1 Corintios 1:1 - Chayahuita (Shahui)

¹ Ca Paonoco ninshitaranquëmaꞌ. ¿Noya canpitantaꞌ yaꞌhuaramaꞌ? Cantaꞌ isëquë noya yaꞌhuarahuë. Yosë nohuanton, Quisocristo acorinco nanamën aꞌchinaꞌhuaso marëꞌ. Iya Sostinisëroꞌco nanan aꞌpatarainquëmaꞌ.

1 Corintios 1:1 ပူးပေါင်းရင်းမြစ်များ

Lucas 6:13

Tahuërihuachina, imarinsopita përarin. Huëꞌpachinara, shonca catoꞌ acorin naꞌcon naꞌcon aꞌchintacaso marëꞌ. “Aꞌchinacaso marëꞌ aꞌparahuësopita itaranquëmaꞌ,” itërin.

Juan 15:16

Co canpitaora nohuanton imaramacohuëꞌ. Ca nohuanto, imaramaco. Carinquëmaꞌ huayonanquëmaꞌ. Nani acoranquëma opa sëꞌpaquën naꞌcon nitërinso pochin nisápamaso marëꞌ. Inapohuatamaꞌ: ‘Quisoso nanan quëtërinco,’ taꞌtomaꞌ, Yosë nontocoꞌ catahuainquëmaꞌ. Ca pochin yonquiatomaꞌ, maꞌsona nipatamaꞌ, acochinquëmaꞌ.

Juan 20:21

—Sano cancantocoꞌ iyaroꞌsaꞌ. Tatahuë aꞌparincoso pochachin canpitantaꞌ aꞌpaaranquëmaꞌ piyapiꞌsaꞌ aꞌchintacamaso marëꞌ, itërincoi.

Hechos 1:15

Ina quëran naꞌa Quisoso imapisopita niyontonpi. Pasa cato shonca piyapiꞌsa pochin yaꞌhuëpi. Pitrori huancánachin huanirahuaton, itërin:

Hechos 1:2

Yaꞌipi inápaquë panantaquë huarëꞌ naporinsoꞌ ninshitëranquën noꞌtëquën nitotamaso marëꞌ. Iporasoꞌ naquëranchin ninshitantaranquën. Coꞌhuara Quisoso inápaquë pantayátëraponhuëꞌ, caꞌtanoꞌsanënpita huayoninsoꞌ shaꞌhuitërin paatonaꞌ aꞌchinacaiso marëꞌ. Ispirito Santo nohuanton, shaꞌhuitërin. Inapita napopisontaꞌ nitochin, taꞌto, ninshitantaranquën.

Hechos 18:17

Naꞌa piyapiꞌsari niꞌsapi. Niꞌsahuatonaꞌ, cotio niyontonpiso pëiꞌ huaꞌan mapi, Sostinisë itopisoꞌ. Masahuatonaꞌ, inaquë chachin ahuëpi. Carionori nicaponahuëꞌ, co mantaꞌ tëninhuëꞌ. Co ina yonquirinhuëꞌ.

Hechos 22:21

‘Ina nipirinhuëꞌ, paquëꞌ. Aquë yaaꞌparanquën nisha piyapiꞌsaꞌ aꞌchintamaso marëꞌ,’ itërinco. Napoaton nisha piyapiꞌsaꞌ aꞌchintarahuë,” tënin Paono.

Romanos 1:1

Ca Paonoco ninshitaranquëmaꞌ, niꞌcoꞌ. ¿Noyanquëmaꞌ canpitantaꞌ? Noya cantaꞌ yaꞌhuarahuë. Quisocristoíchin natërahuë. Ina acorinco paato nanamën aꞌchinaꞌhuaso marëꞌ. Yosë nohuanton, noya nanan aꞌchinárahuë.

Romanos 1:10

Yosë nontarahuë. “Noya catahuaquëꞌ,” itërahuë. Iráca quëran huarëꞌ nicapënquëmaꞌ yapaꞌpirahuëꞌ, co nanitërahuëꞌ. Ipora huantaꞌ pacaꞌhuasoꞌ yonquiarahuë. “Quëma nohuantohuatan, Sinioro, catahuaco onpopiontaꞌ paꞌi,” tënahuë, Yosë nontato.

Romanos 1:5

Ina nosoroatonco, acorinco nisha nisha piyapiꞌsaꞌ aꞌchintaꞌhuaso marëꞌ. Inapitantaꞌ nanamën natëcaiso marëꞌ pënënarahuë. Natëhuachinaꞌ, “Quisocristosoꞌ noya noya,” tosapi.

1 Corintios 15:9

Imapisopita aparisitërahuë niꞌton, co acoincosoꞌ yaꞌhuërinhuëꞌ, topirahuëꞌ. Paꞌpi co noyahuëꞌ cancantopirahuëꞌ, anoyacancantatonco, acorinco paato aꞌchinaꞌhuaso marëꞌ.

1 Corintios 3:9

Quiyasoꞌ Yosë aꞌparincoi ina marëꞌ sacataꞌhuaisoꞌ. Canpitaso nipirinhuëꞌ Yosë shaꞌtërinso pochin ninamaꞌ. Naporahuaton, Quisocristo imaramaꞌ niꞌton, Yosë pëinën pochin ninamaꞌ.

2 Corintios 1:1

Ca Paonoco ninshitantaranquëmaꞌ. ¿Noya canpitantaꞌ yaꞌhuaramaꞌ? Noya cantaꞌ yaꞌhuarahuë. Yosë nohuanton, Quisocristo acorinco nanamën aꞌchinaꞌhuaso marëꞌ. Iya Timotioroꞌco nanan aꞌpataranquëmaꞌ. Corintoquë yaꞌhuëramasopita ninshitaranquëmaꞌ. Yosë nohuanton, canpitantaꞌ huëntonënquë yaꞌconamaꞌ. Acaya parti nisha nisha ninanoroꞌsaquë imaramasopita yonquiatënquëmaꞌ, ninshitaranquëmaꞌ.

2 Corintios 11:5

“Quiyasoꞌ noya noyacoi,” itopirinënquëmahuëꞌ, inapitasoꞌ co ca quëran noya noyahuëꞌ, tënahuë.

2 Corintios 12:12

Iráca isoroꞌpaquë nipon, aꞌnaya aꞌnaya huayonaton, acorin nanamën aꞌchinacaiso marëꞌ. Inapitasoꞌ naꞌcon catahuarin. Ina nohuanton, caniaꞌpiroꞌsaꞌ aꞌnaroáchin anoyatopi. Nani maꞌsha nanitapapi. Inapopi quëran acorinsopita nohuitërëhuaꞌ. Cantaꞌ acorinco niꞌton, inapochachin catahuarinco. Canpitataquë yaꞌhuapo, caniaꞌpiroꞌsaꞌ aꞌnaroáchin anoyatërahuë. Aparisitopirinacohuëꞌ, ahuantato, aꞌchintëranquëmaꞌ. “Ma noyacha Yosëri catahuarin paya,” taꞌtomaꞌ, imaramaꞌ.

2 Corintios 8:5

Co coriqui quëtacasoachin yonquipihuëꞌ. Yaꞌipi cancanëna quëran Yosë imapi. Inaꞌton yonquipi. Ina pochin cancantacasoꞌ noya noya, tënahuë. Ina quëran coriqui, maꞌsha, inapita quëtopi. Quiyantaꞌ yanatërinacoi. “Maꞌsona Yosë nohuantohuachin, shaꞌhuitocoi natëꞌi,” itërinacoi.

Gálatas 1:1

Ca Paonoco ninshitaranquëmaꞌ, niꞌcoꞌ. ¿Noyanquëmaꞌ canpitantaꞌ? Noya cantaꞌ yaꞌhuarahuë. Quisocristo acorinco nanamën aꞌchinaꞌhuaso marëꞌ. Co piyapiꞌsaꞌ inahuara nohuanton aꞌparinacohuëꞌ aꞌchinaꞌhuaso marëꞌ. Co inapita acorinacohuëꞌ. Tata Yosë chachin acorinco. Ina nohuanton, Quisocristo nanpiantarin huachi. Nani nanpiantohuachina, ina chachin nanan quëtërinco aꞌchinaꞌhuaso marëꞌ.

Efesios 1:1

Ca Paonoco ninshitaranquëmaꞌ, niꞌcoꞌ. ¿Noyanquëmaꞌ canpitantaꞌ? Noya cantaꞌ yaꞌhuarahuë. Yosë nohuanton, Quisocristo acorinco nanamën aꞌchinaꞌhuaso marëꞌ. Canpitantaꞌ Quisocristo noya imaramaꞌ niꞌton, Yosë noya niꞌninquëmaꞌ. Ipisoquë yaꞌhuëramasopita ninshitaranquëmaꞌ.

Efesios 4:11

Naporahuaton, nisha nisha acorinpoaꞌ nicatahuacaso marëꞌ. Aꞌnaquën Quisocristori chachin aꞌparin aꞌchinacaso marëꞌ. Aꞌnaquëontaꞌ Ispirito Santo nohuanton, Yosë yonquirinso chachin shaꞌhuirin. Aꞌnaquëontaꞌ nisha nisha parti paaton, Yosë nanamën aꞌchinaꞌpiarin. Aꞌnaquëontaꞌ ina nohuanton, yaꞌhuëpiquë yaꞌhuëhuanoꞌsaꞌ nani tahuëri catahuapi noya imacaiso marëꞌ. Aꞌnaquëontaꞌ yaꞌipi Yosë nanamën aꞌchintapi.

Colosenses 1:1

Ca Paonoco ninshitaranquëmaꞌ, niꞌcoꞌ. ¿Noyanquëmaꞌ canpitantaꞌ? Noya cantaꞌ yaꞌhuarahuë. Yosë nohuanton, Quisocristo acorinco nanamën aꞌchinaꞌhuaso marëꞌ. Iya Timotioroꞌco nanan aꞌpatarainquëmaꞌ.

1 Timoteo 1:1

Ca Paonoco ninshitaranquën, niꞌquëꞌ. ¿Noya, yaꞌhuaran? Noya cantaꞌ yaꞌhuarahuë. Yosë nohuanton, Quisocristo acorinco nanamën aꞌchinaꞌhuaso marëꞌ. Yosë chachin anoyacancantërinpoaꞌ. Oshanënpoaꞌ inquitatonpoaꞌ, nichaꞌërinpoaꞌ. Quisocristo imatëhuaꞌ, ina ninarëhuaꞌ. Aꞌna tahuëri inápaquë quëpantarinpoaꞌ.

1 Timoteo 2:7

Ina nanan shaꞌhuicaꞌhuaso marëꞌ Yosë acorinco. Aꞌparinco nisha piyapiꞌsaꞌ aꞌchintaꞌhuaso marëꞌ. “Yosë noꞌtëquën nontërinpoaꞌ. Ina natëcoꞌ,” itërahuë. Tëhuënchachin noꞌtëquën nonahuë, co nonpinahuëꞌ.

2 Timoteo 1:1

Ca Paonoco ninshitaranquën. ¿Noya quëmantaꞌ yaꞌhuaran? Noya cantaꞌ isëquë yaꞌhuarahuë. Yosë nohuanton, Quisocristo acorinco nanamën aꞌchinaꞌhuaso marëꞌ. Quisocristo imapatëhuaꞌ, Yosë nohuitatëhuaꞌ, nanpimiatarihuaꞌ.