1 Corintios 4:12 - Chayahuita (Shahui)

¹² Chiníquën sacatatoi, canotërai. Noꞌhuipirinacoihuëntaꞌ, noya nontërai. Aparisitohuachinacoirantaꞌ, co noꞌhuiraihuëꞌ. Ahuantërai.

1 Corintios 4:12 ပူးပေါင်းရင်းမြစ်များ

Mateo 5:11

Imaramacoso marëꞌ aꞌnaquën noꞌhuiarinënquëmaꞌ, ahuëarinënquëmaꞌ, pinosarinënquëmaꞌ, nisha nisha nonpinapiarinënquëmaꞌ. Napotopirinënquëmahuëꞌ, ama sëtocosohuëꞌ. Ina marëꞌ Yosë noya niꞌsarinquëmaꞌ niꞌton, nóya cancantocoꞌ.

Mateo 5:44

Nipirinhuëꞌ carimaꞌ shaꞌhuichinquëmaꞌ. Inimiconëmapitantaꞌ iyaroꞌsaꞌ, nosorocoꞌ. Aparisitopirinënquëmaontaꞌ, nosorocasoꞌ yaꞌhuërin. Inapita marëntaꞌ noya Yosë nontocoꞌ inahuantaꞌ catahuain.

Lucas 23:34

Patanantopirinahuëꞌ, Yosë nontërin. —Tëparinacoso marëꞌ Tata, ama anaꞌintëquësohuëꞌ. Co nohuitatonacohuëꞌ, napotarinaco, itërin.] Ina quëran sontaroꞌsa capini ninontopi. “Huëcoꞌ nicanatëhuaꞌ Quisoso aꞌmorinsoꞌ maahuaꞌ,” nitatonaꞌ, yaꞌnipirapi. Naporahuatonaꞌ, aꞌnaya aꞌnaya mapi.

Lucas 6:28

Pinopirinënquëmaontaꞌ, noya nontocoꞌ. Co quëꞌyapirinënquëmaontaꞌ, ama noꞌhuicosohuëꞌ. Yosë nontocoꞌ inahuantaꞌ catahuain.

Juan 15:20

Noꞌhuirinaco niꞌton, canpitantaꞌ noꞌhuiarinënquëmaꞌ. Nani shaꞌhuitëranquëmaꞌ: ‘Huaꞌanëmaco niꞌton, co canpitasoꞌ noya noya niꞌsarinënquëmahuëꞌ,’ itëranquëmaꞌ. Aparisitërinaco niꞌton, canpitantaꞌ aparisitarinënquëmaꞌ. Aꞌchinahuësoꞌ natëhuachinaꞌ, canpitantaꞌ natëarinënquëmaꞌ.

Hechos 18:3

Paonosoꞌ nëꞌmëtëꞌ pëiroꞌsaꞌ ninaꞌpi. Aquirontaꞌ inaquë chachin sacatërin niꞌton, inaquë yacapatërin nicatahuacaiso marëꞌ.

Hechos 20:34

Caora sacatonëhuë quëran coshatërahuë, maꞌsha pahuantërincosoꞌ paꞌanahuë. Caꞌtanincosopitantaꞌ quëtërahuë. Ina nitotëramaꞌ.

Hechos 7:60

Ina quëran isonahuaton, chiníquën itantarin: “Tëparinacoso marëꞌ, ama Sinioro isopita anaꞌintëquësohuëꞌ,” itërin. Ina tosahuaton, chiminin.

Romanos 12:14

Piyapi aparisitohuachinënquëmaꞌ, ama noꞌhuitomarahuëꞌ, noya nontocoꞌ. Yosë nontocoꞌ inahuantaꞌ catahuacaso marëꞌ. Ama Yosëri anaꞌintacasoꞌ yonquirapicosohuëꞌ.

Romanos 12:20

Napoaton “Inimiconëmaꞌ tanahuachin, aꞌcacoꞌ. Yamorohuachin, oꞌshitocoꞌ. Inapotohuatamaꞌ, inimiconëmaꞌ atapanaramaꞌ,” tënin antaꞌ.

Romanos 8:35

Tëhuënchachin Quisocristo nosororinpoaꞌ. Co insontaꞌ nanitërinhuë ina quëran osërëinpoasoꞌ. Aꞌna tahuëri parisitërëhuaꞌ. Parisitatëhuaꞌ, co napion cancantërëhuaꞌ. Piyapiꞌsaꞌ aparisitërinënpoaꞌ. Cosharoꞌ, maꞌsha inapita pahuantërinpoaꞌ. Maꞌsha onpochináchin nisarëhuaꞌ. Yatëparinënpoaꞌ. Inapopirëhuahuëꞌ, ¡co inapita nanitapihuëꞌ Quisocristo quëran osërëinpoasoꞌ!

1 Corintios 9:6

Pirnapirëꞌco aꞌchintarainquëmaꞌ niꞌton, aꞌcamacoisoꞌ yaꞌhuëpirinhuëꞌ. Quiyaora sacatatoi, coshatërai. Maꞌshantaꞌ pahuantohuachincoira, quiyaora paꞌanai. Aꞌnapitasoꞌ topinan maꞌparinënquëmaꞌ.

2 Corintios 11:8

Aꞌchintëranquëmaso marëꞌ co mantaꞌ maꞌparanquëmahuëꞌ. Aꞌnapita imapisopita coriqui aꞌpatërinaco catahuaꞌhuanquëmaso marëꞌ. Naporoꞌ co inapita aꞌchintopirahuëꞌ, aꞌpatërinaco.

Efesios 4:28

Aꞌnaquëmaꞌ iráca ihuatëramaꞌ. Ama huachi ihuatocosohuëꞌ. Ama chirotomarahuëꞌ, noya sacatocoꞌ. Ina quëran nanitëramaꞌ pahuantërinsopita quëtacamasoꞌ.

1 Tesalonicenses 2:9

Canpitataquë yaꞌhuasocoi, chiníquën sacatatoi, aꞌchintërainquëmaꞌ. Tahuërirë chachin tashirë chachin sacatërai ama topinan maꞌsha maꞌpacaꞌhuainquëmaso marëhuëꞌ. Quiyaora sacatonëhuëi quëran coshatërai. Naporahuatoi, Yosë nanamën aꞌchintërainquëmaꞌ. Co ina naniantëramahuëꞌ, tënahuë.

2 Tesalonicenses 3:8

Co aꞌna piyapi cosharonën topinan maꞌparaihuëꞌ. Nani tahuëri chiníquën sacatërai. Tashirë chachin sacatërai ama topinan maꞌpataꞌhuaiso marëhuëꞌ.

1 Timoteo 4:10

Ina marëꞌ paatëhuaꞌ, Yosë nanamën shaꞌhuirárëhuaꞌ. Parisitarihuarahuëꞌ, aꞌchinárëhuaꞌ. Yosëíchin ninarëhuaꞌ. Inasoꞌ nanpiarin niꞌton, yaꞌipi piyapi nichaꞌëcasoꞌ nohuantërin. Natëhuatëhuaꞌ, anoyacancantatonpoaꞌ, nichaꞌësarinpoaꞌ.

1 Pedro 2:23

Inimiconënpitari pinopachinara, co yaiꞌhuërëtërinhuëꞌ. Aparisitopirinahuëꞌ, co noꞌhuirinhuëꞌ. “Aꞌna tahuëri Yosëri noꞌtëquën anaꞌintarin,” taꞌton, Yosëíchin natërin.

1 Pedro 3:14

Aꞌna tahuëriso nipirinhuëꞌ imaramaso marëꞌ aparisitohuachinënquëmaꞌ, ama tëꞌhuatocosohuëꞌ. “Quisocristo marëꞌ parisitarëhuaꞌ,” taꞌtomaꞌ, noya cancantocoꞌ. Yosë noya catahuarinquëmaꞌ niꞌton, ama paꞌyancosohuëꞌ.

1 Pedro 3:9

Piyapiꞌsaꞌ maꞌsha onpotohuachinënquëmaꞌ, ama iꞌhuërëtacamasoꞌ yonquicosohuëꞌ. Pinopachinënquëmaꞌ, ama canpitarisoꞌ pinocosohuëꞌ. Noya nontocoꞌ. Naporahuaton, Yosë nontocoꞌ inapitantaꞌ catahuain. Imapatëhuaꞌ, ina shaꞌhuitërinpoaꞌ aꞌnapitantaꞌ nosorocasoꞌ. Napohuatëhuaꞌ, Yosë noya catahuarinpoaꞌ.

1 Pedro 4:19

Napoaton Yosë nohuanton parisitohuatamaꞌ, noya nicoꞌ. “Catahuaco Sinioro chiníquën cancanchi,” itocoꞌ. Yosë chachin nininpoaꞌ. Inasoꞌ co onporontaꞌ naniantarinpoahuëꞌ.

Judas 1:9

Iráca Moisësë chiminpachina, Yosëri anquëni huaꞌan aꞌpaimarin nonën paꞌpitacaso marëꞌ. Miquiri itopisoꞌ. Sopairi yaosërëtohuachina, ninoꞌhuipi. Naporoꞌ anquëni chiníquën nanantaponahuëꞌ, co nohuantërinhuëꞌ sopai pinocasoꞌ. Co inaora anaꞌintacasoꞌ yonquirinhuëꞌ. “Sinioro anaꞌinchinquën,” itërin.