1 Corintios 14:20 - Chayahuita (Shahui)

²⁰ Canpitasoꞌ iyaroꞌsaꞌ chinotonoꞌsa pochin yonquicoꞌ. Ama huaꞌhuaroꞌsa pochin yonquicosohuëꞌ. Napoaponahuëꞌ, huaꞌhuaroꞌsa pochin noyápiachin cancantatomaꞌ, noyasáchin nicoꞌ. Inapitasoꞌ co yonquiyatërapihuëꞌ oshahuanacaisoꞌ.

1 Corintios 14:20 ပူးပေါင်းရင်းမြစ်များ

Nehemías 4:13

Napotohuachinacoira, sacatoroꞌsa quëmopinënpitarë chachin yapo yaporia paira nininquë acoraꞌpiarahuë. Sahuëninënaꞌ, nansanënaꞌ, pëꞌchinanënaꞌ, inapitarë chachin acoraꞌpiarahuë. Yaꞌcoanaroꞌsaquëntaꞌ, inapotëraꞌpiarahuë.

Salmos 119:99

Aꞌchintërinacosopita quëran naꞌcon naꞌcon nitotërahuë ninatanahuë. Camaitëransopita naꞌcon yonquirápato naporahuë.

Isaías 11:3

Co papinanquë piyapiꞌsa maꞌsona onpotacasoꞌ shaꞌhuiponhuëꞌ. Co nanan natëtaton piyapiꞌsa maꞌsona onpotacasoꞌ shaꞌhuiponhuëꞌ.

Mateo 11:25

Naporoꞌ noya cancantaton, Yosë nontërin: “¡Ma noyacha Tata yonquiran paya! Quëmasoꞌ chini chiníquën nanantëran. Inápaquë yaꞌhuërinsopita, isoroꞌpaquë yaꞌhuërinsopita, yaꞌipiya huaꞌanëntëran. Aꞌnaquën Tata nani maꞌsha nitotaponaraihuëꞌ: ‘Quiyaora noya noya nitotarai,’ topiso marëꞌ, co nanamën anitotëranhuëꞌ. Imarinacosopitaso nipirinhuëꞌ, co onpopinchin nitotaponaraihuëꞌ: ‘Catahuaco Sinioro co caora nanitërahuëꞌ,’ topachinara, quëma nanamën chachin anitotëran. Ina marë: ‘Yosparinquën,’ itëranquën.

Mateo 18:3

—Natanco iyaroꞌsaꞌ piꞌpian aꞌchinchinquëmaꞌ. Co noꞌtëquën yonquiyátëraramahuëꞌ. Huaꞌhuasharoꞌsaꞌ yonquicoꞌ. Co chiníquën nanan nohuantopihuëꞌ. Co aꞌnapita nocanpihuëꞌ. Co inapita pochin cancantohuatamahuëꞌ, co onporontaꞌ Yosë huaꞌanëntërinquë yaꞌconaramahuëꞌ.

Mateo 19:14

Quisososo nipirinhuëꞌ tënin: —Tananpitocoꞌ huaꞌhuaroꞌsantaꞌ huëꞌinaꞌ. Ama aꞌpacosohuëꞌ. Huaꞌhuaroꞌsaꞌ aꞌnaroáchin yaimarinaco. Inapita pochin cancantohuatamaꞌ, Yosë huaꞌanëntërinquë yaꞌconaramaꞌ, itahuaton,

Mateo 19:4

—¿Maꞌtaꞌ Yosë quiricanën quëran shaꞌhuitërinpoaꞌ? Iráca yaꞌnan piyapi nipon, catoíchin Yosëri ninin. Aꞌna quëmapi, aꞌna sanapi, inaíchin ninin.

Marcos 10:15

Tëhuënchachin carinquëmaꞌ itaranquëmaꞌ, huaꞌhuaroꞌsaꞌ aꞌnaroáchin yaimarinaco. Coꞌsoꞌ inapita pochin cancantohuatamahuëꞌ, co onporontaꞌ Yosë huaꞌanëntërinquë yaꞌconaramahuëꞌ, itërin.

Lucas 18:17

Tëhuënchachin itëranquëmaꞌ. Huaꞌhuaroꞌsaꞌ aꞌnaroáchin yaimarinaco. Coꞌsoꞌ inapita pochin cancantohuatamahuëꞌ, co Yosë huaꞌanëntërinquë yaꞌconaramahuëꞌ, itërin.

Romanos 1:13

Tëhuënchachin iyaroꞌsaꞌ, iráca quëran huarëꞌ nicapënquëmaꞌ yapaꞌpirahuëꞌ. Ipora huantaꞌ co nanitërahuëꞌ pacaꞌhuasoꞌ. Nisha nisha parti aꞌchinpatëra, piyapiꞌsaꞌ natëtonaꞌ, Quisocristo imasapi. Canpitantaꞌ yaaꞌchintëranquëmaꞌ noya noya imacamaso marëꞌ.

Romanos 16:19

Canpitaso nipirinhuëꞌ noya natëramaꞌ niꞌton, yaꞌipi piyapiꞌsaꞌ natantopi. Ina marëꞌ noya cancantërahuë. Naꞌcon yonquicoꞌ noya nicacamaso marëꞌ. Ama oshahuanamaso marëꞌ yonquicosohuëꞌ.

1 Corintios 13:11

Iráca huaꞌhuatarihuaꞌ, huaꞌhuasha pochin nonëhuaꞌ, huaꞌhuasha pochin yonquirëhuaꞌ. Iporaso nipirinhuëꞌ nani mashotërëhuaꞌ. Co huachi huaꞌhuasha pochin nonëhuahuëꞌ. Co huachi huaꞌhuasha pochin ninëhuahuëꞌ.

1 Corintios 14:19

Napoaponahuëꞌ, Yosë chinotacaso marëꞌ niyontonpatëhuaꞌ, aꞌchinacasoꞌ noya noya tënahuë. Nisha nananquë pochin nonato, shonca huaranca nanan nonahuë naporini, topinan quëran nointohuëꞌ. Canpoaꞌ nananquë cara nanaínchin tërantaꞌ nonpato, natanamaꞌ niꞌton, noya noya ninin, tënahuë.

1 Corintios 2:6

Napoaponahuëꞌ, chinoton pochin cancantopisopita aꞌchintohuatoi, yaꞌipi Yosë yonquirinpoasoꞌ aꞌchintërai. Co piyapiꞌsaꞌ yonquipisoꞌ aꞌchinaihuëꞌ. Co huaꞌanoꞌsaꞌ yonquipiso tëranta aꞌchinaihuëꞌ. Inapitasoꞌ inahuara yonquipisoáchin yonquiatonaꞌ, co Yosë pochin yonquipihuëꞌ niꞌton, taꞌhuantapi.

Efesios 4:13

Inapohuatëhuaꞌ, yaꞌipinpoaꞌ imarëhuasopita napopináchin yonquiarihuaꞌ. Yosë huiꞌnin chachin nóya nohuitarihuaꞌ. Ina quëran noya noya cancantarihuaꞌ. Soꞌsorëso pochin oshaquëran Quisocristo pochachin cancantacasoꞌ yaꞌhuërin.

Filipenses 1:9

Canpita marëꞌ ina nontërahuë. “Catahuaquëꞌ, Sinioro, noya noya ninosoroꞌinaꞌ. Quëma nohuanton, nanamën nóya nitochinaꞌ. Catahuaquëꞌ, Sinioro, noꞌtëquën yonquiꞌinaꞌ,” itërahuë Yosë nontato.

Filipenses 3:15

Yaꞌipi Yosë imarëhuasopita chinoton pochin cancantohuatëhuaꞌ, ina pochin yonquiarëhuaꞌ. Nisha yonquihuatëhuaꞌ, Yosë anitotarinpoaꞌ. “Catahuaco noꞌtëquën yonquiꞌi,” itohuatëhuaꞌ, anitotarinpoaꞌ.

1 Pedro 2:2

Yosë huëntonënquë yaꞌconpatëhuaꞌ, huaꞌhuasha nasha huaipiso pochin ninëhuaꞌ. Niꞌcoꞌ. Canopiaꞌhuaya shoꞌsho apira apira nayarin. Shoꞌshotaton, noya chinirarin. Inapochachin canpitantaꞌ Yosë noninso chachin naꞌcon naꞌcon nohuantocoꞌ. Ina yonquihuatamaꞌ, oshaquëran noya noya nisaramaꞌ. Chiníquën cancantatomaꞌ, noya chaꞌësaramaꞌ. Yosë nanamënáchin achinicancaninpoaꞌ.

2 Pedro 3:18

Canpitaso nipirinhuëꞌ, Sinioro Quisocristoíchin yonquicoꞌ. Inaora nohuanton, nosororinquëmaꞌ niꞌton, nani tahuëri yacatahuarinquëmaꞌ. Inasáchin yonquihuatamaꞌ, oshaquëran noya noya nohuitaramaꞌ. Inasoꞌ nichaꞌësarinpoaꞌ. Yaꞌipi piyapiꞌsari chinochinaꞌ. Ayaroꞌ tahuëriquë huarëꞌ inasáchin yonquiaꞌahuaꞌ. Amen. Nani ninshitëranquëma huachi. Pitro