1 Corintios 12:11 - Chayahuita (Shahui)

¹¹ Yaꞌipi imarëhuasopita catahuarinpoaꞌ. Aꞌnaíchin Ispirito Santo niponahuëꞌ, catahuarinpoaꞌ nisha nisha nitotacasoꞌ. Inaora nohuantërinsoꞌ ananitërinpoaꞌ.

1 Corintios 12:11 ပူးပေါင်းရင်းမြစ်များ

Daniel 4:35

Isoroꞌpaquë yaꞌhuëpisopita quëma marësoꞌ, co máquënoꞌsahuëꞌ. Inápaquë yaꞌhuëpisopita, nohuantëransoráchin nipi. Isoroꞌpaquëntaꞌ, ina pochachin nipi. Chini chiníquën nanantëran niꞌton, co insonta nanitarinhuëꞌ, chinitiinquënsoꞌ. Maꞌsha nipataontaꞌ: ‘¿Onpoatonta ina pochin nisaran?’ co itiinënso yaꞌhuërinhuëꞌ,” itërahuë.

Mateo 11:26

Quëmaora nohuanton Tata naporan,” itërin.

Mateo 20:15

Caoranquën coriqui niꞌton, onposona nohuantohuato, inanapo pahuërëtaꞌhuasoꞌ yaꞌhuërin. Inapita nosoroato, pahuërërahuëso marëꞌ ¿noꞌhuiramaco ti?’ itahuaton, aꞌparin huachi.

Juan 3:27

—Co Yosë nohuantërinhuëꞌ naporini, co napoꞌitonahuëꞌ. Yaꞌipinpoaꞌ Yosë acorinpoaꞌ maꞌsona nicacasoꞌ.

Juan 3:8

Niꞌquëꞌ. Ihuan inaora nohuanton, paꞌnin. Natanarihuarahuëꞌ, intohua quëransoꞌ huëcaton intohuasona paꞌninsoꞌ, co nitotërëhuahuëꞌ. Co quënanpirëhuahuëꞌ, natanëhuaꞌ. Inapochachin Ispirito Santo yaꞌcoancantohuachinquëmaꞌ, nasitaantarëso pochin nasha cancan quëtarinquëmaꞌ, itërin.

Juan 5:21

Tatahuë chimipi ananpitaantarin. Inapochachin cantaꞌ insosona nohuantërahuësoꞌ ananpitaantarahuë.

Romanos 12:6

Yosë nosoroatonpoaꞌ, acorinpoaꞌ nisha nisha nicacasoꞌ. Maꞌmarësona acohuachinpoaꞌ, noya niahuaꞌ. Aꞌnaquën, yonquirinso chachin anitotërin shaꞌhuicaiso marëꞌ. Anitotohuachinquëmaꞌ, yaꞌipiya noꞌtëquën shaꞌhuicoꞌ.

Romanos 9:18

Inaora nohuanton, aꞌnaquën nosororin. Aꞌnaquënso nipirinhuëꞌ tananpitërin. Tananpitohuachina, co natantochináchinhuëꞌ cancantopi.

1 Corintios 12:18

Yosëso nipirinhuëꞌ nisha nisha acotërinpoaꞌ. Ina nohuanton, imiranpoaꞌ, nantënpoaꞌ, yaꞌpiranpoaꞌ, inapita yaꞌhuëtërinpoaꞌ. Aꞌnaya aꞌnaya nohuantërinquë chachin acotërinpoaꞌ.

1 Corintios 12:4

Yosë acorinpoaꞌ nisha nisha nitotacaso marëꞌ. Ispirito Santo chachin catahuarinpoaꞌ noya nicacasoꞌ.

1 Corintios 12:6

Aꞌnaya aꞌnayanpoaꞌ ananitërinpoaꞌ nisha nisha nicacaso marëꞌ. Yaꞌipinpoaꞌ Yosë chachin catahuarinpoaꞌ.

1 Corintios 7:17

Yosë nohuanton, nisha nisha ninëhuaꞌ. Co napopináchin ninëhuahuëꞌ. Onpopinsona nicasëhuaꞌ Yosë imapatëhuaꞌ, inachachin niahuaꞌ. Yaꞌhuërëhuaquë chachin sano yonquiatëhuaꞌ, imahuaꞌ. Paato, yaꞌipi imapisopita inachachin pënënarahuë.

1 Corintios 7:7

Caso nipirinhuëꞌ co saꞌahuancohuëꞌ. Co mantaꞌ sanapi sëꞌhuarahuëꞌ. Yosë catahuarinco ahuantaꞌhuasoꞌ. Paꞌsápato, aꞌchinárahuë. Naꞌa quëmapiꞌsaꞌ ca pochin nipi naporini, noya niitonahuëꞌ, topirahuëꞌ. Co yaꞌipi nanitopihuëꞌ ca pochin nicacaisoꞌ. Yosë catahuarinpoaꞌ nisha nisha nicacasoꞌ. Aꞌnaquën ina nohuanton, saꞌarin. Aꞌnaquënso nipirinhuëꞌ ina nohuanton, noya inaora yaꞌhuërin.

2 Corintios 10:13

Co quiyaora nohuanton, chiníquën nanantëraihuëꞌ. Yosë chachin acorincoi naꞌa piyapiꞌsaꞌ aꞌchintaꞌhuaiso marëꞌ. Insëquësona aꞌchinaꞌhuaisontaꞌ shaꞌhuitërincoi. Ina nohuanton, Corintoquë yaꞌhuëramasopitantaꞌ aꞌchintërainquëmaꞌ.

Efesios 1:11

Inaora nohuanton, acorinpoaꞌ piyapinënpita nicacaso marëꞌ. Quisocristo imapatëhuaꞌ, huiꞌnin pochin niꞌsarinpoaꞌ. Napoaton aꞌna tahuëri Yosëꞌpaꞌ noya noya acoarinpoaꞌ. Iráca chachin yonquirinpoaꞌ niꞌton, huëntonënquë ayaꞌconinpoaꞌ.

Efesios 4:7

Quisocristo catahuarinpoaꞌ maꞌsona tërantaꞌ noya nicacaso marëꞌ. Yaꞌipinpoaꞌ aꞌnaya aꞌnayanpoaꞌ catahuarinpoaꞌ nisha nisha nicacasoꞌ. Inaora nohuanton, catahuarinpoaꞌ maꞌsona nohuantërinsoꞌ noya nitotacaso marëꞌ.

Hebreos 2:4

Yosëri catahuarin niꞌton, caꞌtanoꞌsanënpita nani maꞌsha nanitapapi. Ina nohuanton, Ispirito Santori catahuarin nisha nisha nitotacaiso marëꞌ. Aꞌnaya aꞌnaya catahuarin Yosë nohuantërinsoꞌ nicacaisoꞌ. Aꞌnaquën catahuarin caniaꞌpiroꞌsaꞌ aꞌnaroáchin anoyatacaisoꞌ. Aꞌnaquëontaꞌ catahuarin Yosë yonquirinso chachin nitotacaiso marëꞌ. Ina nicatëhuaꞌ: “¡Ma noyacha Yosëri catahuarin paya! Ina nohuanton, noꞌtëquën Yosë nanamën shaꞌhuitërinënpoaꞌ,” tënëhuaꞌ.

Santiago 1:18

Inaora nohuanton, anasitaantatonpoa pochin nasha cancan quëtërinpoaꞌ. Inasoꞌ noꞌtëquën nonin. Nanamën natëhuatëhuaꞌ, huëntonënquë ayaꞌcoaninpoaꞌ. Huiꞌninpita pochachin niꞌninpoaꞌ. Canpoaꞌton anoyacancantërinpoaꞌ. Ina quëran oshaquëran naꞌayaꞌpi anoyacancantarin.