1 Corintios 1:18 - Chayahuita (Shahui)

¹⁸ Aꞌchinpatëra, “Quisocristo corosëquë chiminin nichaꞌëinpoaso marëꞌ,” itërahuë. Aꞌnaquën natanpachinara, tëhuapi. Naporinsopita chiminpachinaꞌ, parisitomiatapi. Canpoaso nipirinhuëꞌ noya natanëhuaꞌ. Nani Yosë anoyacancantërinpoaꞌ. Yosëíchin nanitaparin nichaꞌëinpoasoꞌ.

1 Corintios 1:18 ပူးပေါင်းရင်းမြစ်များ

Hechos 13:41

‘Yosëri itërin: “Canpitasoꞌ naꞌcon tëhuaconamaꞌ. Iso tahuëriꞌsaꞌ ca nohuanto, naꞌcon maꞌsha onpoaramaꞌ. Yonquirahuësoꞌ shaꞌhuitarinënquëmaꞌ. Natanapomarahuëꞌ, co natëtaramahuëꞌ. Napoaton paꞌyanatomaꞌ, yonquicoꞌ. Chiníquën anaꞌintaranquëmaꞌ niꞌton, taꞌhuantaramaꞌ,” tënin Yosë,’ itopi. Canpitantaꞌ niꞌcona inapochachin anaꞌintochinquëmaꞌ, tënin Paono, pënëntaton.

Hechos 17:18

Inaquë nisha nisha yonquipisoꞌ aꞌchinaꞌpiroꞌsantaꞌ huëꞌpi. Aꞌnaquën ipicorioroꞌsaꞌ itopi. Aꞌnaquëontaꞌ istoicoroꞌsaꞌ itopi. Paono quënanahuatonaꞌ, ninontopi. —Iso quëmapi paꞌpi nonaꞌpi. ¿Maꞌtaꞌ tëcapon naporin? itopi aꞌnaquën. —Ahuën. Nisha yosëroꞌsaꞌ imacaiso marëꞌ aꞌchinamara, topi aꞌnaquën. “Quisoso chiminin. Ina quëran nanpiantarin,” tëninso marëꞌ napotopi.

Hechos 17:32

“Ananpitaantarin,” tëninso marëꞌ, “Tëhuënchachin taꞌmaꞌ ananpitëca,” taꞌtonaꞌ, tëhuapi aꞌnaquën. Aꞌnaquënso nipirinhuëꞌ co tëhuapihuëꞌ. —Aꞌna tahuëri aꞌchintaantacoi, itopi.

Hechos 2:47

“Ma noyacha Yosëso paya,” tosapi. Yaꞌipi piyapiꞌsari noya niꞌpi. Nani tahuëriya aꞌnapitantaꞌ imasapi niꞌton, Yosëri anoyacancantërin. Ina nohuanton, inapitantaꞌ yaꞌconpi.

Romanos 1:16

Co casoꞌ tapanahuëꞌ Quisocristo nanamën aꞌchinaꞌhuaso marëꞌ. Piyapiꞌsaꞌ natëhuachinaꞌ, Yosëri anoyacancantarin. Inaíchin nanitaparin nichaꞌëinpoasoꞌ. Cotioroꞌsariꞌton natëhuachinaꞌ, anoyacancantarin. Iporasoꞌ nisha nisha piyapiꞌsantaꞌ anoyacancantarin. Napoaton paꞌyatërahuë nanamën shaꞌhuicaꞌhuasoꞌ.

1 Corintios 1:21

Ina nohuanton, piyapi inahuara yonquinëna quëran co nanitopihuëꞌ Yosë nohuitacaisoꞌ. Quisocristo chimininsoꞌ aꞌchinárai. Aꞌnaquënsoꞌ ina natanpachinara, tëhuapi. Canpoaso nipirinhuëꞌ natëhuatëhuaꞌ, anoyacancantërinpoaꞌ. Ina Yosë nohuantërin.

1 Corintios 15:2

Ina natëmiatohuatamaꞌ, Yosë nichaꞌësarinquëmaꞌ. Aꞌnaquënso nipirinhuëꞌ: “Imarahuë,” taponaraihuëꞌ, topinan quëran napopi. Co cancanëna quëran natëpihuëꞌ. Inapitasoꞌ co nichaꞌësarinhuëꞌ.

1 Corintios 2:14

Aꞌnaquënso nipirinhuëꞌ piyapi yonquirinsoráchin nitotatonaꞌ, co nohuantopihuëꞌ Yosë nanamën natanacaisoꞌ niꞌton, tëhuaconpi. Ispirito Santoráchin catahuarinpoaꞌ natëtacasoꞌ. Napoaton co imarinsopitasohuëꞌ natanaponaraihuëꞌ, co nanitopihuëꞌ noꞌtëquën yonquicaisoꞌ.

1 Corintios 2:2

Coꞌhuara paꞌshatërapohuëꞌ, yonquirahuë. “Quisocristo naporinsoáchin aꞌchinarahuë. Corosëquë oshanënpoa marëꞌ chimininsoꞌ aꞌchinchi,” taꞌto, inaíchin shaꞌhuitëranquëmaꞌ. Inasáchin imacamaso marëꞌ.

1 Corintios 3:19

Co imapisopitasohuëꞌ nani maꞌsha nitotaponaraihuëꞌ: “Co noꞌtëquën yonquipihuëꞌ,” tënin Yosë. Quiricanën quëran anitotërinpoaꞌ. “Naꞌcon nitotatonaꞌ, piyapiꞌsaꞌ nonpintopirinahuëꞌ, co nanitopihuëꞌ Yosësoꞌ nonpintacaisoꞌ. Inari naꞌcon naꞌcon nitotaton, minsëarin,” tënin.

1 Corintios 4:10

Quisocristo natëtoi, nanamën aꞌchinarai. Ina marëꞌ quiyasoꞌ tëhuarinacoi. Canpitaso nipirinhuëꞌ noya nitotonaꞌpiroꞌsa pochin nicatënënquëmaꞌ, co tëhuarinënquëmahuëꞌ. Quiyasoꞌ co chiníquën nanantëraihuëꞌ. Canpitaso nipirinhuëꞌ chiníquën nanantëramaꞌ. Piyapiꞌsaꞌ noya niꞌpirinënquëmahuëꞌ, quiyasoꞌ co noyahuëꞌ niꞌninacoi.

2 Corintios 10:4

Aꞌnaquënsoꞌ inimiconënpita minsëcaiso marëꞌ nisha nisha quihuípi. Quiyaso nipirinhuëꞌ co quiyaora yonquinëhuëi quëran minsëtaraihuëꞌ. Sacaiꞌ nipirinhuëꞌ, Yosë ananitërincoi nonpin nananoꞌsaꞌ minsëcaꞌhuaisoꞌ.

2 Corintios 4:3

Quisocristo nanamën noya aꞌchintopiraihuëꞌ, aꞌnaquën co yanatëtopihuëꞌ. Parisitopiquë pacacaiso nipisopita co nohuantopihuëꞌ natëtacaisoꞌ.

1 Tesalonicenses 1:5

Quisocristo nanamën aꞌchintohuatëinquëmara, co topinan quëran aꞌchintërainquëmahuëꞌ. Ispirito Santo chachin catahuarincoi aꞌchinaꞌhuaisoꞌ. Canpitantaꞌ catahuarinquëmaꞌ noya natanacamaso marëꞌ. “Noꞌtëquën nontërinpoaꞌ,” taꞌtomaꞌ, yaꞌipi cancanëma quëran natëramaꞌ. Ina nicatoi: “Tëhuënchachin Yosëri huëntonënquë ayaꞌconin,” tënai. Canpitataquë yaꞌhuapoi, noya imarai canpitantaꞌ noya imacamaso marëꞌ.

2 Tesalonicenses 2:10

Co noyahuëꞌ nicaton, naꞌa piyapiꞌsaꞌ nonpintarin. Co noꞌtën nanan nohuantopihuëꞌ niꞌton, Yosë inimiconën natëapi, parisitopiquë paꞌsapi huachi. Yosë nanamën nohuantopi naporini, chaꞌëitonahuëꞌ.

Hebreos 12:2

Quisocristo naꞌcon yonquiaꞌahuaꞌ. Inasáchin catahuarinpoaꞌ Yosë natëcasoꞌ. Naporahuaton, inasáchin catahuarinpoaꞌ noya noya natëtacasoꞌ. Isoroꞌpaquë oꞌmahuachina, chiníquën parisitërin. Corosëquë parisitohuachina, naꞌcon tëhuapirinahuëꞌ, co ina yonquirinhuëꞌ. “Chiminpato, piyapiꞌsaꞌ nichaꞌësarahuë,” taꞌton, nóya cancantërin. Ina quëran inápaquë panantarahuaton, Yosë inchinanën quëran chachin huënsëarin.

Hebreos 4:12

Yosë nanamën chiníquën nanantërin. Yosë nanpiárin niꞌton, ipora huantaꞌ quiricanën quëran nontarinpoaꞌ. Noya natëhuatëhuaꞌ, nanamën quëran chachin catahuarinpoaꞌ noya noya imacaso marëꞌ. Coꞌsoꞌ natëhuatëhuahuëꞌ, aquë aquëtëꞌ co noyahuëꞌ cancantarihuaꞌ. Sahuëni cato quëran chachin toꞌnahuatëra, inëshin niꞌton, niahuëpatëra, aꞌnaroáchin nansë acopoquë huarëꞌ nipëꞌsharëꞌ. Inapochachin Yosë nanamënsoꞌ chini chiníquën yaꞌcoancantërinpoaꞌ. Ina yonquihuatëhuaꞌ, noꞌtëquën nitotarihuaꞌ. Yaꞌipi yonquirëhuaso chachin anitotërinpoaꞌ. Yonquinënpoaquë maꞌmarësona naporëhuasopitantaꞌ anitotarinpoaꞌ.