1 Corintios 1:20 - Chayahuita (Shahui)

²⁰ Aꞌnaquën inahuara yonquinëna quëran nani maꞌsha nitotopi. Aꞌnaquëntaꞌ nitoaꞌchinapi. Aꞌnaquëontaꞌ míso nonpi. Inapopirinahuëꞌ, ¿maꞌtaꞌ ina marëꞌ canapi? Co mantaꞌ canapihuëꞌ. “Co nanamëhuë imatomahuëꞌ, napoonin yonquiramaꞌ,” itërin Yosëri.

1 Corintios 1:20 ပူးပေါင်းရင်းမြစ်များ

2 Samuel 15:31

Aꞌnari Tapi shaꞌhuitërin: “Aitohuironta Apësaron catahuarin,” itërin. Ina natanaton, inaso Sinioro nontërin: “Aitohuirori maꞌsona nicacasoꞌ, Apësaron ayonquiarin. Ayonquihuachin, quëma nohuanton ama natëinsohuëꞌ,” itërin.

2 Samuel 16:23

(Naporo tahuëriꞌsa Aitohuiro maꞌsona nicacaisoꞌ natanpanchinara, pënënin. Pënënpachin, Yosë shaꞌhuirinso pochachin nitopi. Ina pochin Aitohuiro natëpi. Tapirinta natërin. Apësaronta natërin.)

2 Samuel 17:14

Apësaron, Israiro ansianoꞌsaꞌ, inapitaso Osai naporinso natanpi. Ina natanatonaꞌ: “Osaicha, Aitohuiro quëran noya noya pënëninpoa paya,” topi. Aitohuirori noꞌtëquën pënënpirinhuëꞌ, Sinioro nohuanton co ina imapihuëꞌ. Tapiri, Apësaron canacaso marëꞌ naporin.

2 Samuel 17:23

Aitohuirosoꞌ: “Noꞌtëquën pënënpirahuëꞌ, co Apësaron natërincohuëꞌ. Co natërincohuëꞌ niꞌquëhuarëꞌ, paꞌpini canapon,” tënin. Ina yonquiaton moranën taparin. Inaquë yaꞌmitëahuaton huaꞌhuatërinso ninanoquë paꞌnin. Canconahuaton quëmopinënpita, piyapinënpita, inapita nontërin. Maꞌpitaso nicacaisoꞌ camaitërin. Inaporahuaton, noninquë nihuënquëconorin quëran chiminin. Napohuachina, inanta paꞌpincoꞌ poꞌmopiquë chachin poꞌmoontapi.

Isaías 33:18

Naporoꞌ inimicoroꞌsa tëꞌhuatëransoꞌ yonquiaton tapon: “Inimico huaꞌan, sontoronënpita nicacaso marëꞌ pichiyantërinpoasoꞌ, ¡co huachi yaꞌhuërinhuëꞌ! Inimico copirno marëꞌ pahuërëtacasoꞌ maꞌpatonaꞌpi huaꞌaontaꞌ, ¡co huachi yaꞌhuërinhuëꞌ! Toriroꞌsa pichirahuaton onposo sontaroꞌsa aꞌpacaiso marëꞌ tantiachantërinso huaꞌaontaꞌ, ¡co huachi yaꞌhuërinhuëꞌ!” tosaran.

Isaías 44:25

Nonpin nanan pënëntonaꞌpiroꞌsa maꞌsona onpocasoꞌ shaꞌhuihuachinara, ca nohuanton co inachachin nininhuëꞌ. Ninotonoꞌsanta ca nohuanton huaꞌyantopi. Yonquinahuanoꞌsantaꞌ, ca nohuanton itohuara capini nipatëtopi. Nitotopirinahuë tërantaꞌ, napoonin yonquiapi.

Isaías 53:1

Noya nanan shaꞌhuitërinënpoasoꞌ natanpirëhuahuëꞌ, ¡caraíchinpoa natëtërëhuaꞌ! Sinioro chiníquën nanantërinsoꞌ, ¡co insonta yanitotërinhuëꞌ!

Mateo 13:22

Aꞌnaquën piyapiꞌsantaꞌ nahuanoꞌ yaꞌhuërinso pochin niconpi. Yosë nanamën natanpachinara, yaimapirinahuëꞌ, maꞌsharáchin yonquiatonaꞌ, naniantopi. ‘Naꞌa coriqui, maꞌsha, inapita yaꞌhuëtohuachincoi, nóya cancantarai,’ topirinahuëꞌ, co ina quëran noya cancantacasohuëꞌ nipirinhuëꞌ. Napoaton nahuanoꞌsari imotërinso pochin, maꞌsharáchin yonquiatonaꞌ, Yosë nanamën naniantopi. Co imamiatopihuëꞌ.

Juan 12:31

Iporasoꞌ co natëpisopitahuëꞌ noꞌhuiarinaco niꞌton, anaꞌintacasoꞌ yaꞌhuërin huachi. Huaꞌquiꞌ sopairi piyapiꞌsaꞌ camaipirinhuëꞌ, cari minsërahuato, ocoiarahuë.

Hechos 17:18

Inaquë nisha nisha yonquipisoꞌ aꞌchinaꞌpiroꞌsantaꞌ huëꞌpi. Aꞌnaquën ipicorioroꞌsaꞌ itopi. Aꞌnaquëontaꞌ istoicoroꞌsaꞌ itopi. Paono quënanahuatonaꞌ, ninontopi. —Iso quëmapi paꞌpi nonaꞌpi. ¿Maꞌtaꞌ tëcapon naporin? itopi aꞌnaquën. —Ahuën. Nisha yosëroꞌsaꞌ imacaiso marëꞌ aꞌchinamara, topi aꞌnaquën. “Quisoso chiminin. Ina quëran nanpiantarin,” tëninso marëꞌ napotopi.

Romanos 1:20

Isoroꞌpaꞌ ninin quëran huarëꞌ piyapiꞌsaꞌ nitotopi. Yosësoꞌ co quënanpirëhuahuëꞌ, nani maꞌsha ninin. Ina nicatonaꞌ, “Tëhuënchachin Yosë yaꞌhuërin. Yaꞌipiya nanitaparin niꞌton, ina chinotahuaꞌ,” taꞌcaso nipirinhuëꞌ, co nohuantopihuëꞌ. Napoaton naꞌinpi.

Romanos 1:22

“Yaꞌipiya nitotërai,” topirinahuëꞌ, co noya yonquipihuëꞌ.

1 Corintios 1:19

Quiricanën quëran itapon: “Aꞌnaquënsoꞌ nani maꞌsha nitotaponaraihuëꞌ, co noya yonquipihuëꞌ. Inahuara chaꞌëcaisoꞌ yonquipirinahuëꞌ, co nanitapihuëꞌ. Nani maꞌsha yonquiaponaraihuëꞌ, napoonin yonquipi,” tënin Yosë.

1 Corintios 1:26

Niꞌcoꞌ iyaroꞌsaꞌ. Naꞌaquëmaꞌ co naꞌcon nitotopiramahuëꞌ, Yosë huayoninquëmaꞌ. Co chiníquën nanantonaꞌpiroꞌsa pochin nipiramahuëꞌ, nohuantërinquëmaꞌ. Caraíchin maꞌhuanoꞌsasoꞌ imasapi.

1 Corintios 1:27

Yosë nohuanton, naꞌa topinan piyapiꞌsaꞌ imasapi. Aꞌnaquënso nipirinhuëꞌ naꞌcon nitotaponaraihuëꞌ co imapihuëꞌ. Chiníquën nanantopirinahuëꞌ, co Yosëri nichaꞌërinhuëꞌ. Inapita atapanacaso marëꞌ Yosë nohuanton, naꞌa topinan piyapiꞌsaꞌ imasapi.

1 Corintios 1:28

Iporasoꞌ aꞌnaquën nocaninënpoaꞌ. “Canpitasoꞌ topinan piyapiꞌsanquëmaꞌ. Co mantaꞌ nitotëramahuëꞌ. Napoonamaꞌ,” itopirinënpoahuëꞌ, Yosësoꞌ nohuantërinpoaꞌ. Inapitasoꞌ chiníquën nanantaponaraihuëꞌ, co imapihuëꞌ niꞌton, yaꞌipi Yosëri ayatarin.

1 Corintios 11:32

Aꞌna tahuëri oshahuanoꞌsaꞌ anaꞌintomiatarin. Imarëhuasopitaso nipirinhuëꞌ, ipora chachin piꞌpian anaꞌintarinpoaꞌ noya noya yonquicaso marëꞌ. Ina quëran ayaroꞌ tahuëri co anaꞌintomiatarinpoahuëꞌ.

1 Corintios 2:6

Napoaponahuëꞌ, chinoton pochin cancantopisopita aꞌchintohuatoi, yaꞌipi Yosë yonquirinpoasoꞌ aꞌchintërai. Co piyapiꞌsaꞌ yonquipisoꞌ aꞌchinaihuëꞌ. Co huaꞌanoꞌsaꞌ yonquipiso tëranta aꞌchinaihuëꞌ. Inapitasoꞌ inahuara yonquipisoáchin yonquiatonaꞌ, co Yosë pochin yonquipihuëꞌ niꞌton, taꞌhuantapi.

1 Corintios 2:8

Huaꞌanoꞌsasoꞌ co nitotopihuëꞌ. Nitotopi naporini, co Quisocristo tëpaꞌitonahuëꞌ. Inasoꞌ Yosë chachin. Noya noya nipirinhuëꞌ, tëpapi.

1 Corintios 3:18

Ama inquëma tërantaꞌ isoroꞌparáchin yonquiatomaꞌ, ninonpintocosohuëꞌ. “Caora noya noya nitotërahuë,” co taꞌcasoꞌ yaꞌhuërinhuëꞌ. Ama ina pochin yonquicosohuëꞌ. “Caora co noꞌtëquën yonquirahuëꞌ. Catahuaco Sinioro noya yonquiꞌi,” topatamaꞌ, Yosë catahuarinquëmaꞌ noya noya yonquicasoꞌ.

1 Corintios 3:19

Co imapisopitasohuëꞌ nani maꞌsha nitotaponaraihuëꞌ: “Co noꞌtëquën yonquipihuëꞌ,” tënin Yosë. Quiricanën quëran anitotërinpoaꞌ. “Naꞌcon nitotatonaꞌ, piyapiꞌsaꞌ nonpintopirinahuëꞌ, co nanitopihuëꞌ Yosësoꞌ nonpintacaisoꞌ. Inari naꞌcon naꞌcon nitotaton, minsëarin,” tënin.

1 Corintios 6:2

Aꞌna tahuëri Quisocristo oꞌmahuachin, imarëhuasopita acoarinpoaꞌ inarëꞌquënpoaꞌ huaꞌanëntacaso marëꞌ. Coisë pochin nicatëhuaꞌ, yaꞌipi piyapiꞌsaꞌ noꞌtëquën shaꞌhuitarihuaꞌ. Nani ina nitotëramaꞌ. Ina nitotatomaꞌ, ipora nanan yaꞌhuëhuachin, anoyatacaso yaꞌhuërin.

Santiago 4:4

Canpitasoꞌ co huachi Yosëíchin yonquiramahuëꞌ. Yosë yonquipiramahuëꞌ, nani maꞌsha naꞌcon naꞌcon nohuantatomaꞌ, yamonshihuaninso pochin cancantëramaꞌ. Capa cancantacasoáchin paꞌyatëramaꞌ. Maꞌsharáchin yonquiatomaꞌ, Yosë inimiconën pochin cancantëramaꞌ.