1 Corintios 1:9 - Chayahuita (Shahui)

⁹ Yosë co naniantarinquëmahuëꞌ. Shaꞌhuitërinquëmaso chachin catahuarinquëmaꞌ. Nani acorinquëmaꞌ huiꞌnin nohuitacamaso marëꞌ. Quisocristo chachin huaꞌanëntërinpoa huachi.

1 Corintios 1:9 ပူးပေါင်းရင်းမြစ်များ

Salmos 100:5

Siniorosoꞌ noyasáchin ninin. Nosoromiatërinpoa niꞌton, co onporonta aꞌpoarinpoahuëꞌ. Shaꞌhuitërinpoaso chachin huiꞌnanpoaꞌ, shiaꞌhuayanënpoaꞌ, inapitanta noya catahuarápon.

Isaías 11:5

Piyapi nani tahuëri aꞌmoanaton paꞌninso pochin, noyasáchin nicaton noꞌtëquënáchin nonsarin.

Isaías 49:7

Siniorosoꞌ nichaꞌëtonaꞌpi. Siniorosoꞌ noyasáchin ninin niꞌton, Israirori chinotërin. Ina chachin piyapinën nontaton: “Quëmasoꞌ nisha piyapiꞌsa nocamiatarinquën. Nisha nisha piyapiꞌsa noꞌhuiarinquën. Noꞌhuitërayaroꞌsa huaꞌanëntatënquën asacatarinquën. Inapotopirinënquënhuëꞌ, copirnoroꞌsaꞌ, huaꞌanoꞌsa inapita niꞌsarinënquën. Noya nicatënënquën huaniponaꞌ. Huanipi quëran moshapënën. Caso Sinioroco. Noyasáchin ninahuë niꞌton, Israiro chinotërinco. Carinquën huayonanquën. Napoaton shaꞌhuitëranquënsopita ananiarahuë,” itërin.

Números 23:19

Yosëso co canpoa pochinhuëꞌ. Co nisha nisha nonaton nonpininhuëꞌ. Maꞌsona topachina, inachachin nisarin. Catahuatacaso shaꞌhuihuachina, catahuatërin.

Mateo 24:35

Isoroꞌpaꞌ taꞌhuantarin. Piꞌiroꞌtëntaꞌ taꞌhuantarin. Ca nanamëhuëso nipirinhuëꞌ co onporontaꞌ taꞌhuantarinhuëꞌ. Noꞌtëquën nonahuë niꞌton, yaꞌipi shaꞌhuitëranquëmaso chachin naniarin huachi.

Juan 17:21

Inapitantaꞌ catahuaquëꞌ napopianachin yonquiꞌinaꞌ. Canpoꞌ ninosororëso pochin ninosoroꞌinaꞌ. Quëma huiꞌnanco niꞌto, yonquiranso chachin yonquirahuë. Inapitantaꞌ catahuaquëꞌ canpo pochachin yonquiꞌinaꞌ. Ina quëran aꞌnapitantaꞌ natëarinaco. ‘Yosëri chachin aꞌpaimarin,’ tosapi.

Romanos 11:17

Nara quëran aꞌchinchinquëmaꞌ. Oripo nara sëꞌpaꞌ co noya nitohuachinahuëꞌ, nishitëtahuatëꞌ, tëꞌyatërëꞌ. Ina quëran apinapinsoꞌ oripo sëꞌpaquën tërantaꞌ achinpitërëꞌ papotacaso marëꞌ. Aꞌnaquën israiroꞌsasoꞌ oripo nara sëꞌpa pochin nipi. Co natëpihuëꞌ niꞌton, Yosëri tananpitërin. Canpitasoꞌ nisha piyapinquëmaꞌ nipiramahuëꞌ, huëntonënquë ayaꞌconinquëmaꞌ. Piyapinënpita pochachin niꞌninquëmaꞌ.

Romanos 8:28

Yosë nosorohuatëhuaꞌ, noyasáchin yonquirinpoaꞌ. Maꞌsha onpohuatëhuara, naꞌcon catahuarinpoaꞌ. Piꞌpian parisitapirëhuahuëꞌ, ina nohuanton, parisitërëhua quëran noya noya pipiarëhuaꞌ. Achinicancaninpoaꞌ niꞌton, noya noya imarihuaꞌ. Nani huayoninpoaꞌ ina nohuantërinsoꞌ nicacaso marëꞌ.

Romanos 8:30

Nohuantërinpoaꞌ niꞌton, huëntonënquë chachin ayaꞌconinpoaꞌ. Oshanënpoaꞌ inquitatonpoaꞌ, noya niꞌninpoaꞌ. Ina nohuanton, aꞌna tahuëri inápaquë noya noya acoarinpoaꞌ.

Romanos 9:24

Aꞌnaquën cotio piyapiꞌsacoi huayonincoi. Aꞌnaquëmaꞌ nisha piyapiꞌsanquëmantaꞌ Yosë nohuanton, imaramaꞌ canpitantaꞌ.

1 Corintios 1:30

Yosë nohuanton, Quisocristo imarëhuaꞌ. Imapatëhuaꞌ, yaꞌcoancantërinpoaꞌ niꞌton, yonquínahuan pochin Yosë niꞌninpoaꞌ. Naporahuaton, catahuarinpoaꞌ noꞌtëquën yonquicasoꞌ. Oshanënpoaꞌ inquitohuachinpoaꞌ, noya huachi niꞌninpoaꞌ. Nasha cancan quëtërinpoaꞌ noya nicacaso marëꞌ. Quisocristo chachin nichaꞌërinpoaꞌ.

1 Corintios 10:13

Sopai yaꞌipi piyapinpoaꞌ shaꞌhuitërinpoaꞌ co noyahuëꞌ nicacaso marëꞌ. Yosëso nipirinhuëꞌ catahuarinpoaꞌ. Aꞌnaya aꞌnayanpoaꞌ co nanitërëhuasohuëꞌ nitotaton, niꞌsarinpoaꞌ. “Tananpitëquëꞌ,” itohuachina, co sopai nanitërinhuëꞌ aquëtëꞌ tëniinpoasoꞌ. Cancanënpoa quëran huarëꞌ Yosë natëhuatëhuaꞌ, co sopai minsëarinpoahuëꞌ. Maꞌsha onpopirëhuahuëntaꞌ, Yosë ananitarinpoaꞌ ahuantacasoꞌ. Yosë chachin catahuarinpoaꞌ sopai minsëcaso marëꞌ.

1 Corintios 10:16

Niyontonpatëhuara, Quisocristo chimininsoꞌ yonquirëhuaꞌ. “Quiya marëꞌ Sinioro huënainën paꞌnin niꞌton, ‘Yosparinquën’ tënai,” itatëhuaꞌ, huënainën pochin nininsoꞌ oꞌorëhuaꞌ. Cancanënpoa quëran huarëꞌ yonquiatëhuaꞌ, oꞌopatëhuaꞌ, huënainën napopináchin yonquirëhuaꞌ. Ina quëran cosharoꞌ ina nonën pochin nininsoꞌ sëꞌpanahuatëhuaꞌ, caꞌnëhuaꞌ. “Tëhuënchachin canpoa marëꞌ Quisocristo nonën ohuanpi,” taꞌtëhuaꞌ, napopináchin yonquirëhuaꞌ.

2 Corintios 1:18

Yosë niꞌsárinco noꞌtëquën nontëranquëmaꞌ. Yosë noꞌtëquënáchin nonin niꞌton, cantaꞌ co nonpintëranquëmahuëꞌ. Co nisha nisha nonahuëꞌ.

Gálatas 1:15

Yosë nosoroatonco, nohuantërinco huiꞌnin imacaꞌhuaso marëꞌ. Coꞌhuara nasichátërapohuëꞌ, yonquirinco nanamën aꞌchinaꞌhuaso marëꞌ. Inaora nohuanton, nosororinco niꞌton, huiꞌnin anohuitërinco nisha piyapiꞌsaꞌ pënënaꞌhuaso marëꞌ. Ina marëꞌ acohuachincora, co piyapiꞌsaꞌ paaparahuëꞌ aꞌchintinacoso marëꞌ.

Gálatas 2:20

Quisocristo corosëquë chiminin. Ina imato, cantaꞌ corosëquë chiminahuëso pochin ninahuë. Iráca yonquirahuësoꞌ naniantërahuë. Napoaton co huachi oshahuanacaꞌhuasoꞌ yaꞌhuërinhuëꞌ. Iporasoꞌ Quisocristoíchin yonquirahuë. Co huachi caora nohuanto maꞌsha ninahuëꞌ. Quisocristo yaꞌcoancantërinco niꞌton, catahuarinco noya nicaꞌhuasoꞌ. ‘Nani tahuëri Yosë huiꞌnin chachin catahuarinco,’ taꞌto, noya cancantërahuë. Inasoꞌ paꞌpi nosororinco. Nosoroatonco, yaꞌhuërënamëhuë chiminin.

Efesios 3:6

Naꞌa piꞌipi cotioroꞌsaráchin Yosë chinotopi. “Nichaꞌësaranquëmaꞌ,” itaton, Yosëri naꞌcon catahuarin. Iporaso nipirinhuëꞌ nisha piyapiꞌsanquëmantaꞌ catahuarinquëmaꞌ. Noya nanan natanatomaꞌ, Quisocristo imaramaꞌ niꞌton, canpitantaꞌ nichaꞌësarinquëmaꞌ. Napoaton aꞌna huëntoínchin pochin ninëhuaꞌ.

Deuteronomio 32:4

Inasoꞌ, nóya paꞌpoyarinpoaꞌ. Maꞌsha nipachina, co tëhuërinhuëꞌ. Noꞌtëquënáchin nicaton nóya ninin. Inasoꞌ Yosë, noꞌtëquënáchin nonin. Topinansoꞌ co onporonta piyapi maꞌsha onpotërinhuëꞌ. Noꞌtëquënáchin ninin. Inaíchin Yosësoꞌ.

Deuteronomio 7:9

Naporinso marëꞌ: ‘Sinioroíchin Yosësoꞌ. Shimashonënpoapitarëꞌ anoyatërinsoꞌ, co onporonta naniantarinhuëꞌ. Ina nosoroatëhua camaitërinsopita natëhuatëhuaꞌ, co naniantarinpoahuëꞌ canpoantaꞌ,’ tocoꞌ.

Colosenses 1:24

Imarëhuasopita marëꞌ Quisocristo chiníquën parisitërin. Parisitaton, huëntonënquë ayaꞌconinpoaꞌ. Ina quëran imarëhuasopitantaꞌ parisitacasoꞌ yaꞌhuërin aꞌnapitantaꞌ imacaiso marëꞌ. Napoaton ipora cantaꞌ parisitarahuë canpitantaꞌ imacamaso marëꞌ. Parisitaporahuëꞌ, noya cancantërahuë.

1 Tesalonicenses 2:12

Achinicancanainquëmaꞌ. “Yosë imaramaꞌ niꞌton, noyasáchin nicoꞌ Yosë noya niꞌinquëmaꞌ,” itërainquëmaꞌ. Ina acorinquëmaꞌ huaꞌanëntërinquë yaꞌconacamasoꞌ. Aꞌna tahuëri yaꞌhuërinꞌpaꞌ quëpantahuachinquëmaꞌ, noya noya yaꞌhuëcontaramaꞌ.

2 Tesalonicenses 2:14

Yosë nanamën aꞌchintohuatëinquëmara, canpitantaꞌ imaramaꞌ. Yosë acorinquëmaꞌ Sinioro Quisocristo pochin nicacamasoꞌ. Aꞌna tahuëri oꞌmantahuachin, ina pochin yaꞌnoaramaꞌ.

2 Tesalonicenses 3:3

Tata Yosëso nipirinhuëꞌ co onporontaꞌ naniantërinpoahuëꞌ. Achinicancaninpoaꞌ. Sopai yaminsëpirinpoahuëꞌ, ina niꞌsarinpoaꞌ. Catahuarinpoaꞌ sopai minsëcasoꞌ.

2 Timoteo 1:9

Yosë chachin anoyacancantërinpoaꞌ. Oshanënpoaꞌ inquitatonpoaꞌ, acorinpoaꞌ nóya nicacaso marëꞌ. Inaora nohuanton, nosororinpoaꞌ. Co noyahuëꞌ nipirëhuahuëꞌ, nosoroatonpoaꞌ, catahuarinpoaꞌ. Coꞌhuara isoroꞌpaꞌ acoyátërasohuëꞌ, ninotonpoaꞌ, nosororinpoaꞌ. Naporoꞌ chinotërin Quisocristo aꞌpaimacasoꞌ. Ina imapatëhuaꞌ, anoyacancantërinpoaꞌ.

2 Timoteo 2:13

Co noꞌtëquënáchin imapirëhuahuëꞌ, inasoꞌ noꞌtëquën nontërinpoaꞌ niꞌton, noya aꞌpaiarinpoaꞌ. Nani shaꞌhuitërinpoaꞌ niꞌton, co nanitërinhuëꞌ nonpintinpoasoꞌ. Co onporontaꞌ nisha cancantarinhuëꞌ.

Tito 1:2

Quisocristo imapatëhuaꞌ, aꞌna tahuëri inápaquë quëpantarinpoaꞌ. Yaꞌhuërinꞌpaꞌ yaꞌhuëmiatarihuaꞌ. “Ananpitaantarinpoaꞌ,” taꞌtëhuaꞌ, ina ninarëhuaꞌ. Yosë iráca coꞌhuara isoroꞌpaꞌ acoyátërasohuëꞌ, ninotonpoaꞌ yonquirinpoaꞌ. Inasoꞌ co onporontaꞌ nonpintërinpoahuëꞌ.

Hebreos 10:23

“Yosë noꞌtëquën shaꞌhuitërinpoaꞌ. Quisocristoíchin nichaꞌësarinpoaꞌ,” taꞌtëhuaꞌ, imamiatahuaꞌ. Ama piꞌpian tërantaꞌ nisha yonquiaꞌhuasohuë. Nani shaꞌhuitërinpoaꞌ niꞌton, co nonpintarinpoahuëꞌ.

Hebreos 11:11

Inasoꞌ, chiníquën Yosë natërin. “Nani máshoco. Sarantaꞌ co huaꞌhuanaꞌpihuëꞌ nipirinhuëꞌ, Yosë shaꞌhuitërinco niꞌton, oshaquëran huiꞌnahuë yaꞌhuëtarinco,” tëninso marëꞌ, Yosë nohuanton, huiꞌnahuanin huachi.

Hebreos 2:17

Napoaton isoroꞌpaquë oꞌmaton, piyapi chachin nasitimarin. Co piyapi pochin nasitërinhuëꞌ naporini, co catahuainpoasoꞌ nanichitonhuëꞌ. Piyapi pochachin inantaꞌ niꞌton, noyá nohuitërinpoaꞌ. Corto huaꞌan chini chiníquën nanantërinso pochin nicaton, canpoa marëꞌ Yosë nontarin nanan anoyatinpoaso marëꞌ. Nosoroatonpoaꞌ, chiminin oshanënpoaꞌ inquitinpoaso marëꞌ. Inasoꞌ co nonpintërinpoahuëꞌ.

Hebreos 3:1

Imaramaꞌ niꞌton, Yosë anoyacancantërinquëmaꞌ. Huëntonënquë ayaꞌconinquëmaꞌ. Napoaton iyaroꞌsaꞌ Quisocristo naꞌcon yonquicoꞌ. Yosëri aꞌpaimarin nanamën aꞌchintinpoaso marëꞌ. Corto huaꞌan chini chiníquën nanantërinso pochin acorin. Ina nohuanton, imarëhuaꞌ.

Hebreos 3:14

Iráca Quisocristo natërëhuaꞌ. Chiminaquë huarëꞌ noya imahuaꞌ. Co aꞌpohuatëhuahuëꞌ, Quisocristorëꞌquënpoaꞌ yaꞌhuëcontarihuaꞌ.

Hebreos 6:18

Yosë chachin shaꞌhuitërinpoaꞌ. Naporahuaton “Casoꞌ Yosëco niꞌto, noꞌtëquën nontëranquëmaꞌ,” itomantarinpoaꞌ. Napoaton co onporontaꞌ nonpintarinpoahuëꞌ. Co piꞌpian tërantaꞌ nishataponhuëꞌ, tënëhuaꞌ. Ina yonquiatëhuaꞌ, chiníquën cancantahuaꞌ. Iráca Yosëíchin imarëhuaꞌ catahuainpoaso marëꞌ. “Nichaꞌësarinpoaꞌ,” taꞌtëhuaꞌ, yaꞌipi cancanënpoa quëran imahuaꞌ.

1 Pedro 5:10

Yosë paꞌpi nosororinpoaꞌ. Quisocristo imarëhuaꞌ niꞌton, aꞌna tahuëri inápaquë quëpantarinpoaꞌ. Iporasoꞌ maꞌsha onpopirëhuahuëꞌ, catahuarinpoaꞌ. Co huaꞌquiꞌ parisitarihuahuëꞌ. Ina quëran nosoroatonpoaꞌ, anoyatarinpoaꞌ. Achinicancanarinpoaꞌ. Noya noya acoarinpoaꞌ.

1 Juan 1:3

Inápaquë yaꞌhuaponahuëꞌ, oꞌmahuachina, piyapicoi niꞌnai, aꞌchininsontaꞌ natanai. Paꞌpiontaꞌ anohuitërincoi. Huiꞌnin nohuitatoi, nohuitërai. Nipayarëso pochin ninai. Napoaton ninshitaranquëmaꞌ canpitantaꞌ Quisocristo nohuitacamaso marëꞌ. Quiya pochachin Yosë nohuitocoꞌ nipayarëso pochin nicacamaso marëꞌ.

1 Juan 1:7

Yosësoꞌ noyasáchin ninin. Tahuëri pochin cancantërin. Canpoantaꞌ tahuëri pochin yonquihuatëhuaꞌ, Yosë nohuitarihuaꞌ. Naporahuaton, noya niniꞌtëhuaꞌ yaꞌhuarihuaꞌ. Huiꞌnin chachin chiminin niꞌton, yaꞌipi oshanënpoaꞌ inquitarinpoaꞌ. Huënainën quëran anoyacancantarinpoaꞌ.

1 Juan 4:13

Yosë huëntonënquë yaꞌconpatëhuaꞌ, Ispirito Santo aꞌpatimarinpoaꞌ yaꞌcoancantinpoaso marëꞌ. Huaꞌyanën chachin niꞌton, cancanënpoaquë ayonquirinpoaꞌ. “Tëhuënchachin Yosë yaꞌcoancantërinpoaꞌ,” tënëhuaꞌ.

Apocalipsis 19:11

Ina quëran Yosë nohuanton, huaꞌnarëso pochin niantarahuë. Piꞌiroꞌtëꞌ niꞌsoatohuachina, huiri cahuario quënantarahuë. Ina aipi quëmapi huënsëarin. Noꞌtëquën nonaꞌpi itërëhuasoꞌ. Maꞌsona tërantaꞌ shaꞌhuitohuachinpoaꞌ, co onporontaꞌ nonpintarinpoahuëꞌ. Noꞌtëquën huaꞌanëntarin. Quira nicaton, inimicoroꞌsaꞌ minsëarin.