1 Corintios 12:9 - Chayahuita (Shahui)

⁹ Aꞌnaquëontaꞌ catahuarin chiníquën Yosë natëcaso marëꞌ. “Yosë yaꞌipiya nanitaparin,” taꞌton ina nontërin. Nontohuachina, Yosëri naꞌcon catahuarin. Aꞌnantaꞌ Ispirito Santori catahuarin caniaꞌpiroꞌsaꞌ anoyatacaso marëꞌ.

1 Corintios 12:9 ပူးပေါင်းရင်းမြစ်များ

Mateo 10:8

Caniaꞌpiroꞌsaꞌ aꞌnaroáchin anoyatocoꞌ. Chimipiroꞌsantaꞌ, ananpitaantacoꞌ. Chana caniori maninsontaꞌ quënanpatamaꞌ, anoyatocoꞌ. Aꞌnapitantaꞌ sopairoꞌsari yaꞌcoancantopi niꞌton, paꞌpi huaꞌyantopi. Quënanpatamaꞌ, sopairoꞌsaꞌ aꞌpatocoꞌ piyapiꞌsaꞌ noyachinaꞌ. Co mantaꞌ pahuërëtapomarahuëꞌ, Yosësoꞌ inaora nohuanton, catahuarinquëmaꞌ niꞌton, ama pahuërë nitocosohuëꞌ.

Mateo 21:21

—Tëhuënchachin Yosë yaꞌipi nanitaparin. Ina nontohuatamaꞌ, yaꞌipi cancanëma quëran natëcoꞌ. “Co Yosë catahuarincohuëꞌ,” ama tocosohuëꞌ. Yaꞌipi cancanëma quëran ina natëhuatamaꞌ, sacaiꞌ nininsoꞌ nanitaparamaꞌ canpitantaꞌ. “Yosë nohuanton, iso motopi nichiꞌhuincarahuaton marëquë niichin” tënamaꞌ naporini, ina nohuanton, inapoꞌitonhuëꞌ.

Marcos 16:18

Yaꞌhuan mapatamaꞌ, co mantaꞌ onpotarinquëmahuëꞌ. Sonimaontaꞌ nipirinhuëꞌ oꞌopatamaꞌ, co chiminaramahuëꞌ. Caniaꞌpiroꞌsaꞌ topinan sëꞌhuahuatamaꞌ, noyataponaꞌ,” itërin Quisosori.

Marcos 6:13

Naporahuatonaꞌ, naꞌa piyapiꞌsaꞌ sopairoꞌsari yaꞌcoancantërinso inquitopi. Naꞌa caniaꞌpiroꞌsantaꞌ tomaquë pashitatonaꞌ, anoyatopi.

Lucas 10:9

Caniaꞌpiroꞌsaꞌ inaquë yaꞌhuëhuachinaꞌ, anoyatocoꞌ. ‘Iso tahuëriꞌsaꞌ Yosë yahuaꞌanëntarinquëmaꞌ,’ itocoꞌ.

Lucas 9:2

“Paatomaꞌ iyaroꞌsaꞌ, piyapiꞌsaꞌ aꞌchintoncoꞌ. ‘Yosë yahuaꞌanëntarinquëmaꞌ. Huëntonënquë yaꞌconpatamaꞌ, noya catahuarinquëmaꞌ,’ itocoꞌ. Caniaꞌpiroꞌsantaꞌ anoyatocoꞌ. Carinquëma catahuaranquëmaꞌ anoyatacamaso marëꞌ,” itërin.

Hechos 10:38

Ina piquëran Yosëri chachin Quisocristo acorin, Nasaritoquë yaꞌhuërinsoꞌ. Yosë nohuanton, Ispirito Santori noyá yaꞌcoancantërin. Napoaton nani maꞌsha nanitaparin nicacasoꞌ. Nisha nisha parti paaton, nóya ninin. Naꞌa caniaꞌpiroꞌsaꞌ aꞌnaroáchin anoyatërin. Aꞌnaquën sopairi yaꞌcoancantërin niꞌton, chiníquën parisitopirinahuëꞌ, inari anoyatërin. Yosëri catahuarin niꞌton, aꞌnaroáchin anoyatërin.

Hechos 5:15

“Quisosori catahuarin niꞌton, caꞌtanoꞌsaꞌ nani maꞌsha nanitapapi,” taꞌtonaꞌ, naꞌa caniaꞌpiroꞌsaꞌ quëntarahuatonaꞌ, cachiquë acoonpi anoyatacaiso marëꞌ. Aꞌnaquën nantëtërë chachin acoonpi. Aꞌnaquëontaꞌ sahuanasaquë tërantaꞌ aquëhuënpi. “Pitro paꞌpachin, huaꞌyanën tërantaꞌ tashinantohuachin, noyatapon nimara,” taꞌtonaꞌ, quëntapi.

1 Corintios 12:28

Yosë nisha nisha acorinpoaꞌ imarëhuasopita capini nicatahuacaso marëꞌ. Quisocristo isoroꞌpaquë nipon, aꞌnaquën acorin paatonaꞌ nanamën aꞌchinacaiso marëꞌ. Inapitaꞌton Yosëri acorin. Ina quëran aꞌnapitantaꞌ acorin pënëntacaiso marëꞌ. Naporahuaton, aꞌnaquëontaꞌ acorin Quisocristo nanamën aꞌchinacaiso marëꞌ. Yosë nohuanton, aꞌnaquën sacaiꞌ nininsoꞌ nanitaparin. Aꞌnaquën acorin caniaꞌpiroꞌsaꞌ anoyatacaso marëꞌ. Aꞌnaquën acorin aꞌnapita catahuacaso marëꞌ. Aꞌnaquën acorin huaꞌan pochin nicacaso marëꞌ. Aꞌnaquën Yosë nohuanton, nisha nananquë nonpiso pochin nonin.

1 Corintios 12:30

Co yaꞌipinpoaꞌ ananitërinpoahuëꞌ caniaꞌpiroꞌsaꞌ anoyatacasoꞌ. Co yaꞌipinpoaꞌ nisha nananquë nonëhuahuëꞌ. Nisha nanan natanpatëhuara, co yaꞌipinpoaꞌ nanitërëhuahuëꞌ maꞌsona tëninsoꞌ shaꞌhuicasoꞌ. Co yaꞌipinpoaꞌ inachachin nicacasoꞌ acorinpoahuëꞌ. Ispirito Santo nohuanton, nisha nisha ninëhuaꞌ.

1 Corintios 13:2

Aꞌnaquënpoaꞌ Yosë yonquirinso chachin nitotatëhuaꞌ, shaꞌhuitarëhuaꞌ. Yaꞌipi nitotarihuarahuëꞌ, co piyapiꞌsaꞌ nosorohuatëhuahuëꞌ, topinan quëran nitotarihuaꞌ, co Yosë noya niꞌsarinpoahuëꞌ. Yosë chiníquën natëtëhuaꞌ, nontohuatëhuaꞌ, motopi chiꞌhuincacaso pochin nanitapapirëhuahuëꞌ, co piyapiꞌsaꞌ nosorohuatëhuahuëꞌ, topinan quëran natërëhuaꞌ, co Yosë noya niꞌsarinpoahuëꞌ.

2 Corintios 4:13

Yosë quiricanënquë ninshitopi. “Yosë natërahuë niꞌton, shaꞌhuirahuë,” tënin. Quiyantaꞌ inapochachin cancantërai. “Yosë catahuarincoi,” taꞌtoi, nanamën aꞌchinarai.

Efesios 2:8

Nosoroatonpoaꞌ, inaora nohuanton nichaꞌërinpoaꞌ. “Quisocristoíchin anoyacancantërinpoaꞌ,” topatëhuaꞌ, oshanënpoaꞌ inquitatonpoaꞌ, nichaꞌërinpoaꞌ. Co canpoara nanitërëhuahuëꞌ Yosë imacasoꞌ. Ina catahuarinpoaꞌ cancanënpoa quëran natëcasoꞌ.

Hebreos 11:33

Aꞌnaquën Yosë natëtonaꞌ, nisha nisha piyapiroꞌsaꞌ minsëpi. Aꞌnaquëontaꞌ huaꞌan yaꞌconatonaꞌ, noꞌtëquën huaꞌanëntopi. “Yosë shaꞌhuitërinpoaꞌ niꞌton, catahuarinpoaꞌ,” taꞌtonaꞌ, aꞌnaquën natëpi. Napoaton Yosëri catahuarin. Aꞌnaquënsoꞌ Yosë natëtonaꞌ, paꞌpiniꞌ quëran chaꞌëpi.