1 Corintios 16:1 - Chayahuita (Shahui)

¹ Aꞌnantaꞌ shaꞌhuichinquëmaꞌ, yonquicoꞌ. Aꞌnaquën imapisopita maꞌsha pahuantarin niꞌton, parisitapi. Inapita catahuacaso marëꞌ coriqui yaaꞌparamaꞌ. Carasiaquë imapisopitantaꞌ coriqui aꞌparapi. Inapita nani shaꞌhuitërahuë coriqui yontonacaiso marëꞌ. Inapochachin canpitantaꞌ shaꞌhuitaranquëmaꞌ.

1 Corintios 16:1 ပူးပေါင်းရင်းမြစ်များ

Hechos 11:28

Aꞌnasoꞌ Acapo itopi. Inasoꞌ Ispirito Santo nohuanton, ninorin. “Co huaꞌqui quëranhuëꞌ yaꞌipi parti tanarotapi,” itërin ninoton. Ina quëran Craotio itopisoꞌ Noma copirno yaꞌconasoꞌ, tëhuënchachin tanarotopi.

Hechos 11:30

Nani coriqui yontonpachinara, Pirnapi, Saono, inapita quëtopi quëpacaiso marëꞌ. Quirosarinquë quëparahuatonaꞌ, ansianoꞌsaꞌ quëtonpi pahuantërinsopita quëtacaiso marëꞌ.

Hechos 16:6

Asia parti Yosë nanamën yashaꞌhuipirinahuëꞌ, Ispirito Santo co nohuantërinhuëꞌ inaquë aꞌchinacaisoꞌ. Napoaton Piriquia parti, Carasia parti inapita naꞌhuëtopi.

Hechos 18:23

Huaꞌquimiáchin inaquë yaꞌhuërin. Ina quëran naquëranchin yonquirin paaton nasha imapisopita nicacaso marëꞌ. Carasia parti paꞌsahuaton, pënënaꞌpiarin. Naporahuaton, Piriquia partintaꞌ paꞌsahuaton, pënënaꞌpiarin. Aꞌnaya aꞌnaya ninanoroꞌsaquë Quisoso imapisopita achinicancanaꞌpiarin. Achinicancanpachina, noya noya imasapi.

Hechos 24:17

Iráca Quirosarinquë yaꞌhuëpirahuëꞌ. Naꞌa piꞌipi aꞌna parti paꞌnahuë quëran iꞌhuamiáchin inaquë paantarahuë. Saꞌahuaroꞌsaꞌ nosoroato, coriqui quëtaꞌhuaso marëꞌ paꞌnahuë. Maꞌsha Yosë quëtaꞌhuaso marëntaꞌ paꞌnahuë.

Hechos 9:13

Ananiasëso nipirinhuëꞌ co yapaꞌninhuëꞌ. “Ina quëmapisoꞌ Sinioro, paꞌpi co noyahuëꞌ, topi natantërahuë. Quirosarinquë quëma imarinënquënsopita chiníquën aparisitërin.

Hechos 9:41

Pitrori maimirarahuaton, ahuanirin. Ina quëran imapisopita, quëyoronoꞌsaꞌ inapita përarin. Huëꞌsahuatonaꞌ, nanpirin quënanquipi.

Romanos 12:13

Imapisopita pahuantohuachinaꞌ, maꞌsha quëtocoꞌ. Niꞌtoroꞌsaꞌ yaꞌnotohuachinënquëmaꞌ, noya nontatomaꞌ, aꞌcacoꞌ.

1 Corintios 11:34

Aꞌnaquën tanahuachinaꞌ, inahuara pëinënaquë coshachinaꞌ. Ina quëran noya niyontonpatamaꞌ, co Yosë anaꞌintarinquëmahuëꞌ. Aꞌna tahuëri paꞌsarahuë nicaponquëmaꞌ. Naporoꞌ naꞌcon naꞌcon aꞌchinchinquëmaꞌ.

1 Corintios 16:15

Istipano saꞌinë chachin nohuitëramaꞌ. Iráca Acaya parti aꞌchinpatëra, inapitaꞌton Quisocristo imapi. Pëinënquë yaꞌhuëpisopitantaꞌ imasapi. Imatonaꞌ, naꞌcon catahuarinënquëmaꞌ. Yaꞌipi imapisopita catahuapi.

1 Corintios 4:17

Ina marëꞌ Timotio aꞌpatëranquëmaꞌ. Inasoꞌ noya niꞌnahuë. Aꞌchintohuatëra, Quisocristo imarin niꞌton, huiꞌnahuë pochin niꞌnahuë. Nóya Sinioro imarin. Yaꞌipi naporahuësoꞌ ayonquiarinquëmaꞌ noya noya imacamaso marëꞌ. Insëquësona paꞌpatëra, Quisocristo nanamënsáchin aꞌchinahuë. Imapisopita niyontonpachinara, aꞌchintërahuë.

Gálatas 1:2

Yaꞌipicoi isëquë imaraisopitaroꞌcoi chachin nanan aꞌpatarainquëmaꞌ. Canpitantaꞌ Carasia parti yaꞌhuëramasopita imaramaꞌ niꞌton, ninshitaranquëmaꞌ.

Gálatas 2:10

“Ama saꞌahuaroꞌsaꞌ naniantocosohuëꞌ. Imapisopita aꞌchintocoꞌ maꞌsha quëtacasoꞌ,” itërinacoi. “Coꞌchi naniantaraihuë paya. Nosororai quiyarintaꞌ,” itërahuë.

Filemón 1:7

Yaꞌipi imapisopita nosoroaton, quëmari achinicancanan. Noya noya cancantapi. Ina natantahuato iyasha, cantaꞌ nóya cancantërahuë. Achinicancananco cantaꞌ.

Hebreos 6:10

Yosë co topinan anaꞌintarinquëmahuëꞌ. Iráca noya ninamaꞌ. Imapisopita nosoroatomaꞌ, catahuaramaꞌ noya imacaso marëꞌ. Ipora huantaꞌ noya ninosoroaramaꞌ niꞌton, co Yosë naniantarinquëmahuëꞌ.

1 Juan 3:17

Quisocristo imarëhuasopita capini noya ninosorocasoꞌ yaꞌhuërin. Aꞌnapita maꞌsha pahuantohuachinaꞌ, catahuahuaꞌ. Capa capacaisoꞌ nipachin, capa aꞌmocaisoꞌ nipachin quëtahuaꞌ. Co inapita catahuahuatëhuahuëꞌ, co tëhuënchachin nosororëhuahuëꞌ. Co canpoa capini ninosorohuatëhuahuëꞌ, co Yosëntaꞌ nosororëhuahuëꞌ.