1 Corintios 14:37 - Chayahuita (Shahui)

³⁷ Yosë nanamën chachin noꞌtëquën aꞌchintëranquëmaꞌ. Noꞌtëquën ninshitëranquëmaꞌ. Insosona yapënëntohuachin, natëinco. Ispirito Santo tëhuënchachin catahuahuachinquëmaꞌ, ina nanan chachin natëaramaꞌ.

1 Corintios 14:37 ပူးပေါင်းရင်းမြစ်များ

Números 24:16

Yosë ispiritonën yaꞌcoancantohuachincora, noya noya nitotërahuë. Yosë chachin nanan anitotërinco. Co huëꞌëporahuëꞌ, huaꞌnarëso pochin quënanahuë. Ina Yosëso chini chiníquën nanantaton yaꞌipi nanitaparin.

Lucas 10:16

Ina quëran yaaꞌparinsopita itaantarin: “Iporasoꞌ pënëntacamaso marëꞌ aꞌpararanquëmaꞌ. Ca yaꞌhuërënamëhuë pënëntaramaꞌ. Noya natanpachinquëmaꞌ, natanarinaco cantaꞌ. Coꞌsoꞌ nohuantohuachinënquëmahuëꞌ, co cantaꞌ nohuantarinacohuëꞌ. Co nohuantohuachinacohuëꞌ, co Yosëntaꞌ nohuantapihuëꞌ,” itërin Quisosori. Itohuachina, paꞌpi huachi. Nisha nisha ninanoquë pënëntëraꞌpiapi.

Romanos 12:3

Yosë nosoroatonco, acorinco piyapiꞌsaꞌ aꞌchintaꞌhuasoꞌ. Nani tahuëri catahuarinco. Napoaton pënënaranquëmaꞌ. Yaꞌipinquëmaꞌ sano yonquicoꞌ. Ama aꞌnapita nocancosohuëꞌ. Yosë nisha nisha acorinpoaꞌ. Nisha nisha catahuarinpoaꞌ maꞌsona nohuantërinsoꞌ nicacasoꞌ. Napoaton, co aꞌnapita nocanacasoꞌ yaꞌhuërinhuëꞌ. Noꞌtëquën yonquiatomaꞌ, maꞌmarësona acorinquëmasoꞌ nitotocoꞌ. Aꞌnaya aꞌnayanquëmaꞌ anitotarinquëmaꞌ.

1 Corintios 14:29

Niyontonpatamaꞌ, catoya, caraya nimara Yosëri anitotërinsoꞌ shaꞌhuiinaꞌ. Aꞌnapitasoꞌ natainaꞌ. Noꞌtën nanan nipachin, noya natanatomaꞌ yonquicoꞌ noꞌtëquën natëcamaso marëꞌ. Yosë nanamënáchin imacasoꞌ yaꞌhuërin.

1 Corintios 14:36

Isontaꞌ yonquicoꞌ. Co canpitaꞌton Yosë nanamën nitotëramahuëꞌ. Naporahuaton, co canpitaráchin aꞌchintërainquëmahuëꞌ.

1 Corintios 14:38

Nisha aꞌchintohuachinënquëmaꞌ, ama natëtocosohuëꞌ, tënahuë.

1 Corintios 2:15

Ispirito Santo catahuahuachinpoaꞌ, noꞌtëquën yonquiarihuaꞌ. Aꞌnapitasoꞌ co canpoa pochin yonquipihuëꞌ. Co nitotatonaraihuëꞌ: “¿Onpoatomataꞌ ina pochin yonquiramaꞌ?” itërinënpoaꞌ.

1 Corintios 3:1

Yaꞌipi Yosë nanamën iyaroꞌsaꞌ yaaꞌchintopiranquëmahuëꞌ, co ipora nanitërahuëꞌ. Ispirito Santo cancanëma quëran huarëꞌ natëramaꞌ naporini, naꞌcon aꞌchinchitënquëmahuëꞌ. Co noyahuëꞌ yonquiramasopita co nanianchátëraramahuëꞌ. Quisocristo imapiramahuëꞌ, huaꞌhuishin pochin cancantëramaꞌ.

1 Corintios 7:25

Iporasoꞌ co saꞌarinsopitahuëꞌ, co soꞌyarinsopitahuëꞌ, inapita maꞌsona onpocasoꞌ shaꞌhuichinquëmaꞌ. Quisocristo isoroꞌpaquë nipon, co ina aꞌchinpirinhuëꞌ, catahuarinco noꞌtëquën pënënaꞌhuasoꞌ. Nosoroatonco, acorinco nanamën aꞌchinaꞌhuaso marëꞌ. Napoaton nanitëramaꞌ natëamacosoꞌ, tënahuë.

1 Corintios 7:40

Co huachi soꞌyantahuachinhuëꞌ, noya inantaꞌ. Noya noya cancantarin, topirahuëꞌ. Ispirito Santo catahuarinco noꞌtëquën pënëntaꞌhuasoꞌ tënahuë.

1 Corintios 8:2

Aꞌnaquënsoꞌ: “Yaꞌipi nitotërai” topirinahuëꞌ, naꞌcon pahuantarin noꞌtëquën yonquicaisoꞌ.

2 Corintios 10:12

Inapitasoꞌ co noꞌtëquën yonquipihuëꞌ. “Quiyasoꞌ noya noyacoi. Aꞌnapita quëran noya noya nitotërai,” toconpi. Co ina pochin nonacasohuëꞌ nipirinhuëꞌ, napopi. Inahua capini ninocanatonaꞌ, ninapotopi. Co quiyasoꞌ inapita pochin cancantëraihuëꞌ.

2 Corintios 10:7

Canpitasoꞌ yaꞌpirama quëran quënanamasoráchin yonquiramaꞌ. Co cancanëma quëran huarëꞌ yonquiramahuëꞌ. Aꞌnaquën “Quisocristo chachin imarai,” topachinara, isontaꞌ yonquiꞌinaꞌ. Quiyantaꞌ Quisocristo imarai mini.

2 Corintios 11:4

Quisocristo imacasoꞌ aꞌchintëranquëmaꞌ. Natëhuatamaꞌ, Ispirito Santo yaꞌcoancantërinquëmaꞌ. Inapitaso nipirinhuëꞌ nisha aꞌchintërinënquëmaꞌ. “Quisocristo nanamën chachin aꞌchintarainquëmaꞌ,” itopirinënquëmahuëꞌ, nisha nanan aꞌchintërinënquëmaꞌ. Nisha ispiritontaꞌ yaꞌhuërin, itërinënquëmaꞌ. Nisha nisha natëcasoꞌ aꞌchintohuachinquëmara, aꞌnaroáchin yaimaramaꞌ.

Gálatas 6:8

Inapochachin co noyahuëꞌ yonquirápatëhuaꞌ, co noyahuëꞌ nisarëhuaꞌ. Ina marëꞌ anaꞌintinpoasoꞌ yaꞌhuërin. Nipirinhuëꞌ, Ispirito Santo natëhuatëhuaꞌ, nani tahuëri catahuarinpoaꞌ noya cancantacaso marëꞌ. Ina quëran Yosëꞌpaꞌ noya nanpicontarihuaꞌ.

2 Pedro 3:2

Iráca noya pënëntonaꞌpiroꞌsaꞌ yaꞌhuëpi. Ninotonaꞌ, Yosë quiricanënquë ninshitopi, nani nontëramaꞌ. Naporahuaton, quiyantaꞌ Quisocristo pënënincoisoꞌ aꞌchintërainquëmaꞌ. Inasoꞌ nichaꞌësarinpoaꞌ. Caꞌtanoꞌsanënpitacoi chachin aꞌparincoi. Ama naniantacamaso marëhuëꞌ ninshitaranquëmaꞌ.

1 Juan 4:6

Quiyaso nipirinhuëꞌ Yosë nohuitatoi, noꞌtëquën aꞌchinai. Yosë imapisopita noya nataninacoi. Inasoꞌ noꞌtën nanan, topi. Co imapisopitasohuëꞌ nipirinhuëꞌ, co yanatërinacoihuëꞌ. Ispirito Santosoꞌ noꞌtëquënáchin nonin. Napoaton nonpin nanan paꞌyatopisopitasoꞌ co Ispirito Santo yanatëpihuëꞌ. Ina quëran nonpin nananoꞌsaꞌ nohuitërëhuaꞌ.

Judas 1:17

Canpitaso nipirinhuëꞌ iyaroꞌsaꞌ, noya yonquicoꞌ. Nosororanquëmaꞌ niꞌton, pënënaranquëmaꞌ. Quisocristo caꞌtanoꞌsanënpita shaꞌhuitërinpoasoꞌ ama naniantocosohuëꞌ.