1 Corintios 12:12 - Chayahuita (Shahui)

¹² Nonënpoaꞌ aꞌnaíchin nipirinhuëꞌ, nisha nisha yaꞌhuëtërin. Yaꞌpiranpoaꞌ, nantënpoaꞌ, imiranpoaꞌ, inapita yaꞌhuëtërinpoaꞌ. Inapochachin Quisocristo imarëhuasopita nisha nisha nirihuarahuëꞌ, aꞌna huëntoínchin ninëhuaꞌ. Nonën pochin Quisocristo niꞌninpoaꞌ.

1 Corintios 12:12 ပူးပေါင်းရင်းမြစ်များ

1 Corintios 10:17

Quisocristo yonquiatëhuaꞌ, ina cosharoꞌ caꞌnëhuaꞌ. Naꞌaquënpoaꞌ nirihuarahuëꞌ, Quisocristo imarëhuaꞌ niꞌton, aꞌna huëntona pochin ninëhuaꞌ. Napopináchin yonquirëhuaꞌ.

1 Corintios 12:20

Nisha nisha yaꞌhuëtopirinpoahuëꞌ, aꞌnaíchin nonënpoaꞌ yaꞌhuërin.

1 Corintios 12:27

Canpoantaꞌ imarëhuaꞌ niꞌton, aꞌna huëntoínchin ninëhuaꞌ. Nonën pochin Quisocristo niꞌninpoaꞌ. Aꞌnaya aꞌnayanpoaꞌ nohuantërinpoaꞌ.

1 Corintios 12:7

Co canpoara nanitopirëhuahuëꞌ, Ispirito Santo ananitërinpoaꞌ maꞌsona ina nohuantërinsoꞌ nicacasoꞌ. Catahuarinpoaꞌ niꞌton, aꞌnapitantaꞌ catahuarihuaꞌ noya noya imacaiso marëꞌ.

Gálatas 3:16

Inapochachin iráca Yosëri nontaton, Apraan shaꞌhuitërin: “Caora nohuanto, nóya catahuaranquën. Quëma shipariontaꞌ catahuarahuë yaꞌipi piyapiꞌsaꞌ anoyacancantacaso marëꞌ,” itërin. Aꞌnaíchin shiin yonquiaton, naporin. Quisocristo ninoton, napotërin.

Efesios 1:23

Inaora nonën pochin niꞌninpoaꞌ. Napoaton naꞌcon yonquirinpoaꞌ. Nani yaꞌcoancantërinpoaꞌ noya noya imacaso marëꞌ. Noyá yaꞌcoancantohuachinpoaꞌ, yaꞌipi cancanënpoa quëran ina yonquiarihuaꞌ. Ina marëꞌ nininpoaꞌ. Inasoꞌ yaꞌipiya huaꞌanëntarin.

Efesios 4:12

Nisha nisha acorinpoaꞌ noya nicatahuacaso marëꞌ. Inaora nonën pochin niꞌninpoaꞌ niꞌton, yaꞌipi imarëhuasopita catahuarinpoaꞌ noya ina marëꞌ sacatacasoꞌ.

Efesios 4:4

Quisocristo imapatëhuaꞌ, yaꞌipinpoaꞌ aꞌna huëntoínchin pochin ninëhuaꞌ. Aꞌnaíchin Ispirito Santo yaꞌhuërinsoꞌ yaꞌcoancantërinpoaꞌ. Imarëhuasopita nichaꞌësarinpoaꞌ yaꞌhuërinquë chachin quëpantaꞌinpoaso marëꞌ. Inasáchin ninarëhuaꞌ.

Efesios 5:23

Imarëhuasopitasoꞌ Quisocristo nonën pochin ninëhuaꞌ. Inasoꞌ huaꞌanënpoaꞌ niꞌton, camairinpoaꞌ. Yaꞌipi imarëhuasopita nichaꞌësarinpoaꞌ. Napoaton inasáchin natëcasoꞌ yaꞌhuërin. Inapochachin quëmapiꞌsaꞌ saꞌina quëran chini chiníquën nanantërin. Napoaton sanapiꞌsaꞌ soꞌinaꞌ natëinaꞌ.

Efesios 5:30

Imarëhuasopitasoꞌ inaora nonën pochin niꞌninpoaꞌ niꞌton, aꞌnaya aꞌnayanpoaꞌ nosororinpoaꞌ.

Colosenses 1:18

Yaꞌipi imarëhuasopita aꞌna huënton pochin ninëhuaꞌ. Inaora nonën pochachin Quisocristo niꞌninpoaꞌ. Inasoꞌ motënpoa pochin nicaton, huaꞌanëntërinpoaꞌ. Inaꞌton chiminaponahuëꞌ, nanpiantarin. Napoaton yaꞌipinpoaꞌ inasáchin natëcasoꞌ yaꞌhuërin huachi.

Colosenses 1:24

Imarëhuasopita marëꞌ Quisocristo chiníquën parisitërin. Parisitaton, huëntonënquë ayaꞌconinpoaꞌ. Ina quëran imarëhuasopitantaꞌ parisitacasoꞌ yaꞌhuërin aꞌnapitantaꞌ imacaiso marëꞌ. Napoaton ipora cantaꞌ parisitarahuë canpitantaꞌ imacamaso marëꞌ. Parisitaporahuëꞌ, noya cancantërahuë.

Colosenses 2:19

Inapitasoꞌ co tëhuënchachin Quisocristo imapihuëꞌ. Inasáchin motënpoaꞌ pochin nicaton, huaꞌanëntarinpoaꞌ. Niꞌcoꞌ. Nonënpoaꞌ nisha nisha yaꞌhuëtërin. Motënpoari yaꞌipi camairin noya sacatacaiso marëꞌ. Inapochachin imarëhuasopitantaꞌ Quisocristoíchin noya camairinpoaꞌ. Achinirinpoaꞌ soꞌsorëso pochin nicacaso marëꞌ. Ina pochin nicacasoꞌ Yosë nohuantërin.

Colosenses 3:15

Quisocristoíchin asanocancaninpoaꞌ. Ina yonquihuatëhuaꞌ, noya ninicatëhuaꞌ, yaꞌhuarëhuaꞌ. Ina marëꞌ aꞌna huënton pochin Yosë acorinpoaꞌ. Ina catahuahuachinpoaꞌ, co huachi paꞌyanarihuahuëꞌ. Napoaton inasáchin yonquicoꞌ asanocancainquëmaꞌ. Nani tahuëri: “Yosparinquën Sinioro,” itocoꞌ.