1 Corintios 15:52 - Chayahuita (Shahui)

⁵² Aꞌnanaya nisha nonënpoaꞌ yaꞌhuëtarinpoaꞌ. Oꞌmantacasoꞌ tahuëri nanihuachin, tronpita pihuirarin. Pihuihuachin, chiminpisopita nanpiantarapi. Quisocristo imapi niꞌton, ananpitaantarin huachi. Naporoꞌ yaꞌipi imarëhuasopita nisha nonënpoaꞌ yaꞌhuëtarinpoaꞌ. Co huachi chiminarihuahuëꞌ.

1 Corintios 15:52 ပူးပေါင်းရင်းမြစ်များ

Éxodo 19:16

Moisësë naporinso chachin naporo tahuëri nanihuachina, tashiramiachin chiníquën oꞌcoritaton, huirátarin. Yaráton chitoro nininso motopi imotërin. Naporahuaton carniro pomon chiníquën pihuipisoꞌ natanpi. Ina natanatonaꞌ, yaꞌipi israiroꞌsa yaꞌhuëpiquë paꞌyanpi. Paꞌyanatona ropa ropatapi.

Éxodo 20:18

Noninsoꞌ, huiratërinsoꞌ, carniro pomon pihuipisoꞌ, inapita natanahuatonaꞌ, israiroꞌsasoꞌ paꞌpi tëꞌhuatopi. Oꞌcoriꞌ, pën, conaiꞌ, inapitanta quënanatonaꞌ, paꞌpi paꞌyanpi. Paꞌyanatona co nohuantopihuëꞌ yaꞌcaritacaisoꞌ.

Ezequiel 33:3

Inasoꞌ inimicoroꞌsa huëꞌsarin quënanpachin, piyapiꞌsa niyátainpichin yaꞌhuëcaiso marëꞌ pomonquë shaꞌhuitarin.

Ezequiel 33:6

Aꞌpaitonaꞌpisoꞌ, inimicoroꞌsa huëꞌsarinso nicaponahuëꞌ, co pomon pihuirinhuëꞌ. Inapitaso canquirahuatona inso tëranta tëpahuachinaꞌ, inasoꞌ, inaora oshanën marëꞌ chiminapon. Napoaponahuëꞌ ina chimininso marëꞌ, aꞌpaitonaꞌpintaꞌ anaꞌintaꞌhuaso yaꞌhuërin.

Zacarías 9:14

Piyapinënpita ahuëtacaiso marëꞌ paꞌpachinara, inapita yaꞌhuëapiso aipi Sinioro yaꞌnopon. Shinërënënpita quëran inantohuachin, oꞌcori pochin nisharápon. Tronpita pihuirahuaton, pëꞌnatë parti quëran ihuan huëꞌninso huáncana huëcapon.

Mateo 24:31

Oꞌmantarahuato, naꞌa anquëniroꞌsaꞌ aꞌpararahuë. Panca tronpita pihuitonaꞌ, yaꞌipi parti paꞌsapi huayonahuësopita ayontonacaiso marëꞌ.

Juan 5:25

Casoꞌ Yosë huiꞌninco. Iporaso huachi aꞌnaquën chimipi pochin nipisopita natanarinaco. Inapita noya natanpachinaco, Yosë anohuitarahuë. Ina nohuitohuachinaꞌ, nanpimiatapi.

Juan 5:28

Ama ina yonquiatomaꞌ, paꞌyancosohuëꞌ. Aꞌna tahuëri yaꞌipi chiminpisopita natanarinaco.

1 Corintios 15:23

Co napopináchin nanpiantarihuahuëꞌ. Quisocristoꞌton nanpiantarin. Aꞌna tahuëri oꞌmantahuachin, imarëhuasopitantaꞌ ananpitaantarinpoaꞌ.

1 Corintios 15:42

Inapochachin canpoantaꞌ nanpiantahuatëhuaꞌ, nisha yaꞌnoarihuaꞌ. Chiminpatëhuara, nonënpoaꞌ chanatopirinhuëꞌ, nanpiantahuatëhuaꞌ, nasha nonënpoaꞌ yaꞌhuëtarinpoaꞌ. Co onporontaꞌ chanatarinhuëꞌ.

1 Corintios 15:50

Nonënpoaꞌ ipora yaꞌhuëtërinpoasoꞌ co nanitërinhuëꞌ Yosë huaꞌanëntërinquë paacasoꞌ. Chiminpatëhuaꞌ, nonënpoaꞌ chanatarin, co yaꞌhuëmiatarinhuëꞌ.

1 Tesalonicenses 4:15

Oꞌmantahuachin, co nanpirëhuasopitaráchin pantarihuahuëꞌ. Chiminpisopitaꞌton nanpiantarapi. Sinioro Quisoso shaꞌhuitërinpoaso chachin shaꞌhuichinquëmaꞌ.

2 Pedro 3:10

Napoaponahuëꞌ, tahuërinën nanihuachin, Sinioro oꞌmantararin. Niꞌcoꞌ. Tashiꞌ co yonquiasëhuëꞌ, ihuatëꞌ huëꞌnin. Inapochachin aꞌnanaya ayaroꞌ tahuëri naniarin huachi. Naporoꞌ tahuëri piꞌiroꞌtëꞌ huëntoncaarin. Chiníquën huëntoncahuachin, taꞌhuantarin. Piꞌi, tayora, inapita huë́ya niꞌton, soquiarin huachi. Isoroꞌpaꞌ, yaꞌipi yaꞌhuërinsopita, inapita huiquitapi.

Apocalipsis 8:13

Ina quëran panca onian quënanahuë. Inápaquë aꞌninquëchin yanponarin. Piyapi pochin noninsoꞌ natanahuë. —¡Maꞌhuantacha nisapi paya! Yosë aꞌpopi niꞌton, piyapiꞌsaꞌ chiníquën parisitaponaꞌ. Aꞌnapita anquëniroꞌsaꞌ pihuiantahuachina, isoroꞌpaquë yaꞌhuëpisopita aquë aquëtëꞌ parisitaponaꞌ, tënin.

Apocalipsis 8:2

Ina quëran canchisë anquëniroꞌsaꞌ quënanahuë. Yosë notënanquë huanirapi. Inaquë huanihuachinara, aꞌnaya aꞌnaya tronpita quëtopi pihuicaiso marëꞌ.