1 Corintios 4:10 - Chayahuita (Shahui)

¹⁰ Quisocristo natëtoi, nanamën aꞌchinarai. Ina marëꞌ quiyasoꞌ tëhuarinacoi. Canpitaso nipirinhuëꞌ noya nitotonaꞌpiroꞌsa pochin nicatënënquëmaꞌ, co tëhuarinënquëmahuëꞌ. Quiyasoꞌ co chiníquën nanantëraihuëꞌ. Canpitaso nipirinhuëꞌ chiníquën nanantëramaꞌ. Piyapiꞌsaꞌ noya niꞌpirinënquëmahuëꞌ, quiyasoꞌ co noyahuëꞌ niꞌninacoi.

1 Corintios 4:10 ပူးပေါင်းရင်းမြစ်များ

Isaías 53:3

Piyapiꞌsari nocanatona aꞌpoaponaꞌ. Co noyahuëꞌ nicatona chiníquën aparisitapi. Aꞌpopi niꞌton, paꞌpi sëtaton parisitapon. Canpoarinta co niꞌchináchinhuëꞌ cancantatëhuaꞌ, nocanëhuaꞌ. Co piꞌpian tëranta noya yonquirapirëhuahuëꞌ.

Mateo 24:9

“Naporoꞌ tahuëriꞌsaꞌ co noya piyapiꞌsahuëꞌ masarinënquëmaꞌ. Imaramacoso marëꞌ aparisitarinënquëmaꞌ. Nisha nisha piyapiꞌsaꞌ noꞌhuiarinënquëmaꞌ. Aꞌnaquëmaꞌ tëpararinënquëmaꞌ.

Mateo 5:11

Imaramacoso marëꞌ aꞌnaquën noꞌhuiarinënquëmaꞌ, ahuëarinënquëmaꞌ, pinosarinënquëmaꞌ, nisha nisha nonpinapiarinënquëmaꞌ. Napotopirinënquëmahuëꞌ, ama sëtocosohuëꞌ. Ina marëꞌ Yosë noya niꞌsarinquëmaꞌ niꞌton, nóya cancantocoꞌ.

Lucas 10:16

Ina quëran yaaꞌparinsopita itaantarin: “Iporasoꞌ pënëntacamaso marëꞌ aꞌpararanquëmaꞌ. Ca yaꞌhuërënamëhuë pënëntaramaꞌ. Noya natanpachinquëmaꞌ, natanarinaco cantaꞌ. Coꞌsoꞌ nohuantohuachinënquëmahuëꞌ, co cantaꞌ nohuantarinacohuëꞌ. Co nohuantohuachinacohuëꞌ, co Yosëntaꞌ nohuantapihuëꞌ,” itërin Quisosori. Itohuachina, paꞌpi huachi. Nisha nisha ninanoquë pënëntëraꞌpiapi.

Lucas 18:9

Aꞌnaquën piyapiꞌsaꞌ yaꞌhuëpirinahuëꞌ. “Quiyasáchin noꞌtëquën Yosë natërai. Aꞌnapitasoꞌ co quiya pochin natëpihuëꞌ,” toconpi. Napopirinahuëꞌ, inapita pënënacaso marëꞌ Quisosori itërin:

Lucas 6:22

Yosë quëran quëmapico niꞌto, imaramaco. Imaramacoso marëꞌ aꞌnaquën noꞌhuiarinënquëmaꞌ. Co huachi quëꞌyarinënquëmahuëꞌ. Pinosarinënquëmaꞌ. Nonpinapiarinënquëmaꞌ. Napotopirinënquëmahuëꞌ, ama sëtocosohuëꞌ. Ina marëꞌ Yosë noya niꞌsarinquëma niꞌton, nóya cancantocoꞌ.

Hechos 17:18

Inaquë nisha nisha yonquipisoꞌ aꞌchinaꞌpiroꞌsantaꞌ huëꞌpi. Aꞌnaquën ipicorioroꞌsaꞌ itopi. Aꞌnaquëontaꞌ istoicoroꞌsaꞌ itopi. Paono quënanahuatonaꞌ, ninontopi. —Iso quëmapi paꞌpi nonaꞌpi. ¿Maꞌtaꞌ tëcapon naporin? itopi aꞌnaquën. —Ahuën. Nisha yosëroꞌsaꞌ imacaiso marëꞌ aꞌchinamara, topi aꞌnaquën. “Quisoso chiminin. Ina quëran nanpiantarin,” tëninso marëꞌ napotopi.

Hechos 17:32

“Ananpitaantarin,” tëninso marëꞌ, “Tëhuënchachin taꞌmaꞌ ananpitëca,” taꞌtonaꞌ, tëhuapi aꞌnaquën. Aꞌnaquënso nipirinhuëꞌ co tëhuapihuëꞌ. —Aꞌna tahuëri aꞌchintaantacoi, itopi.

Hechos 26:24

Ina pochin nontahuachina, Pistori chiníquën itërin: —¡Paono, quëmasoꞌ huaꞌyantëran! Naꞌcon quirica nontaton huaꞌyantëran, itërin.

Hechos 9:16

Nanamëhuë aꞌchininso marëꞌ naꞌcon parisitapon. Inantaꞌ cari anitotarahuë,” itërin Quisosori.

1 Corintios 1:21

Ina nohuanton, piyapi inahuara yonquinëna quëran co nanitopihuëꞌ Yosë nohuitacaisoꞌ. Quisocristo chimininsoꞌ aꞌchinárai. Aꞌnaquënsoꞌ ina natanpachinara, tëhuapi. Canpoaso nipirinhuëꞌ natëhuatëhuaꞌ, anoyacancantërinpoaꞌ. Ina Yosë nohuantërin.

1 Corintios 1:23

Quiyaso nipirinhuëꞌ Quisocristo nanamënáchin aꞌchinai: “Corosëquë canpoa marëꞌ chiminin,” tënai. Cotioroꞌsasoꞌ co natëtopihuëꞌ: “Inasoꞌ Yosë huiꞌnin naporini, co chimiintonhuëꞌ,” toconpi. Nisha piyapiroꞌsarintaꞌ co nohuantatonaraihuëꞌ, tëhuapi.

1 Corintios 1:25

Aꞌnaquën Quisocristo nanamën tëhuapi. “Quiyasoꞌ naꞌcon naꞌcon nitotërai,” topirinahuëꞌ, Yosësoꞌ noya noya yonquiaton, noꞌtëquën anitotërinpoaꞌ. Aꞌnaquëontaꞌ “Co inasoꞌ chiníquën nanantërinhuëꞌ,” taꞌtonaꞌ, co natëtopirinahuëꞌ. Yosësoꞌ yaꞌipi nanitapaton, anoyacancantërinpoaꞌ.

1 Corintios 10:12

Aꞌnaya aꞌnayanquëmaꞌ niꞌcona oshahuantamaꞌ. “Casoꞌ noya piyapico. Co onporontaꞌ Yosë aꞌpoarahuëꞌ,” ama tocosohuëꞌ.

1 Corintios 2:14

Aꞌnaquënso nipirinhuëꞌ piyapi yonquirinsoráchin nitotatonaꞌ, co nohuantopihuëꞌ Yosë nanamën natanacaisoꞌ niꞌton, tëhuaconpi. Ispirito Santoráchin catahuarinpoaꞌ natëtacasoꞌ. Napoaton co imarinsopitasohuëꞌ natanaponaraihuëꞌ, co nanitopihuëꞌ noꞌtëquën yonquicaisoꞌ.

1 Corintios 2:3

Canpitataquë yaꞌhuasoco, co chiníquën cancantërahuëꞌ. “Co caora nanitërahuëꞌ noya aꞌchinaꞌhuasoꞌ,” taꞌto, naporahuëꞌ.

1 Corintios 3:18

Ama inquëma tërantaꞌ isoroꞌparáchin yonquiatomaꞌ, ninonpintocosohuëꞌ. “Caora noya noya nitotërahuë,” co taꞌcasoꞌ yaꞌhuërinhuëꞌ. Ama ina pochin yonquicosohuëꞌ. “Caora co noꞌtëquën yonquirahuëꞌ. Catahuaco Sinioro noya yonquiꞌi,” topatamaꞌ, Yosë catahuarinquëmaꞌ noya noya yonquicasoꞌ.

1 Corintios 3:2

Niꞌcoꞌ. Huaꞌhuishin shoꞌshoíchin nanpitërin. Co coshachatërarinhuëꞌ. Inapochachin canpitasoꞌ ninamaꞌ. Yaꞌnan aꞌchintaponquëmaꞌ, piꞌpian aꞌchintëranquëmaꞌ. Aquëtëꞌ yaaꞌchintopiranquëmahuëꞌ, co nanichátëraramahuëꞌ noꞌtëquën yonquicamasoꞌ. Iporahuantaꞌ co nanitëramahuëꞌ.

1 Corintios 4:8

Canpitasoꞌ naporamaꞌ: “Nani yaꞌipi nitotërai. Co mantaꞌ pahuantërincoihuëꞌ noya cancantaꞌhuaiso marëꞌ. Quiyaora noya nitotatoi, huaꞌan pochin chiníquën nanantërai,” topiramahuëꞌ. ¡Tëhuënchachin chiníquën nanantëramaꞌ naporini, quiyantaꞌ isoroꞌpaquë chachin chiníquën nananchitoihuëꞌ!

2 Corintios 10:10

Aꞌnaquën itërinënquëmaꞌ: “Paono naꞌcon ninshitatonpoaꞌ, chiníquën pënënpirinpoahuëꞌ. Huëꞌpachinasoꞌ, co chiníquën nanantonaꞌpi pochin nontërinpoahuëꞌ. Sanoanayan quëran aꞌchintërinpoaꞌ niꞌton, co chiníquën nanantërinhuëꞌ,” toconpi.

2 Corintios 11:19

Inapitasoꞌ nocanpirinënquëmahuëꞌ, noya natanamaꞌ niꞌquëhuarëꞌ, cantaꞌ piꞌpian tërantaꞌ natanco, topirahuëꞌ.

2 Corintios 11:29

Aꞌnaquën co chiníquën cancantohuachinahuëꞌ, cantaꞌ ina pochin ninatanahuë. Aꞌna piyapi anishacancantohuachinquëmara, nosororanquëmaꞌ niꞌton, ina noꞌhuirë pochin cancantërahuë.

2 Corintios 13:9

Co chiníquën nanantonaꞌpi pochin nipiraihuëꞌ, co ina marëꞌ sëtëraihuëꞌ. Noya imapatamaꞌ, nóya cancantarai. Ipora huantaꞌ Yosë nontarai. “Catahuaquëꞌ, Sinioro, noya noya cancanchinaꞌ,” itërai.

2 Corintios 4:12

Aꞌchintërainquëmaso marëꞌ aparisitatonacoi, yatëpapirinacoihuëꞌ, canpitasoꞌ imaramaꞌ. Quisocristo anoyacancantërinquëmaꞌ niꞌton, nanpimiataramaꞌ, tënahuë.

2 Corintios 6:8

Aꞌnaquën noya niꞌninacoi. Aꞌnaquënso nipirinhuëꞌ noꞌhuirinacoi. Aꞌna tahuëri: “Paono nóya aꞌchinin,” topi. Aꞌna tahuëriso nipirinhuëꞌ pinorinacoi. Noꞌtëquën aꞌchintopiraihuëꞌ: “Nonpiánpi,” topi aꞌnaquëntaꞌ.

1 Tesalonicenses 4:8

Co quiyaora yonquinëhuëi quëran pënënainquëmahuëꞌ. Co natëhuatamahuëꞌ, Yosë chachin co natëaramahuëꞌ. Ina nohuanton, Ispirito Santo yaꞌcoancantërinpoaꞌ noya nicacaso marëꞌ. Inasoꞌ noyasáchin ninin.

1 Pedro 4:14

Imaramaso marëꞌ pinopachinënquëmaꞌ, Yosë noya niꞌsarinquëmaꞌ. Ispirito Santo yaꞌcoancantatënquëmaꞌ achinicancanarinquëmaꞌ niꞌton, noya cancantocoꞌ.