërin. Noyá nitotërin aꞌchinacasoꞌ. Yosë quiricanën iráca ninshitopisontaꞌ noya nitotërin.

Hechos 19:1

Aporosë Corintoquë yaꞌhuasoꞌ, Paono huancoro ira paꞌtahuaton, Ipisoquë canconin. Inaquë naꞌamiáchin imapisopita quënanconin.

Romanos 12:3

Yosë nosoroatonco, acorinco piyapiꞌsaꞌ aꞌchintaꞌhuasoꞌ. Nani tahuëri catahuarinco. Napoaton pënënaranquëmaꞌ. Yaꞌipinquëmaꞌ sano yonquicoꞌ. Ama aꞌnapita nocancosohuëꞌ. Yosë nisha nisha acorinpoaꞌ. Nisha nisha catahuarinpoaꞌ maꞌsona nohuantërinsoꞌ nicacasoꞌ. Napoaton, co aꞌnapita nocanacasoꞌ yaꞌhuërinhuëꞌ. Noꞌtëquën yonquiatomaꞌ, maꞌmarësona acorinquëmasoꞌ nitotocoꞌ. Aꞌnaya aꞌnayanquëmaꞌ anitotarinquëmaꞌ.

1 Corintios 1:12

Nisha nisha nonamaꞌ: “Paono imarai,” tënamaꞌ aꞌnaquëmaꞌ. “Quiyasoꞌ Aporosë imarai,” tënamaꞌ aꞌnaquëmaꞌ. Aꞌnaquëmantaꞌ: “Pitro imarai,” tënamaꞌ. Aꞌnaquëmaso nipirinhuëꞌ: “Cristo imarai quiyasoꞌ,” tënamaꞌ.

1 Corintios 1:19

Quiricanën quëran itapon: “Aꞌnaquënsoꞌ nani maꞌsha nitotaponaraihuëꞌ, co noya yonquipihuëꞌ. Inahuara chaꞌëcaisoꞌ yonquipirinahuëꞌ, co nanitapihuëꞌ. Nani maꞌsha yonquiaponaraihuëꞌ, napoonin yonquipi,” tënin Yosë.

1 Corintios 1:31

“ ‘Ma noyacha Yosësoꞌ niꞌton, anoyacancantërinpoa paya,’ nitahuaꞌ. ‘Quiyasoꞌ noya noyacoi,’ ama tocosohuëꞌ,” tënin Yosë quiricanënquë.

1 Corintios 13:4

Piyapiꞌsaꞌ nosorohuatëhuaꞌ, co yanoꞌhuirihuahuëꞌ. Noya nontatëhuaꞌ, catahuarihuaꞌ. Piyapiꞌsaꞌ nosorohuatëhuaꞌ, co noyapatëhuaꞌ, noꞌhuiarihuahuëꞌ. Co nocantarihuahuëꞌ. “Casoꞌ noya noyaco,” co tarihuahuëꞌ.

1 Corintios 3:19

Co imapisopitasohuëꞌ nani maꞌsha nitotaponaraihuëꞌ: “Co noꞌtëquën yonquipihuëꞌ,” tënin Yosë. Quiricanën quëran anitotërinpoaꞌ. “Naꞌcon nitotatonaꞌ, piyapiꞌsaꞌ nonpintopirinahuëꞌ, co nanitopihuëꞌ Yosësoꞌ nonpintacaisoꞌ. Inari naꞌcon naꞌcon nitotaton, minsëarin,” tënin.

1 Corintios 3:21

Napoaton ama piyapiꞌsaꞌ paꞌyatocosohuëꞌ. “Pasoꞌ quëmapi noya noya aꞌchintërincoi,” ama tocosohuëꞌ. Yosëíchin paꞌyatacasoꞌ yaꞌhuërin. Inari yaꞌipi acorin canpita marëꞌ.

1 Corintios 5:2

Canpitantaꞌ nitotapomarahuëꞌ, co ina marëꞌ tapanamahuëꞌ. Ina oshanën yonquiatomaꞌ sëtacamaso nipirinhuëꞌ, iporahuantaꞌ “Quiyasoꞌ nóya imarai,” toconamaꞌ. Nani ocoicaso nipirinhuëꞌ, co ocoiramahuëꞌ.

1 Corintios 5:6

Iporaso nipirinhuëꞌ “Nóya imarai,” topiramahuëꞌ, co yaꞌipinquëmaꞌ noya ninamahuëꞌ. Co noꞌtëquën yonquiramahuëꞌ. Niꞌcoꞌ. “Pan nipatëra, piꞌpian ahuëpocatërinsoꞌ acohuachina, yaꞌipi sëꞌcotërin,” topi. Nani ina nitotëramaꞌ. Inapochachin aꞌnayanquëma tërantaꞌ co noyahuëꞌ yonquihuatamaꞌ, yaꞌipinquëmaꞌ nitapicancanaramaꞌ.

1 Corintios 8:1

Aꞌnaquën maꞌsha tëparahuatonaꞌ, nosha acopi mamanshi chinotacaiso marëꞌ. “¿Noya ipora ina nosha paꞌanatëꞌ capacasoꞌ ti?” itëramaco niꞌton, shaꞌhuichinquëmaꞌ. Tëhuënchachin iyaroꞌsaꞌ co mamanshisoꞌ nanpirinhuëꞌ, nitotërëhuaꞌ. Nani naꞌcon nitotarihuarahuëꞌ, co aꞌnapita nosorohuatëhuahuëꞌ, topinan quëran nitotatëhuaꞌ, ninocanarihuaꞌ. Nipirinhuëꞌ, piyapi nosorohuatëhuaꞌ, catahuarëhuaꞌ noya noya Yosë imacaiso marëꞌ.

1 Corintios 9:23

Ina pochin Yosë nanamën aꞌchinpato, naꞌcon naꞌcon piyapiꞌsari ina nohuitapi antaꞌ. Ina marëꞌ cantaꞌ noya cancantërahuë.

2 Corintios 10:12

Inapitasoꞌ co noꞌtëquën yonquipihuëꞌ. “Quiyasoꞌ noya noyacoi. Aꞌnapita quëran noya noya nitotërai,” toconpi. Co ina pochin nonacasohuëꞌ nipirinhuëꞌ, napopi. Inahua capini ninocanatonaꞌ, ninapotopi. Co quiyasoꞌ inapita pochin cancantëraihuëꞌ.

2 Corintios 10:15

Co aꞌna piyapi aꞌchininquë paatoi, aꞌchinaihuëꞌ. Yosë aꞌparincoi noya aꞌchintaꞌhuainquëmaso marëꞌ. Naꞌcon nohuantërai noya noya imacamasoꞌ. Noya noya natëhuatamaꞌ, aquëtë huarëꞌ aꞌchintarainquëmaꞌ.

2 Corintios 10:7

Canpitasoꞌ yaꞌpirama quëran quënanamasoráchin yonquiramaꞌ. Co cancanëma quëran huarëꞌ yonquiramahuëꞌ. Aꞌnaquën “Quisocristo chachin imarai,” topachinara, isontaꞌ yonquiꞌinaꞌ. Quiyantaꞌ Quisocristo imarai mini.

2 Corintios 11:4

Quisocristo imacasoꞌ aꞌchintëranquëmaꞌ. Natëhuatamaꞌ, Ispirito Santo yaꞌcoancantërinquëmaꞌ. Inapitaso nipirinhuëꞌ nisha aꞌchintërinënquëmaꞌ. “Quisocristo nanamën chachin aꞌchintarainquëmaꞌ,” itopirinënquëmahuëꞌ, nisha nanan aꞌchintërinënquëmaꞌ. Nisha ispiritontaꞌ yaꞌhuërin, itërinënquëmaꞌ. Nisha nisha natëcasoꞌ aꞌchintohuachinquëmara, aꞌnaroáchin yaimaramaꞌ.

2 Corintios 12:19

Co noya nicamacoiso marëꞌ ninshitarainquëmahuëꞌ. Aꞌnaquëmaꞌ nimara ina pochin yonquipiramahuëꞌ, co quiyaso naporaihuëꞌ. Nosororainquëmaꞌ iyaroꞌsaꞌ. Noya noya imacamaso marëꞌ ninshitarainquëmaꞌ. Quisocristo imarai niꞌton, Yosëíchin yonquirai. Ina niꞌsárincoi niꞌton, noꞌtëquën ninshitarainquëmaꞌ.

2 Corintios 12:20

Canconpato, co noya niꞌsaranquëmahuëꞌ nimara. Canpitantaꞌ co noya niꞌsaramacohuëꞌ nimara. Napoaton sëtato, yonquiáranquëmaꞌ. Ipora huantaꞌ aꞌnaquëmaꞌ nimara ninoꞌhuiaramaꞌ, niaꞌpitaramaꞌ, iquianan quëran ninontaramaꞌ, nipinosaramaꞌ, ninocanaramaꞌ, nisha nisha yonquiaramaꞌ nimara, tënahuë yonquiato.

2 Corintios 12:6

“Naꞌcon naꞌcon nitotërahuë,” itëranquëmaꞌ naporini, noꞌtëquën nonchitënquëmahuëꞌ, co nonpinchitënquëmahuëꞌ. Nipirinhuëꞌ, co ina pochin nontëranquëmahuëꞌ. Nani nohuitëramaco. Aꞌchintohuatënquëmara, natanamaco. Naporahuësopita niꞌnamaꞌ. Inaíchin yonquiatomaꞌ, noya niꞌco topirahuëꞌ. Napoaton co aquëtëꞌ shaꞌhuitaranquëmahuëꞌ.

2 Corintios 4:15

Canpitantaꞌ imacamaso marëꞌ parisitërai. Inaora nohuanton, Yosë naꞌcon nosororincoi. Naꞌcon naꞌcon piyapiꞌsaꞌ ina nohuitohuachinaꞌ, noya cancantatonaꞌ, Yosë nontapi. “Ma noyanquëncha, Sinioro, paya. Nosoroatoncoi, nichaꞌësarancoi niꞌton, ‘Yosparinquën,’ Sinioro,” itapi.

Colosenses 2:18

Nisha aꞌchinaꞌpiroꞌsaso nipirinhuëꞌ taponaꞌ: “Quiyasoꞌ anquëniroꞌsaꞌ chinotërai. Huaꞌnarëso pochin quënanai. Co canpitasoꞌ quiya pochin nipatamahuëꞌ, co noya cancantaramahuëꞌ,” itohuachinënquëmaꞌ, ama piꞌpisha tërantaꞌ natëtocosohuëꞌ. Inapitasoꞌ nonpinatonaꞌ, “Nani maꞌsha Yosë anitotërincoi niꞌton, noya noyacoi,” topirinahuëꞌ, inahuara yonquinëna quëran napopi.

1 Tesalonicenses 1:5

Quisocristo nanamën aꞌchintohuatëinquëmara, co topinan quëran aꞌchintërainquëmahuëꞌ. Ispirito Santo chachin catahuarincoi aꞌchinaꞌhuaisoꞌ. Canpitantaꞌ catahuarinquëmaꞌ noya natanacamaso marëꞌ. “Noꞌtëquën nontërinpoaꞌ,” taꞌtomaꞌ, yaꞌipi cancanëma quëran natëramaꞌ. Ina nicatoi: “Tëhuënchachin Yosëri huëntonënquë ayaꞌconin,” tënai. Canpitataquë yaꞌhuapoi, noya imarai canpitantaꞌ noya imacamaso marëꞌ.

2 Timoteo 2:10

“Yosë nohuanton, huayoninsopita oshaquëran imasapi,” taꞌto, yaꞌipiya ahuantërahuë. Quisocristo imapachinaꞌ, nichaꞌësarin. Oshanënaꞌ inquitahuaton, anoyacancantarin niꞌton, aꞌna tahuëri Yosëꞌpaꞌ nanpiantarapi. Inatohuaꞌ noya noya yaꞌhuëcontapi. Co onporontaꞌ pipiapihuëꞌ.