1 Corintios 14:31 - Chayahuita (Shahui)

³¹ Inapoatomaꞌ, aꞌnaya aꞌnayanquëmaꞌ pënëntocoꞌ. Yaꞌipinquëmaꞌ noya noya yonquicamaso marëꞌ nipënëncoꞌ. Napohuatamaꞌ, canpita capini niachinicancanaramaꞌ.

1 Corintios 14:31 ပူးပေါင်းရင်းမြစ်များ

Proverbios 1:5

Yonquínahuan nipisopitasoꞌ, pënëinpoaso marëꞌ ninshitopisoꞌ, paꞌyatapona natanacaisoꞌ. Inapoatonaꞌ, yonqui yonquínahuanoꞌsa nicaponaꞌ.

Romanos 1:12

Canpitantaꞌ noya imapatamaꞌ, achinicancanaramaco cantaꞌ. Noya ninontatëhuaꞌ, noya noya cancantarihuaꞌ.

1 Corintios 14:19

Napoaponahuëꞌ, Yosë chinotacaso marëꞌ niyontonpatëhuaꞌ, aꞌchinacasoꞌ noya noya tënahuë. Nisha nananquë pochin nonato, shonca huaranca nanan nonahuë naporini, topinan quëran nointohuëꞌ. Canpoaꞌ nananquë cara nanaínchin tërantaꞌ nonpato, natanamaꞌ niꞌton, noya noya ninin, tënahuë.

1 Corintios 14:3

Napoaponahuëꞌ, Yosë nanamën shaꞌhuitohuatëhuasoꞌ, noya nataninënpoaꞌ. Ina yonquihuachinaꞌ, noya noya imasapi. Shaꞌhuitohuatëhuaꞌ, achinicancanarihuaꞌ. Sëtopirinahuëꞌ, natanatënënpoaꞌ, chiníquën cancantapi.

1 Corintios 14:30

Aꞌnantaꞌ inaquë huënsërinsoꞌ Yosëri nanan anitotohuachin, inantaꞌ shaꞌhuiin. Yashaꞌhuihuachin, yaꞌnan nonaꞌpi taꞌtaton, nataꞌin.

1 Corintios 14:32

Nipënënpatëhuaꞌ, aꞌnaya aꞌnayanpoaꞌ pënëntacasoꞌ yaꞌhuërin. Aꞌnaꞌton tonihuachin, aꞌnantaꞌ pënëntantaꞌin. Ina toniantahuachin, aꞌnantaꞌ pënëntantaꞌin.

1 Corintios 14:35

Maꞌsona yanitotohuachinaꞌ, pëinënaquë soꞌinaꞌ natainaꞌ. Yosë chinotacaso marëꞌ niyontonpatamaꞌ, sanapiꞌsasoꞌ co nonacaisoꞌ yaꞌhuërinhuëꞌ.

2 Corintios 1:4

Maꞌsona tërantaꞌ onpohuatëhuaꞌ, ina catahuarinpoaꞌ noya cancantacaso marëꞌ. Achinicancaninpoaꞌ niꞌton, canpoantaꞌ nanitarihuaꞌ aꞌnapita catahuacasoꞌ. Inapitantaꞌ maꞌsha onpohuachinaꞌ, achinicancanarihuaꞌ. Yosë catahuarinpoaso pochachin inapitantaꞌ catahuarihuaꞌ.

Efesios 6:22

Canpitataquë aꞌpaarahuë onpohuinsona yaꞌhuëraisoꞌ shaꞌhuitinquëmaso marëꞌ. Ina natanpatamaꞌ, chiníquën cancantaramaꞌ.

Colosenses 2:2

Yaꞌipinquëmaꞌ yonquiatënquëmaꞌ, Yosë nontárahuë. “Catahuaquëꞌ Sinioro chiníquën cancanchinaꞌ. Noya ninosoroꞌinaꞌ. Ina quëran aꞌna huëntoínchin pochin nisapi. Ma noyacha quëmasoꞌ yonquirancoi paya. Catahuaquëꞌ quëma nanamën noya yonquiꞌinaꞌ. Quisocristo chachin nohuichinaꞌ. Iracasoꞌ co piyapiꞌsari nohuitopirinahuëꞌ. Iporaso nipirinhuëꞌ anohuitërancoi. Ina nohuitatoi, tëhuënchachin noya cancantarai,” itërahuë, Yosë nontato.

1 Tesalonicenses 4:18

Inapita yonquiatomaꞌ, nishaꞌhuitocoꞌ noya cancantacaso marëꞌ. Ama sëtacaso marëhuëꞌ ina pochin niachinicancancoꞌ.

1 Tesalonicenses 5:11

Napoaton nani tahuëri nicatahuacoꞌ chiníquën cancantacamaso marëꞌ. Oꞌmantacasoꞌ tahuëri yonquiatomaꞌ, naꞌcon ninontocoꞌ noya noya imacamaso marëꞌ. Nani noya nicatahuaramaꞌ. Aquëtë chachin niachinicancancoꞌ.

1 Tesalonicenses 5:14

Canpita capini iyaroꞌsaꞌ nipënëncoꞌ. Aꞌnaquën co yasacatopihuëꞌ. Inapita pënëncoꞌ ama chiroinasohuëꞌ. Aꞌnaquën maꞌsha onpohuachinara, Yosë yananiantopi. Inapitantaꞌ noya nontocoꞌ chiníquën cancanchinaꞌ. Aꞌnaquëontaꞌ cancanëna quëran co chinipihuëꞌ. Catahuacoꞌ ama Yosë nanianchinasohuëꞌ. Inapohuatamaꞌ, ama insontaꞌ noꞌhuicosohuëꞌ. Sanoanan quëran pënëncoꞌ.

1 Tesalonicenses 5:20

“Yosë anitotërincoso shaꞌhuichinquëma,” itohuachinënquëmaꞌ, noya natancoꞌ.