1 Corintios 13:13 - Chayahuita (Shahui)

¹³ Cancanënpoa quëran huarëꞌ Yosë natëcasoꞌ yaꞌhuërin. “Co onporontaꞌ nonpintarinpoahuëꞌ,” taꞌtëhuaꞌ, inasáchin ninacasoꞌ yaꞌhuërin. Ninosorocasontaꞌ yaꞌhuërin. Yosësoꞌ naꞌcon naꞌcon nohuantërin ninosorocasoꞌ.

1 Corintios 13:13 ပူးပေါင်းရင်းမြစ်များ

Salmos 42:11

Parisitapirahuëꞌ, ¡ama huachi sëchisohuëꞌ! ¡Ama huachi napoin ancanchisohuëꞌ! Sinioro catahuaantaponco. Ina nohuanton noya chinotaantapo. Inasáchin Yosënëhuë niꞌton, nichaꞌësarinco.

Salmos 43:5

Parisitápirahuëꞌ, ¡ama huachi sëchisohuëꞌ! ¡Ama huachi napion ancanchisohuëꞌ! Sinioro catahuaantaponco. Ina nohuanton noya chinotaantapo. Inasáchin Yosënëhuë niꞌton, nichaꞌësarinco.

Lucas 10:27

—“Tata Yosë huaꞌanëntërinpoaꞌ. Ina nosorocoꞌ. Yaꞌipi cancanëma quëran, yaꞌipi huaꞌyanëma quëran, yaꞌipi chinirama quëran, yaꞌipi yonquinëma quëran, yaꞌipi inaquëranpita nosoromiatocoꞌ. Isontaꞌ Yosë nohuantërin: Quëmaora ninosororanso pochachin aꞌnapitantaꞌ nosorocoꞌ,” tënin, itërin.

Lucas 22:32

Caso nipirinhuëꞌ iyasha, nani Yosë nontërahuë ama aꞌpoancoso marëhuëꞌ. Napoaton co naniantomiatarancohuëꞌ. Noya imaantahuatanco, iyanpita achinicancanquëꞌ, itërin.

Romanos 15:13

Yosëíchin tëhuënchachin catahuarinpoaꞌ chiníquën cancantacasoꞌ. Canpitantaꞌ catahuainquëmaꞌ nóya cancantacamaso marëꞌ. Asanocancainquëmaꞌ. Inasáchin yonquihuatamaꞌ, catahuarinquëmaꞌ. Ispirito Santo yaꞌipi nanitaparin. Catahuahuachinquëmaꞌ, chini chiníquën cancantatomaꞌ, noya ninaramaꞌ.

1 Corintios 14:1

Napoaton iyaroꞌsaꞌ, noya ninosorocoꞌ. Ina quëran Yosë nontocoꞌ Ispirito Santo catahuainquëmaꞌ maꞌsona nohuantërinsoꞌ nicacamasoꞌ. Yosë nanamën shaꞌhuicasoꞌ naꞌcon naꞌcon nohuantocoꞌ.

1 Corintios 16:14

Maꞌsona tërantaꞌ nipatamaꞌ, noya ninosoroatomaꞌ, nicoꞌ.

1 Corintios 3:14

Noya nipatëhuaꞌ, tachiton quëran pëirinso pochin nisarëhuaꞌ. Inasoꞌ co huiquitërinhuëꞌ niꞌton, Yosë noya niꞌsarinpoaꞌ. Aꞌnapita catahuarëhuaꞌ noya imacaiso marëꞌ. Napoaton inápaquë acanaarinpoaꞌ.

1 Corintios 8:1

Aꞌnaquën maꞌsha tëparahuatonaꞌ, nosha acopi mamanshi chinotacaiso marëꞌ. “¿Noya ipora ina nosha paꞌanatëꞌ capacasoꞌ ti?” itëramaco niꞌton, shaꞌhuichinquëmaꞌ. Tëhuënchachin iyaroꞌsaꞌ co mamanshisoꞌ nanpirinhuëꞌ, nitotërëhuaꞌ. Nani naꞌcon nitotarihuarahuëꞌ, co aꞌnapita nosorohuatëhuahuëꞌ, topinan quëran nitotatëhuaꞌ, ninocanarihuaꞌ. Nipirinhuëꞌ, piyapi nosorohuatëhuaꞌ, catahuarëhuaꞌ noya noya Yosë imacaiso marëꞌ.

1 Corintios 8:3

Napoaponahuëꞌ, Yosë nosorohuatëhuaꞌ, ina pochin cancantarihuaꞌ. Ina quëran Yosë nohuitatonpoaꞌ, noya niꞌsarinpoaꞌ.

2 Corintios 5:10

Aꞌna tahuëri Quisocristo oꞌmantahuachin, yaꞌipinpoaꞌ coisë pochin shaꞌhuitarinpoaꞌ. Yaꞌipi ninëhuasopita yonquiaton, aꞌnaya aꞌnayanpoaꞌ noꞌtëquën nontarinpoaꞌ. Co noya nipatëhuahuëꞌ, co Yosëꞌpaꞌ acanaarinpoahuëꞌ. Noya nipatëhuaꞌ, acanaarinpoa huachi.

2 Corintios 5:15

Tëhuënchachin canpoa marëꞌ chiminin noya noya cancantacaso marëꞌ. Co huachi canpoara costarëhuasoꞌ paꞌyatacasoꞌ yaꞌhuërinhuëꞌ. Inasáchin yonquicaso marëꞌ chiminin. Chiminaponahuëꞌ, nanpiantarin niꞌton, inasáchin yonquirëhuaꞌ.

Gálatas 5:6

Quisocristo imapatëhuaꞌ, co marca yonquiarihuahuëꞌ. Aꞌnaquënsoꞌ nani niacotopi. Aꞌnaquënso nipirinhuëꞌ co niacotopihuëꞌ. Co ina yonquicasoꞌ yaꞌhuërinhuëꞌ. Cancanënpoa quëran huarëꞌ imacasoꞌ yaꞌhuërin. “Quisocristo catahuarinpoaꞌ. Co nonpintarinpoahuëꞌ,” taꞌtëhuaꞌ, yaꞌipi cancanënpoa quëran natëahuaꞌ. Ina natëhuatëhuaꞌ, catahuarinpoaꞌ nóya ninosorocasoꞌ. Ina pochin cancantohuatëhuaꞌ, Yosë noya niꞌsarinpoaꞌ.

Filipenses 1:9

Canpita marëꞌ ina nontërahuë. “Catahuaquëꞌ, Sinioro, noya noya ninosoroꞌinaꞌ. Quëma nohuanton, nanamën nóya nitochinaꞌ. Catahuaquëꞌ, Sinioro, noꞌtëquën yonquiꞌinaꞌ,” itërahuë Yosë nontato.

Colosenses 1:27

“Quisocristo chachin ayaꞌcoancantaranquëmaꞌ,” itërinpoaꞌ. Canpitantaꞌ nisha piyapinquëmaꞌ nipiramahuëꞌ, yaꞌcoancantërinquëmaꞌ. Yaꞌipinpoaꞌ yaꞌcoancantërinpoaꞌ niꞌton, aꞌna tahuëri Yosëꞌpaꞌ noya noya yaꞌhuëcontarihuaꞌ. Iráca co mantaꞌ ina nitotopirinahuëꞌ, nani anitotërinpoa huachi. Quisocristo nohuitatëhuaꞌ, ina ninarëhuaꞌ. Ma noyacha Tata Yosësoꞌ yonquirinpoa paya, tënëhuaꞌ.

Colosenses 1:5

Iráca noya nanan natanamaꞌ. “Oshanënpoaꞌ inquitatonpoaꞌ, Quisocristo anoyacancantërinpoaꞌ,” itohuachinënquëmaꞌ, noꞌtëquën aꞌchintërinënquëmaꞌ. Aꞌchintohuachinënquëmaꞌ, natëramaꞌ. “Aꞌna tahuëri Yosëꞌpaꞌ noya ananpitaantarinpoaꞌ,” taꞌtomaꞌ, Quisocristo imaramaꞌ. Ina imatomaꞌ, ina tahuëri ninaramaꞌ.

Colosenses 3:14

Nóya ninosorocoꞌ. Ina naꞌcon naꞌcon Yosë nohuantërin. Noya ninosorohuatëhuaꞌ, noya noya nisarëhuaꞌ. Inapohuatëhuaꞌ, tëhuënchachin nóya cancantarihuaꞌ.

1 Tesalonicenses 5:8

Canpoaso nipirinhuëꞌ tahuëri pochin cancantacasoꞌ yaꞌhuërin. Napoaton noya yonquiatëhuaꞌ, Yosë imamiatahuaꞌ. Niꞌcoꞌ iyaroꞌsaꞌ. Inimicoroꞌsaꞌ huëꞌpachinara, sontaroꞌsaꞌ co topinan paꞌpihuëꞌ. Coton huaꞌna quëran nininsoꞌ aꞌmopi. Cascontaꞌ huaꞌna quëran nininsoꞌ yancopi ama inimicori ohuanacaso marëhuëꞌ. Noya nitapahuachinara, co inimicori minsërinhuëꞌ. Huaꞌna aꞌmopiso pochin canpoantaꞌ Yosë natëahuaꞌ catahuainpoaꞌ. Ina natëtëhuaꞌ, noya ninosoroaꞌahuaꞌ. “Yosë aꞌpaiarinpoaꞌ. Oꞌmahuachin, noyá nichaꞌësarinpoaꞌ,” taꞌtëhuaꞌ noya ninahuaꞌ.

1 Timoteo 1:5

Noꞌtën nanansáchin imapatëhuaꞌ, catahuarinpoaꞌ noya ninosorocasoꞌ. Noyápiachin cancantohuatëhuaꞌ, co nisha nisha yonquiarihuahuëꞌ. Ina quëran cancanënpoa quëran huarëꞌ natëarihuaꞌ. Ina pochin cancantohuatëhuaꞌ, noya nosoroarihuaꞌ. Ina Yosësoꞌ nohuantërin.

2 Timoteo 1:7

Yosë co nohuantërinhuëꞌ tëꞌhuacasoꞌ. Ispirito Santo chachin achinicancaninpoaꞌ sopai minsëcaso marëꞌ. Inasáchin ananitërinpoaꞌ piyapiꞌsaꞌ nosorocasoꞌ. Catahuarinpoaꞌ cancanënpoa quëran noꞌtëquën yonquicasoꞌ.

Hebreos 10:35

Yaꞌnan imapomaꞌ, noya imaramaꞌ. Ama iporasoꞌ yaaꞌpocosohuëꞌ. “Yosë naniantërinco,” ama tocosohuëꞌ. Chiníquën cancantocoꞌ Yosë nóya acanainquëmaꞌ.

Hebreos 10:39

Insosona aꞌpohuachinaꞌ, parisitopiquë paꞌsapi. Canpoaso nipirinhuëꞌ, co aꞌpoarihuahuëꞌ. Natërëhuaꞌ niꞌton, nichaꞌësarinpoa huachi.

Hebreos 6:11

Chiníquën cancantatomaꞌ, yaꞌipinquëmaꞌ imamiatocoꞌ. “Yosë co naniantarinpoahuëꞌ. Aꞌna tahuëri yaꞌhuërinꞌpaꞌ quëpantarinpoaꞌ,” taꞌtomaꞌ, chiminaquë huarëꞌ nóya imacoꞌ.

Hebreos 6:19

Niꞌcoꞌ. Nanchaquë paꞌpachinara, aꞌna tahuëri panca ihuan nacapipi. Chiníquën coꞌsacaitërin. Naporoꞌ huaꞌna quëquën nininsoꞌ aꞌsonahuatonaꞌ, tëꞌyaitopi. Acopoiꞌ noꞌpaquë niꞌtoromahuachina, sano yanponin. Co coꞌsacairi tërantaꞌ chiꞌhuincarinhuëꞌ. Inapochachin canpoantaꞌ aꞌna tahuëri maꞌsha onporëhuaꞌ, parisitërëhuaꞌ, sëtërëhuaꞌ, naporëhuaꞌ. Inapohuatëhuaꞌ, Yosë yonquiaꞌahuaꞌ. “Inasoꞌ noꞌtëquën nontërinpoaꞌ. Nichaꞌësarinpoaꞌ. Co onporontaꞌ naniantarinpoahuëꞌ,” topatëhuaꞌ, sano cancantarihuaꞌ. Yosësoꞌ co quënanarihuarahuëꞌ, inápaquë yaꞌhuárin. Ina yonquiatëhuaꞌ, ninarëhuaꞌ.

1 Pedro 1:21

Quisocristo anoyacancantërinquëmaꞌ niꞌton, Yosë nohuitatomaꞌ, natëramaꞌ: “Tëhuënchachin catahuarinpoaꞌ,” tënamaꞌ. Quisocristo chiminaponahuëꞌ, Yosëri ananpitaantarin. Inápaquë quëpantarahuaton, chiníquën nanan quëtërin. Napoaton Yosëíchin imaramaꞌ. “Canpoantaꞌ ananpitaantarinpoaꞌ,” taꞌtomaꞌ, ninaramaꞌ.

1 Juan 2:10

Imaramasopita capini ninosorohuatamaꞌ, tahuëri pochin cancantaramaꞌ. Ina pochin nipatamaꞌ, noꞌtëquën imaramaꞌ.

1 Juan 2:14

Yaꞌipi imaramasopita huiꞌnahuëpita pochin niꞌnanquëmaꞌ. Yosë nohuitëramaꞌ niꞌton, ninshitaranquëmaꞌ noya noya cancantacamaso marëꞌ. Quisocristo noya nohuitëramaꞌ niꞌton, iyaroꞌsaꞌ, ninshitaranquëmaꞌ. Inasoꞌ iráca quëran huarëꞌ yaꞌhuërin. Nani tahuëri, apiaꞌhuaroꞌsaꞌ, Yosë nanamën yonquiaramaꞌ. Napoaton chiníquën cancantaramaꞌ. Chiníquën cancantatomaꞌ, sopai nani minsëramaꞌ.

1 Juan 2:24

Yaꞌnan imapomaꞌ, noꞌtëquën aꞌchintërainquëmaꞌ. Ina chachin imamiatocoꞌ. Ina imapatamaꞌ, cancanëma quëran Tata Yosë nohuitaramaꞌ. Huiꞌniontaꞌ noya nohuitarama huachi.

1 Juan 3:3

“Aꞌna tahuëri Quisocristo niꞌsarëhuaꞌ,” taꞌtëhuaꞌ, co noyahuëꞌ yonquirëhuasopita naniantarëhuaꞌ. Quisocristosoꞌ noyápiachin cancantërin niꞌton, canpoantaꞌ noyápiachin cancantacasoꞌ nohuantarihuaꞌ.

1 Juan 3:9

Huëntonënquë chachin Yosë ayaꞌconinpoaꞌ niꞌton, co iporasoꞌ paꞌyatarëhuahuëꞌ oshahuanacasoꞌ. Huiꞌnin pochachin cancantatonpoaꞌ, yonquinën chachin quëtërinpoaꞌ. Nasitantarëhuaso pochin ninëhuaꞌ. Napoaton co huachi nohuantarihuahuëꞌ oshahuanacasoꞌ.